WINSTON po Pamela (Pam) Payne po to sinsẹ̀n to alahọ Australasie tọn mẹ. Yé duvivi gbẹzan ayajẹ tọn de tọn dopọ, amọ́ yé pehẹ avùnnukundiọsọmẹnu lẹ, taidi adàdidiọ sọgbe hẹ aṣa voovo lẹ po akọndidona awufiẹsa he ohò he gbledo asi lọ hẹnwa na yé po. Etomọṣo, to ninọmẹ ehe lẹpo mẹ, yé hẹn owanyi yetọn na Jehovah po omẹ etọn lẹ po go, podọ ayajẹ yetọn to lizọnyizọn lọ mẹ ma depò. To hokansemẹ ehe mẹ, mí basi oylọna yé nado má numimọ yetọn delẹ hẹ mí.

Winston, jaale dọna mí lehe a dín Jiwheyẹwhe mọ do.

N’yin pinplọn whẹ́n to whẹndo he ma yin sinsẹ̀nnọ de mẹ to lẹdo ogle tọn de mẹ to Queensland, to Australie. Na fie owhé mítọn te to olá wutu, n’ma nọ yawu wanu dopọ hẹ mẹdevo de hugan hagbẹ whẹndo ṣie tọn lẹ. N’jẹ Jiwheyẹwhe dín ji bẹsọn whenue n’do nudi owhe 12. N’hodẹ̀ hlan ẹn dọ ni gọalọna mi nado yọ́n nugbo lọ gando ewọ go. To nukọn mẹ, n’wá tọ́n sọn lẹdo lọ mẹ bo mọ azọ́n do Adélaïde, to Hùwaji Australie tọn. Whenue n’do owhe 21, n’dukosọ hẹ Pam whenue n’yì gbọjẹ to Sydney, podọ e dọhona mi gando sinsẹ̀n Anglo-Israélisme tọn go, he nọ dọ dọ Grande-Bretagne-nu lẹ wá sọn hẹnnu Islaeli tọn he danbú lẹ mẹ. Sinsẹ̀n lọ dọ dọ hẹnnu enẹlẹ wẹ hẹnnu ao ahọluduta agewaji tọn lọ he yì kanlinmọgbenu to owhe kanweko ṣinatọ̀ntọ J.W.M. Enẹwutu, to whenue n’lẹkọwa Adélaïde, n’fọ́n whẹho enẹ dote to azọ́nwatọgbẹ́ he ko to Biblu plọn hẹ Kunnudetọ Jehovah tọn lẹ de dè. Whenue n’dọho hẹ ẹ na gànhiho kleun de godo, titengbe gando nuyise Kunnudetọ lẹ tọn go, n’mọdọ odẹ̀ he n’hò to ovu whenu wẹ to hẹndi mọ. N’jẹ nuplọn ji gando Mẹdatọ ṣie po Ahọluduta etọn po go! N’ko mọ “peali he họakuẹ tlala” lọ.—Mat. 13:45, 46.

Pam, sọn jọja whenu wẹ hiẹ lọsu jẹ peali enẹ dín ji. Nawẹ a wagbọn do mọ ẹn?

N’whẹ́n to whẹndo he yin sinsẹ̀nnọ de mẹ to tòpẹvi Coffs Harbour tọn mẹ to Nouvelle-Galles du Sud. Mẹjitọ ṣie lẹ po mẹjitọ daho ṣie lẹ po kẹalọyi nuplọnmẹ sinsẹ̀n Anglo-Israélisme tọn lẹ. Sọn ovu gbọ́n wẹ yẹn, nọvisunnu ṣie pẹvi, mẹdaho ṣie yọnnu po nafẹ-vi mítọn susu po yin pinplọn dọ mẹhe tọgbo yetọn yin Grande-Bretagne-nu lẹ wẹ Jiwheyẹwhe nọ  do nukundagbe hia. Ṣigba, n’ma kọngbedopọ hẹ nuyise enẹlẹ podọ n’ma mọ pekọ to gbigbọ-liho. Whenue n’do owhe 14, n’yì ṣọṣi lẹdo lọ tọn voovo lẹ, yèdọ Ṣọṣi Anglicane, Baptiste po Adventistes du septième jour po tọn. Ṣogan, ninọmẹ ṣie ma diọ to gbigbọ-liho.

To nukọn mẹ, whẹndo ṣie sẹtẹn yì Sydney, fie n’dukosọna Winston te, mẹhe wá gbọjẹ to finẹ. Dile e ko dọ do, hodọdopọ mítọn lẹ do sinsẹ̀n ji zọ́n bọ e wá jẹ nuplọn hẹ Kunnudetọ lẹ ji to godo mẹ. Bẹsọn whenẹnu, wekanhlanmẹ he e nọ dohlan mi lẹ nọ bẹ wefọ susu hẹn! Nado dọ hójọhó, to tintan whenu, n’hanú, bo tlẹ sọ gblehomẹ. Amọ́ vudevude, n’wá mọdọ nugbo lọ wẹ.

To 1962, n’sẹtẹn wá Adélaïde nado sẹpọ Winston dogọ. E bayi tito na ma do nọ Thomas po Janice Sloman po pá, yèdọ asu po asi po Kunnudetọ de he sẹ̀n wayi taidi mẹdehlan to Papouasie-Nouvelle-Guinée. Yé do homẹdagbe ayidego tọn hia mi; owhe 18 janwẹ n’tindo, podọ yé gọalọna mi taun to gbigbọ-liho. Enẹwutu, yẹnlọsu jẹ Ohó Jiwheyẹwhe tọn plọn ji, podọ e madẹn bọ e họnwun na mi dọ n’ko mọ nugbo lọ. Tlolo he yẹn po Winston po wlealọ godo, mí bẹ gbẹzan he doale hugan de jẹeji to sinsẹ̀nzọn Jehovah tọn mẹ, yèdọ gbẹzan de he zọ́n bọ mí yọ́n pinpẹn peali dagbedagbe he mí mọ lọ tọn dogọ, mahopọnna whlepọn lẹ.

Winston, dọhona mí gando owhe tintan he a yizan to sinsẹ̀nzọn Jehovah tọn mẹ lẹ go.

A. Yẹdide otò tọn he do fie mí gbọn to azọ́n lẹdo tọn mẹ lẹ hia

B. Posu-wema lopo delẹ tọn. To dai, Kiribati po Tuvalu po nọ yin yiylọdọ Lopo Gilbert tọn po Lopo Ellice tọn po

C. Lopo whanpẹnọ Funafuti tọn to Tuvalu, he nọ gọ́ na aṣápán susu. Dopo to lopo susu he mí dlapọn whẹpo mẹdehlan lẹ do yin didohlan finẹ lẹ mẹ

Ojlẹ kleun de to alọwle yẹn po Pam po tọn godo, Jehovah hùn tintan to “ohọ̀n daho” he nọ planmẹ jẹ nuwiwa susu kọ̀n lọ lẹ mẹ na mí. (1 Kọl. 16:9) Mẹmẹsunnu Jack Porter, he yin nugopọntọ lẹdo tọn bo nọ dla agun pẹvi he mẹ mí nọ wayi pọ́n wẹ dọ̀n ayiha mítọn wá ohọ̀n tintan lọ ji. (Todin yẹn po e po to sinsẹ̀n dopọ taidi hagbẹ Wedegbẹ́ Alahọ Australasie tọn lẹ.) Jack po asi ẹ Roslyn po wẹ na mí tuli nado yin gbehosọnalitọ whepoponu tọn, lẹblanulọkẹyi de he sin vivi mí dù na owhe atọ́n. Whenue n’do owhe 29, e yin bibiọ to yẹn po Pam po si nado sẹ̀n taidi nugopọntọ lẹdo tọn to Lopo Hùwaji Pacifique tọn lẹ ji, fie alahọ Fidji tọn to anadena to ojlẹ lọ mẹ. Lopo lọ lẹ wẹ Samoa Américaines, Samoa, Kiribati, Nauru, Niue, Tokelau, Tonga, Tuvalu, gọna Vanuatu.

To ojlẹ enẹlẹ mẹ, mẹhe nọ nọ̀ delẹ to lopo he to olá taun lẹ mẹ ji lẹ nọ vẹnudo Kunnudetọ Jehovah tọn lẹ, enẹwutu mí dona yin zinzintọ bosọ nọ wà dẹẹdẹ. (Mat. 10:16) Agun lọ lẹ nọ bẹ omẹ kleun de hẹn, bọ delẹ to agun lọ lẹ mẹ ma nọ penugo nado mọ adọtẹn na mí. Enẹwutu, mí nọ kanse mẹhe to gbétatò lọ mẹ lẹ eyin yé gán mọ adọtẹn na mí, podọ yé nọ jọmẹ hẹ mí to whepoponu.

Winston, mí yọnẹn dọ a tindo ojlo taun to azọ́n lẹdogbedevomẹ tọn mẹ. Etẹwẹ hẹn we tindo ojlo enẹ?

Anadidena wehọmẹ mẹho lẹ tọn de to Samoa

To ojlẹ lọ mẹ, alọnuwe pẹvi po alọnuwe apòmẹ tọn lẹ po vude poun wẹ mẹmẹsunnu he to lopo Tonga tọn ji lẹ tindo to Tonga-gbè mẹ, yèdọ ogbè Polynésie tọn de. To lizọnyizọn lọ mẹ, owe oplọn tọn lọ Nugbo he Nọ Planmẹ Sọyi Ogbẹ̀ Mavọmavọ Mẹ, Glẹnsigbe tọn wẹ yé nọ yizan. Enẹwutu, to wehọmẹ mẹho lẹ tọn de whenu he yin bibasi na osẹ ẹnẹ, mẹho agun tọn lẹdo lọ tọn atọ̀n he ma sè Glẹnsigbe sọmọ delẹ yigbe nado lilẹ́ owe Nugbo lọ do Tonga-gbè mẹ. Pam yí maṣinu do basi kandai owe lọ tọn bọ mí do e hlan alahọ États-Unis tọn mẹ nado yin zinzinjẹgbonu. Nudi osẹ ṣinatọ̀n wẹ azọ́n lọ blebu yí to mí si. Dile etlẹ yindọ nudelẹ jẹdò to lẹdogbedevomẹ lọ mẹ, owe lọ gọalọna Tonga-gbè dotọ susu nado plọn nugbo lọ. Yẹn po Pam po ma yin lẹdogbedevomẹtọ, amọ́ numimọ enẹ whàn mí nado tindo ojlo nujọnu tọn na azọ́n ehe.

Pam, nawẹ a mọ gbẹninọ to lopo lẹ ji do, yijlẹdo gbẹninọ to Australie go?

Dopo to adọtẹn mítọn lẹ mẹ to azọ́n lẹdo tọn mẹ

E gbọnvo pete! To fidelẹ, omú nọ dù taun, to fidevo lẹ mí nọ pehẹ yozò po fifá po, ajaka lẹ, awutu, gọna núdùdù whèdomẹ to whedelẹnu. To alọ devo mẹ, to vivọnu azán dopodopo tọn, awuvivinu wẹ e nọ yin nado to ohù lọ  pọnhlan sọn fale mítọn mẹ, enẹ wẹ yinkọ he Samoa-nu lẹ do na ohọ̀ Polynésie tọn de he yè nọ yí osẹ̀ do gbá, bo ma nọ do adó lẹdo. Eyin osun dì to zánmẹ, yè nọ mọ agọ̀nkẹ-tin lẹ hlan bọ hinhọ́n sọ nọ tá do ohù lọ ji. Mí nọ yin whinwhàn to ojlẹ họakuẹ enẹlẹ mẹ nado lẹnayihamẹpọn bo hodẹ̀, ehe nọ de ayiha mítọn sọn linlẹn agọ̀ lẹ ji wá dagbe lẹ ji.

Mí wá yiwanna yọpọvu lẹ, na yé nọ do nukiko namẹ bosọ nọ to tlintlindo dín eyin yé mọ míwu jonọ yovo lẹ. Whenue mí to lẹdo Niue tọn dlapọn, yọpọ sunnu de dọ̀n alọ gbọn ofún he to awà Winston tọn lẹ dopo go bo dọ dọ, “N’yiwanna ohẹ̀-fún towe lẹ taun.” E họnwun dọ e ma ko mọ ofún sù to awà go na mẹde domọ pọ́n, podọ e ma yọ́n lehe e na basi zẹẹmẹ etọn do!

E nọ biọlanmẹna mí eyin mí mọ ohẹ́n he mẹ suhugan omẹ lọ lẹ tọn te. Lẹdo yetọn yọnwhanpẹ taun, amọ́ yé ma do nukunpedomẹgo dotowhé tọn dagbe de po osin-jọ-sin po. Etomọṣo, e taidi dọ mẹmẹsunnu mítọn lẹ ma tlẹ nọ hanú. Gbẹzan he yé jẹakọ hẹ niyẹn. Homẹ yetọn nọ hùn dọ yé topọ hẹ hagbẹ whẹndo tọn yetọn lẹ, dọ yé tindo nọtẹn sinsẹ̀n-bibasi tọn de, podọ dọ yé tindo lẹblanulọkẹyi lọ nado nọ pà Jehovah. Apajlẹ yetọn gọalọna mí nado ze ayiha do nuhe yin nujọnu hugan lẹ ji bo hẹn gbẹzan mítọn bọawu.

Pam, to ojlẹ de mẹ, e wá biọ dọ hiẹ ni dà osin bosọ dànú to ninọmẹ he gbọnvo pete mẹ. Nawẹ a bayi do?

To Tonga, Pam to avọ̀ mítọn lẹ yàn

Baba ṣie wẹ n’na dọnudo. E plọn mi nususu he yọ́n-na-yizan, taidi lehe n’gán flọ miyọ́n bo dànú to kọho ji do, podọ lehe n’gán nọ dowéna onú kleun he to mí si do. To dlapọn dopo whenu yì Kiribati, mí nọ sẹhọ̀ pẹvi de mẹ, ehe yè whè apàlùntin lẹ lẹdo bo yí aṣápán lẹ do tẹ́ kọmẹ lọ. Nado dà núdùdù kleun de, n’kùn odò do bayi adò de bo bẹ agọ̀nkẹ-pà lẹ do e mẹ nado flọ miyọ́n. Nado dà osin, n’nọ tò to pọmẹ hẹ yọnnu lẹdo lọ tọn lẹ to dotọ̀ de tó. Yé nọ yí opò he dite na nudi mẹtlu awe nkọ de zan, bo nọ sìn okàn tlẹ́lẹ de do onù na ẹn, bọ e nọ taidi omlẹn-pò. Amọ́ sindàpanu de wẹ yé nọ sìn denù kakati ni yin omlẹn. Debọdo-dego, yọnnu lọ lẹ nọ do sindàpanu yetọn otọ̀, bo nọ lilẹ́ alọ yetọn to aliho de mẹ to ojlẹ sisọ mẹ. Sindàpanu lọ nọ lẹ́ adà bo nọ yí osin. N’lẹndọ onú vlẹkẹsẹ de wẹ—kakajẹ whenue e wá jẹ ji e. N’do sindàpanu ṣie otọ̀ whlasusu, amọ́ e nọ jẹ dotọ̀ lọ mẹ bo nọ gbọṣi osin nukunmẹ! Whenue yemẹpo ko konu fó godo, dopo to yọnnu lọ lẹ mẹ gọalọna mi. Whelẹponu wẹ yé nọ gọalọnamẹ bosọ nọ jọmẹ.

Mì omẹ awe lẹ wá yiwanna azọ́ndenamẹ mìtọn to lopo lọ lẹ ji. Be mì gán má numimọ titengbe delẹ hẹ mí ya?

Winston: E nọ yí whenu vude nado jẹakọ hẹ aṣa delẹ. Di apajlẹ, eyin mẹmẹsunnu lẹ wleawu núdùdù tọn na mí, yé nọ saba ze nuhe to yé si lẹpo donukọnna mí. To tintan whenu, mí ma yọnẹn dọ mí dona nọ pò nude dai na yé. Enẹwutu, mí nọ dù nue yé zedonukọnna mí lẹpo! Na nugbo tọn, whenue mí wá mọnukunnujẹ lehe nulẹ nọ yì do mẹ, mí nọ dù núdùdù lọ pò na yé. Mahopọnna nuhe mí ṣiwà to mayọnẹn mẹ enẹlẹ, mẹmẹsunnu lọ lẹ mọnukunnujẹ mí go. Podọ homẹ yetọn nọ hùn taun nado vọ́ mí mọ to osun ṣidopo-ṣidopo godo eyin mí dla yé pọ́n to azọ́n lẹdo tọn mẹ. Gbọnvona mẹmẹsunnu lẹdo lọ tọn lẹ, míwlẹ kẹdẹ wẹ yin Kunnudetọ devo he yé nọ mọ to ojlẹ lọ mẹ.

Anadidena pipli de yì kunnudegbe to Lopo Niue tọn ji

Dlapọn mítọn lẹ sọ nọ yin kunnudide dagbe de na mẹhe to lẹdo lọ mẹ lẹ. Mẹsusu to gbétatò lọ mẹ nọ lẹndọ mẹmẹsunnu lọ lẹ lọsu wẹ fọ́n poun bo do sinsẹ̀n yetọn ai. Enẹwutu, eyin yé mọ bọ lizọnyizọnwatọ de po asi etọn po wá sọn tògodo nado dla mẹmẹsunnu lẹ pọ́n, e nọ paṣa yé, bosọ nọ jiawu na yé taun.

Pam: Dopo to numimọ he n’yiwanna hugan lẹ mẹ wẹ dehe n’tindo to Kiribati, fie agun de tin te he bẹ mẹmẹsunnu po mẹmẹyọnnu kleun delẹ po hẹn. Mẹho agun tọn dopo gee he to finẹ bo nọ yin Itinikai Matera nọ wà nuhe go e pé lẹpo nado penukundo mí go. E wá mí dè to gbèdopo bo hẹn ohà de he mẹ azìn dopo gee te. E dọmọ: “Mìtọn wẹ.” Mí ma nọ yawu mọ  koklozìn to whenẹnu. Nuyiwa alọtútlú tọn kleun enẹ yinuwado mí ji taun.

Pam, to owhe delẹ godo, ovi kúdo we whenue ohò gbledo we. Etẹwẹ gọalọna we nado doakọnna?

N’mọhò to 1973, whenue yẹn po Winston po to Hùwaji Pacifique tọn. Mí de nado lẹkọyi Australie, fie ovi lọ kúdo mí te to osun ẹnẹ godo. E yinuwado Winston ji taun na ovi etọn wẹ ga. Awufiẹsa he to ahun ṣie mẹ wá depò dile ojlẹ to yìyì, amọ́ e ma busẹ petepete kakajẹ whenue mí mọ Atọ̀họ̀-Nuhihọ́ lọ Tọn 15 avril 2009 tọn yí. “Kanbiọ lẹ sọn Wehiatọ lẹ Dè” he to e mẹ bẹ kanbiọ de hẹn dọ: “Be todido depope tin dọ ovi he kúdo homẹ na onọ̀ etọn de na yin finfọnsọnku ya?” Hosọ lọ vọ́ jide na mí dọ whẹho lọ to alọ Jehovah tọn mẹ, mẹhe nọ wà nuhe sọgbe to whepoponu. Ewọ na hẹn kọgbọ wá na mí sọn awugble susu he aihọn ylankan ehe ko hẹnwa lẹ si, to whenue e na gbọn owanyi dali deazọ́nna Visunnu etọn nado ‘gbà azọ́n Satani tọn lẹ.’ (1 Joh. 3:8) Hosọ lọ sọ gọalọna mí taidi omẹ Jehovah tọn lẹ, nado yọ́n pinpẹn “peali” họakuẹ he mí tindo lọ tọn dogọ! N’ma tlẹ gán dọ lehe ogbẹ̀ mítọn na ko te do matin todido Ahọluduta lọ tọn!

To whenue ovi mítọn kú, mí sọ vọ́ sinsẹ̀nzọn whenu-gigọ́ tọn bẹjẹeji. Mí sẹ̀n na osun delẹ to Bẹtẹli Australie tọn, podọ to nukọn mẹ mí gọ̀ azọ́n lẹdo tọn bẹ. To 1981, whenue mí ko sẹ̀n na owhe ẹnẹ to glètoho Nouvelle-Galles du Sud tọn mẹ podọ to Sydney godo, mí yin oylọ-basina wá alahọ Australie tọn mẹ, dile e nọ yin yiylọdọ to whenẹnu, fie mí gbẹ́ pò te kakajẹ din.

Winston, be numimọ he a tindo to Lopo Hùwaji Pacifique tọn ji lẹ gọalọna we to azọ́n towe mẹ taidi hagbẹ Wedegbẹ́ Alahọ Australasie tọn de ya?

Mọwẹ, to aliho susu mẹ. Tintan, e yin bibiọ to Australie si nado penukundo Samoa Américaines po Samoa po go. Enẹgodo, alahọ Nouvelle-Zélande tọn yin kinkọndopọ hẹ Australie tọn. Todin, aigba-denamẹ alahọ Australasie tọn bẹ Samoa Américaines po Samoa po, Lopo Cook tọn lẹ, Nouvelle-Zélande, Niue, Timor-Leste, Tokelau, po Tonga po hẹn, podọ n’ko tindo lẹblanulọkẹyi nado dla susu to yé mẹ pọ́n taidi afọzedaitọ alahọ tọn. Azọ́nwiwa dopọ hẹ mẹmẹsunnu po mẹmẹyọnnu nugbonọ enẹlẹ po to lopo lẹ ji ko gọalọna mi taun todin he n’to devizọnwa na yé sọn alahọ mẹ.

Winston po Pam po to alahọ Australasie tọn mẹ

Nado dotana, n’gán dọ sọn numimọ mítọn titi mẹ dọ e ko họnwun na yẹn po Pam po sọn ojlẹ dindẹn die, dọ e ma yin mẹhe ko whẹ́n mẹho lẹ kẹdẹ wẹ nọ dín Jiwheyẹwhe. Jọja lẹ lọsu nọ tindo ojlo to “peali he họakuẹ tlala” lọ mẹ—eyin hagbẹ whẹndo tọn devo lẹ ma tlẹ do ojlo hia. (2 Ahọ. 5:2, 3; 2 Otàn. 34:1-3) Na nugbo tọn, Jehovah yin Jiwheyẹwhe owanyinọ de he nọ jlo dọ mẹlẹpo, yèdọ jọja po mẹho po ni mọ ogbẹ̀!

Whenue yẹn po Pam po jẹ Jiwheyẹwhe dín ji to nudi owhe 50 linlán die, mí ma yọnẹn paali dọ enẹ na wá dekọtọn do dona susu mẹ. Matin ayihaawe, peali akuẹgegenu tọn de wẹ nugbo Ahọluduta lọ tọn yin! Mí ko magbe nado tẹdo peali he họakuẹ enẹ go gbanun-gbanun!