Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Atọ̀họ̀-Nuhihọ́ lọ Tọn—Zinjẹgbonu Oplọn Tọn  |  Juin 2017

Be Hiẹ Flin Ya?

Be Hiẹ Flin Ya?

Be a yí sọwhiwhe do hia zinjẹgbonu Atọ̀họ̀-Nuhihọ́ lọ Tọn agọe tọn lẹ ya? Eyọn, pọ́n eyin a sọgan na gblọndo kanbiọ he bọdego ehelẹ tọn:

To whenue anademẹ lẹ wá sọn titobasinanu Jiwheyẹwhe tọn dè, nawẹ mẹmẹsunnu he to sinsẹ̀n taidi nugopọntọ lẹdo tọn po mẹho agun tọn lẹ po dona nọ yinuwa gbọn?

Yé dona nọ yawu setonu. Yé sọgan kanse yede dọ: ‘Be n’nọ yidogọna gbigbọnọ-yinyin mẹhe lẹdo mi lẹ tọn ya? Be n’nọ yawu kẹalọyi bosọ nọ nọgodona anademẹ he yin nina lẹ ya?’​—w16.11, w. 11.

Whetẹnu wẹ Klistiani nugbo lẹ biọ kanlinmọgbenu Babilọni tọn glọ?

Ehe jọ ojlẹ vude to okú apọsteli lẹ tọn godo. To ojlẹ enẹ mẹ, pipli sinsẹ̀ngán tọn de jẹ awusọhia ji. Ṣọṣi po Gandudu otò tọn po wleawuna sinsẹ̀n Klistiani tọn he yin hinhẹnflu de bosọ tẹnpọn nado hẹn vivẹnudido Klistiani he taidi likun lẹ tọn zun osin bado pápá nẹgbé. Ṣigba to owhe delẹ jẹnukọnna 1914, mẹyiamisisadode lẹ jẹ yedekannu jẹ ji.​—w16.11, w. 23-25.

Naegbọn azọ́n he Lefèvre d’Étaples wà do jẹna ayidego?

To owhe 1520 lẹ gblamẹ, Lefèvre basi lẹdogbedevomẹ Biblu tọn do Flansegbe mẹ nado hẹn ẹn tin-to-aimẹ na gbẹtọ paa lẹ. Aliho he mẹ e basi zẹẹmẹ wefọ Biblu tọn lẹ tọn te yinuwado Martin Luther, William Tyndale, po John Calvin po ji taun.​—wp16.6, w. 10-12.

Vogbingbọn tẹwẹ tin to “ayiha zizedo agbasalan ji” po “ayiha zizedo gbigbọ ji” po ṣẹnṣẹn? (Lom. 8:6)

Mẹhe nọ joawuna tintan lọ nọ ze ayiha do ojlo po ayilinlẹn agbasa mapenọ tọn etọn lẹ po ji, nọ to hodọ mapote gando onú agbasalan tọn lẹ go, bosọ nọ doawagun to yé mẹ. Mẹhe nọ joawuna awetọ lọ nọ dike gbẹzan etọn blebu ni tin to kọndopọ mẹ hẹ Jiwheyẹwhe po linlẹn etọn lẹ po; podọ gbigbọ wiwe wẹ nọ deanana Klistiani mọnkọtọn. Tintan lọ nọ dekọtọn do okú mẹ, awetọ lọ nọ dekọtọn do ogbẹ̀ po jijọho po mẹ.​—w16.12, w. 15-17.

Etẹwẹ yin aliho yọ́n-na-yizan delẹ nado de magbọjẹ towe pò?

Yọ́n nuhe dona nọ otẹn tintan mẹ lẹ, yin lẹnpọn dagbenọ gando nuhe a nọ donukun lẹ go, nọ de whenu dovo egbesọegbesọ nado gbọjẹ vude, nọ duvivi nudida Jehovah tọn lẹ tọn, nọ yìn aslan pẹẹde pẹẹde, podọ nọ daihun lanmẹyiya tọn to gbesisọ mẹ bo nọ damlọn ganji.​—w16.12, w. 22-23.

“Enọku yin tẹndiọna ma nado mọ okú.” (Heb. 11:5) Gbọnna?

E taidi dọ Jiwheyẹwhe diọ ogbẹ̀ Enọku tọn zun okú, to aliho de mẹ bọ ewọ lọsu ma tlẹ yọnẹn dọ emi to kúkú.​—wp17.1, w. 12-13.

Naegbọn whiwhẹ gbẹ́ do yin nujọnu?

Mẹhe tindo whiwhẹ nọ yin mẹde he tindo pọndohlan jlẹkaji tọn gando ede go bo nọ yọ́n dogbó ede tọn lẹ. Mí dona tin to aṣeji gando lehe aliho nuyiwa tọn mítọn lẹ sọgan yinuwado mẹdevo lẹ ji do go podọ ma nado nọ ze míde daga.​—w17.01, w. 18.

Kunnudenu tẹwẹ dohia dọ Jiwheyẹwhe deanana hagbẹ anademẹtọ owhe kanweko tintan tọn kẹdẹdile e to anadena mẹhe to Hagbẹ Anademẹtọ egbezangbe tọn lọ mẹ lẹ do?

Po alọgọ gbigbọ wiwe tọn po, yé mọnukunnujẹ nugbo Owe-wiwe lẹ tọn lẹ mẹ. Po godonọnamẹ angẹli lẹ tọn po, yé penukundo azọ́n yẹwhehodidọ tọn lọ go, podọ yé ganjẹ Ohó Jiwheyẹwhe tọn go to whenue yé to anademẹ lẹ na. Onú ehelẹ dopolọ wẹ to azọ́n lọ hẹn yọnbasi to egbehe ga.​—w17.02, w. 26-28.

Etẹlẹ wẹ whàn mí nado pọ́n ofligọ lọ hlan di nuhọakuẹ?

Onú ẹnẹ delẹ die: Mẹhe na mí nunina lọ, nuhewutu e do yin nina mí, avọ́sinsan he e biọ, podọ nuhudo tangan he sin odò e sú. Mí dona nọ lẹnayihamẹpọn do lehe onú enẹlẹ gando ofligọ lọ go do ji.​—wp17.2, w. 4-5.

To whenue Klistiani de ko basi nudide de godo, be e sọgan gbẹ́ diọlinlẹn ya?

Mí dona nọ yin nugbonọ na nuhe mí dọ. Etomọṣo, to whedelẹnu e nọ biọ dọ yè ni vọ́ nudide de gbeje pọ́n. To whenue Ninevenu lẹ lẹnvọjọ, Jiwheyẹwhe diọ nudide etọn gando yé go. To whedelẹnu, ninọmẹ kavi nudọnamẹ yọyọ lẹ sọgan wá aimẹ bọ e na biọ dọ mílọsu ni wà nudopolọ.​—w17.03, w. 16-17.

Naegbọn ohó mẹhẹngble tọn didọ pé do ylan taun?

Taidi yovomi bibà do miyọ́n mẹ, e sọgan hẹn nuhahun de vantan dogọ. Vlavo owhẹ̀ mítọn whẹ́n wẹo kavi lala, ohó mẹhẹngble tọn didọ pé ma na hẹn ninọmẹ lọ pọnte gbede.​—w17.04, w. 21.