Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

ATỌ̀HỌ̀-NUHIHỌ́ LỌ TỌN (ZINJẸGBONU OPLỌN TỌN) MARS 2016

Ezekiẹli yí ojlo do yinuwa taidi mẹhe dosla lẹdo Jelusalẹm

Nọ Do Gbigbọ Yẹwhegán lẹ Tọn Nkọ Hia

Nọ Do Gbigbọ Yẹwhegán lẹ Tọn Nkọ Hia

BE HIẸ tindo nude to kọndopọ mẹ hẹ yẹwhegán hohowhenu tọn lẹ ya? To Biblu Lẹdogbedevomẹ Aihọn Yọyọ Tọn Glẹnsigbe tọn he yin didetọn to 2013 mẹ, adà lọ “Zẹẹmẹ Hogbe Biblu Tọn lẹ Tọn” basi zẹẹmẹ hogbe lọ yẹwhegán tọn dọmọ: “Mẹhe gblamẹ lẹndai Jiwheyẹwhe tọn lẹ nọ yin hinhẹn zun yinyọnẹn te. Yẹwhegán lẹ nọ yinuwa taidi hoyidọtọ Jiwheyẹwhe tọn bo nọ lá nuhe na wá jọ lẹ gọna nuplọnmẹ, gbedide po whẹdida Jehovah tọn lẹ po.” Dile etlẹ yindọ hiẹ ma to nuhe na wá jọ lẹ dọ, a nọ dọho do otẹn Jiwheyẹwhe tọn mẹ, bo nọ lá nuhe tin to Ohó etọn mẹ lẹ.—Mat. 24:14.

Lẹblanulọkẹyi nankọ die mí tindo nado dọhona mẹdevo lẹ gando Jiwheyẹwhe mítọn, Jehovah go, bosọ plọn yé nuhe yin ojlo etọn na gbẹtọvi lẹ! Mí to mahẹ tindo to azọ́n enẹ mẹ to pọmẹ hẹ “angẹli he to zinzlọn to agahomẹ” lọ. (Osọ. 14:6) Etomọṣo, mí sọgan pehẹ avùnnukundiọsọmẹnu lẹ he sọgan zọ́n bọ mí na wọnji lẹblanulọkẹyi jiawu enẹ go. Etẹwẹ yin delẹ to avùnnukundiọsọmẹnu lọ lẹ mẹ? Mí sọgan pehẹ nuṣikọ, gbigbọjọ, kavi numọtolanmẹ nuvọ́nọ-yinyin tọn. Yẹwhegán nugbonọ hohowhenu tọn lẹ pehẹ avùnnukundiọsọmẹnu enẹlẹ, ṣigba yé ma jogbe. Podọ Jehovah gọalọna yé nado hẹn azọ́ndenamẹ yetọn lẹ di. Lẹnnupọndo yẹwhegán delẹ ji, bo pọ́n lehe mí sọgan hodo apajlẹ yetọn do.

YÉ DOVIVẸNU VẸKUVẸKU

To whedelẹnu, nuwiwa egbesọ tọn mítọn lẹ sọgan zọ́n bọ onú na ṣikọna mí, bọ mí na mọdọ mí ma sọgan tọ́n na lizọnyizọn lọ. Na nugbo tọn, mí dona nọ gbọjẹ, Jesu po apọsteli etọn lẹ po tlẹ wàmọ. (Malku 6:31) Ṣigba, flin Ezekiẹli to Babilọni podọ azọ́ndenamẹ he e tindo to Islaelivi he yin wiwle sọn Jelusalẹm yì kanlinmọgbenu lẹ ṣẹnṣẹn. To gbèdopo, Jiwheyẹwhe dọna Ezekiẹli nado yí zannu de bo basi yẹdide tòdaho Jelusalẹm tọn do e go. To yẹhiadonu-liho, Ezekiẹli dona dosla lẹdo tòdaho pẹvi lọ gbọn aimimlọn do adà amiyọn tọn etọn ji na azán 390 podọ gbọn aimimlọn do adà adusi tọn etọn ji na azán 40  dali. Jehovah dọna Ezekiẹli dọmọ: ‘Doayi e go, yẹn na yí okàn do blá we, podọ hiẹ ma na lẹ́ dewe sọn adà de ji hlan awetọ ji, kakajẹ whenue hiẹ na dotana azán glọ̀ndo towe tọn lẹ.’ (Ezek. 4:1-8) Enẹ dona ko dọ̀n ayidonugo Islaelivi he tin to kanlinmọgbenu lọ lẹ tọn. Na nuhe hugan owhe dopo, Ezekiẹli dona to akọndona nuwiwa enẹ he na hẹn nuṣikọna ẹn taun. Nawẹ yẹwhegán lọ sọgan hẹn azọ́ndenamẹ etọn di gbọn?

Ezekiẹli mọnukunnujẹ nuhewutu ewọ do yin didohlan taidi yẹwhegán de mẹ. Jiwheyẹwhe dọna ẹn to whenue e to dido e hlan dọmọ: ‘Eyin Islaelivi lẹ na sè, kavi eyin yé na gbọ, ganṣo yé na yọnẹn dọ yẹwhegán de ko tin to yé ṣẹnṣẹn.’ (Ezek. 2:5) Ezekiẹli hẹn lẹndai azọ́ndenamẹ etọn tọn do ayiha mẹ. Enẹwutu, ewọ yí ojlo do yinuwa to yẹhiadonu-liho taidi mẹhe dosla lẹdo Jelusalẹm. E dohia dọ yẹwhegán nugbo de wẹ emi yin. Ewọ po Juvi he tin to kanlinmọgbenu po e po lẹ po wá sè linlin de dọmọ: “Yè hò tòdaho lọ.” Mọwẹ, Islaelivi lẹ wá mọdọ yẹwhegán de ko tin to ṣẹnṣẹn yetọn.—Ezek. 33:21, 33.

To egbehe, mí nọ na avase gbẹtọ lẹ gando vasudo titonu Satani tọn blebu he ja lọ go. Mahopọnna dọ onú nọ ṣikọna mí to whedelẹnu, mí nọ zan huhlọn mítọn nado lá Ohó Jiwheyẹwhe tọn, bo nọ basi gọyìpọn lẹ, bosọ nọ deanana plọnmẹ Biblu lẹ. Dile dọdai he gando vivọnu titonu ehe tọn go lẹ to hẹndi mọ, mí nọ tindo pekọ lọ dọ mí yin “mẹhe gblamẹ lẹndai Jiwheyẹwhe tọn lẹ nọ yin hinhẹn zun yinyọnẹn te.”

YÉ DUTO GBIGBỌJỌ JI

Mí to vivẹnudo vẹkuvẹku po alọgọ gbigbọ wiwe Jehovah tọn po; etomọṣo, mí sọgan gbọjọ to whedelẹnu na aliho he mẹ gbẹtọ lẹ yinuwa te gando owẹ̀n mítọn go wutu. Mí na wà dagbe nado flin apajlẹ yẹwhegán Jelemia tọn. E pehẹ mẹṣanko, mẹzunzun, po mẹvivlẹ po, na e lá owẹ̀n Jiwheyẹwhe tọn na Islaelivi lẹ wutu. To ojlẹ de mẹ, Jelemia tlẹ dọmọ: “Yẹn ma na dọho etọn gba, kavi dọho depope to oyín etọn mẹ ba.” Jelemia yin gbẹtọ he tindo numọtolanmẹ taidi mítọn lẹ nkọ. Etomọṣo, e zindonukọn to owẹ̀n Jiwheyẹwhe tọn lilá mẹ. Etẹwutu? Yẹwhegán lọ yidogọ dọmọ: “Whenẹnu e tin to ayiha ṣie mẹ di miyọ́n jiji de [he] yè ṣinyọnnudo do ohú ṣie lẹ mẹ, yè sọ yí linsinsinyẹn do hẹn mi zun nuṣikọnọ, yẹn masọ sọgan hẹn ẹn.”—Jel. 20:7-9.

Mọdopolọ, eyin mí wá gbọjọ na lehe gbẹtọ lẹ yinuwa gando owẹ̀n mítọn go do wutu, mí sọgan duto numọtolanmẹ enẹ ji gbọn ayihamẹlinlẹnpọn do owẹ̀n he lá mí te ji dali. E sọgan taidi ‘miyọ́n jiji de he yè ṣinyọnnudo do ohú mítọn lẹ mẹ.’ Aṣa Biblu hihia egbesọegbesọ tọn tintindo sọgan zọ́n bọ miyọ́n enẹ na to jiji zọnmii to ohò mítọn mẹ.

YÉ DUTO NUMỌTOLANMẸ AGỌ̀ LẸ JI

Klistiani delẹ sọgan gbọjọ to whenue yé mọ azọ́ndenamẹ yọyọ de yí. Yẹwhegán Hosea sọgan ko tindo numọtolanmẹ enẹ. Jehovah degbena ẹn dọmọ: “Yì bo dà asi de, ewọ nasọ lọga bo na ji ayọvi lẹ na we.” (Hos. 1:2, NW) Pọ́n nuhe na yin numọtolanmẹ towe eyin a jlo na wlealọ bọ Jiwheyẹwhe dọna we dọ yọnnu lọ na wá lọga! Hosea kẹalọyi azọ́ndenamẹ lọ. Ewọ dà Gomẹli bọ e ji visunnu de. To nukọn mẹ, e ji viyọnnu de bosọ ji visunnu devo. Ṣigba, e taidi dọ ewọ lọga bo do jivi awe he gbọngodo lọ lẹ wẹ. Jehovah ko dọna Hosea dọ asi he e na dà lọ na “dómọna mẹhe tindo owanyi zogbe na ẹn lẹ.” Hodidọ lọ “mẹhe tindo owanyi zogbe na ẹn lẹ” dohia dọ mẹsusu wẹ lọga hẹ ẹ. Enẹgodo, e na jlo nado lẹkọwa Hosea dè. Todin, eyin hiẹ wẹ yin yẹwhegán lọ, be a na ko gọ̀ asi towe yí ya? Nuhe Jehovah dọna Hosea nado wà lọ niyẹn! Yẹwhegán lọ tlẹ gọ̀ ẹ họ̀ po akuẹ he yinukunkẹ de po.—Hos. 2:7; 3:1-5, NW.

Hosea sọgan ko kanse ede dọ, “Dagbe tẹwẹ azọ́ndenamẹ ṣie hinhẹndi sọgan hẹnwa?” Etomọṣo, Hosea yí nugbonọ-yinyin do basi wadohia nujijọ jọnun de tọn bo gbọnmọ dali gọalọna mí nado mọnukunnujẹ awufiẹsa he Ganhunupotọ lọ na ko mọ mẹ, to whenue Islaelivi lẹ gbẹ́ ẹ dai. Podọ na nugbo tọn, Islaelivi ahundoponọ delẹ wá lẹkọwa Jiwheyẹwhe dè.

To egbehe, Jiwheyẹwhe ma nọ dọna mẹde dọ ni ‘dà asi de he na wá lọga.’ Etomọṣo, be mí sọgan plọn nude sọn ojlo Hosea tọn nado kẹalọyi azọ́ndenamẹ mọnkọtọn mẹ ya? Nuplọnmẹ dopo wẹ yindọ mí dona tindo ojlo nado lá wẹndagbe Ahọluduta lọ tọn “to gbangba podọ sọn whédegbè jẹ whédegbè,” eyin mọwiwà tlẹ vẹawuna mí. (Owalọ 20:20) Vlavo adà azọ́n yẹwhehodidọ Ahọluduta lọ tọn delẹ ma  nọ bọawuna we. Susu mẹhe Kunnudetọ Jehovah tọn lẹ nọ plọn Biblu hẹ lẹ tọn wẹ nọ dọ dọ dile etlẹ yindọ emi nọ duvivi Biblu pinplọn tọn, emi ma na yì sọn họndekọn jẹ họndekọn nado lá wẹndagbe lọ gbede. Ṣigba, nuhe yé lẹn to ojlẹ de mẹ dọ emi ma sọgan wà wẹ susu to yé mẹ wá jẹ wiwà ji. Be a mọ nuhe enẹ plọn mí ya?

Ojlo Hosea tọn nado kẹalọyi azọ́ndenamẹ de he vẹawu sọgan plọn mí nudevo. Ewọ sọgan ko dín whẹjijọ ma nado basi wadohia nujijọ jọnun tọn lọ he mẹ asi etọn na tindo mahẹ te. Gbẹtọvi devo tẹwẹ na ko mọnukunnujẹ azọ́ndenamẹ ehe mẹ eyin Hosea ma basi kandai etọn? Mílọsu sọgan pehẹ ninọmẹ de he mẹ mí na tindo dotẹnmẹ hundote lọ nado dọhona mẹde gando Jehovah go te, yèdọ dotẹnmẹ de he mẹdevo depope ma na yọnẹn dọ mí tindo. Nuhe jọ do Anna go niyẹn, yèdọ mẹhe tin to wehọmẹ daho to États-Unis. Mẹplọntọ etọn biọ to klasi lọ si nado wlanwe gando hosọ kavi whẹho he nọ duahunmẹna yé taun de go, bosọ tẹnpọn nado diọlinlẹnna klasi lọ gando hosọ lọ go. Anna sọgan ko dovọ́na dotẹnmẹ hundote ehe nado dekunnu. Etomọṣo, e mọdọ dotẹnmẹ hundote de wẹ ehe yin sọn Jiwheyẹwhe dè. Na e mọ lehe klasi lọ sọgan yinuwa do, e hodẹ̀ hlan Jehovah, podọ ojlo lọ fọndote to ahun etọn mẹ nado yí dotẹnmẹ ehe zan. E wlanwe gando hosọ de go, enẹ wẹ: “Nulẹ Tin Yededenu: Lẹnnupọndo Kunnudenu lọ lẹ Ji.”

Jọja mítọn lẹ nọ do gbigbọ yẹwhegán lẹ tọn nkọ hia—yé nọ yí adọgbigbo do yiavùnlọna Jehovah taidi Mẹdatọ mítọn

To whenue Anna ze hosọ lọ donukọnna klasi lọ, viyọnnu de he tindo yise to nulẹ tin yededenu mẹ kàn kanbiọ susu lẹ sè Anna nado dohia dọ nuhe e dọ ma sọgbe. Anna yiavùnlọna nuyise etọn po kọdetọn dagbe po. E jiawu na mẹplọntọ etọn taun bọ e na Anna ajọ̀ de he dohia dọ nuzedonukọnnamẹ etọn wẹ diọlinlẹnnamẹ hugan. Sọn whenẹnu, Anna tindo hodọdopọ susu gando nudida lẹ go hẹ viyọnnu lọ he jẹagọdo nuhe e dọ. Na Anna kẹalọyi azọ́ndenamẹ enẹ he e mọdọ Jehovah wẹ dena emi wutu, e dọ dọ, “Todin, n’nọ dọyẹwheho wẹndagbe lọ tọn po adọgbigbo po.”

Dile etlẹ yindọ mí ma yin yẹwhegán lẹ to gigọ́ mẹ, gbọn apajlẹ gbigbọ mẹde-yido-sanvọ́ tọn yẹwhegán delẹ taidi Ezekiẹli, Jelemia, po Hosea po tọn hihodo dali, mílọsu sọgan wà ojlo Jehovah tọn po kọdetọn dagbe po to egbehe! To sinsẹ̀n-bibasi whẹndo tọn kavi oplọn mẹdetiti tọn de whenu, naegbọn a ma na hiawe gando yẹwhegán hohowhenu tọn devo lẹ go bo lẹnayihamẹpọn do lehe a sọgan hodo apajlẹ yetọn do ji?