Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Atọ̀họ̀-Nuhihọ́ lọ Tọn—Zinjẹgbonu Oplọn Tọn  |  Juillet 2017

Alisa

Yé Ze Yede Jo sọn Ojlo mẹ Wá—to Turquie

Yé Ze Yede Jo sọn Ojlo mẹ Wá—to Turquie

KLISTIANI owhe kanweko tintan tọn lẹ dovivẹnu taun nado hẹn “wẹndagbe Ahọluduta lọ tọn” jẹ mẹsusu dè dile e sọgan yọnbasi do. (Mat. 24:14) Mẹdelẹ tlẹ zingbejizọnlin yì otò devo lẹ mẹ. Di apajlẹ, apọsteli Paulu yì lẹdo he mẹ Turquie egbezangbe tọn tin te mẹ bo dọyẹwheho gbọn fisusu to finẹ to gbejizọnlin mẹdehlan tọn etọn lẹ whenu. * To nudi owhe 2 000 delẹ godo, enẹ wẹ to 2014, nujijla yẹwhehodidọ tọn vonọtaun de sọ yin bibasi to Turquie whladopo dogọ. Naegbọn nujijla ehe do yin tito-basina? Mẹnu lẹ wẹ tindo mahẹ to e mẹ?

“ETẸWẸ TO JIJỌ?”

Wẹnlatọ 2 800 linlán wẹ to Turquie, ṣigba gbẹtọ livi 79 wẹ to otò lọ mẹ. Ehe zẹẹmẹdo dọ wẹnlatọ dopo dona dekunnuna nudi Turquie-nu 28 000. Dile a sọgan ko lẹn do, omẹ vude poun wẹ wẹnlatọ lẹ nọ penugo nado dọho hẹ to otò ehe mẹ. Yanwle nujijla yẹwhehodidọ vonọtaun lọ tọn wẹ nado jẹ mẹsusu dè dile e sọgan yọnbasi do to ojlẹ kleun de gblamẹ. Nudi mẹmẹsunnu po mẹmẹyọnnu 550 po he nọ do Turquie-gbè lẹ wẹ zingbejizọnlin sọn otò devo lẹ mẹ wá Turquie nado dọyẹwheho dopọ hẹ wẹnlatọ he to otò lọ mẹ lẹ to nujijla lọ whenu. Etẹwẹ yin wiwadotana?

Kunnu yin dide gbayipe. Agun de to Istanbul wlan dọmọ: “Whenue gbẹtọ lẹ mọ mí, yé kanse dọ: ‘Plidopọ vonọtaun de wẹ to yìyì tofi ya? Mí to Kunnudetọ Jehovah tọn lẹ mọ to filẹpo!’” Agun de to tòdaho Izmir tọn mẹ wlan dọmọ: “Dawe de he to azọ́nwa to fihe ahihun lẹ nọ glin do dọnsẹpọ mẹho agun tọn lẹdo lọ tọn de bo kanse dọ, ‘Etẹwẹ to jijọ? Mì gbloada na azọ́n mìtọn wẹ ya?’” Mọwẹ, mẹsusu doayi nujijla lọ go.

Steffen

Mẹhe wá sọn otò devo mẹ bo wá gọalọ lẹ duvivi azọ́n yẹwhehodidọ tọn lọ tọn taun. Steffen he wá sọn Danemark dọmọ: “To azán dopodopo ji, n’nọ penugo nado dekunnuna mẹhe ma ko sèhó gando Jehovah go pọ́n lẹ. N’tindo numọtolanmẹ lọ dọ n’to oyín Jehovah tọn hẹn zun yinyọnẹn nugbonugbo.” Jean-David he wá sọn France wlan dọmọ: “Aliho dopo gee ji wẹ mí dekunnu te na gànhiho susu. E jiawu taun! Mẹsusu ma yọ́n Kunnudetọ Jehovah tọn lẹ. Diblayin to ohọ̀n lẹpo kọ̀n wẹ mí nọ penugo nado bẹ hodọdopọ jẹeji, do video mítọn de hia, bo do owe mítọn lẹ gbonu te.”

Jean-David (ṣẹnṣẹn)

 Wẹnlatọ 550 lọ lẹ do nudi owe 60 000 gbonu to osẹ awe poun gblamẹ! Na taun tọn, nujijla lọ zọ́n bọ kunnu yin dide gbayipe.

Zohunhun na lizọnyizọn lọ jideji. Nujijla vonọtaun lọ whàn mẹmẹsunnu lẹdo lọ tọn lẹ taun. Susu to yé mẹ jẹ nulẹnpọn ji do sinsẹ̀nzọn whenu-gigọ́ tọn ji. Na nugbo tọn, sọha gbehosọnalitọ whepoponu tọn lẹ tọn to Turquie jideji bo yiaga jẹ 24 to kanweko ji to osun 12 he bọdo nujijla lọ go lẹ gblamẹ.

Şirin

Mẹhe wá sọn otò devo mẹ bo wá gọalọ lẹ dọ lehe nujijla lọ yinuwado lizọnyizọn yetọn ji do etlẹ yin to whenue yé ko lẹkọyi otò yetọn lẹ mẹ godo. Mẹmẹyọnnu de he nọ yin Şirin bo wá sọn Allemagne wlan dọmọ: “Mẹmẹsunnu he to Turquie lẹ nọ dekunnu to aliho mayin aṣa tọn mẹ po awuvivo po. Winyan nọ hù yẹn taun eyin e biọ dọ ma dekunnu to aliho mayin aṣa tọn mẹ. Ṣigba, nujijla vonọtaun lọ, apajlẹ mẹmẹsunnu lẹdo lọ tọn lẹ tọn po odẹ̀ susu hihò po gọalọna mi nado wà nuhe n’ma nọ penugo nado wà dai lọ. N’tlẹ dekunnu to fihe yè nọ do pinpán dòglọ tọn te bo do alọnuwe pẹvi lẹ gbonu! Todin, n’masọ nọ kuwinyan di dai ba.”

Johannes

Johannes he wá sọn Allemagne dọmọ: “N’plọn onú delẹ he n’na yizan to lizọnyizọn ṣie mẹ. Mẹmẹsunnu he to Turquie lẹ tindo ojlo vẹkuvẹku nado má nugbo lọ hẹ mẹsusu dile e sọgan yọnbasi do. Yé nọ yí dotẹnmẹ hundote lẹpo zan nado dekunnu. N’de nado wà nudopolọ to whenue n’lẹkọwa Allemagne. Podọ nado dọ hójọhó, n’nọ dekunnuna mẹsusu todin hú dai.”

Zeynep

“Nujijla ehe yinuwado lizọnyizọn ṣie titi ji taun. E gọalọna mi nado wleawuna adọgbigbo dogọ podọ nado nọ dejido Jehovah go dogọ,” wẹ Zeynep he wá sọn France dọ.

Wẹnlatọ lẹ dọnsẹpọ ode awetọ dogọ. Owanyi po pọninọ he tin to mẹmẹsunnu he wá sọn otò voovo mẹ lẹ ṣẹnṣẹn po yinuwadomẹji na ojlẹ dindẹn. Jean-David he go mí donù wayi dọmọ: “Mí duvivi johẹmẹ mẹmẹsunnu lẹ tọn.” E yidogọ dọmọ: “Yé yí mí di họntọn podọ di hagbẹ whẹndo tọn yetọn lẹ. Yé yí mí do owhé yetọn lẹ gbè. N’yọnẹn dọ pipli mẹmẹsunnu lẹ tọn de wẹ mí yin lẹdo aihọn pé; n’ko nọ hia enẹ whlasusu to owe mítọn lẹ mẹ. Ṣigba, n’tindo numimọ etọn tlọlọ todin. E sọ vivi na mi dogọ dọ n’yin dopo to omẹ Jehovah  tọn lẹ mẹ, podọ n’dopẹna ẹn na lẹblanulọkẹyi jiawu ehe.”

Claire (ṣẹnṣẹn)

Claire he wá sọn France dọmọ: “Vlavo mí wá sọn Danemark, France, Allemagne kavi Turquie, whẹndo dopo wẹ mímẹpo yin. E taidi dọ Jiwheyẹwhe ko de dogbó otò enẹ lẹpo tọn sẹ̀ mlẹnmlẹn wẹ nkọ.”

Stéphanie (ṣẹnṣẹn)

Stéphanie he wá sọn France yidogọ dọmọ: “Nujijla vonọtaun lọ plọn mí dọ e ma yin aṣa kavi ogbè wẹ dona kọ̀n mí dopọ gba, ṣigba owanyi he mímẹpo tindo na Jehovah wẹ.”

ALE DẸN-TO-AIMẸ LẸ WẸ YÉ MỌYI

Susu to mẹmẹsunnu he wá sọn otò devo mẹ lọ lẹ mẹ jẹ nulẹnpọn ji nado sẹtẹn yì Turquie nado yì gọalọ to azọ́n pligidi he gbẹ́ dona yin wiwà to finẹ lọ mẹ. Vude to yé mẹ ko sẹtẹn. Yè nọ yọ́n pinpẹn mẹhe to sinsẹ̀n to fie nuhudo sù te ehelẹ tọn taun.

Di apajlẹ, pipli pẹvi de he bẹ wẹnlatọ 25 hẹn tin to lẹdo he to olá de mẹ. Na owhe susu, mẹho dopo gee wẹ tin to finẹ. Yí nukun homẹ tọn do pọ́n ayajẹ wẹnlatọ enẹlẹ tọn to 2015, to whenue mẹdezejotọ ṣidopo sẹtẹn sọn Allemagne po Pays-Bas po nado wá gọalọna yé!

SINSẸ̀N TO FIE NUHUDO SÙ TE

Etẹwẹ mẹhe ko sẹ̀n na ojlẹ de to fie nuhudo sù te to Turquie lẹ dọ gando gbẹzan yetọn to finẹ go? Nugbo wẹ dọ, e nọ kàn dẹpẹ biọ to whedelẹnu, ṣigba gbẹzan mọnkọtọn zinzan doale taun. Lẹnnupọndo nuhe mẹdelẹ to yé mẹ dọ ji:

Federico

Federico he yin mẹmẹsunnu de he ko wlealọ bo tindo owhe 40 linlán bo wá sọn Espagne dọmọ: “Na n’ma tindo agbasanu susu he go n’na tẹdo wutu, n’nọ vò podọ ehe nọ na mi dotẹnmẹ nado ze ayiha ṣie do nujọnu hugan lẹ ji.” Be e na na tuli mẹdevo lẹ nado biọ sinsẹ̀nzọn ehe mẹ ya? E gblọn dọ, “Gbau! Eyin a sẹtẹn yì tògodo po yanwle lọ po nado gọalọna gbẹtọ lẹ nado yọ́n yinkọ Jehovah tọn, na nugbo tọn a to dewe zedo alọmẹ na ẹn niyẹn. Nado dọ hójọhó, a na mọ nukunpedomẹgo Jehovah tọn hugan gbede pọ́n.”

Rudy

Rudy he yin mẹmẹsunnu de he ko wlealọ bo tindo nudi owhe 60 bo wá sọn Pays-Bas dọmọ: “Sinsẹ̀n to  fie nuhudo sù te podọ nugbo lọ mimá hẹ mẹsusu he ma ko sèhó gandego pọ́n lẹ nọ hẹn ayajẹ mayọnjlẹ de wá na mí. Mimọ ayajẹ he gbẹtọ lẹ nọ tindo to whenue yé kẹalọyi nugbo lọ nọ hẹn mílọsu gọ́ na ayajẹ.”

Sascha

Sascha he yin mẹmẹsunnu de he ko wlealọ bo tindo owhe 40 linlán bo wá sọn Allemagne dọmọ: “Whedepopenu he n’to lizọnyizọn lọ mẹ, n’nọ dukosọ hẹ mẹhe to nugbo lọ sè whla tintan lẹ. Dotẹnmẹ hunhundote na omẹ mọnkọtọn lẹ nado yọ́n Jehovah nọ hẹn ayajẹ mayọnjlẹ de wá na mi.”

Atsuko

Atsuko he yin mẹmẹyọnnu de he ko wlealọ bo tindo nudi owhe 35 bo wá sọn Japon dọmọ: “To dai, n’nọ jlo to whelẹponu dọ Amagẹdọni ni yawu wá. Ṣigba, to whenue n’sẹtẹn yì Turquie godo, n’dopẹna Jehovah dọ ewọ gbẹ́ pò to homẹfa. Dile n’to mimọ lehe Jehovah to anadena whẹho lẹ do, mọ wẹ ojlo ṣie nado dọnsẹpọ ẹ nọ sinyẹn dogọ do niyẹn.”

Alisa he yin mẹmẹyọnnu de he tindo owhe 30 linlán bo wá sọn Russie dọmọ: “Jehovah sinsẹ̀n to adà lizọnyizọn lọ tọn ehe mẹ ko gọalọna mi nado dọ́ dagbewà etọn lẹpo pọ́n.” (Salm. 34:8) E yidogọ dọmọ: “E ma yin Otọ́ kẹdẹ wẹ Jehovah yin na mi gba, ṣigba e sọ yin Họntọn vivẹ́ ṣie, he n’ko wá yọnẹn dogọ to ninọmẹ voovo lẹ mẹ. Gbẹzan ṣie gọ́ na ojlẹ ayajẹ tọn lẹ, numimọ dagbedagbe lẹ po dona susugege lẹ po!”

MÌ “PỌ́N OGLE LẸ HLAN”

Gbọn nujijla yẹwhehodidọ tọn vonọtaun he yin bibasi to Turquie lọ dali, wẹndagbe lọ jẹ mẹsusu dè dogọ. Etomọṣo, fisusu gbẹ́ pò to finẹ he wẹndagbe lọ ma ko jẹ. Egbesọegbesọ, mẹdezejotọ he sẹtẹn yì Turquie lẹ nọ dukosọ hẹ mẹhe ma ko sèhó gando Jehovah go pọ́n lẹ. Be e na jlo mì nado sẹ̀n to aigba-denamẹ mọnkọtọn ji ya? Eyin mọ wẹ, mí to tulina mì dọmọ: “Mì ze nukun mìtọn lẹ daga bo pọ́n ogle lẹ hlan, mì na mọdọ yé ko bia na gbingbẹ̀n.” (Joh. 4:35) Be mì sọgan gọalọ to fide to aihọn lọ mẹ, yèdọ fie ogle lẹ “ko bia na gbingbẹ̀n” te ya? Eyin mọ wẹ, mì jẹ afọdide lẹ ze ji bẹsọn din nado jẹ yanwle enẹ kọ̀n. Onú dopo họnwun: Eyin a hẹn mahẹ tintindo towe to wẹndagbe lọ hinhẹn gbayipe “yì awà he dẹn hugan aigba tọn lẹ ji” mẹ jideji, a na mọ dona mayọnjlẹ lẹ yí!—Owalọ 1:8.

^ huk. 2 Pọ́n alọnuwe lọ “Voyez le bon pays,” weda 32-​33.