“Ehe mẹ wẹ Otọ́ ṣie yin gigopana te, dọ mì ni nọ to sinsẹ́n susu detọ́n bo do mìde hia di devi ṣie lẹ.”​—JOH. 15:8.

OHÀN LẸ: 53, 60

1, 2. (a) Ojlẹ vude jẹnukọnna okú Jesu tọn, etẹwẹ ewọ dọna devi etọn lẹ? (Pọ́n yẹdide he tin to bẹjẹeji hosọ ehe tọn.) (b) Naegbọn e do yin nujọnu dọ mí ni hẹn nuhewutu mí do nọ dọyẹwheho do ayiha mẹ? (c) Etẹwẹ mí na gbadopọnna?

TO WHÈJAI godo tọn he jẹnukọnna okú Jesu tọn, ewọ yí whenu susu zan nado dọho hẹ apọsteli etọn lẹ bo hẹn yé deji dọ emi yiwanna yé sisosiso. E sọ na yé apajlẹ de gando vẹntin de go dile mí ko mọ do to hosọ he jẹnukọn mẹ. Gbọn apajlẹ enẹ gblamẹ, Jesu na tuli devi etọn lẹ nado “nọ to sinsẹ́n susu detọ́n”—yèdọ nado to akọndonanu to owẹ̀n Ahọluduta lọ tọn lilá mẹ.—Joh. 15:8.

2 Ṣigba, gbọnvona dọ Jesu dọna devi etọn lẹ nuhe yé dona wà, ewọ sọ dọ nuhewutu yé dona wàmọ na yé. E dọ nuhewutu yé dona tindo mahẹ to azọ́n yẹwhehodidọ tọn lọ mẹ lẹ na yé. Naegbọn e do yin nujọnu dọ mí ni gbadopọnna whẹwhinwhẹ́n enẹlẹ? Eyin mí hẹn nuhewutu mí dona to yẹwhehodọ do ayiha mẹ, mí nọ yin whinwhàn nado doakọnnanu to ‘kunnudidena akọta lẹpo’ mẹ. (Mat. 24:13, 14) Enẹwutu, mì gbọ mí ni gbadopọnna whẹwhinwhẹ́n sinai do Owe-wiwe ji ẹnẹ he wutu mí do nọ dọyẹwheho. Humọ, mí na gbadopọnna nunina sọn Jehovah dè ẹnẹ delẹ he nọ gọalọna mí nado yí akọndonanu do to sinsẹ́n detọ́n.

 MÍ NỌ PAGIGONA JEHOVAH

3. (a) Whẹwhinwhẹ́n he wutu mí do nọ dọyẹwheho tẹwẹ tin to Johanu 15:8 mẹ? (b) Etẹwẹ ovẹn sinsẹ́n lẹ nọtena to apajlẹ Jesu tọn mẹ, podọ naegbọn nuyijlẹdonugo lọ do sọgbe?

3 Whẹwhinwhẹ́n titengbe he wutu mí do nọ dọyẹwheho wẹ nado pagigona Jehovah bo klan oyín etọn do wiwe to gbẹtọvi lẹ nukọn. (Hia Johanu 15:1, 8.) Doayi e go dọ Jesu yí Otọ́ etọn Jehovah jlẹdo glesi he nọ pọ̀ vẹngle de go. Podọ ewọ yí edetiti jlẹdo vẹntin de go, bo yí hodotọ etọn lẹ jlẹdo alà lẹ go. (Joh. 15:5) Gbọnmọ dali, e sọgbe nado yí ovẹn sinsẹ́n lẹ jlẹdo sinsẹ́n Ahọluduta lọ tọn he hodotọ Klisti tọn lẹ nọ detọ́n go. Jesu dọna apọsteli etọn lẹ dọmọ: “Ehe mẹ wẹ Otọ́ ṣie yin gigopana te, dọ mì ni nọ to sinsẹ́n susu detọ́n.” Dile vẹntin he nọ de sinsẹ́n dagbe tọ́n lẹ nọ hẹn pipà wá na glesi de do, mọ wẹ mí nọ hẹn gbégbò kavi gigo wá na Jehovah do eyin mí wà nuhe go mí pé lẹpo nado lá owẹ̀n Ahọluduta lọ tọn.—Mat. 25:20-23.

4. (a) Aliho tẹlẹ mẹ wẹ mí nọ klan oyín Jiwheyẹwhe tọn do wiwe te? (b) Etẹwẹ a nọ lẹn gando lẹblanulọkẹyi he mí tindo nado klan oyín Jiwheyẹwhe tọn do wiwe go?

4 Aliho tẹ mẹ wẹ azọ́n yẹwhehodidọ tọn mítọn nọ klan oyín Jiwheyẹwhe tọn do wiwe te? Mí ma sọgan hẹn oyín Jiwheyẹwhe tọn zun wiwe hú lehe e ko te do. E ko yin wiwe mlẹnmlẹn. Ṣigba, doayi nuhe yẹwhegán Isaia dọ go dọmọ: “Jehovah awhànpa lẹ tọn—ewọ wẹ Mẹhe mìwlẹ dona nọ pọnhlan di wiwe.” (Isa. 8:13) Aliho devo he mẹ mí nọ klan oyín Jiwheyẹwhe tọn do wiwe te lẹ wẹ yindọ, mí nọ pọ́n ẹn hlan di oyín he gbọnvona oyín devo depope, bosọ nọ gọalọna mẹdevo lẹ nado nọ pọ́n ẹn hlan di wiwe. (Mat. 6:9, Odò.) Di apajlẹ, to whenue mí to nugbo lọ lá gando jẹhẹnu dagbedagbe Jehovah tọn lẹ po lẹndai etọn na gbẹtọ lẹ he ma nọ diọ lọ po go, mí nọ yiavùnlọna oyín Jiwheyẹwhe tọn sọta lalo po vlẹko Satani tọn lẹ po. (Jen. 3:1-5) Humọ, mí nọ klan oyín Jiwheyẹwhe tọn do wiwe to whenue mí dovivẹnu nado gọalọna mẹhe to aigba-denamẹ mítọn ji lẹ nado mọdọ Jehovah wẹ jẹ “nado mọ gigo, gbégbò po huhlọn po yí.” (Osọ. 4:11) Rune he ko yin gbehosọnalitọ na owhe 16 dọmọ: “Homẹ ṣie nọ hùn taun dọ Didatọ wẹkẹ lọ tọn hùn dotẹnmẹ dote na mi nado yin kunnudetọ etọn. Ehe nọ zọ́n bọ n’nọ tindo ojlo nado to yẹwhehodọ zọnmii.”

MÍ YIWANNA JEHOVAH PO VISUNNU ETỌN PO

5. (a) Whẹwhinwhẹ́n he wutu mí do nọ dọyẹwheho tẹwẹ yin nùdego to Johanu 15:9, 10 mẹ? (b) Nawẹ Jesu zinnudo nuhewutu e do yin nujọnu nado nọ doakọnnanu ji gbọn?

5 Hia Johanu 15:9, 10. Owanyi ahundopo tọn he mí tindo na Jehovah po Jesu po yin whẹwhinwhẹ́n titengbe de he wutu mí do nọ lá owẹ̀n Ahọluduta lọ tọn. (Malku 12:30; Joh. 14:15) Jesu ma dọna devi etọn lẹ nado yiwanna emi kẹdẹ gba, ṣigba nado “gbọṣi owanyi [emitọn] mẹ” ga. Etẹwutu? Na e nọ biọ akọndonanu nado to devi nugbo Klisti tọn de yin zọnmii wutu. To kandai kleun he to Johanu 15:4-10 kẹdẹ mẹ, Jesu yí hogbe lọ “gbọṣi” zan pludopludo nado zinnudo nuhewutu e do yin nujọnu nado nọ doakọnnanu ji.

6. Nawẹ mí nọ dohia dọ mí jlo na gbọṣi owanyi Klisti tọn mẹ gbọn?

6 Nawẹ mí nọ dohia dọ mí jlo na gbọṣi owanyi Klisti tọn mẹ bo to nukundagbe etọn tindo zọnmii gbọn? Mí nọ wàmọ gbọn gbedide Jesu tọn lẹ yìnyìn dali. Do glido, Jesu dọna mí dọmọ: ‘Mì nọ setonuna mi.’ Ṣigba, nuhe Jesu biọ to mí si poun wẹ nado wà nuhe ewọ lọsu wà, na e yidogọ dọmọ: “Kẹdẹdile yẹn ko yìn gbedide Otọ́ ṣie tọn lẹ bo gbọṣi owanyi etọn mẹ do.” Jesu nọ ze apajlẹ dai.—Joh. 13:15.

7. Kanṣiṣa tẹwẹ tin to tonusise po owanyi po ṣẹnṣẹn?

7 Nado dohia dọ kanṣiṣa tin to tonusise po owanyi po ṣẹnṣẹn, Jesu ko dọna apọsteli etọn lẹ jẹnukọn dọmọ: “Mẹdepope he mọ gbedide ṣie lẹ yí bo nọ yìn yé wẹ mẹhe yiwanna  mi.” (Joh. 14:21) Humọ, eyin mí nọ setonuna gbedide Jesu tọn lọ nado yì bo dọyẹwheho, mílọsu nọ do owanyi he mí tindo na Jiwheyẹwhe hia, na gbedide Jesu tọn lẹ nọ do linlẹn Otọ́ etọn tọn hia wutu. (Mat. 17:5; Joh. 8:28) Eyin mí dohia dọ mí yiwanna Jehovah po Jesu po, yelọsu nọ hẹn mí do owanyi yetọn mẹ.

MÍ NỌ NA AVASE GBẸTỌ LẸ

8, 9. (a) Whẹwhinwhẹ́n devo tẹwẹ mí tindo nado nọ dọyẹwheho? (b) Naegbọn nuhe Jehovah dọ to Ezekiẹli 3:18, 19 po 18:23 po mẹ lẹ do nọ whàn mí nado to yẹwhehodọ zọnmii?

8 Mí tindo whẹwhinwhẹ́n devo nado zindonukọn to azọ́n yẹwhehodidọ tọn mítọn mẹ. Mí nọ dọyẹwheho nado na avase mẹlẹ. To Biblu mẹ, Noa yin yiylọdọ “yẹwhehodọtọ.” (Hia 2 Pita 2:5.) E họnwun dọ azọ́n yẹwhehodidọ tọn he e wà jẹnukọnna Singigọ lọ bẹ avase de hẹn gando vasudo he ja lọ go. Naegbọn mí sọgan wá tadona enẹ kọ̀n? Doayi nuhe Jesu dọ go dọmọ: “Na dile gbẹtọ lẹ te do to azán enẹlẹ gbè he jẹnukọnna Singigọ lọ, yé to dùdù bo to nùnù, bọ sunnu lẹ to alọwle podọ yọnnu lẹ sọ to yinyin nina to alọwle mẹ, kakajẹ azán he gbè Noa biọ aki lọ mẹ, bọ yé ma doayi e go kaka Singigọ lọ do wá bo plọ́ yemẹpo yì, mọ wẹ tintin tofi Visunnu gbẹtọ tọn na te.” (Mat. 24:38, 39) Mahopọnna dọ gbẹtọ lẹ ma tindo ojlo, Noa lá owẹ̀n avase tọn he yin zizedo alọmẹ na ẹn lọ po nugbonọ-yinyin po.

9 To egbehe, mí nọ lá owẹ̀n Ahọluduta lọ tọn nado hùn dotẹnmẹ dote na gbẹtọ lẹ nado plọnnu gando ojlo Jiwheyẹwhe tọn na gbẹtọvi lẹ go. Taidi Jehovah, ojlo vẹkuvẹku mítọn wẹ yindọ gbẹtọ lẹ ni kẹalọyi owẹ̀n lọ bo “nọgbẹ̀.” (Ezek. 18:23) To ojlẹ dopolọ mẹ, whenue mí to yẹwhehodọ sọn whédegbè jẹ whédegbè podọ to nọtẹn gbangba tọn lẹ, mí nọ na avase gbẹtọ susu dile e yọnbasi do dọ Ahọluduta Jiwheyẹwhe tọn na wá bo na hẹn aihọn jijọ-madi-Jiwheyẹwhe tọn ehe wá opodo.—Ezek. 3:18, 19; Dan. 2:44; Osọ. 14:6, 7.

MÍ YIWANNA KỌMẸNU MÍTỌN

10. (a) Whẹwhinwhẹ́n he wutu mí dona dọyẹwheho tẹwẹ tin to Matiu 22:39 mẹ? (b) Dọ lehe Paulu po Sila po gọalọna gàntọ-ṣọ́tọ de to Filipi do.

10 Whẹwhinwhẹ́n titengbe devo he wutu mí do nọ to yẹwhehodọ zọnmii wẹ yindọ: Mí yiwanna kọmẹnu mítọn lẹ. (Mat. 22:39) Owanyi enẹ wẹ nọ whàn mí nado doakọnnanu to azọ́n ehe mẹ, na mí yọnẹn dọ gbẹtọ lẹ sọgan wá diọlinlẹn to whenue ninọmẹ yetọn lẹ diọ. Lẹnnupọndo nuhe jọ do apọsteli Paulu po gbẹdohẹmẹtọ etọn Sila po go ji. To tòdaho Filipi tọn mẹ, nukundiọsọmẹtọ lẹ sú yé do gànpamẹ. Enẹgodo to zángbodawe mẹ, aigba sisọsisọ de jọ to ajiji mẹ bọ ohọ̀n gànpa lọ tọn lẹ hùndonuvo. Gàntọ-ṣọ́tọ lọ dibu dọ gàntọ lọ lẹ ko họnyi bo jlo na hù ede. Ṣigba, Paulu dawhá ylọ ẹ bo dọmọ: “A gbleawuna dewe blo!” Gàntọ-ṣọ́tọ he ko jẹflumẹ lọ kanse dọmọ: “Etẹwẹ yẹn dona wà nado yin whinwhlẹngán?” Yé dọna ẹn dọmọ: “Yise to Oklunọ Jesu mẹ, podọ hiẹ na yin whinwhlẹngán.”—Owalọ 16:25-34.

Wanyina Jehovah, Jesu po kọmẹnu mítọn lẹ po nọ whàn mí nado dọyẹwheho (Pọ́n hukan 5, 10tọ)

11, 12. (a) Nawẹ kandai he gando gàntọ-ṣọ́tọ lọ go tindo kanṣiṣa hẹ lizọnyizọn mítọn gbọn? (b) Etẹwẹ mí jlo na tin to gbesisọ mẹ nado wà?

11 Nawẹ kandai he gando gàntọ-ṣọ́tọ lọ go tindo kanṣiṣa hẹ azọ́n yẹwhehodidọ tọn mítọn gbọn? Doayi ehe go: Ninọmẹ ahun mẹ tọn gàntọ-ṣọ́tọ lọ tọn diọ bọ e biọ alọgọ kiki to whenue aigba sisọsisọ lọ ko jọ godo.  Mọdopolọ to egbehe, ninọmẹ ahun mẹ tọn mẹhe ma nọ kẹalọyi owẹ̀n Biblu tọn dai delẹ tọn sọgan wá diọ bọ yé na biọ alọgọ to whenue nujijọ madonukun de dán yé to gbẹ̀mẹ. Di apajlẹ, mẹdelẹ to aigba-denamẹ mítọn ji sọgan hẹn agbasazọ́n he yé ko to wiwà na ojlẹ dindẹn de bu to ajiji mẹ bo jẹflumẹ pete. Mẹdevo lẹ sọgan to awubla mẹ na alọwle yetọn ṣẹṣẹ gbakija wutu. Podọ na mẹdevo lẹ, e sọgan yindọ yé jẹflumẹ na yè mọ azọ̀n sinsinyẹn de na yé to agọe, kavi na okú mẹyiwanna de tọn wutu. Eyin nujijọ mọnkọtọn lẹ wá aimẹ, mẹhe ahun yetọn gbàdo delẹ sọgan nọ kanhose gando lẹndai ogbẹ̀ tọn go, yèdọ nuhe yé ma ko nọ wà to dai. Vlavo yé tlẹ sọgan nọ kanse dọ, ‘Etẹwẹ n’dona wà nado yin whinwhlẹngán?’ Eyin mí dukosọ hẹ omẹ mọnkọtọn lẹ, yé sọgan jlo nado dotoaina owẹ̀n todido tọn mítọn, yèdọ whla tintan to gbẹzan yetọn mẹ.

12 Enẹwutu, eyin mí zindonukọn to azọ́n yẹwhehodidọ tọn mítọn mẹ po nugbonọ-yinyin po, mí na tin to gbesisọ mẹ nado miọnhomẹna gbẹtọ lẹ to whenue yé wleawufo nado kẹalọyi i. (Isa. 61:1) Charlotte he ko to sinsẹ̀nzọn whenu-gigọ́ tọn mẹ sọn owhe 38 die dọmọ: “To egbehe, gbẹtọ lẹ ko buali pete. Dotẹnmẹ dona yin nina yé nado sè wẹndagbe lọ.” Ejvo he ko yin gbehosọnalitọ sọn owhe 34 die dọmọ: “To egbehe hugan gbede pọ́n, mẹsusu ko jẹflumẹ sinsinyẹn. Ojlo vẹkuvẹku ṣie wẹ nado gọalọna yé. Enẹ nọ whàn mi nado dọyẹwheho.” Owanyi kọmẹnu tọn yin whẹwhinwhẹ́n dagbe de nado zindonukọn to lizọnyizọn mítọn mẹ!

NUNINA HE NỌ GỌALỌNA MÍ NADO DOAKỌNNANU LẸ

13, 14. (a) Nunina tẹwẹ yin nùdego to Johanu 15:11 mẹ? (b) Nawẹ ayajẹ Jesu tọn na yin mítọn gbọn? (c) Nawẹ ayajẹ nọ yinuwado lizọnyizọn mítọn ji gbọn?

13 To ozán he jẹnukọnna okú Jesu tọn enẹ mẹ, ewọ sọ dọhodo nunina susu ji na apọsteli etọn lẹ, ehe na gọalọna yé nado yí akọndonanu do to sinsẹ́n detọ́n. Nunina tẹlẹ wẹ, podọ nawẹ yé sọgan hẹn ale wá na mí gbọn?

14 Nunina ayajẹ tọn. Be tonusisena gbedide Jesu tọn nado dọyẹwheho na lẹzun agbànpẹnmẹnu wẹ ya? Paali. To whenue Jesu na apajlẹ vẹntin tọn lọ godo, e dọ dọ mí na tindo ayajẹ na mí yin wẹnlatọ Ahọluduta lọ tọn lẹ wutu. (Hia Johanu 15:11.) Na nugbo tọn, e hẹn mí deji dọ ayajẹ emitọn na yin mítọn. Gbọnna? Dile mí dọ do to bẹjẹeji, Jesu yí ede jlẹdo vẹntin de go, podọ devi etọn lẹ jlẹdo alà lẹ go. Vẹntin lọ go wẹ alà lẹ nọ nọ̀. Dile e na dẹnsọ bọ alà lọ lẹ na to vẹntin lọ go, yé na nọ mọ osin po núdùdù po sọn vẹntin lọ mẹ. Mọdopolọ, dile e na dẹnsọ bọ mí na gbọṣi kọndopọ mẹ hẹ Klisti gbọn afọdòmẹ etọn lẹ hihodo pẹkipẹki dali, mí na duvivi ayajẹ dopolọ he ewọ nọ tindo to ojlo Otọ́ etọn tọn wiwà mẹ tọn. (Joh. 4:34; 17:13; 1 Pita 2:21) Doayi nuhe Hanne he ko yin gbehosọnalitọ sọn owhe 40 die dọ go: “Ayajẹ he n’nọ tindo to whedepopenu he n’tọ́n na lizọnyizọn lọ nọ whàn mi nado zindonukọn to sinsẹ̀nzọn Jehovah tọn mẹ.” Na nugbo tọn, ayajẹ sisosiso tintindo nọ na mí huhlọn nado zindonukọn etlẹ yin to aigba-denamẹ he ji gbẹtọ lẹ ma nọ do ojlo hia te lẹ ji.—Mat. 5:10-12.

15. (a) Nunina tẹwẹ yin nùdego to Johanu 14:27 mẹ? (b) Naegbọn jijọho tintindo do nọ gọalọna mí nado to sinsẹ́n detọ́n zọnmii?

15 Nunina jijọho tọn. (Hia Johanu 14:27.) To whèjai godo tọn he jẹnukọnna okú Jesu tọn enẹ, ewọ dọna apọsteli etọn lẹ dọmọ: “Yẹn na mì jijọho ṣie.” Nawẹ nunina enẹ, yèdọ jijọho etọn—nọ gọalọna mí nado de sinsẹ́n tọ́n gbọn? Dile mí to akọndonanu, mí nọ duvivi jijọho ahun mẹ tọn he nọ dẹn-to-aimẹ de tọn, na mí yọnẹn dọ mí tindo nukundagbe Jehovah po Jesu po tọn wutu. (Salm. 149:4; Lom. 5:3, 4; Kol. 3:15) Ulf he to sinsẹ̀nzọn whenu-gigọ́ tọn mẹ sọn owhe 45 die dọmọ: “Azọ́n yẹwhehodidọ tọn nọ zọ́n bọ onú nọ  ṣikọna mi, amọ́ e nọ hẹn pekọ sisosiso wá na mi bosọ nọ hẹn gbẹzan ṣie tindo zẹẹmẹ nujọnu tọn.” Lehe mí dopẹ́ dọ mí nọ tindo jijọho ahun mẹ tọn he dẹn-to-aimẹ de do sọ!

16. (a) Nunina tẹwẹ yin nùdego to Johanu 15:15 mẹ? (b) Nawẹ apọsteli lẹ sọgan to họntọn Jesu tọn lẹ yin zọnmii gbọn?

16 Nunina họntọnjiji tọn. To whenue Jesu ko dọ dọ emi jlo dọ ayajẹ apọsteli emitọn lẹ tọn ni “yin hinhẹn gọ́” godo, e dohia yé dọ nujọnu wẹ e yin nado nọ do owanyi matin ṣejannabi hia. (Joh. 15:11-13) Enẹgodo, e dọmọ: “Yẹn ko ylọ mì dọ họntọn.” Nunina họakuẹ nankọ die—nado jihọntọn hẹ Jesu! Etẹwẹ apọsteli lẹ dona wà nado gbọṣi họntọn mẹ hẹ ẹ? Yé dona “zindonukọn bo to sinsẹ́n detọ́n.” (Hia Johanu 15:14-16.) Nudi owhe awe jẹnukọn, Jesu ko na anademẹ apọsteli etọn lẹ dọmọ: “Dile mì to yìyì, mì nọ dọyẹwheho, dọmọ: ‘Ahọluduta olọn tọn ko dọnsẹpọ.’” (Mat. 10:7) Enẹwutu, to ozán godo tọn enẹ mẹ, e na yé tuli nado doakọnnanu to azọ́n he yé ko bẹjẹeji lọ mẹ. (Mat. 24:13; Malku 3:14) Tonusisena gbedide Jesu tọn bẹ avùnnukundiọsọmẹnu hẹn, ṣigba e sọgan pà yé, bọ gbọnmọ dali yé na to họntọn etọn lẹ yin zọnmii. Gbọnna? Gbọn alọgọ nunina devo de tọn dali.

17, 18. (a) Nunina tẹwẹ yin nùdego to Johanu 15:16 mẹ? (b) Nawẹ nunina enẹ gọalọna devi Jesu tọn lẹ gbọn? (c) Nunina tẹlẹ wẹ nọ hẹn mí lodo to egbehe?

17 Nunina lọ dọ odẹ̀ mítọn lẹ nọ yin sisè. Jesu dọmọ: “Na nudepope he mì biọ Otọ́ to oyín ṣie mẹ, ewọ [na] na mì.” (Joh. 15:16) Lehe opagbe ehe dona ko hẹn apọsteli lẹ lodo do sọ! * Dile etlẹ yindọ yé ma mọnukunnujẹemẹ ganji, Nukọntọ yetọn na kú to madẹnmẹ, ṣigba yé ma na ba godonọnamẹ pò. Jehovah to gbesisọ mẹ nado na gblọndo odẹ̀ depope he yé hò nado biọ alọgọ etọn nado setonuna gbedide lọ nado dọyẹwheho wẹndagbe Ahọluduta lọ tọn. Podọ nugbonugbo, to ojlẹ kleun de godo, yé tindo numimọ lehe Jehovah na gblọndo odẹ̀ he yé hò nado mọ alọgọ yí lẹ do tọn.—Owalọ 4:29, 31.

Mí sọgan kudeji dọ Jehovah nọ na gblọndo odẹ̀ he mí nọ hò nado biọ alọgọ lẹ tọn (Pọ́n hukan 18tọ)

18 Nudopolọ wẹ nọ jọ to egbehe. Dile mí yí akọndonanu do to sinsẹ́n detọ́n, mí nọ duvivi họntọnjiji hẹ Jesu tọn. Humọ, mí sọgan deji dọ Jehovah wleawufo nado sè odẹ̀ mítọn lẹ na alọgọ nado duto aliglọnnamẹnu he mí sọgan pehẹ to whenue mí to yẹwheho wẹndagbe Ahọluduta lọ tọn lá lẹ ji. (Flp. 4:13) Lehe mí dopẹ́ do sọ dọ odẹ̀ mítọn lẹ nọ yin sisè, podọ mí sọgan jihọntọn hẹ Jesu! Nunina Jehovah tọn ehelẹ nọ hẹn mí lodo nado to sinsẹ́n detọ́n zọnmii.—Jak. 1:17.

19. (a) Naegbọn mí do nọ zindonukọn to azọ́n yẹwhehodidọ tọn lọ mẹ? (b) Etẹlẹ wẹ na gọalọna mí nado dotana azọ́n Jiwheyẹwhe tọn?

19 Dile mí mọ do to hosọ ehe mẹ, mí nọ zindonukọn to azọ́n yẹwhehodidọ tọn lọ mẹ nado pagigona Jehovah bo klan oyín etọn do wiwe, nado do owanyi mítọn na Jehovah po Jesu po hia, nado na avase gbẹtọ lẹ to gigọ́ mẹ, podọ nado do owanyi hia kọmẹnu mítọn. Humọ, nunina ayajẹ, jijọho, họntọnjiji po odẹ̀ mítọn he nọ yin sisè po tọn nọ na mí huhlọn nado dotana azọ́n Jiwheyẹwhe tọn. Lehe homẹ Jehovah tọn na hùn do sọ dile e mọ bọ mí yí alindọn lẹpo do to vivẹnudo nado “to sinsẹ́n susu detọ́n”!

^ huk. 17 To hodọdopọ Jesu tọn hẹ apọsteli etọn lẹ whenu, e hẹn yé deji whlasusu dọ odẹ̀ yetọn lẹ na mọ gblọndo.—Joh. 14:13; 15:7, 16; 16:23.