Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Atọ̀họ̀-Nuhihọ́ lọ Tọn—Zinjẹgbonu Oplọn Tọn  |  Juin 2017

“Jiwheyẹwhe Ni Dona Zinzin He A Tindo!”

“Jiwheyẹwhe Ni Dona Zinzin He A Tindo!”

DAVIDI Islaeli hohowhenu tọn wẹ zan hogbe ehelẹ nado pà nawe de he e dukosọ hẹ. Abigaili wẹ e nọ yin. Etẹwẹ whàn Davidi nado pà ẹ podọ nawẹ mí sọgan mọaleyi sọn apajlẹ etọn mẹ gbọn?

To whenue Davidi to hinhọ̀nna Ahọlu Sauli wẹ e pé yọnnu whési ehe. Asu Abigaili tọn wẹ Nabali, yèdọ dawe adọkunnọ de he nọ yìn lẹngbọ susugege to lẹdo osó tọn he to hùwaji Juda tọn mẹ. Davidi po sunnu etọn lẹ po ko “taidi adó hihọ́-basinamẹ tọn de” na lẹngbọhọtọ po lẹngbọpa Nabali tọn lẹ po. To ojlẹ de godo, Davidi do wẹnsagun lẹ hlan Nabali nado biọ ẹ ‘núdùdù depope he alọ etọn plá.’ (1 Sam. 25:8, 15, 16) E vẹawu nado dọ dọ obiọ enẹ ma sọgbe hẹ lẹnpọn dagbe, eyin yè pọ́n lehe Davidi po sunnu etọn lẹ po ko basi hihọ́na nutindo Nabali tọn lẹ do.

Ṣigba Nabali, mẹhe yinkọ etọn zẹẹmẹdo “Gugutọ” kavi “Nulunọ,” yinuwa sọgbe hẹ yinkọ etọn. E yí hogbe sinsinyẹn po mẹzunzun po do na gblọndo bo gbẹ́ nado kẹalọyi obiọ Davidi tọn. Enẹwutu, Davidi wleawu nado yì sayana Nabali, na gblọndo whánsọmẹ tọn he ma sọgbe hẹ lẹnpọn dagbe etọn wutu. Nabali po whédo etọn po na jiya nulú etọn tọn.—1 Sam. 25:2-13, 21, 22.

To whenue Abigaili mọ kọdetọn ylankan he nuyiwa sọmawhe tọn lọ jlo na hẹnwa hlan nukọn, e yí adọgbigbo do yinuwa. E yí sisi do vẹ̀ Davidi bo flin in haṣinṣan etọn hẹ Jehovah. E sọ hẹn núdùdù susugege wá na Davidi po sunnu etọn lẹ po, yèdọ mẹhe na lẹzun ahọlu Islaeli tọn he bọdego. Enẹgodo, Davidi kẹalọyi dọ Jehovah ko yí Abigaili zan nado glọnalina emi ma nado wà nuhe na ko hẹn emi hùwhẹ do Jiwheyẹwhe. Davidi dọna Abigaili dọmọ: “Jiwheyẹwhe ni dona zinzin he a tindo! Ewọ nisọ dona we, na ali he a glọn na mi to egbé ma nado duhùnhọ.”—1 Sam. 25:18, 19, 23-35.

E họnwun dọ mí ma na yinuwa di Nabali gbede gbọn dagbe mayọnẹn dali. To yidogọ mẹ, eyin mí doayi e go dọ ninọmẹ ylankan de jlo na sọawuhia, mí na wà dagbe nado nọ wà nuhe go mí pé lẹpo nado dapana ẹn. Mọwẹ, mí sọgan tindo numọtolanmẹ dopolọ hẹ salmu-kantọ lọ, mẹhe dọna Jiwheyẹwhe dọmọ: “Plọn mi zinzin po oyọnẹn po.”—Salm. 119:66.

Mẹdevo lẹ sọgan doayi e go dọ mí nọ do nuyọnẹn kavi zinzin hia to nuyiwa mítọn lẹ mẹ. Eyin yé dọtọ́n wẹo kavi lala, yé sọgan tindo numọtolanmẹ Davidi tọn nkọ, mẹhe dọmọ: “Jiwheyẹwhe ni dona zinzin he a tindo!”