Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Atọ̀họ̀-Nuhihọ́ lọ Tọn—Zinjẹgbonu Oplọn Tọn  |  Juillet 2017

Nọ Dín Adọkun He Yin Nugbo Lẹ

Nọ Dín Adọkun He Yin Nugbo Lẹ

“Mì jihọntọn lẹ na mìde gbọn adọkun mawadodo tọn lẹ yiyizan dali.”​—LUKU 16:9.

OHÀN LẸ: 122, 129

1, 2. To titonu ehe mẹ, naegbọn hẹntọnọ lẹ na gbẹ́ tin janwẹ?

TO EGBEHE, aliho he mẹ gbẹtọ lẹ nọ dín akuẹ te ylan bosọ gọ́ na mawadodo. Jọja lẹ nọ dín azọ́n kaka bo nọ bapò. Mẹsusu nọ ze ogbẹ̀ yetọn do owù mẹ nado sẹtẹn yì otò adọkunnọ hugan lẹ mẹ. Filẹpo wẹ ohẹ́n gbọn, etlẹ yin otò adọkunnọ lẹ lọsu mẹ. Podọ vogbingbọn he tin to wamọnọ lẹ po adọkunnọ lẹ po ṣẹnṣẹn fọ́n bo to agayi. Sọgbe hẹ sọhayinanú agọe tọn delẹ, to gbẹtọ kanweko ji, mẹhe yin adọkunnọ hugan sin adọkun na dibla sọ mẹhe pò lẹpo tọn to pọmẹ. Dile etlẹ yindọ e vẹawu nado dọ po nujikudo po dọ sọha enẹ sọgbe, mẹdepope ma sọgan dọ̀n dọ gbẹtọvi liva susu wẹ jẹhẹ́n klókló, to whenue mẹdevo lẹ tindo adọkun he yewlẹ po susu to kúnkan yetọn he na bọdego lẹ po mẹ sọgan zan. Jesu zinnudo nugbo vẹadi enẹ ji to whenue e dọmọ: “Wamọnọ lẹ tin to mì dè to whepoponu.” (Malku 14:7) Etẹwẹ hẹn zẹ́nmasọ ehe wá?

2 Jesu yọnẹn dọ aliho he mẹ gbẹtọ lẹ nọ dín akuẹ te to egbehe ma na diọ kakajẹ whenue Ahọluduta Jiwheyẹwhe tọn na wá. Pipli tonudidọ tọn lẹ po sinsẹ̀n lẹ po gọna tito ajọwiwa tọn nukunkẹnnọ he Osọhia 18:3 dlẹnalọdo taidi “ajọwatọ” lẹ yin apadewhe aihọn Satani tọn. Dile etlẹ yindọ omẹ Jiwheyẹwhe tọn lẹ nọ hẹn kadaninọ mlẹnmlẹn go na nuhe dù tonudidọ po sinsẹ̀n lalo lẹ po, suhugan yetọn ma sọgan nọ nọ̀ kada mlẹnmlẹn na tito ajọwiwa tọn aihọn Satani tọn.

3. Kanbiọ tẹlẹ wẹ mí na gbadopọnna?

 3 Taidi Klistiani lẹ, mí na wà dagbe nado nọ gbeje pọndohlan mítọn gando tito ajọwiwa tọn aihọn ehe tọn go pọ́n gbọn kanbiọ ehe nkọ lẹ kinkanse míde dali: ‘Nawẹ n’sọgan nọ yí nutindo agbasa tọn ṣie lẹ zan nado do nugbonọ-yinyin ṣie na Jiwheyẹwhe hia gbọn? Nawẹ n’sọgan dapana dee titlọ do aihọn ajọwiwa tọn lọ mẹ gbọn? Numimọ tẹlẹ wẹ dohia dọ omẹ Jiwheyẹwhe tọn lẹ nọ dejido ewọ go mlẹnmlẹn to aihọn he vẹawu ehe mẹ?’

APAJLẸ HỌ̀NKỌNSI MAWADODONỌ LỌ TỌN

4, 5. (a) Ninọmẹ tẹ mẹ wẹ họ̀nkọnsi he go Jesu donù to apajlẹ etọn mẹ lọ mọ ede te? (b) Tudohomẹnamẹ tẹwẹ Jesu na hodotọ etọn lẹ?

4 Hia Luku 16:1-9. Apajlẹ họ̀nkọnsi mawadodonọ lọ tọn he Jesu na hẹnmẹ lẹnnupọn taun. To whenue yè ko sawhẹdokọna họ̀nkọnsi lọ dọ e to nutindo ogán etọn tọn lẹ hẹngu godo, e yinuwa po “nuyọnẹn yọ́n-na-yizan” po bo “jihọntọn lẹ,” na yé nido gọalọna ẹn to whenue e na hẹn họ̀nkọnsi-zọ́n etọn bu. * Na nugbo tọn, Jesu ma to tulina devi etọn lẹ nado nọ yinuwa to aliho mawadodo tọn de mẹ nado sọgan nọgbẹ̀ to aihọn ehe mẹ gba. Na e ylọ mẹhe nọ zan walọ mọnkọtọn lẹ dọ “ovi titonu ehe tọn lẹ,” ṣigba nado hẹn nuagokun de họnwun wẹ zọ́n bọ e do yí apajlẹ lọ zan.

5 Jesu yọnẹn dọ taidi họ̀nkọnsi he mọ ede to ninọmẹ sinsinyẹn de mẹ lọ, e na biọ dọ susu hodotọ emitọn lẹ tọn ni hòkàn nado mọ dandannu lẹ to aihọn ajọwiwa tọn mawadodo tọn ehe mẹ. Enẹwutu, e dotuhomẹna yé dọmọ: “Mì jihọntọn lẹ na mìde gbọn adọkun mawadodo tọn lẹ yiyizan dali, na to whenue yé na busẹ, họntọn ehelẹ [Jehovah po Jesu po] nido kẹalọyi mì do nọtẹn madopodo lẹ mẹ.” Etẹwẹ mí sọgan plọn sọn ayinamẹ Jesu tọn mẹ?

6. Nawẹ mí wagbọn do yọnẹn dọ tito ajọwiwa tọn egbehe tọn ma yin apadewhe lẹndai Jiwheyẹwhe tọn?

6 Dile etlẹ yindọ Jesu ma dọ nuhewutu e do ylọ adọkun lẹ dọ adọkun “mawadodo tọn,” Biblu dohia hezeheze dọ tito ajọwiwa tọn ma yin apadewhe lẹndai Jiwheyẹwhe tọn. Jehovah hẹn pekọ wá na nuhudo Adam po Evi po tọn to Edẹni mẹ to gigọ́ mẹ. (Jen. 2:15, 16) To nukọn mẹ, to whenue gbigbọ wiwe yinuwado agun owhe kanweko tintan tọn he bẹ mẹyiamisisadode lẹ hẹn ji, “mẹdopo tata to yé mẹ ma nọ dọ dọ depope to nuhe e tindo lẹ mẹ yin etọn titi, ṣigba yé tindo nulẹpo to pọmẹ.” (Owalọ 4:32) Yẹwhegán Isaia dlẹnalọdo ojlẹ lọ he mẹ gbẹtọvi lẹpo na duvivi nutindo agbasa tọn aigba ji tọn lẹ tọn to vivomẹ te. (Isa. 25:6-9; 65:21, 22) Ṣigba todin whẹ́, hodotọ Jesu tọn lẹ na do hudo “nuyọnẹn yọ́n-na-yizan” tọn nado yí “adọkun mawadodo tọn” aihọn ehe tọn lẹ do penukundo nuhudo yetọn lẹ go dile yé to tintẹnpọn nado hẹn homẹ Jiwheyẹwhe tọn hùn.

ADỌKUN MAWADODO TỌN LẸ ZINZAN PO NUYỌNẸN PO

7. Ayinamẹ tẹwẹ mí mọ to Luku 16:10-13 mẹ?

7 Hia Luku 16:10-13. Họ̀nkọnsi he go Jesu donù to apajlẹ etọn mẹ lọ jihọntọn lẹ na ale edetiti tọn. Ṣigba, Jesu dotuhomẹna hodotọ etọn lẹ nado jihọntọn lẹ do olọn mẹ na lẹndai he ma yin ṣejannabi tọn lẹ. Wefọ he bọdo wefọ he mẹ apajlẹ lọ te go lẹ dohia dọ kanṣiṣa de tin to “adọkun mawadodo tọn lẹ” yiyizan po nugbonọ-yinyin na Jiwheyẹwhe po ṣẹnṣẹn. Nuagokun he ji Jesu to nùzindo wẹ yindọ mí sọgan ‘do míde hia nado yin nugbonọ’ po adọkun enẹlẹ po kavi yí yé zan ganji to whenue yé jẹ mí si. Gbọnna?

8, 9. Na apajlẹ lehe mẹdelẹ nọ do nugbonọ-yinyin yetọn hia to aliho he mẹ yé nọ yí adọkun mawadodo tọn yetọn lẹ zan te do tọn.

8 Aliho dagbe dopo nado yí nutindo agbasa tọn mítọn lẹ do dó míde hia di nugbonọ wẹ nado nọ basi nunina lẹ nado nọgodona azọ́n yẹwhehodidọ lẹdo aihọn pé tọn he Jesu  dọ dọdai etọn lọ. (Mat. 24:14) Viyọnnu pẹvi de to Inde tindo apotin pẹvi de he mẹ e nọ jọ ṣẹ́ngi pẹẹde pẹẹde do, bo tlẹ yí aihundanu hihọ̀ do sanvọ́ nado wàmọ. To whenue apotin lọ gọ́, e yí akuẹ lọ do basi nunina do azọ́n yẹwhehodidọ tọn lọ tamẹ. Mẹmẹsunnu de to Inde he tindo agọ̀nkẹ-gbò de hẹn agọ̀nkẹ susu yì azọ́nwatẹn lẹdogbedevomẹ tọn he ma to Bẹtẹli de to Malayalam nado basi nunina, na e yọnẹn dọ azọ́nwatẹn lọ nọ saba họ̀ agọ̀nkẹ lẹ wutu, e mọdọ nunina agọ̀nkẹ tọn bibasi na yọ́n hú nunina akuẹ tọn bibasi tlọlọ. Nuhe yè nọ ylọdọ nuyọnẹn yọ́n-na-yizan niyẹn. Mọdopolọ to Grèce, mẹmẹsunnu lẹ nọ yí amì olivie tọn, anọ́sin mimlin po núdùdù devo lẹ po do basi nunina na whẹndo Bẹtẹli tọn whẹwhẹ.

9 Mẹmẹsunnu de he wá sọn Sri Lanka, bo to tògodo todin ze owhé etọn he to Sri Lanka lọ jo na opli lẹ po plidopọ lẹ po podọ na mẹhe to sinsẹ̀nzọn whenu-gigọ́ tọn mẹ lẹ nido nọ nọ̀ e mẹ. Avọ́sinsan de wẹ ehe biọ sọn mẹmẹsunnu lọ si to akuẹzinzan-liho, ṣigba ehe gọalọna wẹnlatọ lẹdo lọ tọn he ma do alọnu sọmọ lẹ taun. To otò de mẹ, fie azọ́n mítọn yin alọhẹndotena te, mẹmẹsunnu lẹ nọ ze owhé yetọn jo na yé nido yin yiyizan taidi Plitẹnhọ Ahọluduta tọn, ehe nọ zọ́n bọ gbehosọnalitọ susu po mẹdevo he ma do alọnu sọmọ lẹ po nọ mọ fihe yé na nọ basi opli lẹ te vọnu.

10. Dona tẹlẹ wẹ mí nọ mọyi eyin mí nọ tlúalọ?

10 Apajlẹ he jẹnukọn lẹ do lehe omẹ Jiwheyẹwhe tọn lẹ nọ “yin nugbonọ to onú pẹvi pete mẹ” do hia, enẹ wẹ to adọkunnu agbasa tọn yetọn lẹ yiyizan mẹ, yèdọ nuhe ma sọgan yin yiyijlẹdo adọkun gbigbọmẹ tọn lẹ go. (Luku 16:10) Numọtolanmẹ tẹwẹ họntọn Jiwheyẹwhe tọn ehelẹ nọ tindo gando avọ́sinsan mọnkọtọn lẹ bibasi go? Yé yọnẹn dọ alọtútlú yetọn sọgan hẹn ẹn yọnbasi na yé nado mọ adọkun “nugbo” lẹ. (Luku 16:11) Mẹmẹyọnnu de he nọ nọgodona azọ́n Ahọluduta lọ tọn whẹwhẹ basi zẹẹmẹ dona he e mọyi tọn dọmọ: “Alọtútlú to agbasa-liho ko yinuwado ji e to aliho jiawu de mẹ to owhe lẹ gblamẹ. N’mọdọ dile n’to alọ tlú to agbasa-liho do, mọ wẹ pọndohlan ṣie gando mẹdevo lẹ go nọ to tepọn dogọ do niyẹn. Alọtútlú ko sọ gọalọna mi dogọ nado nọ jonamẹ, nọ fahomẹ hẹ mẹdevo lẹ, nado pehẹ flumẹjijẹ podọ nado nọ kẹalọyi ayinamẹ.” Mẹsusu ko mọdọ alọtútlú nọ hẹnmẹ wàdọkun to gbigbọ-liho.—Salm. 112:5; Howh. 22:9.

11. (a) Nawẹ nunina bibasi sọn ojlo mẹ wá nọ dohia dọ mí tindo “nuyọnẹn yọ́n-na-yizan” gbọn? (b) Nuyiwa akuẹzinzan lẹ hinhẹn sọzẹn tọn tẹwẹ to yìyì to omẹ Jiwheyẹwhe tọn lẹ ṣẹnṣẹn? (Pọ́n yẹdide he tin to bẹjẹeji hosọ ehe tọn.)

11 Nutindo agbasa tọn mítọn lẹ zinzan nado nọgodona nukọnyiyi Ahọluduta lọ tọn yin aliho devo nado dohia dọ mí tindo “nuyọnẹn yọ́n-na-yizan.” E nọ zọ́n bọ mí nọ yí nutindo mítọn lẹ zan nado gọalọna mẹdevo lẹ. Mẹhe tindo nutindo aihọn ehe tọn lẹ bo ma ka sọgan biọ sinsẹ̀nzọn whenu-gigọ́ tọn mẹ kavi sẹtẹn yì tògodo lẹ sin homẹ nọ hùn nado yọnẹn dọ nunina akuẹ tọn yetọn nọ gọalọna mẹdevo lẹ to sinsẹ̀nzọn lọ mẹ. (Howh. 19:17) Nunina sọn ojlo mẹ wá lẹ nọ gọalọ nado zín owe lẹ jẹgbonu podọ nado nọgodona azọ́n yẹwhehodidọ tọn lọ to aigba-denamẹ he ji ohẹ́n gbayipe te ṣigba bọ mẹsusu nọ kẹalọyi nugbo lọ te lẹ. Na owhe susu lẹ, to otò mọnkọtọn lẹ mẹ taidi  Congo, Madagascar po Rwanda po, e nọ saba biọ dọ mẹmẹsunnu lẹ ni de vlavo eyin núdùdù wẹ yé na họ̀ na whẹndo yetọn kavi Biblu he akuẹ etọn nọ yì azọ́nkuẹ osẹ dopo kavi osun dopo tọn to whedelẹnu. Todin, gbọn nunina mẹsusu tọn po akuẹzinzan lẹ “hinhẹn sọzẹn” po dali, titobasinanu Jehovah tọn ko nọgodona lẹdogbedevomẹ Biblu tọn bo ko hẹn Biblu tin-to-aimẹ na hagbẹ whẹndo tọn dopodopo podọ na Biblu plọntọ he huvẹ gbigbọmẹ tọn to hùhù lẹ. (Hia 2 Kọlintinu lẹ 8:13-15.) Gbọnmọ dali, nunina-basitọ lẹ po mẹhe to mimọyi lẹ po to họntọnji hẹ Jehovah po awubibọ po.

DAPANA DEWE TITLỌ DO “AJỌ́ AIHỌN EHE TỌN LẸ MẸ”

12. Nawẹ Ablaham dohia dọ emi dejido Jiwheyẹwhe go gbọn?

12 Aliho devo nado jihọntọn hẹ Jehovah wẹ nado dapana míde titlọ do whẹho ajọ́ tọn aihọn lọ tọn mẹ, bo nọ yí ninọmẹ mítọn lẹ zan nado dín adọkun he yin “nugbo” lẹ. Ablaham, dawe yisenọ de to hohowhenu, gbọn tonusise dali tọ́n sọn otò adọkunnọ lọ Uli mẹ nado sọgan yì nọ gòhọ lẹ mẹ bo doafọna họntọnjiji etọn hẹ Jehovah. (Heb. 11:8-10) E nọ ganjẹ Jiwheyẹwhe go whepoponu taidi Asisa adọkun nugbo tọn, bo ma nọ doafọna agbasanu lẹ, yèdọ nuyiwa de he na dohia dọ e ma dejido Jiwheyẹwhe go. (Jen. 14:22, 23) Jesu dohia dọ nujọnu wẹ e yin nado tindo yise mọnkọtọn, to whenue e dọna dẹpẹ adọkunnọ de dọmọ: “Eyin hiẹ jlo nado yin pipé, yì sà nutindo towe lẹ bo na wamọnọ lẹ, a nasọ tindo adọkun to olọn mẹ; enẹgodo wá bo lẹzun hodotọ ṣie.” (Mat. 19:21) Dẹpẹ enẹ ma do yise Ablaham tọn nkọ hia, ṣigba mẹdevo lẹ ko do jidide mlẹnmlẹn hia to Jiwheyẹwhe mẹ.

13. (a) Ayinamẹ tẹwẹ Paulu na Timoti? (b) Nawẹ mí sọgan yí ayinamẹ Paulu tọn do yizan mẹ to egbehe gbọn?

13 Sunnu he tindo yise de wẹ Timoti yin. To whenue Paulu ko ylọ Timoti dọ “awhànfuntọ Klisti Jesu tọn dagbe de” godo, e dọna ẹn dọmọ: “Mẹdepope he to azọ́nwa taidi awhànfuntọ de ma nọ tlọ ede do ajọ́ aihọn ehe tọn lẹ mẹ, na ewọ nido sọgan yin alọkẹyi gbọn mẹhe yí i taidi awhànfuntọ de dali.” (2 Tim. 2:3, 4) To egbehe, hodotọ Jesu tọn lẹ, ehe bẹ awhànpa mẹhe to sinsẹ̀nzọn whenu-gigọ́ tọn mẹ lẹ tọn livi dopo linlán hẹn, nọ yí ayinamẹ Paulu tọn do yizan mẹ jẹ obá he mẹ ninọmẹ yetọn na yé dotẹnmẹ jẹ. Dile yé to avùnho sọta kọgbidinamẹ ajọjijla tọn po aihọn he lẹdo yé lọ tọn po, yé nọ flin nunọwhinnusẹ́n lọ he dọmọ: “Ahọ́tọnọ nọ yin afanumẹ na mẹhe e duahọdo.” (Howh. 22:7) Satani ma na jlo nudevo de hugan dọ mí ni yí whenu po huhlọn mítọn lẹpo po zan taidi afanumẹ lẹ na aihọn ajọwiwa tọn etọn. Nudide delẹ sọgan hẹn mí zun afanumẹ na akuẹ na owhe susu lẹ. Ahọ́dudu nado tindo owhé dahodaho lẹ, sú wehọmẹ-kuẹ he yì nukunkẹ lẹ, họ̀ mọto vẹnpẹn-vẹnpẹn lẹ, podọ etlẹ yin nado basi alọwle gẹẹ lẹ sọgan dekọtọn do nuhahun sinsinyẹn lẹ mẹ to akuẹzinzan-liho. Mí nọ dohia dọ mí tindo nuyọnẹn yọ́n-na-yizan eyin mí hẹn gbẹzan mítọn bọawu bo de ahọ́ po akuẹzinzan mítọn lẹ po pò, na mí nido vò nado yin afanumẹ Jiwheyẹwhe tọn kakati nido yin na tito ajọwiwa tọn aihọn ehe tọn.—1 Tim. 6:10.

14. Gbemima nankọ wẹ mí dona basi? Na apajlẹ lẹ.

14 Gbẹzan mítọn hinhẹn bọawu nọ biọ dọ mí ni nọ ze nujọnu lẹ do otẹn tintan mẹ. Asu po asi po de tindo azọ́nwhé de bosọ nọ mọ azọ́nwa taun. Etomọṣo, ojlo yetọn nado gọ̀ biọ sinsẹ̀nzọn whenu-gigọ́ tọn mẹ whàn yé nado sà azọ́nwhé yetọn, tọjihun yetọn po agbasanu devo lẹ po. Enẹgodo, yé ze yede jo nado gọalọ to whenue azọ́n họ̀gbigbá tọn tatọ́-tẹnnọ he to Warwick, to New York lọ tọn to yìyì. Dona vonọtaun he yé mọyi wẹ nado sẹ̀n dopọ hẹ viyọnnu yetọn po asu etọn po to Bẹtẹli, podọ na osẹ delẹ hẹ mẹjitọ mẹmẹsunnu lọ tọn lẹ he tindo mahẹ to azọ́n Warwick gbigbá tọn lọ mẹ ga. Mẹmẹyọnnu gbehosọnalitọ de to Colorado, to États-Unis, mọ agbasazọ́n whenu gli tọn de do akuẹsẹdotẹn  de. Homẹ ogán etọn lẹ tọn hùn do azọ́n etọn go sọmọ bọ e yin bibiọ to e si nado jẹ azọ́nwa ji na whenu-gigọ́ bo na jẹ azọ́nkuẹ etọn dai tọn donu atọ̀n dù ji. Ṣigba, na azọ́n lọ na fẹayihasẹna ẹn sọn lizọnyizọn lọ ji wutu, e gbẹ́ nuzedonukọnnamẹ he na hẹn akuẹ susu wá na ẹn ehe dai. Vude poun to avọ́sinsan madosọha he devizọnwatọ Jehovah tọn lẹ nọ basi lẹ mẹ niyẹn. Gbemima mọnkọtọn nado ze Ahọluduta lọ do otẹn tintan mẹ nọ dohia dọ mí nọ yí nukun nujọnu tọn do pọ́n họntọnjiji hẹ Jiwheyẹwhe po adọkun gbigbọmẹ tọn lẹ po hugan nuhe tito ajọwiwa tọn aihọn ehe tọn sọgan zedonukọnnamẹ lẹ.

WHENUE ADỌKUN AGBASA TỌN LẸ NA BUSẸ

15. Adọkun tẹlẹ wẹ nọ hẹn dona daho hugan wá?

15 Adọkun agbasa tọn lẹ ma yin ohia dona Jiwheyẹwhe tọn dandan gba. Jehovah nọ dona mẹhe “nọ sudeji to azọ́n dagbe lẹ mẹ” lẹ. (Hia 1 Timoti 6:17-19.) Di apajlẹ, to whenue Lucia * sè dọ nuhudo lizọnyizọnwatọ tọn tin to Albanie, e sẹtẹn sọn Italie yì dọ́n to 1993 mahopọnna dọ e ma do nude he na nọ hẹn akuẹ wá na ẹn, bo deji mlẹnmlẹn do Jehovah go. E plọn Albanie-gbè bo ko gọalọna gbẹtọ hugan 60 jẹ klandowiwe kọ̀n. Dile etlẹ yindọ suhugan omẹ Jiwheyẹwhe tọn lẹ tọn ma nọ dọyẹwheho to aigba-denamẹ mọnkọtọn he nọ de sinsẹ́n susu tọ́n lẹ ji, nudepope he mí wà nado gọalọna mẹdevo lẹ nado mọ ali ogbẹ̀ tọn lọ bo gbọṣi e ji na yin nuhọakuẹ na míwlẹ po yewlẹ po kakadoi.—Mat. 6:20.

16. (a) Etẹwẹ to tepọn tito ajọwiwa tọn aihọn ehe tọn? (b) Nawẹ nuhe mí yọnẹn gando sọgodo go dona yinuwado pọndohlan mítọn gando adọkun agbasa tọn lẹ go ji gbọn?

16 Jesu dọ dọ: “To whenue [adọkun mawadodo tọn lẹ] na busẹ,” ehe dohia dọ yé na busẹ dandan. (Luku 16:9) Aijijẹ akuẹsẹdotẹn po adọkun otò tọn lẹ po tọn he mí nọ mọ to egbehe lẹ ma tlẹ ko yin nude yijlẹdo nuhe na jọ lẹdo aihọn pé to sọgodo he to yakẹ lọ go. Titonu Satani tọn blebu—tonudidọ, sinsẹ̀n po tito ajọwiwa tọn po—wẹ na busẹ. Yẹwhegán Ezekiẹli po Zefania po dọ dọdai dọ sika po fataka po he ko yin nujọnu na aihọn ajọwiwa tọn ehe na owhe kanweko susu lẹ, na wá lẹzun onú tata. (Ezek. 7:19; Zef. 1:18) Etẹwẹ na yin numọtolanmẹ mítọn to whenue mí ko poyọnho bo wá mọdọ mí ko yí adọkun nugbo lẹ do sanvọ́ do “adọkun mawadodo tọn” susugege aihọn ehe tọn lẹ tamẹ? Mí sọgan tindo numọtolanmẹ dawe de tọn nkọ he yí gbẹzan etọn blebu do wazọ́n bo bẹ akuẹ susu pli bo wá sè dọ akuẹ lọ lẹ ma yin akuẹ jọ akuẹ. (Howh. 18:11) Mọwẹ, adọkun mọnkọtọn lẹ na busẹ, enẹwutu mí ni ma dike dotẹnmẹ hundote lọ nado yí yé zan nado “jihọntọn” lẹ do olọn mẹ ni gbọ mí go blo. Nudepope he mí wà nado nọgodona Ahọluduta Jehovah tọn lẹ nọ hẹn mí jẹ adọkun to gbigbọ-liho.

17, 18. Etẹlẹ wẹ to sẹdotẹnmẹ na họntọn Jiwheyẹwhe tọn lẹ?

17 To whenue Ahọluduta Jiwheyẹwhe tọn na wá, họ̀haya po ahọ́dudu nado tindo owhé po na doalọte, núdùdù na yin vọnu bo nasọ gbọn kámẹ-gòmẹ, dotowhé ma nasọ tin ba. Whẹndo aigba ji tọn Jehovah tọn na duvivi sinsẹ́n dagbe hugan he aigba na detọ́n tọn. Sika, fataka po onú akuẹgegenu tọn mọnkọtọn devo lẹ po na lẹzun aṣọ́donu lẹ, kakati yé nido yin nusisà kavi nubẹpli lẹ. Owhlẹ, zannu po ogàn dagbe hugan lẹ po na tin-to-aimẹ vọnu nado gbá ohọ̀ dagbedagbe lẹ. Họntọn lẹ na nọ gọalọna mí sọn ojlo mẹ wá, bo ma na nọ donukun akuẹ. Aliho yọyọ he mẹ adọkunnu susugege aigba tọn lẹ na nọ yin mimá te na gbọṣi aimẹ kakadoi.

18 Vude poun to ahọsumẹ họakuẹ he to tepọn mẹhe jihọntọn do olọn mẹ lẹ mẹ niyẹn. Ayajẹ sinsẹ̀n-basitọ Jehovah tọn lẹ tọn na gọfla to whenue yé na sè bọ Jesu na dọmọ: “Mì wá, mì mẹhe Otọ́ ṣie ko dona lẹ, mì dugu Ahọluduta lọ tọn he ko yin awú etọn wle dai na mì sọn whenue aihọn ko yin didoai.”—Mat. 25:34.

^ huk. 4 Jesu ma dohia eyin whẹsadokọnamẹ lọ yin nugbo kavi lalo. Hogbe Glẹkigbe tọn lọ he yin lilẹdo “sawhẹdokọna” to Luku 16:1 mẹ, na linlẹn lọ dọ yè hẹn yinkọ họ̀nkọnsi lọ tọn gble wẹ. Enẹwutu, nuyiwa họ̀nkọnsi lọ tọn ji wẹ Jesu ze ayidonugo do, e ma yin do whẹwhinwhẹ́n he wutu azọ́n do gbledo e ji.

^ huk. 15 Otàn gbẹzan tọn Lucia Moussanett tọn sọawuhia to Réveillez-vous! 22 juin 2003, w. 18-22 mẹ.