BE A LẸNDỌ EMI DO AYAJẸ YA? Eyin mọ wẹ, etẹwẹ nọ hẹn ayajẹ wá na we? Whẹndo towe, azọ́n towe, kavi sinsẹ̀n towe? Vlavo a to nukundo nude he na hẹn ayajẹ wá na we, taidi wehọmẹ fifo, agbasazọ́n dagbe de mimọ, kavi mọto yọyọ de hihọ̀.

Mẹsusu wẹ nọ tindo ayajẹ jẹ obá de mẹ to whenue yé jẹ yanwle de kọ̀n kavi họ̀ nuhe yé tindo ojlo na de. Ṣigba, nawẹ ayajẹ mọnkọtọn nọ dẹn-to-aimẹ sọ? E nọ saba yin ojlẹ gli tọn, bo sọgan hẹnmẹ jẹflumẹ.

Ayajẹ yin ninọmẹ dagbemẹninọ tọn he nọ dẹn-to-aimẹ na ojlẹ de. E nọ yin hiadogona gbọn numọtolanmẹ lẹ dali he bẹsọn pekọ tintindo poun ji jẹ homẹhunhun sinsinyẹn he siso taun ji podọ po ojlo jọwamọ tọn po dọ ni zindonukọn.

Humọ, taidi ninọmẹ dagbemẹninọ tọn he nọ dẹn-to-aimẹ de, ayajẹ ko yin zẹẹmẹ-basina, e ma yin taidi fie yè jei kavi yanwle de gba, ṣigba taidi gbejizọnlin de. Nado dọ dọ, “N’na yin ayajẹnọ to whenue . . .” na taun tọn, yin nado sisẹ́ ayajẹ hlan nukọn.

Di dohia, yí ayajẹ jlẹdo agbasalilo go. Nawẹ mí nọ wagbọn do tindo agbasalilo dagbe? Mí nọ basi nudide nuyọnẹn tọn gando dùdù, aihundida po gbẹzan he zan mí te po go. Mọdopolọ, ayajẹ yin kọdetọn gbẹzan dagbe zinzan tọn gọna gbẹninọ sọgbe hẹ anademẹ he sọgbe lẹ.

Anademẹ kavi jẹhẹnu tẹlẹ wẹ nọ hẹn ayajẹ wá? Dile etlẹ yindọ delẹ yin nujọnu hú devo lẹ, nuhe bọdego ehelẹ nọ yí adà titengbe de wà:

  • PEKỌ PO ALỌTÚTLÚ PO

  • AGBASALILO PO AKỌNDONANU PO

  • OWANYI

  • JONAMẸ

  • NUHEWUTU MÍ DO TOGBẸ̀

  • TODIDO

Owe nuyọnẹn tọn he mẹsusu nọ na sisi de dọmọ: “Ayajẹnọ wẹ mẹhe madoblọ to aliho yetọn ji lẹ.” (Salmu lẹ 119:1) Todin, mì gbọ mí ni gbadopọnna aliho enẹ.