Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

ATỌ̀HỌ̀-NUHIHỌ́ LỌ TỌN (ZINJẸGBONU OPLỌN TỌN) OCTOBRE 2016

“Mì Wọnji Homẹdagbe Didohia Jonọ lẹ Go Blo”

“Mì Wọnji Homẹdagbe Didohia Jonọ lẹ Go Blo”

“Mì wọnji homẹdagbe didohia jonọ lẹ go blo.”HEB. 13:2, Odò.

OHÀN LẸ: 124, 79

1, 2. (a) Avùnnukundiọsọmẹ tẹlẹ wẹ jonọ susu nọ pehẹ to egbehe? (Pọ́n yẹdide he tin to bẹjẹeji hosọ ehe tọn.) (b) Etẹwẹ apọsteli Paulu flin mí, podọ kanbiọ tẹlẹ wẹ enẹ fọndote?

HUGAN owhe 30 die wayi, Osei, [1] he ma yin Kunnudetọ de to whenẹnu, tọ́n sọn Ghana bo wá Europe. E flin dọmọ: “N’yawu doayi e go dọ suhugan gbẹtọ lẹ tọn ma nọ hò ṣie pọ́n. Ninọmẹ aimẹ tọn lọ lọsu hò mi taun. To whenue n’tọ́n sọn agahun-jlẹtẹn lọ, avivọ he ma hù mi to gbẹ̀ ṣie mẹ pọ́n wẹ blá mi bọ n’bẹ avi.” Na Osei ma sè ogbè wutu, e ma sọgan mọ agbasazọ́n dagbe de jẹnukọnna owhe dopo. Podọ na e dẹn do whẹndo etọn wutu, e nọ mọdọ emi to ṣokẹdẹ podọ ajlù whégbè tọn nọ wle e.

2 Lẹnnupọndo lehe a na ko jlo dọ mẹdevo lẹ ni yinuwa hẹ we do ji eyin hiẹ wẹ to ninọmẹ mọnkọtọn mẹ. Be homẹ towe ma na hùn taun eyin yè dokuavọ zohunhun tọn na we to Plitẹnhọ Ahọluduta tọn mẹ, mahopọnna otò he mẹ a wá sọn kavi sinmẹ agbasa tọn towe ya? Na nugbo tọn, Biblu dotuhomẹna Klistiani nugbo lẹ dọmọ: “Mì wọnji homẹdagbe didohia jonọ lẹ go blo.” (Heb. 13:2,  Odò.) Enẹwutu, mì gbọ mí ni gbadopọnna kanbiọ he bọdego ehelẹ: Nukun tẹwẹ Jehovah nọ yí do pọ́n jonọ lẹ? Naegbọn e sọgan biọ dọ mí ni jla pọndohlan mítọn gando jonọ lẹ go do? Podọ nawẹ mí sọgan gọalọna mẹhe wá sọn otò devo mẹ lẹ nado voawu to agun mítọn mẹ gbọn?

NUKUN HE JEHOVAH NỌ YÍ DO PỌ́N JONỌ LẸ

3, 4. Sọgbe hẹ Eksọdusi 23:9, nawẹ Jiwheyẹwhe jlo dọ omẹ etọn lẹ ni nọ yinuwa hẹ jonọ lẹ gbọn to hohowhenu, podọ etẹwutu?

3 To whenue Jehovah tún omẹ etọn lẹ dote sọn Egipti godo, e na yé todohukanji osẹ́n tọn de he do mẹtọnhopọn nujọnu tọn hia susu mẹhe ma yin Islaelivi bo wá kọnawudopọ hẹ yé lẹ tọn. (Eks. 12:38, 49; 22:21) Na jonọ lẹ nọ saba tin to nuhudo mẹ wutu, Jehovah gbọn owanyi dali ze tito delẹ dai na yé. Jlọjẹ lọ nado wéwélu yin dopo to tito mọnkọtọn lẹ mẹ.Lev. 19:9, 10.

4 Kakati Jehovah ni degbe na Islaelivi lẹ nado do sisi hia jonọ lẹ, e gọalọna yé nado mọ nuhewutu awuvẹmẹ didohia do yin nujọnu. (Hia Eksọdusi 23:9.) Yé yọ́n “nuhe e zẹẹmẹdo nado yin jonọ.” Whẹpo Heblu lẹ tlẹ do lẹzun afanumẹ, vlavo yé ko yin gbigbẹdai gbọn Egiptinu lẹ dali na akọ̀ ṣinṣinyan kavi nuvẹun sinsẹ̀n tọn wutu. (Jen. 43:32; 46:34; Eks. 1:11-14) Islaelivi lẹ tindo numimọ gbẹzan he vẹawu tọn to whenue yé to jonọ-gbéji, ṣigba, Jehovah jlo dọ yé ni nọ yinuwa hẹ jonọ lẹ “taidi tòvi” to ṣẹnṣẹn yetọn.Lev. 19:33, 34.

5. Etẹwẹ na gọalọna mí nado nọ do mẹtọnhopọn Jehovah tọn nkọ hia mẹhe to jonọ-gbéji lẹ?

5 To egbehe, mí sọgan deji dọ ahunmẹdunamẹnu dopolọ wẹ Jehovah nọ tindo gando mẹhe to jonọ-gbéji bo nọ wá opli to agun mítọn mẹ lẹ go. (Deut. 10:17-19; Mal. 3:5, 6) Eyin mí nọ lẹnnupọndo avùnnukundiọsọmẹnu he yé to pipehẹ lẹ ji, taidi akọ̀ ṣinṣinyan kavi nuhahun gbèmase tọn, mí na nọ dín aliho lẹ nado do homẹdagbe po mẹtọnhopọn po hia yé.1 Pita 3:8.

BE E BIỌ DỌ MÍ NI JLA PỌNDOHLAN MÍTỌN GANDO JONỌ LẸ GO DO WẸ YA?

6, 7. Etẹwẹ dohia dọ Klistiani owhe kanweko tintan tọn lẹ plọn nado duto nuvẹun sinsinyẹn lẹ ji?

6 Klistiani owhe kanweko tintan tọn lẹ plọn nado duto nuvẹun sinsinyẹn he doadọ̀do bo gbayipe to Ju lẹ ṣẹnṣẹn ji. To Pẹntikọsti 33 W.M., Klistiani he nọ nọ̀ Jelusalẹm lẹ dlẹnkanna johẹmẹ yetọn jẹ mẹhe wá sọn otò voovo mẹ bo ṣẹṣẹ lẹzun Klistiani lẹ dè. (Owalọ 2:5, 44-47) Mẹtọnhopọn owanyinọ he Klistiani he yin Juvi lẹ dohia yisenọ hatọ he wá sọn otò devo mẹ lẹ dohia dọ yé mọnukunnujẹ hogbe lọ “johẹmẹ” he zẹẹmẹdo “homẹdagbe didohia jonọ lẹ” mẹ.

7 Ṣigba, dile agun Klistiani dowhenu tọn to jijideji, e taidi dọ ninọmẹ akọ̀ ṣinṣinyan tọn de wá aimẹ. Ju he nọ do Glẹkigbe lẹ wule dọ asuṣiọsi emitọn lẹ ma yin nuyiwa hẹ to aliho he sọgbe mẹ. (Owalọ 6:1) Nado didẹ whẹho enẹ, apọsteli lẹ de sunnu ṣinawe nado hẹn ẹn diun dọ mẹdepope ma yin vọdona. Sunnu enẹ lẹpo wẹ tindo yinkọ Glẹkigbe tọn; e taidi dọ apọsteli lẹ wàmọ nado ṣimiyọ́n na gbemanọpọ depope he sọgan ko fọ́n gando akọ̀ ṣinṣinyan go to Klistiani dowhenu tọn lẹ ṣẹnṣẹn.Owalọ 6:2-6.

8, 9. (a) Etẹwẹ sọgan dohia dọ mí tindo nuvẹun kavi nọ ṣinyan akọ̀? (b) Etẹwẹ mí dona họ̀nadọna sọn ahun mítọn mẹ? (1 Pita 1:22)

8 Vlavo mí yọnẹn kavi lala, mímẹpo ji wẹ aṣa mítọn nọ yinuwado sinsinyẹn. (Lom. 12:2) Humọ, vlavo mí nọ sè bọ kọmẹnu, azọ́nwatọgbẹ́, kavi wehọmẹvigbẹ́ mítọn lẹ nọ dọho agọ̀ gando mẹhe wá sọn otò kavi akọ̀ devo mẹ lẹ, kavi mẹhe tindo sinmẹ agbasa tọn devo lẹ go. Obá tẹ mẹ wẹ pọndohlan agọ̀ enẹlẹ ko yinuwado mí ji jẹ? Podọ nawẹ  mí nọ yinuwa gbọn to whenue mẹde ṣàn akọ̀ mítọn kò—vlavo bo jlẹhó zẹjlẹgo gando aṣa mítọn go?

9 Na ojlẹ de, apọsteli Pita tindo nuvẹun na mẹhe ma yin Ju lẹ, ṣigba vudevude e plọn nado họ̀nadọna pọndohlan agọ̀ sọn ahun etọn mẹ. (Owalọ 10:28, 34, 35; Gal. 2:11-14) Mọdopolọ, eyin mí doayi ohia nuvẹun kavi goyiyi tọn depope go to mí mẹ, mí dona dovivẹnu nujọnu tọn nado họ̀nadọna ẹn sọn ahun mítọn mẹ. (Hia 1 Pita 1:22.) Mí sọgan lẹnnupọn sisosiso do nugbo lọ ji dọ depope to mí mẹ ma jẹna whlẹngán; mímẹpo wẹ yin mapenọ, mahopọnna otò he mẹ mí wá sọn. (Lom. 3:9, 10, 21-24) Eyin mọ wẹ, naegbọn mí na do lẹndọ mí yiaga hú mẹdevo? (1 Kọl. 4:7) Mí dona tindo pọndohlan apọsteli Paulu tọn nkọ, mẹhe dọna Klistiani yiamisisadode hatọ etọn lẹ dọ yé “masọ yin jonọ lẹ po mẹhe to jonọ-gbéji lẹ po ba, ṣigba . . . hagbẹ whédo Jiwheyẹwhe tọn tọn lẹ.” (Efe. 2:19) E họnwun dọ, vivẹnudido vẹkuvẹku nado duto nuvẹun tintindo na mẹhe wá sọn otò devo mẹ lẹ ji na gọalọna mí nado ze gbẹtọ-yinyin yọyọ lọ dogo.Kol. 3:10, 11.

LEHE MÍ NA DO HOMẸDAGBE HIA JONỌ LẸ DO

10, 11. Nawẹ Boazi do pọndohlan Jehovah tọn nkọ gando jonọ lẹ go hia to nuyiwa etọn hẹ Luti Moabinu lọ mẹ gbọn?

10 Matin ayihaawe, Boazi do pọndohlan Jehovah tọn nkọ gando jonọ lẹ go hia to nuyiwa etọn hẹ Luti Moabinu lọ mẹ. To whenue Boazi wá nado pọ́n ogle etọn mẹ to jibẹwawhé whenu, e ma sọgan nọma doayi yọnnu jonọ azọ́n sinsinyẹnwatọ he to wélu-wé to jibẹwawhétọ etọn lẹ godo lọ go. To whenue e sè dọ e biọgbè whẹpo do wéwélu—mahopọnna dọ jlọjẹ etọn wẹ nado wàmọ—Boazi gbọn alọtútlú dali na ẹn dotẹnmẹ nado wéwélu etlẹ yin to ohín jinukun tọn he ko yin sinsánliai lẹ ṣẹnṣẹn.Hia Luti 2:5-7, 15, 16.

11 Hodọdopọ he bọdego dohia dọ onú Luti tọn po ninọmẹ owù tọn he mẹ e tin te taidi jonọ de po duahunmẹna Boazi taun. Jẹnukọn whẹ́, e basi oylọna ẹn nado gbọṣi jọja yọnnu etọn lẹ pá ma nado yin kọgbidina gbọn sunnu he to azọ́nwa to ogle lọ mẹ lẹ dali. E tlẹ sọ hẹn ẹn diun dọ e tindo núdùdù po osin po he pemẹnu, taidi pakanọ etọn lẹ. Humọ, Boazi ma de yọnnu jonọ wamọnọ lọ pò gba, kakatimọ, e hẹn ẹn deji.Luti 2:8-10, 13, 14.

12. Nuyiwadomẹji dagbe tẹwẹ homẹdagbe mítọn sọgan tindo do mẹhe ṣẹṣẹ wá sọn otò devo mẹ lẹ ji?

12 E ma yin owanyi matin ṣejannabi he Luti tindo na asu-nọ̀ etọn, Naomi, kẹdẹ wẹ yinuwado Boazi ji gba, ṣigba sinsẹ̀n-basitọ Jehovah tọn he e lẹzun sọ yinuwado e ji ga. Na taun tọn, homẹdagbe Boazi tọn yin dohia owanyi nugbo Jehovah tọn na yọnnu de he wá nado ‘dín fibẹtado to awà Jiwheyẹwhe Islaeli tọn glọ.’ (Luti 2:12, 20; Howh. 19:17) Mọdopolọ to egbehe, homẹdagbe mítọn sọgan gọalọna “gbẹtọ wunmẹ lẹpo” nado kẹalọyi nugbo lọ bo mọ obá he mẹ Jehovah yiwanna yé jẹ.1 Tim. 2:3, 4.

Be mí nọ dọnudo mẹyọyọ lẹ po zohunhun po to whenue yé wá Plitẹnhọ Ahọluduta tọn mẹ ya? (Pọ́n hukan 13 po 14tọ po)

13, 14. (a) Naegbọn mí dona nọ dovivẹnu nado dọnudo jonọ lẹ to Plitẹnhọ Ahọluduta tọn mẹ? (b) Etẹwẹ a sọgan wà eyin e nọ vẹawuna we nado dọnsẹpọ mẹhe wá sọn aṣa devo mẹ lẹ?

13 Mí sọgan do homẹdagbe hia mẹhe wá sọn otò devo mẹ lẹ gbọn nudidọ do yé po zohunhun po to Plitẹnhọ Ahọluduta tọn mẹ dali. Mí sọgan ko doayi e go dọ mẹhe ṣẹṣẹ wá sọn otò devo mẹ lẹ nọ kuwinyan bo ma nọ yawu gbàdo-mẹmẹ. Oplọn he yé yí kavi ninọmẹ yetọn sọgan nọ zọ́n bọ yé na nọ mọdọ emi yìdo hú akọ̀ kavi otò devo mẹ nù lẹ. Enẹwutu, mí dona ze afọdide tintan nado yí ahundopo do dó ojlo nujọnu tọn hia yé. Eyin JW Language app tin to ogbè towe mẹ, e sọgan gọalọna we nado plọn lehe a na dọnudo mẹyọyọ lẹ do to ogbè yetọn mẹ.Hia Filipinu lẹ 2:3, 4.

 14 E sọgan nọ vẹawuna we nado dọnsẹpọ mẹhe wá sọn aṣa devo mẹ lẹ. Nado duto numọtolanmẹ mọnkọtọn lẹ ji, a sọgan dọ nude he gando hiẹ lọsu go na yé. Vlavo to madẹnmẹ, a na mọdọ nuhe mì tindo to kọndopọ mẹ sù hugan nuhe taidi vogbingbọn to ṣẹnṣẹn mìtọn lẹ, podọ aṣa dopodopo wẹ nọ tindo adà dagbe po dehe ma yọ́n sọmọ lẹ po.

GỌALỌNA MẸLẸPO NADO VOAWU

15. Etẹwẹ na gọalọna mí nado nọ mọnukunnujẹ mẹhe to adàdiọ sọgbe hẹ aṣa otò devo tọn lẹ mẹ?

15 Nado gọalọna mẹdevo lẹ nado voawu to agun mẹ, yí ahundopo do kanse dewe dọ, ‘Eyin otò devo mẹ wẹ n’te, nawẹ n’na ko jlo dọ mẹdevo lẹ ni yinuwa hẹ mi gbọn?’ (Mat. 7:12) Nọ fahomẹ hẹ mẹhe to adàdiọ sọgbe hẹ aṣa otò devo tọn lẹ. To tintan whenu, mí sọgan nọma mọnukunnujẹ aliho nulẹnpọn po nuyiwa tọn yetọn lẹ po mẹ to gigọ́ mẹ. Ṣigba, kakati nado donukun dọ yé ni yinuwa sọgbe hẹ aṣa mítọn, naegbọn mí ma na kẹalọyi yé kẹdẹdile yé te do poun?Hia Lomunu lẹ 15:7.

16, 17. (a) Afọdide tẹlẹ wẹ mí sọgan ze nado dọnsẹpọ mẹhe wá sọn aṣa devo mẹ lẹ dogọ? (b) Aliho dagbe tẹlẹ mẹ wẹ mí sọgan gọalọna mẹhe wá sọn otò devo mẹ bo to agun mítọn mẹ lẹ te?

16 Eyin mí nọ tẹnpọn nado plọnnu gando otò po aṣa mẹhe wá sọn otò devo mẹ lẹ po tọn go, e sọgan bọawuna mí nado wanu dopọ hẹ yé. To sinsẹ̀n-bibasi whẹndo tọn mítọn whenu, mí sọgan basi dodinnanu do mẹhe mí ma jẹakọ hẹ to agun mítọn mẹ kavi to aigba-denamẹ mítọn ji lẹ ji. Aliho devo nado dọnsẹpọ mẹhe wá sọn otò devo mẹ lẹ wẹ nado basi oylọna yé nado wá dùnú hẹ mí to owhé mítọn gbè. To whenuena e yindọ Jehovah ko “hùn ohọ̀n yise tọn na akọta lẹ,” be e ma jẹ dọ mílọsu ni hùn ohọ̀n mítọn na jonọ he “gando mí go to yise mẹ lẹ” ya?—Owalọ 14:27; Gal. 6:10; Jobu 31:32.

Be mí nọ do johẹmẹ nujọnu tọn hia mẹyọyọ he wá sọn otò devo mẹ lẹ ya? (Pọ́n hukan 16 po 17tọ po)

17 Gbọn whenu yiyizan hẹ whẹndo he wá sọn otò devo mẹ de dali, mí sọgan yọ́n pinpẹn obá he mẹ yé to vivẹnudo nado diọada sọgbe  hẹ aṣa mítọn jẹ tọn dogọ. Podọ, mí sọgan mọdọ yé tindo nuhudo alọgọ nujọnu tọn nado plọn ogbè lọ. Humọ, be mí sọgan deanana yé yì azọ́nwhé he sọgan gọalọna yé nado mọ adọtẹn he jẹ kavi agbasazọ́n dagbe lẹ mẹ ya? Afọdide enẹlẹ sọgan yinuwado gbẹzan yisenọ hatọ de tọn ji taun.Howh. 3:27.

18. To egbehe, apajlẹ mẹnu tọn wẹ jonọ lẹ sọgan hodo na nuhe dù sisi po pinpẹn-nutọn-yinyọnẹn po didohia?

18 Na nugbo tọn, e na yọ́n dọ jonọ lẹ ni wà nuhe go yé pé lẹpo nado diọada sọgbe hẹ aṣa otò yọyọ he mẹ yé wá tọn. Luti ze apajlẹ dagbe de dai to adà ehe mẹ. Tintan, e do sisi hia na aṣa otò yọyọ etọn tọn gbọn gbè bibiọ nado wéwélu dali. (Luti 2:7) E ma pọ́n jlọjẹ enẹ hlan taidi ahọ́ de he mẹdevo lẹ dù do e. Awetọ, e wleawufo nado do pinpẹn-nutọn-yinyọnẹn hia na homẹdagbe he yin didohia ẹ. (Luti 2:13) Eyin mẹhe wá sọn otò devo mẹ lẹ nọ do walọ dagbe mọnkọtọn hia, ehe sọgan zọ́n bọ tòvi lọ lẹ po yisenọ hatọ lẹ po na na sisi yé dogọ.

19. Whẹwhinwhẹ́n tẹlẹ wutu wẹ mí dona nọ kẹalọyi jonọ he to ṣẹnṣẹn mítọn lẹ?

19 Homẹ mítọn hùn dọ Jehovah ko gbọn nukundagbe majẹhẹ dali hùn dotẹnmẹ dote na mẹhe wá sọn aṣa voovo mẹ lẹ nado sè wẹndagbe lọ. To otò yetọn mẹ, vlavo yé ma penugo nado plọn Biblu kavi dogbẹ́ hẹ omẹ Jehovah tọn lẹ. Ṣigba todin he yé tindo dotẹnmẹ hundote lọ nado kọnawudopọ hẹ mí, be e ma jẹ dọ mí ni gọalọna yé nado voawu to ṣẹnṣẹn mítọn ya? Eyin mí ma tlẹ tindo nususu to agbasa-liho kavi ma sọgan gọalọna jonọ lẹ sọmọ to adà devo lẹ mẹ, homẹdagbe he mí nọ dohia yé nọ yin ohia lọ dọ Jehovah yiwanna yé. Enẹwutu, taidi mẹhe “nọ hodo apajlẹ Jiwheyẹwhe tọn” lẹ, mì gbọ mí ni wà nuhe go mí pé lẹpo nado nọ kẹalọyi jonọ he to ṣẹnṣẹn mítọn lẹ.Efe. 5:1, 2.

^ [1] (hukan 1) Yinkọ lọ ko yin didiọ.