Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Atọ̀họ̀-Nuhihọ́ lọ Tọn—Zinjẹgbonu Oplọn Tọn  |  Mars 2016

Jọja lẹ Emi—Nawẹ Mì Sọgan Wleawudaina Baptẹm Yíyí Gbọn?

Jọja lẹ Emi—Nawẹ Mì Sọgan Wleawudaina Baptẹm Yíyí Gbọn?

“Homẹ ṣie hùn nado wà ojlo towe, Jiwheyẹwhe ṣie E.”—PS. 40:8.

OHÀN LẸ: 5158

1, 2. (a) Basi zẹẹmẹ nuhewutu baptẹm do yin afọdide titengbe de tọn. (b) Etẹlẹ wẹ mẹde dona hẹn diun dọ emi wà whẹpo do yí baptẹm?

BE JỌJA de wẹ a yin bo to nulẹnpọn do baptẹm yíyí ji ya? Eyin mọ wẹ, lẹblanulọkẹyi daho hugan he gbẹtọvi de sọgan duvivi etọn wẹ to nukọnna we. Ṣigba, dile hosọ he jẹnukọn dohia do, baptẹm yin afọdide titengbe de. E nọ do klandowiwe towe hia, yèdọ opagbe vonọtaun he a do na Jehovah dọ emi na sẹ̀n ẹn kakadoi gbọn ojlo etọn zizedo otẹn tintan mẹ to gbẹzan towe mẹ dali. E họnwun dọ whenue a dona yí baptẹm wẹ whenue a pegan nado basi nudide enẹ, bo tindo ojlo nado wàmọ, bosọ mọnukunnujẹ nuhe klandowiwe zẹẹmẹdo mẹ.

2 Etẹwẹ lo eyin e ma họnwun na we dọ a ko wleawufo nado yí baptẹm? Kavi etẹwẹ lo eyin a jlo na yí baptẹm bọ mẹjitọ towe lẹ mọdọ a dona nọte whẹ́, vlavo kakajẹ whenue a na whèwhín dogọ to gbigbọ-liho? Eyin a tin to depope to ninọmẹ awe enẹlẹ mẹ, ma gbọjọ blo. Kakatimọ, yí dotẹnmẹ hundote enẹ zan nado yinukọn, na a nido sọgan pegan to ojlẹ vude godo nado yí baptẹm. Po enẹ po to ayiha mẹ, lẹnnupọndo lehe a sọgan ze yanwle lẹ dai gando (1) nuyise towe lẹ (2) nuyiwa towe lẹ, podọ (3) pinpẹn-nutọn-yinyọnẹn towe go do ji.

 NUYISE TOWE LẸ

3, 4. Etẹwẹ jọja lẹ sọgan plọn sọn apajlẹ Timoti tọn mẹ?

3 Lẹnnupọndo lehe a sọgan na gblọndo kanbiọ ehelẹ tọn do ji: Naegbọn n’do yise dọ Jiwheyẹwhe tin? Etẹwẹ hẹn mi kudeji dọ Biblu yin Ohó gbọdo Jiwheyẹwhe tọn? Naegbọn n’do lẹndọ gbẹninọ sọgbe hẹ nujinọtedo walọ dagbe tọn Jiwheyẹwhe tọn lẹ pọnte hugan gbẹninọ sọgbe hẹ walọyizan aihọn tọn lẹ? Kanbiọ enẹlẹ ma yin awuwlena nado fọ́n ayihaawe dote to ahun towe mẹ gba. Kakatimọ, yé sọgan gọalọna we nado yinuwa sọgbe hẹ tudohomẹnamẹ apọsteli Paulu tọn dọmọ: [] mọdona ojlo Jiwheyẹwhe tọn he yọ́n, bo yin alọkẹyi bosọ yin pipé lọ.” (Lom. 12:2) Ṣigba, naegbọn hiẹ dona wà ehe?

4 Lẹnnupọndo apajlẹ Biblu tọn de ji. Timoti yọ́n Owe-wiwe lẹ ganji. Onọ̀ po onọ̀-daho etọn po ko plọn ẹn sọn “ovu whenu gbọ́n.” Etomọṣo Paulu na tuli Timoti dọmọ: “Zindonukọn to nuhe hiẹ ko plọn bo ko yin linlẹndiọna nado yise lẹ mẹ.” (2 Tim. 3:14, 15) Sọgbe hẹ owe alọdlẹndonu tọn de, hogbe dowhenu tọn he yin lilẹdo “yin linlẹndiọna” zẹẹmẹdo “nado wá tindo nujikudo bosọ deji dọ nude yin nugbo.” Timoti ko hẹn nugbo lọ zun ede tọn. E kẹalọyi nugbo lọ, e ma yin na onọ̀ po onọ̀-daho etọn po dọna ẹn nado wàmọ wutu gba, ṣigba na e ko lẹnayihamẹpọn do nugbo lọ ji na ede bo yin linlẹndiọna wutu.—Hia Lomunu lẹ 12:1.

5, 6. Naegbọn e do yin nujọnu dọ a ni plọn nado nọ yí “huhlọn nulẹnpọn tọn” towe zan sọn ovu whenu?

5 Etẹwẹ dogbọn hiẹ dali? Vlavo a ko yọ́n nugbo Biblu tọn lẹ sọn whenu dindẹn die. Eyin mọ wẹ, naegbọn a ma na yí do basi yanwle nado gbadopọnna whẹwhinwhẹ́n nuyise towe lẹ tọn po sọwhiwhe po? Mọwiwà na hẹn nujikudo towe lodo dogọ bo nasọ gọalọna we nado duto kọgbidinamẹ hagbẹ tọn, nuzedonukọnnamẹ aihọn tọn kavi etlẹ yin numọtolanmẹ towe lẹ lọsu ji.

6 Pinplọn nado nọ yí “huhlọn nulẹnpọn tọn” towe zan sọn ovu whenu na gọalọna we to nukọn mẹ nado nọ na gblọndo he sọgbe hagbẹ towe lẹ to whenue yé na kàn kanbiọ delẹ sè we taidi: ‘Etẹwẹ hẹn we kudeji dọ Jiwheyẹwhe de tin? Naegbọn Jiwheyẹwhe owanyinọ de nado jotẹnna nuylankan? Naegbọn Jiwheyẹwhe ma tindo bẹjẹeji?’ Eyin a wleawudai jẹnukọn, kanbiọ enẹlẹ ma na hẹn yise towe gbọjọ, kakatimọ yé na dozolanmẹ na we nado nọ basi oplọn mẹdetiti tọn dogọ.

7-9. Nawẹ anademẹwe nupinplọn tọn he nọ sọawuhia to hosọ lọ “Etẹwẹ Biblu Plọn Mí Taun?” glọ to Intẹnẹt ji lẹ sọgan hẹn nujikudo towe gando nuyise towe lẹ go lodo gbọn?

7 Oplọn mẹdetiti tọn bibasi po sọwhiwhe po sọgan gọalọna we nado nọ na gblọndo na kanbiọ lẹ, nado duto ayihaawe depope ji podọ nado hẹn nujikudo he a tindo gando nuyise towe lẹ go lodo. (Owalọ 17:11) Mí ko mọ azọ́nwanu susu yí, ehe sọgan gọalọna we nado wà enẹ. Mẹsusu ko mọdọ dogbigbapọnna alọnuwe lọ Cinq questions à se poser sur l’origine de la vie po owe Y a-t-il un Créateur qui se soucie de vous? po gọalọna emi. Humọ, jọja susu yiwanna hosọ lọ “Etẹwẹ Biblu Plọn Mí Taun?” he tin to Intẹnẹt ji, bosọ mọaleyi sọn e mẹ. Anademẹwe nupinplọn tọn he nọ yin didetọn debọdo-dego ehelẹ sọgan yin mimọ to jw.org ji. Pọ́n NUHE BIBLU PLỌN MÍ glọ. Anademẹwe nupinplọn tọn lọ lẹ dopodopo yin awuwlena nado gọalọna we, na a nido hẹn nujikudo towe gando hosọ Biblu tọn de go lodo.

8 Na a ko jẹakọ hẹ Biblu wutu, a sọgan yawu na gblọndo na delẹ to kanbiọ lọ lẹ mẹ, ehe sọawuhia to anademẹwe nupinplọn tọn lọ lẹ ji. Amọ́, naegbọn a do kudo gblọndo he a na lẹ ji? Anademẹwe nupinplọn tọn lọ lẹ na hẹn we lẹnnupọndo wefọ Biblu tọn delẹ ji bo nasọ biọ to asi we nado kàn linlẹn towe gando wefọ enẹlẹ go dai. Yé sọgan gọalọna we nado wleawudai nado basi zẹẹmẹ na mẹdevo lẹ gando nuyise sinai do Biblu ji towe lẹ go. Hosọ Intẹnẹt ji tọn lọ “Etẹwẹ Biblu Plọn Mí Taun?” to alọgọna jọja susu nado hẹn nujikudo yetọn gando nuyise yetọn lẹ go lodo. Eyin a sọgan yì nọtẹn ehe ji, naegbọn a ma na basi tito nado  nọ gbadopọnna anademẹwe nupinplọn tọn lọ lẹ to oplọn mẹdetiti tọn towe whenu?

9 To whenue a to nujikudo towe gando nuyise towe lẹ go hẹn lodo, afọdide titengbe he nọ planmẹ jẹ baptẹm kọ̀n de ze wẹ a te. Mẹmẹyọnnu aflanmẹ de dọmọ: “Whẹpo n’do basi nudide nado yí baptẹm, n’plọn Biblu bo mọdọ sinsẹ̀n nugbo lọ die. Podọ to azán dopodopo ji, nujikudo enẹ nọ to sinsinyẹn deji.”

WALỌ TOWE LẸ

10. Naegbọn e do sọgbe nado donukun dọ Klistiani he yí baptẹm de ni tindo walọ he sọgbe hẹ yise etọn?

10 Biblu dọmọ: “Yise, eyin e ma tindo azọ́n lẹ, yin oṣiọ to ede mẹ.” (Jak. 2:17) Eyin a tindo yise nujọnu tọn, nuhe sọgbe wẹ e yin nado donukun dọ a ni do e hia to walọ towe lẹ mẹ. Walọ tẹlẹ wẹ? Biblu dọho gando “walọ wiwe lẹ po nuyiwa mẹdezejo na Jiwheyẹwhe tọn lẹ po” go.—Hia 2 Pita 3:11.

11. Basi zẹẹmẹ hodidọ lọ “walọ wiwe lẹ” tọn.

11 Nado sọgan do “walọ wiwe lẹ” hia, a dona wé to walọyizan-liho. Nawẹ a to nuyiwa gbọn to whẹho ehe mẹ? Di apajlẹ, lẹnnupọndo osun ṣidopo he wayi lẹ ji. Nawẹ a ko dohia dọ a plọn “huhlọn wuntuntun tọn” towe nado nọ yọ́n vogbingbọn to dagbe po oylan po ṣẹnṣẹn gbọn? (Heb. 5:14) Be a sọgan flin ninọmẹ delẹ he mẹ a duto whlepọn kavi kọgbidinamẹ hagbẹ tọn ji te ya? Be walọyizan towe to wehọmẹ nọ na kunnudide dagbe gando yise towe go ya? Be kakati nado yiavùnlọna yise towe a nọ dohia dọ a ma gbọnvona klasigbẹ́ towe lẹ, na yé nikaa ṣàn we kò wutu wẹ ya? (1 Pita 4:3, 4) Na nugbo tọn, gbẹtọvi pipé de ma tin. Mẹhe tlẹ ko to Jehovah sẹ̀n sọn ojlẹ dindẹn die lẹ lọsu sọgan kuwinyan nado yiavùnlọna yise yetọn to mẹsusu nukọn to whedelẹnu. Ṣigba, mẹhe ko klan ede do wiwe na Jehovah nọ doawagun nado tindo oyín Jiwheyẹwhe tọn to ota, podọ e nọ do ehe hia gbọn walọyizan etọn dali.

12. Etẹwẹ yin delẹ to “nuyiwa mẹdezejo na Jiwheyẹwhe tọn lẹ” mẹ, podọ nukun tẹwẹ hiẹ dona nọ yí do pọ́n yé?

12 Etẹwẹ dogbọn “nuyiwa mẹdezejo na Jiwheyẹwhe tọn lẹ” dali? Ehelẹ nọ bẹ nuhe hiẹ nọ wà to agun mẹ lẹ hẹn, taidi opli lẹ yìyì po mahẹ tintindo to lizọnyizọn lọ mẹ po. Yé sọ nọ bẹ nuwiwa gbigbọmẹ tọn he mẹdevo lẹ ma nọ mọ lẹ hẹn, taidi odẹ̀ mẹdetiti tọn towe lẹ po oplọn mẹdetiti tọn po. Mẹhe ko klan gbẹzan etọn do wiwe na Jehovah ma na pọ́n nuwiwa ehelẹ hlan taidi agbànpẹnmẹnu. Kakatimọ, e na tindo pọndohlan Ahọlu Davidi tọn, mẹhe dọmọ: “Homẹ ṣie hùn nado wà ojlo towe, Jiwheyẹwhe ṣie E: nugbo, osẹ́n towe tin to yẹn homẹ dọ́n.”—Ps. 40:8.

13, 14. Awuwledainanu tẹwẹ sọgan gọalọna we nado do “nuyiwa mẹdezejo na Jiwheyẹwhe tọn lẹ” hia, podọ nawẹ jọja delẹ ko mọaleyi sọn awuwledainanu enẹ mẹ gbọn?

13 Nado gọalọna we nado ze yanwle lẹ dai, apotin de yin awuwlena do weda 308 po 309 po tọn ji to owe lọ Les jeunes s’interrogent—Réponses pratiques, Bladopọ 2tọ mẹ. Apotin ehe na hẹn we nado na gblọndo na kanbiọ delẹ taidi “Quelle est la précision de vos prières, et que révèlent-elles sur votre amour pour Jéhovah?” (Etẹlẹ ji wẹ a nọ zinnudo to odẹ̀ towe lẹ mẹ, podọ etẹwẹ odẹ̀ towe lẹ nọ dohia gando owanyi towe na Jehovah go?) “Qu’incluez-vous dans votre étude individuelle?” (Etẹwẹ oplọn mẹdetiti tọn towe nọ bẹhẹn?) “Allez-vous prêchez même si vos parents n’y vont pas?” (Be a nọ tọ́n na lizọnyizọn lọ eyin mẹjitọ towe lẹ ma tlẹ tọ́n ya?) Tẹnmẹ de sọ yin awuwlena do apotin lọ mẹ na we nado kàn yanwle depope he a jlo na zedai gando odẹ̀ towe lẹ, oplọn mẹdetiti tọn, po lizọnyizọn lọ po go dai.

14 Susu jọja he to nulẹnpọn do baptẹm ji lẹ tọn ko mọdọ apotin ehe yin azọ́nwanu họakuẹ de. Mẹmẹyọnnu jọja de he nọ yin Tilda dọmọ: “N’yí apotin ehe zan nado ze yanwle lẹ dai. N’jẹ yanwle enẹlẹ kọ̀n dopodopo, podọ n’wleawufo nado yí baptẹm to nudi owhe dopo godo.” Mẹmẹsunnu jọja de he nọ yin Patrick lọsu mọaleyi sọn apotin lọ yiyizan mẹ. E dọmọ: “N’yọ́n nuhe yin yanwle ṣie lẹ, amọ́, kinkan yé dai hẹn mi nado dovivẹnu bo jẹ yé kọ̀n.”

Be a na to Jehovah sẹ̀n zọnmii eyin mẹjitọ towe lẹ ma tlẹ wàmọ ya? (Pọ́n hukan 15)

15. Naegbọn klandowiwe dona yin nudide mẹdetiti tọn?

 15 Dopo to kanbiọ he hẹnmẹ lẹnnupọn hugan to apotin ehe mẹ lẹ mẹ wẹ: “Serviriez-vous Jéhovah même si vos parents et vos amis cessaient de le faire?” (Be a na sẹ̀n Jehovah eyin mẹjitọ towe lẹ po họntọn towe lẹ po tlẹ jo ewọ do ya?) Flindọ, taidi Klistiani he basi klandowiwe bo yí baptẹm de, hiẹ lọsu wẹ na dogbè dewe tọn na Jehovah. A ma dona nọtepọn mẹdevo lẹ etlẹ yin mẹjitọ towe lẹ whẹpo do sẹ̀n ewọ. Walọ wiwe towe lẹ po nuyiwa mẹdezejo na Jiwheyẹwhe tọn towe lẹ po nọ dohia dọ a ko hẹn nugbo lọ zun towe bosọ to nukọnyi nado jẹ baptẹm kọ̀n.

PINPẸN-NUTỌN-YINYỌNẸN TOWE

16, 17. (a) Etẹwẹ dona whàn mẹde nado lẹzun Klistiani? (b) Apajlẹ tẹwẹ do pinpẹn-nutọn-yinyọnẹn tintindo na ofligọ lọ hia?

16 Dawe de he mọnukunnujẹ Osẹ́n Mose tọn mẹ ganji kanse Jesu dọmọ: “Gbedide tẹwẹ klohugan to Osẹ́n lọ mẹ?” Jesu gblọn na ẹn dọmọ: “Hiẹ dona yí ahun towe lẹpo, alindọn towe lẹpo, podọ ayiha towe lẹpo do yiwanna Jehovah Jiwheyẹwhe towe.” (Mat. 22:35-37) Tofi, Jesu do nuhe dona nọ whàn mí nado wà azọ́n Klistiani tọn lẹ, podọ nado yí baptẹm hia, enẹ wẹ owanyi ahundopo tọn tintindo na Jehovah. Aliho dagbe hugan he mẹ a sọgan hẹn owanyi towe na Jehovah siso deji te wẹ nado lẹnayihamẹpọn do nunina daho hugan he Jehovah wleawu etọn na mí lọ ji, yèdọ avọ́sinsan ofligọ Visunnu etọn tọn. (Hia 2 Kọlintinu lẹ 5:14, 15; 1 Johanu 4:9, 19.) Ayihamẹlinlẹnpọn do ofligọ lọ po ale he e na hẹnwa na we lẹ po ji na whàn we nado do pinpẹn-nutọn-yinyọnẹn towe hia.

17 Apajlẹ de die he sọgan do numọtolanmẹ he a dona tindo gando ofligọ lọ go hia: Mí ni dọ dọ a to otọ̀ kú bọ mẹde wá whlẹn we. Be a na yì whégbè poun bo súnsún agbasa bo na wọn nuhe mẹlọ wà na we wẹ ya? E họnwun dọ a ma na wàmọ! Matin ayihaawe, a na mọdọ a duahọdo mẹhe whlẹn we lọ. Nugbo lọ wẹ yindọ, a duahọ ogbẹ̀ towe tọn do mẹlọ! Ṣigba, ahọ́ he mí dù do Jehovah Jiwheyẹwhe po Jesu Klisti po hugan mọ. Matin ofligọ lọ, dopodopo mítọn wẹ na dọ̀n do ylando po okú po sin alọ mẹ. Ṣigba, na nuyiwa owanyi tọn he klohugan lọ wutu, mí wá tindo todido he ma pé awe lọ nado nọgbẹ̀ kakadoi to paladisi mẹ to aigba ji!

18, 19. (a) Naegbọn a ma dona dibu nado ze dewe jo na Jehovah? (b) Nawẹ Jehovah sinsẹ̀n nọ hẹn gbẹzan towe pọnte gbọn?

18 Be a yọ́n pinpẹn nuhe Jehovah wà na we tọn ya? Eyin mọ wẹ, e na sọgbe dọ a ni klan gbẹzan towe do wiwe na Jehovah bo yí baptẹm. Flindọ, klandowiwe zẹẹmẹdo opà mẹdetiti tọn didona Jehovah nado wà ojlo etọn mahopọnna nudepope he na jọ. Be e jẹ dọ  obu ni di we nado basi gbemima mọnkọtọn wẹ ya? Gbede pọ́n! Hẹn do ayiha mẹ dọ Jehovah to dagbe towe dín podọ ewọ wẹ “ahọsumẹtọ mẹhe to dindin in vẹkuvẹku lẹ tọn.” (Heb. 11:6) Klandowiwe bibasi hlan Jehovah po baptẹm yíyí po ma na hẹn gbẹzan towe gble. Kakatimọ, Jehovah sinsẹ̀n na hẹn gbẹzan towe pọnte dogọ. Mẹmẹsunnu owhe 24 mẹvi de he ko yí baptẹm whẹpo do biọ owhe aflanmẹ tọn mẹ dọmọ: “Eyin n’whẹ́n hugan mọ wẹ, n’sọgan ko mọnukunnujẹnumẹ taun, ṣigba nudide ṣie nado klan dee do wiwe na Jehovah gọalọna mi ma nado doafọna yanwle aihọn tọn lẹ.”

19 Lehe Jehovah gbọnvona Satani he nọ do ojlo hia to hiẹ mẹ na ale etọn kẹdẹ wutu do sọ! Ahọsumẹ he ma na dẹn-to-aimẹ wẹ Satani nọ zedonukọnna mẹhe nọgodona ẹn lẹ. Podọ na nugbo tọn, ahọsumẹ devo tẹwẹ e sọ tindo? Satani lọsu ma to nukundo wẹndagbe kavi todido nujọnu tọn de. Nawẹ e sọgan na we nuhe e ma tindo gbọn? Satani ma sọgan ze nude donukọnna we hugan sọgodo awubla tọn he tin to nukọnna ewọ lọsu!—Osọ. 20:10.

20. Etẹwẹ jọja de sọgan wà nado yinukọn jẹ klandowiwe po baptẹm po kọ̀n? (Pọ́n apotin lọ “ Hosọ He Na Gọalọna We Nado Whẹ́n to Gbigbọ-Liho Lẹ.”)

20 Na nugbo tọn, nuhe sọgbe wẹ e yin dọ a ni klan gbẹzan towe do wiwe na Jehovah. Be a ko wleawufo nado ze afọdide enẹ ya? Eyin mọ wẹ, ma whleawu nado wàmọ blo. To alọ devo mẹ, eyin a ma ko wleawufo, yí ayinamẹ he tin to hosọ ehe mẹ lẹ do yizan mẹ bo to nukọnzindo zọnmii. Paulu kanwehlan Filippinu lẹ dọmọ: “Sọgbe hẹ obá he mẹ mí ko yinukọn jẹ, mì gbọ mí ni nọ to zọnlin jijlọ zìn sọgbe hẹ aliho nuyiwa tọn ehe dopolọ.” (Flp. 3:16) Eyin a hodo ayinamẹ ehe, to madẹnmẹ, a na tindo ojlo nado klan gbẹzan towe do wiwe na Jehovah bo yí baptẹm.