Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

ATỌ̀HỌ̀-NUHIHỌ́ LỌ TỌN (ZINJẸGBONU OPLỌN TỌN) SEPTEMBRE 2016

To Ahidi Zọnmii Nado Mọ Dona Jehovah Tọn

To Ahidi Zọnmii Nado Mọ Dona Jehovah Tọn

“Hiẹ ko diahi hẹ Jiwheyẹwhe po gbẹtọ lẹ po, hiẹ ko sọ dudeji to godo mẹ.”—JEN. 32:28.

OHÀN LẸ: 6038

1, 2. Avùnnukundiọsọmẹnu tẹlẹ wẹ devizọnwatọ Jehovah tọn lẹ nọ pehẹ?

SỌN gbẹtọvi nugbonọ tintan lọ Abẹli ji jẹ azán mítọn gbè, sinsẹ̀n-basitọ nugbonọ lẹ nọ diahi hẹ onú voovo lẹ. Apọsteli Paulu kanwehlan Klistiani Heblu lẹ dọ yé “jiya bo doakọnna whlepọn sinsinyẹn lẹ,” na yé to nukundagbe po dona Jehovah tọn po dín wutu. (Heb. 10:32-34) Paulu yí ahididi Klistiani lẹ tọn jlẹdo huhlọn he aihundatọ lanmẹyiya tọn lẹ nọ do to agbàwhinwhlẹn Glẹki tọn lẹ, yèdọ wezundido, avùnhiho po akotokún-yìnyìn po whenu lẹ go. (Heb. 12:1, 4) To egbehe, mí to alewezun ogbẹ̀ tọn lọ ji, podọ mí nọ pehẹ kẹntọ he jlo na fẹayihasẹna mí, dómọna mí, ze mí jai bo hò ayajẹ po ahọsumẹ sọgodo tọn mítọn po yí sọn mí si lẹ.

2 Tintan, Satani po aihọn ylankan etọn po wẹ mí dona diahi hẹ sinsinyẹn. (Efe. 6:12) Nujọnu wẹ e yin dọ mí ni nọavùnte sọta “nuhe hẹnai” to aihọn lọ mẹ lẹ. Ehe bẹ sinsẹ̀n-nuplọnmẹ po tamẹnuplọnmẹ aihọn lọ tọn lẹ po hẹn, gọna walọyizan ylankan lẹ, taidi fẹnnuwiwa zanhẹmẹ tọn, taba nùnù, ahàn sinsinyẹn po amasin adínọ po ṣiṣizan. Podọ, mí dona nọ hoavùn whelẹponu sọta madogán agbasa tọn mítọn lẹ po gbigbọjọ po.—2 Kọl. 10:3-6; Kol. 3:5-9.

3. Nawẹ Jiwheyẹwhe nọ plọnazọ́n mí nado hoavùn sọta kẹntọ mítọn lẹ gbọn?

 3 Be e yọnbasi nugbonugbo nado gbawhàn kẹntọ huhlọnnọ enẹlẹ tọn ya? Mọwẹ, ṣigba e na biọ ahididi. Paulu yí apajlẹ akotokún-yìntọ hohowhenu tọn lẹ tọn zan bo dọ gando ede dọ: “Aliho he mẹ yẹn to akotokún ṣie lẹ yìn te ma yin nado to nuli jẹhọn gba.” (1 Kọl. 9:26) Kẹdẹdile akotokún-yìntọ de nọ hoavùn sọta kẹntọ etọn do, mí dona hoavùn sọta kẹntọ mítọn lẹ. Jehovah nọ plọnazọ́n mí bo nọ gọalọna mí to avùnhiho mítọn mẹ. E wleawuna anademẹ gbẹwhlẹngán tọn lẹ do Ohó etọn mẹ. E sọ nọ gọalọna mí gbọn owe sinai do Biblu ji mítọn lẹ, opli lẹ, plidopọ lẹ, po plidopọ daho lẹ po gblamẹ. Be a nọ yí nuhe plọn a te lẹ do yizan mẹ ya? Eyin a ma nọ wàmọ, e na taidi dọ a to “nuli jẹhọn,” bo ma to avùnho sọta kẹntọ towe to gigọ́ mẹ.

4. Nawẹ mí ma na dike oylan ni gbawhàn mítọn gbọn?

4 Kẹntọ mítọn lẹ sọgan tọ́nawhàn mí to whenue mí ma donukun bo yangbé mítọn to whenue nuṣikọna mí, enẹwutu mí dona nọ aṣeji hugan gbede pọ́n. Biblu na mí avase dọmọ: “A dike oylan gbawhàn towe blo, ṣigba nọ yí dagbe do gbawhàn oylan tọn.” (Lom. 12:21) Tudohomẹnamẹ lọ dọ “a dike oylan gbawhàn towe blo” dohia dọ mí sọgan gbawhàn oylan tọn. E na yinmọ eyin mí zindonukọn nado to avùnho sọta ẹ. Ṣigba, Satani, aihọn ylankan etọn, po agbasa mape mítọn po sọgan duto mí ji, eyin mí hẹn aṣejininọ mítọn bu bo doalọtena avùnhiho lọ. Ma na dotẹnmẹ Satani gbede nado dobuna we bo hẹn alọ towe lẹ kuyẹ̀ bọ a na ṣíawhàn blo!—1 Pita 5:9.

5. (a) Etẹwẹ sọgan gọalọna mí nado to ahidi zọnmii nado mọ dona Jiwheyẹwhe tọn? (b) Mẹhe go Biblu donù tẹlẹ ji wẹ mí na dọhodo?

5 Nado dudeji, mẹhe to ahidi lẹ ma dona wọn nuhewutu yé do to ahidi. Nado mọ nukundagbe po dona Jiwheyẹwhe tọn po yí, yé dona nọ hẹn jidenamẹ he to Heblu lẹ 11:6 mẹ do ayiha to whepoponu dọmọ: “Mẹhe to dindọnsẹpọ ẹ dona yise dọ ewọ tin podọ ewọ wẹ ahọsumẹtọ mẹhe to dindin in vẹkuvẹku lẹ tọn.” Hogbe Glẹki tọn he yin lilẹdo ‘to dindin vẹkuvẹku’ nọ bẹ linlẹn gándido po vivẹnudido nujikudo tọn po tọn hẹn. (Owalọ 15:17) Owe-wiwe lẹ bẹ apajlẹ sunnu po yọnnu po he dovivẹnu sinsinyẹn nado dín dona Jehovah tọn lẹ tọn hẹn. Jakọbu, Laheli, Josẹfu, po Paulu po pehẹ ninọmẹ he kàn dẹpẹ biọ to numọtolanmẹ-liho podọ to agbasa-liho lẹ, ṣogan yé dohia dọ linsinsinyẹn nọ hẹn dona họakuẹ lẹ wá. Nawẹ mí sọgan hodo apajlẹ ahiditọ ayidego tọn ẹnẹ enẹlẹ tọn gbọn?

LINSINSINYẸN NỌ HẸN DONA LẸ WÁ

6. Etẹwẹ gọalọna Jakọbu nado sinyẹnlin, podọ nawẹ e yin ahọsuna gbọn? (Pọ́n yẹdide he tin to bẹjẹeji hosọ ehe tọn.)

6 Tọgbo Jakọbu diahi bo sinyẹnlin, na e yiwanna Jehovah, yọ́n pinpẹn gbigbọnu lẹ tọn, bo tindo yise mlẹnmlẹn to opagbe Jehovah tọn nado dona kúnkan etọn mẹ wutu. (Jen. 28:3, 4) Nuhe zọ́n niyẹn bọ to whenue Jakọbu tindo nudi owhe 100, e wà nuhe go e pé lẹpo nado mọ dona Jiwheyẹwhe tọn bo tlẹ diahi hẹ angẹli he ze agbasa gbẹtọ tọn do de. (Hia Jenẹsisi 32:24-28.) Be Jakọbu na ede tindo huhlọn gọna linsinsinyẹn he e na biọ nado diahi hẹ angẹli huhlọnnọ de wẹ ya? Lala! Ṣigba ahiditọ nujikudonọ de wẹ e yin, e sọ dohia dọ emi ma na jogbe! Podọ na nugbo tọn, e yin ahọsuna na linsinsinyẹn etọn wutu. Yinkọ he jẹ hẹ ẹ lọ, Islaeli (he zẹẹmẹdo “Ahiditọ [Linsinyẹntọ] hẹ Jiwheyẹwhe” kavi “Jiwheyẹwhe Diahi”) yin didona ẹn. Jakọbu mọ ahọsumẹ họakuẹ he mílọsu to dindin, enẹ wẹ nukundagbe po dona Jehovah tọn po.

7. (a) Ninọmẹ ayimajai tọn tẹwẹ Laheli pehẹ? (b) Nawẹ e zindonukọn nado to ahidi bo yin didona to godo mẹ gbọn?

 7 Asi yiwanna Jakọbu tọn Laheli to jejeji nado mọ lehe Jehovah na hẹn opá he e do na asu etọn di do. Ṣigba, ninọmẹ he taidi nuhahun he e na vẹawu nado dudeji de to aimẹ. Laheli ma tindo ovi. To ojlẹ etọn mẹ, nukun ylankan taun wẹ gbẹtọ lẹ nọ yí do pọ́n ninọmẹ enẹ. Nawẹ Laheli mọ huhlọn to numọtolanmẹ-liho podọ to agbasa-liho nado zindonukọn bo pehẹ ninọmẹ mẹhẹngbọjọ tọn he e ma sọgan diọ enẹlẹ gbọn? E ma hẹn todido bu gbede. Kakatimọ, e to ahidi zọnmii gbọn odẹ̀ sisosiso hihò dali. Jehovah sè ovẹvivẹ ahundoponọ Laheli tọn lẹ, bo na ẹn ovi lẹ to godo mẹ. Abajọ Laheli do dawhá awhàngbigba tọn to ojlẹ de mẹ dọmọ: “Yẹn ko whlẹnagbà . . . sinsinyẹn. Yẹn ko sọ dudeji!”—Jen. 30:8, 20-24.

8. Nuhahun sinsinyẹn he dẹn-to-aimẹ tẹwẹ Josẹfu pehẹ, podọ nawẹ nuyiwa etọn yin apajlẹ dagbe de na mí gbọn?

8 Matin ayihaawe, apajlẹ tenọgli tọn he Jakọbu po Laheli po zedai yinuwado visunnu yetọn Josẹfu ji sinsinyẹn, bo gọalọna ẹn nado duto ninọmẹ he whlé yise etọn pọ́n lẹ ji. To whenue Josẹfu tindo owhe 17, gbẹ̀mẹ dózin do e. Awuwhàn sisẹ́ nọvisunnu etọn lẹ nado sà ẹ do kanlinmọgbenu. To nukọn mẹ, e wá doakọnna gànpamẹninọ na owhe susu to Egipti na owhẹ̀ agọ̀ yin sisadokọna ẹn wutu. (Jen. 37:23-28; 39:7-9, 20, 21) Josẹfu ma joawuna gbigbọjọ; mọ e ma duadi bo tẹnpọn nado yiahọsu. Kakatimọ, e ze ayiha po ahun etọn po do haṣinṣan dagbe he e tindo hẹ Jehovah ji. (Lev. 19:18; Lom. 12:17-21) Apajlẹ Josẹfu tọn sọgan gọalọna mí. Di apajlẹ, eyin mí tlẹ pehẹ nuhahun sinsinyẹn to ovu whenu kavi ninọmẹ mítọn alọnu tọn taidi nuhe ma tindo todido, mí dona to ahidi bo to linsinyẹn zọnmii. Mí sọgan deji dọ eyin mí wàmọ, Jehovah na dona mí.—Hia Jenẹsisi 39:21-23.

9. Taidi Jakọbu, Laheli po Josẹfu po, vivẹnu tẹwẹ dopodopo mítọn dona do nado mọ dona Jehovah tọn?

9 Lẹnnupọndo ninọmẹ de he a to pipehẹ he sọgan taidi whlepọn de na we ji. E sọgan yin whẹdida mawadodo wunmẹ de, nuvẹun kavi mẹṣanko. Kavi mẹde wẹ sawhẹ agọ̀ dokọna we, vlavo na awuwhàn wutu. Kakati nado jogbe, flin nuhe gọalọna Jakọbu, Laheli, po Josẹfu po nado to Jehovah sẹ̀n zọnmii po ayajẹ po. Jiwheyẹwhe na yé huhlọn bo dona yé, na yé zindonukọn bo to pinpẹn-nutọn-yinyọnẹn sisosiso dohia na gbigbọnu lẹ wutu. Yé zindonukọn nado to ahidi bosọ nọ yinuwa to kọndopọ mẹ hẹ odẹ̀ vẹkuvẹku yetọn lẹ. Mí to gbẹnọ to vivọnu titonu ylankan ehe tọn; enẹwutu, mí tindo whẹwhinwhẹ́n dolido nado tẹdo todido dejidego he yin zizedonukọnna mí lọ go! Be a jlo na vánkan nado mọ nukundagbe Jehovah tọn yí, eyin e tlẹ biọ dọ a ni diahi to yẹhiadonu-liho ya?

WLEAWUFO NADO DIAHI NADO MỌ DONA DE YÍ

10, 11. (a) Obá tẹ mẹ wẹ e sọgan biọ dọ mí ni diahi jẹ nado mọ dona Jiwheyẹwhe tọn? (b) Etẹlẹ wẹ na gọalọna mí nado basi nudide he sọgbe lẹ bo duto avùnhiho mítọn sọta gbigbọjọ po ayihafẹsẹnamẹnu lẹ po ji?

10 Ninọmẹ tẹlẹ wẹ sọgan biọ dọ mí ni diahi nado mọ dona Jiwheyẹwhe tọn yí? Ninọmẹ he mẹsusu ko pehẹ wẹ ahididi nado duto madogán agbasa mape tọn de ji. Na mẹdevo lẹ, e biọ vivẹnudido vẹkuvẹku to yé si nado hẹn pọndohlan dagbe go gando lizọnyizọn lọ go. Kavi na hiẹ, e sọgan yindọ a dona to akọndonanu zọnmii, mahopọnna agbasamalo kavi ṣokẹdẹninọ. Humọ, mí ma dona wọnji dọ e nọ biọ vivẹnudido to mẹdelẹ si nado jona mẹhe gbleawuna yé kavi ṣinuwa do yé de. Mahopọnna lehe mí ko to  Jehovah sẹ̀n dẹnsọ, mímẹpo dona hoavùn sọta onú voovo he sọgan glọnalina sinsẹ̀nzọn mítọn na Jiwheyẹwhe, mẹhe nọ suahọ nugbonọ lẹ.

Be a to ahidi nado mọ dona Jiwheyẹwhe tọn ya? (Pọ́n hukan 10 po 11tọ po)

11 Nado dọ hójọhó, e sọgan biọ dọ mí ni diahi taun nado basi nudide he sọgbe lẹ podọ nado zan gbẹzan Klistiani tọn. E sọgan yinmọ, titengbe eyin ahun mítọn he nọ klọmẹ lọ nọ dọ̀n mí yì ali he ma sọgbe ji. (Jel. 17:9) Eyin a mọdọ emi ko yin nuyiwadeji to aliho agọ̀ mẹ jẹ obá de mẹ, nujọnu taun wẹ e yin dọ a ni hodẹ̀ bo biọ gbigbọ wiwe. Odẹ̀ po gbigbọ wiwe po sọgan na we huhlọn nado doafọna nuyiwa he a yọnẹn dọ e sọgbe bọ Jehovah sọgan dona. Nọ yinuwa sọgbe hẹ odẹ̀ towe lẹ. Nọ dovivẹnu nado hia adà Biblu tọn de egbesọegbesọ, bo nọ de whenu dovo na oplọn mẹdetiti tọn podọ na sinsẹ̀n-bibasi whẹndo tọn gbesisọ tọn.—Hia Salmu lẹ 119:32.

12, 13. Nawẹ Klistiani awe delẹ mọ alọgọ yí nado duto ojlo ylankan lẹ ji gbọn?

12 Apajlẹ susu wẹ tin gando lehe Ohó Jiwheyẹwhe tọn, gbigbọ etọn, po owe mítọn lẹ po ko gọalọna Klistiani lẹ nado duto ojlo ylankan lẹ ji do go. Jọja aflanmẹ de hia hosọ lọ “Comment résister aux mauvais désirs?” (Nawẹ A Sọgan Nọavùnte Sọta Ojlo Ylankan lẹ Gbọn?) to Réveillez-vous! 8 décembre 2003 tọn mẹ. Nawẹ e yinuwa gbọn? “N’to avùnho nado duto linlẹn he ma sọgbe lẹ ji. To whenue n’hia to hosọ lọ mẹ dọ to pipli mẹmẹsunnu tọn mítọn mẹ, ‘mẹsusu wẹ e nọ vẹawuna taun nado duto ojlo ylankan lẹ ji,’ ehe miọnhomẹna mi. N’mọdọ e ma yin yẹn kẹdẹ wẹ to ninọmẹ lọ mẹ.” Jọja ehe  sọ mọaleyi sọn hosọ lọ “Dieu approuve-t-il les mœurs ‘différentes’?” (Be Jiwheyẹwhe Nọ Kẹalọyi Zanhẹmẹ to Mẹhe Tindo Vijinu Dopolọ lẹ Ṣẹnṣẹn Ya?) to Réveillez-vous! 8 octobre 2003 tọn mẹ. E doayi e go dọ hosọ lọ dohia dọ, na mẹdelẹ avùn lọ nọ yin ‘owùn de to agbasalan mẹ.’ (2 Kọl. 12:7) Eyin yé zindonukọn nado to avùnho nado hẹn walọ dagbe go, yé sọgan pọ́n sọgodo hlan po todido po. E yidogọ dọ: “Na whẹwhinwhẹ́n enẹ wutu, n’mọdọ dile azán dopodopo to jujuyi, n’sọgan gbọṣi nugbonọ-yinyin mẹ. N’nọ dopẹna Jehovah taun dọ e nọ yí titobasinanu etọn zan nado gọalọna mí nado lùn azán dopodopo tọ́n to titonu ylankan ehe mẹ.”

13 Mí nisọ lẹnnupọndo numimọ mẹmẹyọnnu de tọn ji to États-Unis. E wlan dọmọ: “N’jlo na dọnudo mì na núdùdù gbigbọmẹ tọn gbesisọ tọn he mì nọ na mí sọgbe hẹ nuhudo mítọn podọ to ojlẹ he sọgbe mẹ. N’nọ saba tindo numọtolanmẹ dọ yẹn wẹ hosọ ehelẹ yin kinkan na tlọlọ. Na owhe susu, n’ko to avùnho sinsinyẹn sọta nude he Jehovah gbẹwanna. To whedelẹnu, n’nọ jlo na hònúpla bo doalọtena avùnhiho lọ. N’yọnẹn dọ lẹblanunọ podọ jonamẹtọ wẹ Jehovah, ṣigba na n’tindo ojlo ylankan enẹ bo ma gbẹwanna ẹn to ahun ṣie mẹ dọ́n wutu, n’nọ mọdọ n’ma sọgan mọ alọgọ etọn. Avùnhiho tẹgbẹ tọn enẹ hẹn gbẹninọ vẹawuna mi. . . . To whenue n’hia hosọ lọ “Be Hiẹ Tindo ‘Ahun de Nado Yọ́n’ Jehovah Ya?” to Atọ̀họ̀-Nuhihọ́ lọ Tọn 15 mars 2013 mẹ, n’mọ nugbonugbo dọ Jehovah jlo na gọalọna mi.”

14. (a) Numọtolanmẹ tẹwẹ Paulu tindo gando ahididi etọn lẹ go? (b) Nawẹ mí sọgan tindo kọdetọn dagbe to avùnhiho sọta madogán agbasa tọn lẹ mẹ gbọn?

14 Hia Lomunu lẹ 7:21-25. Paulu yọ́n lehe e sọgan sinyẹnawu nado hoavùn sọta ojlo po madogán agbasa mape tọn lẹ po do. Etomọṣo, e deji mlẹnmlẹn dọ emi sọgan duto avùnhiho homẹ tọn emitọn ji eyin emi nọ ganjẹ Jehovah go to odẹ̀ mẹ bo nọ do yise hia to avọ́sinsan ofligọ Jesu tọn mẹ. Bọ míwlẹ lo? Dile mí to ahidi ma nado joawuna madogán mítọn lẹ, mí sọgan dudeji. Gbọnna? Mí dona hodo apajlẹ Paulu tọn, bo nọ ganjẹ Jehovah go mlẹnmlẹn kakati nido yin do huhlọn mítọn titi go, bosọ tindo yise to ofligọ lọ mẹ.

15. Naegbọn odẹ̀ sọgan gọalọna mí nado yin nugbonọ bo doakọnna whlepọn lẹ?

15 To whedelẹnu, Jiwheyẹwhe sọgan na mí dotẹnmẹ nado do obá he mẹ whẹho de duahunmẹna mí jẹ hia. Di apajlẹ, nawẹ mí na yinuwa do eyin mí (kavi hagbẹ whẹndo tọn mítọn de) bẹ azọ̀n sinsinyẹn de kavi pehẹ whẹdida mawadodo de? Mí na dohia dọ mí deji mlẹnmlẹn do Jehovah go eyin mí nọ vẹ̀ ẹ to odẹ̀ mẹ nado na mí huhlọn, na mí nido hẹn nugbonọ-yinyin, ayajẹ, po gbigbọnọ-yinyin mítọn po go. (Flp. 4:13) Numimọ mẹsusu tọn, yèdọ to azán Paulu tọn po mítọn po gbè, dohia dọ odẹ̀ sọgan gọalọna mí nado gọ̀ huhlọn mọyi bo wleawuna nujikudo nado to akọndonanu zọnmii.

TO AHIDI ZỌNMII NADO MỌ DONA JEHOVAH TỌN

16, 17. Taidi ahiditọ de, etẹwẹ yin gbemima towe?

16 Na nugbo tọn, Lẹgba jlo nado mọdọ a jogbe bo ṣíawhàn. Magbe nado “tẹdo nuhe yin dagbe go gligli.” (1 Tẹs. 5:21) Deji dọ a sọgan duto avùnhiho sọta Satani, aihọn ylankan etọn po ayilinlẹn ylando tọn depope po ji. E sọgan pà we eyin a deji mlẹnmlẹn do nugopipe Jiwheyẹwhe tọn nado na we huhlọn go.—2 Kọl. 4:7-9; Gal. 6:9.

17 To popolẹpo mẹ, to avùnho zọnmii. To kanván zọnmii. To ahidi zọnmii. To linsinyẹn zọnmii. Deji mlẹnmlẹn dọ Jehovah na ‘kọ̀n dona de jẹgbonu do ji we kaka bọ nuhudo nudepope tọn ma na tin ba.’—Mal. 3:10.