Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Atọ̀họ̀-Nuhihọ́ lọ Tọn—Zinjẹgbonu Oplọn Tọn  |  Octobre 2016

Hẹn Yise Towe Lodo to Nuhe A to Todo lẹ Mẹ

Hẹn Yise Towe Lodo to Nuhe A to Todo lẹ Mẹ

“Yise wẹ yin nukundido dejidego nuhe mí to todo lẹ tọn.”HEB. 11:1.

OHÀN LẸ: 81, 134

1, 2. (a) Nawẹ todido họakuẹ he Klistiani nugbo lẹ tindo gbọnvona todido mẹhe tin to aihọn Satani tọn mẹ lẹ tọn gbọn? (b) Kanbiọ titengbe tẹlẹ wẹ mí na gbadopọnna todin?

LEHE todido he Klistiani nugbo lẹ tindo jiawu sọ! Vlavo mí yin dopo to mẹyiamisisadode kavi “lẹngbọ devo lẹ” mẹ, mímẹpo wẹ tindo todido lọ nado mọ hẹndi lẹndai dowhenu tọn Jiwheyẹwhe tọn po klandowiwe oyín Jehovah tọn po tọn. (Joh. 10:16; Mat. 6:9, 10) Onú dagbe hugan he gbẹtọvi depope sọgan donukun lẹ niyẹn. Mí sọ to jejeji nado dugu ogbẹ̀ madopodo tọn, vlavo taidi hagbẹ “olọn yọyọ lẹ” tọn kavi taidi hagbẹ “aigba yọyọ” Jiwheyẹwhe tọn. (2 Pita 3:13) Ṣigba todin whẹ́, todido mítọn wẹ yindọ omẹ Jiwheyẹwhe tọn lẹ na to jijideji madoalọte.

2 Mẹhe yin apadewhe aihọn Satani tọn lẹ lọsu tindo todido wunmẹ de, ṣigba yé sọgan nọ hanú eyin todido yetọn lẹ na mọ hẹndi gbèdopo. Di apajlẹ, akọhotọ livi susu lẹ sọgan tindo todido lọ dọ emi na dù loteli akuẹgegenu tọn de, ṣigba yé ma sọgan kudeji dọ enẹ na jọ. To vogbingbọn mẹ, yise nujọnu tọn yin “nukundido dejidego” nuhe Klistiani lẹ to todo lẹ tọn. (Heb. 11:1) Ṣigba, a sọgan kanse dewe dọ, nawẹ nukundido ṣie sọgan lodo dogọ gbọn? Podọ, ale tẹlẹ wẹ yise dolido tintindo to nuhe n’to todo lẹ mẹ nọ hẹnwa?

3. Nugbo tẹ ji wẹ yise Klistiani tọn sinai do?

 3 Mẹde ma nọ jọ po yise po; mọ e ma nọ wá to jọwamọ-liho. Ahun dagbe he ji gbigbọ wiwe Jiwheyẹwhe tọn to nuyiwa do wẹ nọ gọalọ nado wleawuna yise Klistiani tọn. (Gal. 5:22) Biblu ma dọ dọ Jehovah tindo yise kavi tindo nuhudo etọn gba. Taidi ganhunupotọ podọ mẹhe yọnnuin hugan lọ, nudepope ma sọgan glọnalina Jehovah nado hẹn lẹndai etọn di. Otọ́ olọn mẹ tọn mítọn kudeji dọ dona he ewọ dopagbe etọn lẹ na mọ hẹndi janwẹ, sọmọ bọ e taidi dọ yé ko yin hinhẹndi to nukun etọn mẹ wẹ nkọ. Enẹwutu, e dọmọ: “Yé ko yin hinhẹndi!” (Hia Osọhia 21:3-6.) Nugbo he ji yise Klistiani tọn sinai do wẹ yindọ Jehovah yin “Jiwheyẹwhe nugbo lọ,” mẹhe nọ hẹn opagbe etọn lẹ di to whepoponu.Deut. 7:9.

NUPINPLỌN SỌN APAJLẸ YISE TỌN OMẸ HOHOWHENU TỌN LẸ TỌN MẸ

4. Todido họakuẹ tẹwẹ sunnu po yọnnu po nugbonọ he nọgbẹ̀ jẹnukọnna ojlẹ Klistiani tọn lẹ tindo?

4 Weta 11tọ owe Heblu lẹ tọn slẹ yinkọ sunnu po yọnnu po 16 he do yise hia delẹ tọn. Wekantọ gbọdo lọ dlẹnalọdo omẹ enẹlẹ po mẹsusu devo lẹ po he “mọ kunnudenu dagbe de yí na yise yetọn wutu” lẹ. (Heb. 11:39) Yemẹpo wẹ tindo “nukundido dejidego” lọ dọ Jiwheyẹwhe na wleawuna “kúnkan” dopagbe lọ nado sukúndona atẹṣiṣi Satani tọn bo hẹn lẹndai dowhenu tọn Jehovah tọn di. (Jen. 3:15) Omẹ nugbonọ enẹlẹ kú whẹpo “kúnkan” dopagbe lọ, Jesu Klisti do hùnali ogbẹ̀ olọn mẹ tọn dote. (Gal. 3:16) Etomọṣo, na yé yọnẹn dọ opagbe Jehovah tọn lẹ ma nọ gboawupo gbede wutu, yé deji dọ yé na yin finfọnsọnku bo lẹzun gbẹtọvi pipé he na nọgbẹ̀ to paladisi aigba ji tọn de mẹ lẹ.Salm. 37:11; Isa. 26:19; Hos. 13:14.

5, 6. Etẹ ji wẹ Ablaham po hagbẹ whẹndo tọn etọn lẹ po ze todido yetọn sinai do, podọ nawẹ yé hẹn yise dolido de go gbọn? (Pọ́n yẹdide he tin to bẹjẹeji hosọ ehe tọn.)

5 Heblu lẹ 11:13 dọho gando delẹ to mẹhe nọgbẹ̀ jẹnukọnna ojlẹ Klistiani tọn lẹ mẹ go dọmọ: “Omẹ ehe lẹpo yin nugbonọ kakajẹ okú, dile etlẹ yindọ yé ma mọ hẹndi opagbe lọ lẹ tọn; ṣigba yé mọ yé hlan olá bo kẹalọyi yé.” Dopo to omẹ enẹlẹ mẹ wẹ Ablaham. Be e ze ayiha do todido ayajẹ tọn lọ he yin ogbẹ̀ to anademẹ “kúnkan” dopagbe lọ tọn glọ ji wẹ ya? Jesu na gblọndo kanbiọ enẹ tọn to aliho he họnwun mẹ to whenue e dọna agọjẹdomẹtọ etọn lẹ dọmọ: “Ablaham otọ́ mìtọn jaya tlala dile e to nukundo nado mọ azán ṣie, ewọ sọ mọ ẹn bo jaya.” (Joh. 8:56) Ehe sọ yin nugbo to whẹho Sala, Isaki, Jakọbu po mẹsusu devo lẹ po tọn mẹ he ze todido yetọn do Ahọluduta sọgodo tọn lọ ji, yèdọ Ahọluduta “he Jiwheyẹwhe wẹ yin yẹdenanutọ po didotọ etọn po.”Heb. 11:8-11.

6 Nawẹ Ablaham po whẹndo etọn po hẹn yise dolido de go gbọn? Yé na ko plọnnu gando Jiwheyẹwhe go gbọn todidoai na omẹ nugbonọ hohowhenu tọn lẹ dali, sọn ohó he wá sọn Jiwheyẹwhe dè gbọn angẹli, numimọ, kavi odlọ lẹ gblamẹ kavi sọn nuhe yé hia to kandai dejidego hohowhenu tọn lẹ mẹ. Humọ, yé ma wọn nuhe yé plọn lẹ, kakatimọ, yé ylọ opagbe Jiwheyẹwhe tọn po nubiọtomẹsi etọn lẹ po dọ nujọnu bo nọ lẹnayihamẹpọn do yé ji. Na todido sunnu po yọnnu ehelẹ tọn po họnwun na yé taun wutu, yé wleawufo nado jiya awusinyẹnnamẹnu depope tọn nado yin nugbonọ na Jiwheyẹwhe.

7. Etẹlẹ wẹ Jehovah ko gbọn homẹdagbe dali wleawu etọn na mí nido wleawuna yise he lodo, podọ nukun tẹwẹ mí dona nọ yí do pọ́n awuwledainanu enẹlẹ?

7 Na mí nido penugo bo hẹn yise he lodo de go, Jehovah gbọn homẹdagbe dali wleawuna Ohó etọn blebu he yin Biblu na mí. Nado yin “ayajẹnọ” bo “tindo kọdetọn dagbe,” mí dona nọ hia Ohó Jiwheyẹwhe tọn to gbesisọ mẹ, yèdọ egbesọegbesọ eyin e yọnbasi. (Salm. 1:1-3; hia Owalọ lẹ 17:11.) Podọ, taidi sinsẹ̀n-basitọ Jehovah tọn he nọgbẹ̀ jẹnukọnna ojlẹ Klistiani tọn lẹ, mí dona nọ lẹnayihamẹpọn do opagbe Jiwheyẹwhe tọn lẹ ji bosọ nọ setonuna nubiọtomẹsi etọn lẹ. Jehovah sọ nọ na mí  núdùdù gbigbọmẹ tọn susugege he mí nọ mọyi gbọn “afanumẹ nugbonọ podọ nuyọnẹntọ lọ” gblamẹ. (Mat. 24:45) Enẹwutu, eyin mí nọ ylọ nuplọnmẹ he mí nọ mọyi sọn awuwledainanu gbigbọmẹ tọn he Jehovah ko hẹn tin-to-aimẹ lẹ mẹ dọ nujọnu, mí na taidi omẹ hohowhenu tọn lẹ he tindo “nukundido dejidego” gando todido Ahọluduta tọn yetọn go.

8. Nawẹ odẹ̀ sọgan hẹn yise mítọn lodo gbọn?

8 Humọ, odẹ̀ gọalọ taun na kunnudetọ he nọgbẹ̀ jẹnukọnna ojlẹ Klistiani tọn lẹ nado hẹn yise dolido de go. Yise yetọn to yinyin hinhẹn lodo dile yé mọ bọ Jiwheyẹwhe to gblọndo na na odẹ̀ yetọn lẹ. (Nẹh. 1:4, 11; Salm. 34:4, 15, 17; Dan. 9:19-21) Mílọsu sọgan kọ̀n ahun mítọn jẹgbonu na Jehovah po jide lọ po dọ e na sè mítọn bo na na mí huhlọn nado doakọnnanu po ayajẹ po. Podọ to whenue mí mọ gblọndo na odẹ̀ mítọn lẹ, enẹ nọ hẹn yise mítọn lodo dogọ. (Hia 1 Johanu 5:14, 15.) To whenuena e yindọ yise yin adà sinsẹ́n gbigbọ tọn de, mí dona to gbigbọ Jiwheyẹwhe tọn ‘biọ zọnmii’ dile Jesu na mí tuli nado nọ wà do.Luku 11:9, 13.

9. Gbọnvona dẹ̀hiho na mídetiti, mẹdevo tẹlẹ wẹ mí dona nọ hodẹ̀ na?

9 Ṣigba, odẹ̀ mítọn lẹ ma dona nọte do alọgọ Jiwheyẹwhe tọn bibiọ kẹdẹ ji gba. “Azọ́njiawu” he wutu mí sọgan nọ dopẹna Jehovah bo nọ pà ẹ egbesọegbesọ lẹ “sù hugan nuhe sọgan yin sislẹ!” (Salm. 40:5) Gbọnvona enẹ, odẹ̀ mítọn lẹ dona nọ dohia dọ mí “nọ hẹn mẹhe to gànpamẹ lẹ do ayiha mẹ, taidi dọ [mílọsu] ko yin zizedo gànpamẹ hẹ yé wẹ nkọ.” Podọ mí dona nọ hodẹ̀ na pipli mẹmẹsunnu mítọn lẹ tọn lẹdo aihọn pé, titengbe “mẹhe to anadenanu to ṣẹnṣẹn [mítọn] lẹ.” Eyin mí mọ lehe Jehovah na gblọndo odẹ̀ he hò mí te to pọmẹ tọn do, enẹ nọ yinuwado mí ji taun!Heb. 13:3, 7.

YÉ GBẸ́ NADO JOGBE

10. Apajlẹ devizọnwatọ Jiwheyẹwhe tọn he gbẹ́ nado jogbe tẹlẹ tọn wẹ mí tindo, podọ etẹwẹ na yé huhlọn nado wàmọ?

10 To Heblu lẹ weta 11tọ mẹ, apọsteli Paulu dọho gando whlepọn he devizọnwatọ Jiwheyẹwhe tọn he susu to yé mẹ sin yinkọ ma yin sislẹ lẹ doakọnna go. Di apajlẹ, apọsteli lọ donù yọnnu yisenọ delẹ he hẹn visunnu yetọn lẹ bu to okú mẹ ṣigba he sọ wá gọ̀ yé mọyi gbọn fọnsọnku dali lẹ go. Enẹgodo, e donù mẹdevo lẹ go he “ma kẹalọyi tundote gbọn ofligọ wunmẹ de dali . . ., na yé nido sọgan mọ fọnsọnku he yọ́n hugan de yí.” (Heb. 11:35) Dile etlẹ yindọ mí ma sọgan dọ mẹhe Paulu tindo to ayiha mẹ lẹ na taun tọn, mẹdelẹ taidi Naboti po Zekalia po yin zannu dlan do hù, na yé setonuna Jiwheyẹwhe bo wà ojlo etọn wutu. (1 Ahọ. 21:3, 15; 2 Otàn. 24:20, 21) E họnwun dọ Daniẹli po gbẹdohẹmẹtọ etọn lẹ po tindo dotẹnmẹ lọ nado jogbe bo “kẹalọyi tundote.” Ṣigba to linlẹn de mẹ, yise yetọn to huhlọn Jiwheyẹwhe tọn mẹ hẹn yé penugo nado “bọnùdo na kinnikinni lẹ” bo “doalọtena huhlọn miyọ́n tọn.”Heb. 11:33, 34; Dan. 3:16-18, 20, 28; 6:13, 16, 21-23.

11. Whlepọn tẹlẹ wẹ yẹwhegán delẹ doakọnna na yise yetọn wutu?

11 Na yise he yẹwhegán taidi Mikaia po Jelemia po tindo wutu, yé “mọ whlepọn yetọn yí gbọn vlẹko lẹ . . . po gànpamẹninọ lẹ po” dali. Mẹdevo lẹ, taidi Elija, “flu gbọn danfafa lẹ ji, osó lẹ ji, oslò lẹ po odò aigba tọn lẹ po mẹ.” Yemẹpo wẹ doakọnnanu, na yé tindo “nukundido dejidego nuhe [yé] to todo lẹ tọn” wutu.Heb. 11:1, 36-38; 1 Ahọ. 18:13; 22:24-27; Jel. 20:1, 2; 28:10, 11; 32:2.

12. Mẹnu wẹ ze apajlẹ akọndonanu tọn daho hugan lọ dai, podọ etẹwẹ gọalọna ẹn nado wàmọ?

12 To whenue Paulu ko dọhodo sunnu po yọnnu po yisenọ voovo lẹ ji godo, e zinnudo apajlẹ daho hugan lọ ji, enẹ wẹ Oklunọ mítọn Jesu Klisti. Heblu lẹ 12:2 dọmọ: “Na ayajẹ he yin zizedonukọnna ẹn wutu, e doakọnna yatin de, bo ma hò winyan lọ pọ́n, bo ko sọ sinai to adusilọ ofìn Jiwheyẹwhe tọn mẹ.” Na  nugbo tọn, mí dona “nọ yí sọwhiwhe do lẹn” apajlẹ yise tọn he Jesu dohia to whenue e pannukọn whlepọn he sinyẹn hugan lọ “pọ́n.” (Hia Heblu lẹ 12:3.) Dile Jesu wà do, Klistiani dowhenu tọn he kú do sinsẹ̀n tamẹ lẹ, taidi devi Antipa, gbẹ́ nado jogbe. (Osọ. 2:13) Yé na mọ ahọsumẹ fọnsọnku olọn mẹ tọn yí—yèdọ fọnsọnku de he sọ pọnte taun hugan “fọnsọnku he yọ́n hugan” lọ, ehe yisenọ hohowhenu tọn lẹ tindo todido etọn. (Heb. 11:35) Ojlẹ de to jiji Ahọluduta lọ tọn to 1914 godo, mẹyiamisisadode nugbonọ enẹ lẹpo he to amlọndọ to okú mẹ yin finfọnsọnku na ogbẹ̀ gbigbọmẹ tọn to olọn mẹ nado dugán hẹ Jesu do gbẹtọvi lẹ ji.Osọ. 20:4.

APAJLẸ YISE TỌN EGBEZANGBE TỌN LẸ

13, 14. Whlepọn tẹlẹ wẹ Rudolf Graichen pehẹ, podọ etẹwẹ gọalọna ẹn nado doakọnna?

13 Sinsẹ̀n-basitọ Jiwheyẹwhe tọn egbezangbe tọn livi susu lẹ wẹ to apajlẹ Jesu tọn hodo gbọn ayiha yetọn lẹpo zizedo todido yetọn ji dali bo ma nọ na dotẹnmẹ whlepọn lẹ nado dekanpona yise yetọn. Lẹnnupọndo apajlẹ Rudolf Graichen he yin jiji to Allemagne to 1925 tọn ji. E nọ flin yẹdide nujijọ Biblu tọn lẹ tọn he tin to adógo to owhé etọn gbè. E wlan dọmọ: “Dopo to yẹdide lọ lẹ mẹ do ohla po lẹngbọvu po, gbọgbọẹvu po opọ̀ po, oyìnvu po kinnikinni po hia, bọ yemẹpo to jijọho mẹ bọ yọpọ sunnu de to anadena yé. . . . Yẹdide  enẹlẹ yinuwado ji e taun.” (Isa. 11:6-9) Mahopọnna dọ Rudolf pehẹ homẹkẹn sinsinyẹn na owhe susu lẹ sọn ponọ Gestapo Nazi tọn lẹ dè, podọ to nukọn mẹ sọn gandudu Communiste Stasi Whèzẹtẹn-waji Allemagne tọn dè, ewọ tẹdo yise dolido etọn gando paladisi aigba ji tọn de go.

14 Whlepọn sinsinyẹn devo lẹ he Rudolf pehẹ wẹ okú onọ̀ vivẹ́ etọn tọn, he azọ̀n ovà-gbó tọn hù to osla yasanamẹ Ravensbrück tọn mẹ, gọna otọ́ etọn he yise etọn miọn sọmọ bọ e doalọwemẹ nado dohia dọ emi masọ yin dopo to Kunnudetọ Jehovah tọn lẹ mẹ ba. To whenue Rudolf yin tuntundote sọn gànpamẹ godo, e tindo lẹblanulọkẹyi lọ nado sẹ̀n taidi nugopọntọ lẹdo tọn bo wá yin oylọ-basina yì Wehọmẹ Giliadi tọn. E yin didohlan Chili taidi mẹdehlan de bosọ sẹ̀n to finẹ whladopo dogọ taidi nugopọntọ lẹdo tọn. Ṣigba, whlepọn Rudolf tọn lẹ ma ko fó. Owhe dopo to whenue e dà Patsy he yin mẹdehlan hatọ de godo, viyọnnu pẹvi yetọn kú. To nukọn mẹ, asi vivẹ́ etọn he tindo owhe 43 poun lọsu kú. Rudolf doakọnna whlepọn enẹ lẹpo, podọ mahopọnna dọ e ko poyọnho bo ma tindo agbasalilo, e gbẹ́ to sinsẹ̀n taidi gbehosọnalitọ whepoponu tọn podọ mẹho agun tọn de kakajẹ whenue otàn gbẹzan tọn etọn sọawuhia to Atọ̀họ̀-Nuhihọ́ lọ Tọn 1er août 1997 (Flansegbe) weda 20-25 tọn mẹ. [1]

15. Apajlẹ Kunnudetọ Jehovah tọn egbezangbe tọn he yí ayajẹ do doakọnna homẹkẹn tẹlẹ wẹ mí tindo?

15 Kunnudetọ Jehovah tọn lẹ zindonukọn nado to ayajẹ to todido yetọn mẹ, mahopọnna whlepọn sinsinyẹn madoalọte he yé nọ pehẹ lẹ. Di apajlẹ, susu to mẹmẹsunnu po mẹmẹyọnnu mítọn lẹ po mẹ wẹ yin súsú do gànmẹ to Érythrée, Singapour, po Corée du Sud po, podọ suhugan yetọn wẹ tin to ninọmẹ enẹ mẹ, na yé yinuwa sọgbe hẹ hogbe Jesu tọn lẹ ma nado ze ohí do mẹdevo ji wutu. (Mat. 26:52) Delẹ to gàntọ kanweko susu ehelẹ mẹ wẹ Isaac Negede po Paulos po, he ko to gànmẹ na owhe 20 linlán todin to Érythrée! Mẹmẹsunnu ehelẹ ma yin dotẹnmẹna nado penukundo mẹjitọ yetọn he ko poyọnho lẹ go podọ nado wlealọ, etomọṣo, yé hẹn nugbonọ-yinyin yetọn go mahopọnna yasanamẹ sinsinyẹn. Ayajẹ he sọawuhia to nukunta yetọn dile mí mọ do to nọtẹn Intẹnẹt tọn mítọn jw.org ji, dohia dọ yé hẹn yise dolido yetọn go. Gàntọ-ṣọ́tọ yetọn lẹ tlẹ wá jẹ sisi na yé ji.

Be a to alemọyi sọn apajlẹ yise tọn egbezangbe tọn he tin to agun towe mẹ lẹ mẹ ya? (Pọ́n hukan 15 po 16tọ po)

16. Nawẹ yise dolido sọgan basi hihọ́na we gbọn?

16 Suhugan omẹ Jehovah tọn lẹ tọn ma ko pehẹ homẹkẹn sinsinyẹn dandan gba. Whlepọn yise tọn yetọn lẹ nọ gbọnvo. Mẹsusu ko tin to dandannu glọ nado doakọnna ohẹ́n kavi jiya to tòwhan kavi nugbajẹmẹji jọwamọ tọn lẹ whenu. Mẹdevo lẹ hodo apajlẹ Mose po tọgbó lẹ po tọn bo gbẹ́ gbẹzan fẹẹmẹninọ tọn kavi yindidi dai. Yé dovivẹnu sinsinyẹn ma nado joawuna gbẹzan agbasanu lẹ bibẹpli po ṣejannabi po tọn. Etẹwẹ nọ hẹn yé penugo nado wàmọ? Nulọ wẹ, owanyi yetọn na Jehovah podọ yise dolido yetọn to opagbe lọ mẹ dọ, ewọ na jla mawadodo lẹpo do bo na yí ogbẹ̀ madopodo to aihọn yọyọ dodowiwa tọn de mẹ do suahọ sinsẹ̀n-basitọ nugbonọ etọn lẹ.Hia Salmu lẹ 37:5, 7, 9, 29.

17. Etẹwẹ a magbe nado wà, podọ etẹwẹ na yin hodọdeji to hosọ he bọdego mẹ?

17 To hosọ ehe mẹ, mí ko mọ lehe ayihamẹlinlẹnpọn do opagbe Jiwheyẹwhe tọn lẹ ji po dẹ̀hiho to gbesisọ mẹ po na gọalọna mí nado hẹn yise dolido de go do. Yise mọnkọtọn wẹ na hẹn mí penugo nado doakọnna whlepọn yise tọn lẹ dile mí yí “nukundido dejidego” do ze ayiha mítọn lẹpo do todido Klistiani tọn mítọn ji. Ṣigba, dile hosọ he bọdego na dohia do, zẹẹmẹ he Biblu basi do yise ji bẹ nudevo lẹ hẹn ga.

^ [1] (hukan 14tọ) Sọ pọ́n hosọ lọ Les épreuves n’ont pas terni mon espéranceto Réveillez-vous! 22 avril 2002 he mẹ otàn gbẹzan Andrej Hanák tọn he wá sọn Slovaquie sọawuhia te mẹ.