Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

ATỌ̀HỌ̀-NUHIHỌ́ LỌ TỌN (ZINJẸGBONU OPLỌN TỌN) OCTOBRE 2016

Be A Nọ “Whlá Nuyọnẹn Yọ́n-Na-Yizan” Ya?

Be A Nọ “Whlá Nuyọnẹn Yọ́n-Na-Yizan” Ya?

SỌGBE hẹ ajlú de, visunnu wamọnọ de tin he nọ nọ̀ gbétatò he to olá de mẹ. Mẹhe nọ nọ̀ gbétatò lọ mẹ lẹ nọ kò e na yé nọ lẹndọ yẹ̀yìnọ de wẹ wutu. Eyin jonọ lẹ wá, gbétanu lọ lẹ nọ ṣàn ẹn kò to họntọn yetọn lẹ nukọn. Yé nọ dlẹn abọgan-kuẹ awe do e, yèdọ fataka-kuẹ daho dopo po sika-kuẹ pẹvi he họakuẹ hú fataka-kuẹ lọ donu awe de po. Yé nọ dọna ẹn dọ: “Yí dehe a jlo.” Visunnu lọ nọ yí fataka-kuẹ lọ bo nọ bẹwezun dedo.

To gbèdopo, jonọ de kanse visunnu lọ dọ: “Be a yọnẹn dọ sika-kuẹ lọ họakuẹ hú fataka-kuẹ lọ donu awe ya?” Visunnu pẹvi lọ konu bo dọmọ: “N’yọnẹn maa.” Enẹgodo, jonọ lọ kanse e dọ: “Bọ naegbọn fataka-kuẹ lọ wẹ a nọ yí? Eyin a yí sika-kuẹ lọ, akuẹ he a mọ lọ sin donu awe wẹ a na mọ!” Visunnu lọ dọ dọ, “Amọ́, eyin n’yí sika-kuẹ lọ, mẹde ma nasọ daihun lọ hẹ mi ba nẹ. Be a yọ́n fataka-kuẹ nẹmu he n’ko bẹpli ya?” Visunnu pẹvi he sin ohó yin didọ to ajlú ehe mẹ do jẹhẹnu de hia, ehe mẹhe ko whẹ́n lẹ lọsu sọgan mọaleyi sọn e mẹ—enẹ wẹ nuyọnẹn yọ́n-na-yizan.

Biblu dọmọ: “Whlá nuyọnẹn yọ́n-na-yizan po nugopipe nulẹnpọn tọn po. To whenẹnu, hiẹ na nọ zinzọnlin to hihọ́ mẹ to aliho towe ji.” (Howh. 3:21, 23) Enẹwutu, nuhe “nuyọnẹn yọ́n-na-yizan” zẹẹmẹdo po lehe yè nọ yí i zan do po yinyọnẹn nọ basi hihọ́na mí. Ehe nọ hẹn “afọ” mítọn lẹ lodo bo nọ gọalọna mí ma nado dahli to gbigbọ-liho.

ETẸWẸ NUYỌNẸN YỌ́N-NA-YIZAN ZẸẸMẸDO?

Nuyọnẹn yọ́n-na-yizan gbọnvona oyọnẹn po nukunnumọjẹnumẹ po. Mẹhe tindo oyọnẹn nọ bẹ nudọnamẹ kavi nugbo lẹ pli. Mẹhe tindo nukunnumọjẹnumẹ sọgan nọ mọ lehe nugbo de tindo kanṣiṣa hẹ devo do. Mẹhe tindo nuyọnẹn nọ penugo nado kọ̀n oyọnẹn po nukunnumọjẹnumẹ po dopọ bo nọ yí yé zan to aliho he yọ́n-na-yizan de mẹ.

Di apajlẹ, mẹde sọgan penugo nado hia bo mọnukunnujẹ owe Etẹwẹ Biblu Plọn Mí Taun? mẹ to ojlẹ kleun de gblamẹ. To oplọn etọn whenu, e sọgan nọ na gblọndo he sọgbe. E sọgan jẹ opli agun tọn lẹ yì ji bo tlẹ nọ na gblọndo dagbe lẹ. Ehe lẹpo sọgan dohia dọ mẹlọ to nukọnyi to gbigbọ-liho, ṣigba be enẹ zẹẹmẹdo dọ e ko tindo nuyọnẹn wẹ ya? E ma yinmọ dandan. E sọgan yindọ e nọ yawu mọnukunnujẹnumẹ poun wẹ. Ṣigba, to whenue mẹlọ yí nugbo he plọn e te lẹ do yizan bo nọ yí oyọnẹn po nukunnumọjẹnumẹ po zan to aliho he sọgbe mẹ, enẹ nọ dohia dọ e jẹ nuyọnẹntọ yin ji. Eyin nudide etọn lẹ nọ dekọtọn do dagbe mẹ, bo nọ do nulẹnpọn sisosiso jẹnukọn hia, e nọ họnwun dọ mẹlọ nọ do nuyọnẹn yọ́n-na-yizan hia.

To Matiu 7:24-27 mẹ, mí mọ apajlẹ Jesu tọn gando dawe awe delẹ he dopodopo yetọn gbá ohọ̀ de go. Dopo to dawe lọ lẹ mẹ yin yiylọdọ “nuyọnẹntọ.” Na dawe enẹ lẹnnupọn yinukọn wutu, e gbá ohọ̀ etọn do osé ji. E mọnú hlan nukọn bo yinuwa po nuyọnẹn po. E ma lẹndọ e na de akuẹzinzan kavi whenu pò na emi eyin emi gbá ohọ̀ emitọn do tọkẹ́n ji. E gbọn nuyọnẹn dali lẹnnupọndo kọdetọn dẹn-to-aimẹ nuyiwa etọn tọn lẹ ji. Enẹwutu to whenue yujẹhọn de yìn, ohọ̀ etọn ma họ́jai. Todin, kanbiọ lọ wẹ yindọ, Nawẹ mí sọgan wleawuna jẹhẹnu họakuẹ ehe he yin nuyọnẹn yọ́n-na-yizan bosọ whlá ẹ gbọn?

NAWẸ N’SỌGAN WLEAWUNA ẸN GBỌN?

Tintan, doayi e go dọ, Mika 6:9 dọmọ: “Mẹhe tindo nuyọnẹn yọ́n-na-yizan lẹ na dibusi oyín [Jiwheyẹwhe  tọn].” Nado dibusi oyín Jehovah tọn nọ biọ dọ mí ni tindo sisi na ewọ. E zẹẹmẹdo obu he sọgbe tintindo na nuhe oyín Jiwheyẹwhe tọn nọtena, ehe bẹ nujinọtedo etọn lẹ hẹn. Nado si mẹde, a dona yọ́n lehe e nọ lẹnnupọn do. Enẹgodo, a sọgan dejido mẹlọ go bo nọ plọnnu sọn e dè, gbọn aliho nuyiwa tọn etọn he nọ tindo kọdetọn dagbe lẹ hihodo dali. Eyin kọdetọn dẹn-to-aimẹ he nuyiwa mítọn lẹ na tindo do haṣinṣan mítọn hẹ Jehovah ji lẹ nọ duahunmẹna mí podọ eyin mí nọ ze nudide mítọn lẹ sinai do nujinọtedo etọn lẹ ji, be mí to awuwlena nuyọnẹn yọ́n-na-yizan niyẹn.

Awetọ, Howhinwhẹn lẹ 18:1 dọmọ: “Mẹdepope he nọ klan ede dovo nọ doafọna ojlo ṣejannabi tọn etọn titi lẹ; e sọ nọ gbẹ́ nuyọnẹn yọ́n-na-yizan lẹpo dai.” Eyin mí ma tin to aṣeji, mí sọgan klan míde sọn Jehovah po omẹ etọn lẹ po go. Nado dapana míde kinklan dovo, mí dona nọ yí whenu zan hẹ mẹhe nọ dibusi oyín Jiwheyẹwhe tọn bo nọ na sisi nujinọtedo etọn lẹ. Mí dona nọ yì Plitẹnhọ Ahọluduta tọn mẹ bo nọ kọnawudopọ hẹ agun Klistiani tọn to gbesisọ mẹ. To opli lẹ ji, mí dona nọ hùn ayiha po ahun mítọn lẹ po bo nọ na dotẹnmẹ nuhe yin didọ lẹ nado yinuwado mí ji.

Humọ, eyin mí nọ kọ̀n ahun mítọn jẹgbonu na Jehovah to odẹ̀ mẹ, mí na dọnsẹpọ ẹ dogọ. (Howh. 3:5, 6) Eyin mí nọ hùn ayiha po ahun mítọn po to whenue mí to Biblu po owe he titobasinanu Jehovah tọn po wleawuna lẹ hia, ehe nọ gọalọna mí nado mọ nuhe na yin kọdetọn dẹn-to-aimẹ nuyiwa mítọn lẹ tọn jẹ obá de mẹ bo yọ́n lehe mí sọgan yinuwa do. Mí sọ  dona nọ hùn ahun mítọn nado kẹalọyi ayinamẹ he nọ yin nina gbọn mẹmẹsunnu he whèwhín lẹ dali. (Howh. 19:20) Ehe na zọ́n bọ kakati nado “gbẹ́ nuyọnẹn yọ́n-na-yizan lẹpo dai,” mí na to jẹhẹnu titengbe ehe hẹn lodo dogọ.

NAWẸ E NA GỌALỌNA WHẸNDO ṢIE GBỌN?

Nuyọnẹn yọ́n-na-yizan sọgan basi hihọ́na whẹndo lẹ. Di apajlẹ, Biblu dotuhomẹna asi nado tindo “sisi sisosiso na asu etọn.” (Efe. 5:33) Etẹwẹ asu de sọgan wà nado mọ sisi sisosiso yí? Eyin e nọ biọ ẹ gánnugánnu kavi po nukunvinvan po, kọdetọn ojlẹ gli tọn wẹ e na mọyi. Nado dapana whẹgbè, asi asu mọnkọtọn tọn sọgan nọ si nukọn etọn. Ṣigba, be e na yin whinwhàn nado nọ si godo etọn ya? E na vẹawu taun. Asu lọ dona lẹnnupọndo nuhe na hẹn kọdetọn dẹn-to-aimẹ wá lẹ ji. Eyin e nọ do sinsẹ́n gbigbọ tọn hia, taidi owanyi po homẹdagbe po, e na mọ sisi sisosiso he e jẹna lọ yí sọn asi etọn dè. Na nugbo tọn, asi Klistiani de dona nọ do sisi hia asu etọn vlavo e jẹna kavi lala.Gal. 5:22, 23.

Biblu sọ dọ dọ asu dona yiwanna asi etọn. (Efe. 5:28, 33) Na asu de nido to wanyina asi etọn zọnmii, asi lọ sọgan lẹndọ e pọnte nado whlá nuṣiwa he asu etọn tindo jlọjẹ nado yọnẹn lẹ do e. Ṣigba, be enẹ na dohia dọ ewọ tindo nuyọnẹn yọ́n-na-yizan nugbonugbo ya? To nukọn mẹ, etẹwẹ na yin kọdetọn lọ eyin asu lọ wá yọ́n nuhe e whlá do e lẹ? Be e na yiwanna ẹn dogọ ya? E na vẹawu. Ṣigba, eyin ewọ de ojlẹ dagbe de nado basi zẹẹmẹ nuṣiwa lọ lẹ tọn to jijọho mẹ, e yọnbasi dọ asu etọn ni yọ́n pinpẹn nugbodidọ etọn tọn. Gbọnmọ dali, owanyi he asu etọn tindo na ẹn na jideji.

Lehe a nọ domẹplọnlọ ovi towe lẹ go do to egbé na yinuwado hodọdopọ mìtọn ji to nukọn mẹ

Ovi lẹ dona nọ setonuna mẹjitọ yetọn lẹ podọ mẹplọnlọ dona nọ yin dido yé go sọgbe hẹ aliho Jehovah tọn lẹ. (Efe. 6:1, 4) Be enẹ zẹẹmẹdo dọ mẹjitọ lẹ dona nọ dosẹ́n susugege lẹ na ovi yetọn lẹ wẹ ya? E ma yin osẹ́n he mẹjitọ lẹ to nukundo dọ ovi lẹ ni setonuna kavi yasanamẹ he mẹ nuṣiwa yetọn lẹ na dekọtọn do lẹ kẹdẹ wẹ yé dona yọnẹn gba. Mẹjitọ he tindo nuyọnẹn yọ́n-na-yizan nọ gọalọna ovi etọn nado mọnukunnujẹ nuhewutu ewọ dona setonu mẹ.

Di apajlẹ, mí ni dọ dọ ovi de dọho to aliho mẹmasi tọn mẹ na ode to mẹjitọ etọn lẹ mẹ. Eyin mẹjitọ lẹ wadán do ovi lọ ji kavi yí homẹgble do sayana ẹn, enẹ sọgan dowinyan ẹn kavi hẹn ẹn nado nabọẹ. Etomọṣo, e sọgan to adidu to homẹ bọ enẹ na zọ́n bọ e na họ̀nna mẹjitọ etọn lẹ.

Mẹjitọ he to awuwlena nuyọnẹn yọ́n-na-yizan lẹ na lẹnnupọndo aliho he mẹ yé nọ domẹplọnlọ ovi yetọn lẹ go te gọna nuyiwadomẹji he ehe na tindo do ovi lọ lẹ ji to sọgodo ji. Mẹjitọ lẹ ma dona nọ zọ̀n plaplaji do yinuwa to whenue yé to homẹgble ji. Yé sọgan mọ ovi lọ dovo bo yí homẹfa po owanyi po do yihojlẹdohogo hẹ ẹ bo basi zẹẹmẹ na ẹn dọ Jehovah nọ donukun dọ ewọ ni gbògbéna mẹjitọ etọn lẹ nado mọ ale madopodo yí. To whenẹnu, eyin ovi lọ jẹ sisi dohia mẹjitọ etọn lẹ ji, e na mọdọ Jehovah gbògbéna wẹ emi te. (Efe. 6:2, 3) Nuyiwa homẹdagbe tọn ehe sọgan zọ̀n bọ mẹjitọ lẹ na jẹ ahun ovi lọ tọn mẹ. E na mọdọ mẹjitọ emitọn lẹ nọ hò emitọn pọ́n nugbonugbo, bọ osi he e tindo na yé na jideji. Po enẹ po, ovi lọ sọgan wá biọ alọgọ yetọn to whenue e na wá pehẹ nuhahun sinsinyẹn lẹ to nukọn mẹ.

Mẹjitọ delẹ sọgan nọ whleawu nado domẹplọnlọ ovi yetọn go, na yé nọ dibu dọ ovi lọ na gblehomẹ wutu. Ṣigba, etẹwẹ na jọ eyin ovi lọ wá whẹ́n? Be e na dibusi Jehovah bo mọdọ nuyọnẹnnu wẹ e yin nado nọ hodo nujinọtedo Jiwheyẹwhe tọn lẹ ya? Be e na yin whinwhàn nado nọ hùn ahun po ayiha etọn po hlan Jehovah ya, kavi e na klan ede dovo to gbigbọ-liho?Howh. 13:1; 29:21.

Anazọ́nwatọ dagbe de nọ wleawu ganji jẹnukọn whẹpo do jẹ azọ́n etọn ji. E ma nọ jẹ azọ́n etọn ji poun, po linlẹn lọ po dọ emi na wà anazọ́n dagbe de gba. Mẹjitọ he tindo nuyọnẹn yọ́n-na-yizan lẹ nọ yí whenu susu zan nado plọn nujinọtedo Jehovah tọn lẹ bo yí yé do yizan mẹ, bosọ nọ gbọnmọ dali dibusi oyín etọn. Eyin yé ma nọ klan yede dovo na Jehovah po titobasinanu etọn po, yé na tindo nuyọnẹn yọ́n-na-yizan nado hẹn whẹndo yetọn lodo.

Egbesọegbesọ wẹ mí nọ pannukọn nudide he sọgan yinuwado gbẹzan mítọn ji na owhe susu lẹ. Kakati nado nọ yawu wá tadona de kọ̀n bo zọ̀n plaplaji do basi nudide, naegbọn a ma na yiagbọji bo lẹnnupọn? Nọ yí sọwhiwhe do lẹnnupọndo kọdetọn dẹn-to-aimẹ lẹ ji. Nọ dín anademẹ Jehovah tọn bo nọ yí nuyọnẹn etọn do yizan mẹ. Whenẹnu, mí na dohia dọ mí whlá nuyọnẹn yọ́n-na-yizan podọ e na na mí ogbẹ̀.Howh. 3:21, 22.