Weyọnẹntọ delẹ dọ dọ awubla bẹ adà voovo delẹ hẹn, etomọṣo aliho he mẹ mẹdopodopo nọ blawu te nọ gbọnvo. Be ehe zẹẹmẹdo dọ mẹhe ma nọ blawu sọmọ lẹ ma yiwanna mẹvivẹ yetọn ganji kavi to nuyiwa taidi dọ adán de ma gbò yé nkọ wẹ ya? E ma yinmọ dandan. Dile etlẹ yindọ jọwamọnu wẹ e yin nado blawu bọ e gán sọ wà dagbe namẹ, aliho tangan de ma tin nado blawu. Aṣa, jijọ, nue mẹde ko pehẹ to gbẹ̀mẹ, gọna lehe mẹvivẹ lọ kú gbọn wẹ nọ saba yinuwado aliho he mẹ yè nọ blawu te ji.

OBÁ TẸ MẸ WẸ E NA SINYẸN JẸ?

Mẹhe ṣiọ kú do lẹ gán nọma yọ́n nue yé na donukun to okú mẹvivẹ yetọn tọn godo. Amọ́, nudelẹ tin he nọ dotukla mẹlẹ to paa mẹ he yè gán donukun. Delẹ to yé mẹ die:

Awubla zẹjlẹgo. Mẹsusu wẹ nọ viavi, do ojlo sinsinyẹn nado gọ̀ mẹhe kú lọ mọ, podọ awufiẹsa mẹlọ tọn gán depò todin bo diọ to ojlẹ kleun de godo. Nudelẹ finflin po odlọ delẹ kúkú gando mẹlọ go po gán vọ́ fọ́n awubla dote. Tlolo whẹ́, e gán vẹna we taun bọ a tlẹ sọgan lẹndọ e ma gán yin nugbo. Tiina dọ lehe e yinuwa do to whenue asu etọn Timo kú to ajiji mẹ. E dọmọ: “Tlolo whẹ́, n’ma gán yise. N’ma tlẹ gán viavi. Awufiẹsa lọ sinyẹn sọmọ bọ whedelẹnu, n’ma tlẹ gán gbọ. Odlọ wẹ e di na mi.”

Mẹsusu nọ dibu, duadi bo nọ dowhẹ yede sọn ojlẹ de mẹ jẹ devo mẹ. Ivan dọmọ: “Whenue visunnu mítọn Eric he do owhe 24 kú, yẹn po asi ṣie, Yolanda, po duadi taun na ojlẹ de! E paṣa mílọsu, na e ma yin jijọ mítọn dai nado nọ duadi. Mí sọ nọ dowhẹ míde, na mí nọ lẹndọ visunnu mítọn ma na ko kú eyin mí ko dogán hú lehe mí wà do.” Alejandro, mẹhe azọ̀n jẹmagbọ de hù asi etọn, lọsu dowhẹ ede. E dọ dọ: “To bẹjẹeji, n’nọ lẹndọ mẹylankan de wẹ n’yin wẹ zọ́n bọ Jiwheyẹwhe dike bọ adán ehe do gbò mi. Ehe sọ zọ́n bọ n’nọ dowhẹ dee, na n’nọ mọdọ n’to whẹgbledo Jiwheyẹwhe.” Na nuhe dù Kostas he go mí donù to hosọ he wayi mẹ, e dọmọ: “To ojlẹ delẹ mẹ, n’tlẹ nọ dowhẹ Sophia dọ e kú. Podọ n’sọ nọ wá dowhẹ dee na enẹ. E ma saa yin whẹ̀ etọn.”

Linlẹn he ma sọgbe lẹ. To ojlẹ delẹ mẹ, nulẹnpọn mẹhe ṣiọ kú do lọ tọn lẹ gán nọma sọgbe kavi tlẹ zẹ̀pá. Di apajlẹ, mẹlọ gán nọ lẹndọ emi nọ sè ogbè mẹhe kú lọ tọn kavi mọ ẹn. Kavi e gán nọ vẹawuna ẹn nado nọ ze ayiha do fidopo kavi nado nọ flinnu. Tiina dọmọ: “N’gán to hodọ hẹ mẹde to whedelẹnu bo nọ wá mọdọ ayiha ṣie ma to finẹ! Nue jọ jẹnukọnna okú Timo tọn lẹ ji wẹ ayiha ṣie nọ to yìyì whẹwhẹ. E nọ dotukla mi taun dọ ma nọ penugo nado ze ayiha ṣie do nuhe ji yè to hodọna mi do.”

Ojlo lọ nado nọ mẹdeṣo. Mẹhe ṣiọ kú gán nọ yawu gblehomẹ kavi nọma voawu to whenue e topọ hẹ mẹdevo lẹ. Kostas dọmọ: “N’nọ mọ dee di gbẹ́gọ́nu de eyin n’topọ hẹ asu po asi po lẹ. Mọ n’masọ nọ mọ otẹn ṣie to tlẹnnọ lẹ ṣẹnṣẹn.” Asi Ivan tọn Yolanda, dọmọ: “E ma nọ yọ́nsè na mí eyin mẹhe mí topọ hẹ lẹ to lewu gando nuhahun he mílẹ mọdọ e ma sọ̀ mítọn lẹ go kavi eyin mẹdevo lẹ to hodọna mí gando lehe ovi yetọn lẹ to dagbe wà do go! N’nọ jaya hẹ yé ṣá, amọ́ e ma nọ bọawuna mi nado dotoaina yé. Yẹn po asu ṣie po yọnẹn dọ nulẹpo ma ko fó do finẹ, amọ́ nulọ wẹ yindọ e vẹawuna mí nado doakọnna.”

Manọna. Núdùdù ma nọ jlomẹ, yè nọ húgo, podọ yè nọ ba amlọn pò. Aaron flin nue jọ dego to owhe he bọdo okú otọ́ etọn tọn go mẹ dọmọ: “Amlọn nọ gbẹ́ mi. N’nọ yín fọ́n to ogàn dopolọ mẹ to zánmẹ bo nọ to okú baba ṣie tọn flin.”

 Alejandro nọ mọdọ emi to azọ̀njẹ, amọ́ e ma yọ́n azọ̀n he jẹ e te taun. E dọmọ: “Whlasusu wẹ n’yì dotowhé bọ doto dọna mi dọ nude ma to wiwà mi. N’wá mọdọ awubla wẹ yin nuhahun lọ.” Ninọmẹ Alejandro tọn wá pọnte to nukọn mẹ. Amọ́, nuyọnẹnnu wẹ dọ e yì dotowhé. Awubla gán zọ́n bọ mẹde na yawu bẹ azọ̀n, kavi e gán hẹn azọ̀n de sinyẹn deji kavi fọ́n azọ́n devo pete dote.

E gán vẹawu nado wà nuhe tlẹ yin dandan lẹ. Ivan flindọ: “To okú Eric tọn godo, mí dona dọho hẹ hẹnnumẹ, họntọn po mẹyinyọnẹn devo lẹ po, gọna ogán etọn, whétọ etọn po mọmọ po. Gbọnvona enẹ, mí dona họ̀nwezun kandai-wema he osẹ́n biọ delẹ tọn. Podọ, mí dona keje nuhe Eric tindo lẹ mẹ pọ́n. Ehe lẹpo go wẹ mí dona penukundo mahopọnna dọ mí ko jẹflumẹ bọ agbọ́ ko pé mí pete.”

Na mẹdevo lẹ, nukọn mẹ wẹ ninọmẹ lọ nọ wá kàn dẹpẹ biọ te, whenue e wá biọ dọ yé ni wà azọ́n de he mẹhe kú lọ wẹ nọ wà dai. Nuhe jọ do Tiina go niyẹn. E basi zẹẹmẹ dọ: “Timo wẹ ko nọ penukundo nue gando akuẹzinzan mítọn lẹpo go kakajẹ dehe to banki lẹ ji. Amọ́ todin, ehe lẹpo wẹ jẹ kọ̀ji na mi, bọ ehe yidogọna flumẹjijẹ ṣie. Be n’gán penukundo ehe lẹpo go ganji ya?”

Onú ehe lẹpo wẹ gán zọ́n bọ e nọ vẹawu nado doakọnna awufiẹsa he okú mẹvivẹ de tọn nọ hẹnwa. Nugbo wẹ dọ e nọ vẹawu taun, amọ́ onú ehelẹ yinyọnẹn jẹnukọn gán gọalọna mẹhe ṣiọ kú do nado doakọnnanu. Sọ flindọ mẹlẹpo ma nọ jugbọn ninọmẹ voovo he mí slẹ to aga lọ lẹpo mẹ. Podọ, yinyọnẹn dọ jọwamọnu wẹ e yin nado nọ tindo linlẹn he ma sọgbe delẹ sọgan miọnhomẹna mẹhe mẹvivẹ yetọn kú lẹ.

BE N’NA GBẸ́ WÁ DO AYAJẸ GBÈDOPO YA?

Nue a gán donukun: Awufiẹsa lọ ma nọ nọ̀ aimẹ kaka sọyi; e nọ wá depò. Ehe ma zẹẹmẹdo dọ awufiẹsa lọ nọ yì pete kavi dọ yè nọ wá wọn mẹvivẹ mẹtọn gba. Amọ́ dile ojlẹ to yìyì, e masọ nọ wá sinyẹn sọmọ ba. Awubla lọ sọgan nọ gọwá to ajiji mẹ eyin yè flin nudelẹ, titengbe to azán he jẹ do alọwle-zan mẹlọ tọn ji kavi gbeegbe mẹlọ kú. Amọ́, mẹsusu wẹ nọ wá duto e ji bo nọ zindonukọn to nuwiwa yetọn lẹ mẹ dile e jẹ do. E nọ bọawu, titengbe eyin hẹnnumẹ kavi họntọn lẹ gọalọna mẹlọ bọ ewọ lọsu dovivẹnu nado duto ninọmẹ lọ ji.

Nawẹ awubla lọ na dẹnsọ? Awufiẹsa mẹdelẹ tọn gán depò taun to osun delẹ godo. Amọ́ na mẹsusu, e gán biọ owhe dopo kavi awe whẹpo yé nado mọ yede mẹ. Podọ mẹdevo lẹ tọn tlẹ gán dẹn humọ. * Alejandro dọmọ: “N’nọ awufiẹsa sinsinyẹn mẹ na nudi owhe atọ̀n.”

Ma nọ donukun nususu sọn dewe si blo. Nọ dọ azán dopodopo tọn, nọ wà nulẹ sọgbe hẹ nugopipe towe, bo yọnẹn dọ awufiẹsa lọ ma na nọ aimẹ kaka sọyi. Amọ́, be nudelẹ tin he a gán wà nado de awufiẹsa towe pò todin, kavi bọ e ma na dẹn to aimẹ zẹjlẹgo ya?

Jọwamọnu wẹ e yin nado nọ tindo linlẹn he ma sọgbe delẹ

^ huk. 17 Omẹ ṣinṣinyan delẹ tin he awufiẹsa yetọn nọ sinyẹn taun bosọ nọ nọ̀ aimẹ dẹn sọmọ bọ e nọ wá taidi azọ̀n de na yé. E gán biọ dọ omẹ enẹlẹ ni yì dotowhé.