GBẸTỌVI LẸ DO HUDO OWANYI TỌN TAUN. Alọwle, whẹndo, kavi họntọnjiji depope ma sọgan tindo kọdetọn dagbe matin owanyi. Enẹwutu wẹ owanyi do yin nujọnu na dagbemẹninọ apọ̀nmẹ tọn podọ na ayajẹ. Amọ́, etẹwẹ “owanyi” zẹẹmẹdo taun?

Dile etlẹ yindọ owanyi to sunnu po yọnnu po ṣẹnṣẹn yin nujọnu, e ma yin enẹ hodọ wẹ mí te. Kakatimọ, owanyi he yiaga humọ de wẹ, he nọ zọ́n bọ mẹde nọ do ojlo nujọnu tọn hia to dagbemẹninọ mẹdevo lẹ tọn mẹ, bo tlẹ nọ ze dagbe yetọn donukọnna edetiti tọn. Owanyi ehe nọ yin anadena gbọn nunọwhinnusẹ́n he wá sọn Jiwheyẹwhe dè lẹ dali, amọ́ e ma nọ nọma bẹ mẹtọnhopọn po numọtolanmẹ po hẹn.

Zẹẹmẹ owanyi tọn yin bibasi to aliho dagbe mẹ dọmọ: “Owanyi nọ fahomẹ bo nọ yin homẹdagbenọ. Owanyi ma nọ whànwu. E ma nọ ze ede daga, ma nọ kla, ma nọ wanu jẹagọ, ma nọ dín ale edetiti tọn lẹ, ma nọ gblehomẹ aplà. E ma nọ basi kandai nuṣiwa tọn. E ma nọ jaya to mawadodo mẹ, ṣigba nọ jaya to nugbo mẹ. E nọ ṣinyọnnudo nulẹpo, . . . nọ do todido to nulẹpo mẹ, nọ doakọnna nulẹpo. Owanyi ma nọ gboawupo gbede.”—1 Kọlintinu lẹ 13:4-8.

Owanyi mọnkọtọn “ma nọ gboawupo gbede” to linlẹn lọ mẹ dọ e ma nọ doalọte. Kakatimọ, e nọ to sinsinyẹn deji dile ojlẹ to yìyì. Podọ na e nọ fahomẹ, yin homẹdagbenọ bo nọ jonamẹ wutu, e yin “gẹdẹ he nọ kọ̀n gbẹtọ lẹ dopọ to aliho pipé de mẹ.” (Kolosinu lẹ 3:14) Enẹwutu, kanṣiṣa he mẹ owanyi mọnkọtọn tin te lẹ nọ tindo hihọ́ po ayajẹ po, mahopọnna  dọ mapenọ lẹ wẹ e bẹhẹn. Di apajlẹ, mí ni gbadopọnna kọndopọ alọwle tọn.

“GẸDẸ HE NỌ KỌ̀N GBẸTỌ LẸ DOPỌ TO ALIHO PIPÉ DE MẸ”

Jesu Klisti namẹ anademẹ titengbe delẹ do alọwle ji. Di apajlẹ, e dọmọ: “‘Sunnu na jo otọ́ etọn po onọ̀ etọn po do bo na sẹbọdo asi etọn go, bọ yé omẹ awe lẹ na lẹzun agbasalan dopo’ . . . Enẹwutu, nuhe Jiwheyẹwhe ko kọndopọ, mì dike mẹde klan ẹn blo.” (Matiu 19:5, 6) E whè gbau, anademẹ awe wẹ tin tofi.

“YÉ OMẸ AWE LẸ NA LẸZUN AGBASALAN DOPO.” Alọwle wẹ yin kọndopọ he sinyẹn hugan he gbẹtọvi lẹ sọgan tindo, podọ owanyi sọgan basi hihọ́na ẹn sọta nugbonọ-mayin, na asu po asi po ko lẹzun “agbasalan dopo” hẹ alọwlemẹ etọn kẹdẹ. (1 Kọlintinu lẹ 6:16; Heblu lẹ 13:4) Nugbonọ-mayin nọ hẹn jidedomẹgo gble bo sọgan gbà alọwle. Eyin ovi lẹ ko tin, yé sọgan jiya to numọtolanmẹ-liho bo na jẹdò owanyi po hihọ́ po tọn, kavi tlẹ nọ duadi.

“NUHE JIWHEYẸWHE KO KỌNDOPỌ.” Alọwle sọ yin kọndopọ wiwe de. Asu po asi po he yọ́n ehe nọ dovivẹnu nado hẹn alọwle yetọn lodo. Yé ma nọ dín dotẹnmẹ hundote lẹ nado deta sọn alọwle yetọn mẹ eyin nuhahun lẹ fọ́n. Owanyi yetọn nọ sinyẹn bọ yé nọ doakọnnanu. Owanyi mọnkọtọn “nọ ṣinyọnnudo nulẹpo,” bo nọ gọalọ nado duto nuhahun lẹ ji na pọninọ po jijọho po nido tin to alọwle lọ mẹ.

Eyin owanyi mẹdetiti-yido-sanvọ́ tọn tin to mẹjitọ lẹ ṣẹnṣẹn, e nọ wà dagbe na ovi he to whẹndo lọ mẹ lẹ taun. Yọnnu jọja de he nọ yin Jessica dọmọ: “Otọ́ ṣie po onọ̀ ṣie po yiwanna yedelẹ taun bo nọ na sisi ode awetọ. Na n’nọ mọ bọ onọ̀ ṣie nọ do sisi hia otọ́ ṣie, titengbe to whenue e to nuyiwa hẹ ovi lẹ wutu, enẹ zọ́n bọ yẹnlọsu jlo na taidi onọ̀ ṣie.”

Owanyi wẹ yin jẹhẹnu Jiwheyẹwhe tọn tintan. Biblu tlẹ dọ dọ: “Jiwheyẹwhe wẹ owanyi.” (1 Johanu 4:8) Hún, e ma yin nupaṣamẹ de dọ Jehovah yin yiylọdọ “Jiwheyẹwhe ayajẹnọ.” (1 Timoti 1:11) Mílọsu na yin ayajẹnọ eyin mí dovivẹnu nado hodo apajlẹ jẹhẹnu Mẹdatọ mítọn tọn lẹ—titengbe owanyi etọn. Efesunu lẹ 5:1, 2 dọmọ: “Mì nọ hodo apajlẹ Jiwheyẹwhe tọn, taidi ovi yiwanna lẹ bo nọ to zọnlinzin to owanyi mẹ.”