Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Atọ̀họ̀-Nuhihọ́ lọ Tọn—Zinjẹgbonu Oplọn Tọn  |  Juillet 2017

“Mì Nọ Viavi hẹ Mẹhe to Avivi Lẹ”

“Mì Nọ Viavi hẹ Mẹhe to Avivi Lẹ”

“Mì nọ to tulina ode awetọ bo nọ to ode awetọ hẹn lodo.”​—1 TẸS. 5:11.

OHÀN LẸ: 90, 111

1, 2. Naegbọn e biọ dọ mí ni dọhodo lehe yè sọgan miọnhomẹna mẹhe to aluẹmẹ lẹ do ji? (Pọ́n yẹdide he tin to bẹjẹeji hosọ ehe tọn.)

SUSI dọmọ: “Diblayin na owhe dopo to okú visunnu mítọn tọn godo, mí gbẹ́ tin to awufiẹsa po awubla sinsinyẹn po mẹ.” Klistiani devo dọ dọ to whenue asi emitọn kú to ajiji mẹ, ehe hẹn “awufiẹsa sinsinyẹn de” wá na emi. E blawu dọ mẹsusu devo lẹ tin to awufiẹsa sinsinyẹn ehe nkọ mẹ ga. Mẹsusu to agun Klistiani tọn mẹ sọgan ko nọma donukọn dọ mẹyiwanna yetọn lẹ na kú jẹnukọnna Amagẹdọni. Vlavo eyin hiẹ lọsu ko hẹn mẹyiwanna de bu to okú mẹ kavi yọ́n mẹde he to aluẹmẹ, a sọgan kanse dọ, ‘Nawẹ yè sọgan gọalọna mẹhe to aluẹmẹ lẹ nado pehẹ ninọmẹ awubla tọn yetọn gbọn?’

2 Vlavo a sọgan nọ sè bọ mẹdelẹ nọ dọ dọ, awubla nọ wá busẹ dile ojlẹ to yìyì. Ṣigba, be nugbo wẹ dọ awubla mẹhe to aluẹmẹ de tọn nọ wá busẹ na ede dile ojlẹ to yìyì ya? Asuṣiọsi de dọmọ: “N’mọdọ e sọgbe hugan nado nọ dọ dọ nuhe mẹde nọ yí whenu etọn do wà lẹ wẹ nọ gọalọna ẹn na awubla etọn nido busẹ.” Mọwẹ, kẹdẹdi apà he to agbasago de, awufiẹsa he ninọmẹ awubla tọn de nọ hẹnwa sọgan depò vudevude dile ojlẹ to yìyì eyin  yè na ẹn ayidonugo nujọnu tọn. Onú tangan tẹlẹ wẹ sọgan gọalọna mẹhe to aluẹmẹ lẹ nado duto awufiẹsa yetọn ji?

JEHOVAH—“JIWHEYẸWHE HOMẸMIMIỌN LẸPO TỌN”

3, 4. Naegbọn mí sọgan kudeji dọ Jehovah nọ mọnukunnujẹ nuhudo homẹmiọnnamẹ tọn he mẹhe to aluẹmẹ de tindo mẹ?

3 Matin ayihaawe, asisa homẹmiọnnamẹ tọn tintan mítọn wẹ Otọ́ awuvẹmẹtọ olọn mẹ tọn mítọn Jehovah. (Hia 2 Kọlintinu lẹ 1:3, 4.) Jehovah, yèdọ mẹhe yin apajlẹ dagbe hugan to awuvẹmẹ didohia mẹ, hẹn omẹ etọn lẹ deji dọmọ: “Yẹnlọsu wẹ to homẹmiọnna mì.”—Isa. 51:12; Salm. 119:50, 52, 76.

4 Otọ́ lẹblanu sisosiso lẹ tọn mítọn lọsu ko hẹn mẹyiwanna lẹ bu to okú mẹ pọ́n, yèdọ gbẹtọ taidi, Ablaham, Isaki, Jakọbu, Mose po Ahọlu Davidi po. (Sọh. 12:6-8; Mat. 22:31, 32; Owalọ 13:22) Ohó Jiwheyẹwhe tọn hẹn mí deji dọ Jehovah yí jejejininọ do to nukọnpọnhlan—yèdọ tindo ojlo vẹkuvẹku na—ojlẹ he mẹ Ewọ na hẹn yé gọwá ogbẹ̀ te. (Jobu 14:14, 15) Yé na to ayajẹ bo nasọ tindo agbasalilo dagbe. Sọ flindọ Visunnu yiwanna vivẹ́ Jiwheyẹwhe tọn—yèdọ mẹhe go “homẹ etọn nọ hùn do . . . taun”—kú okú awufiẹsa tọn de. (Howh. 8:22, 30) E na vẹawu nado basi zẹẹmẹ awufiẹsa he enẹ na ko hẹnwa na Jehovah tọn.—Joh. 5:20; 10:17.

5, 6. Nawẹ Jehovah sọgan miọnhomẹna mí gbọn?

5 Mí sọgan deji mlẹnmlẹn dọ Jehovah na yinuwa do ota mítọn mẹ. Enẹwutu, mí ma dona nọ whleawu nado túntún awubla he to ahun ji na mí jẹgbonu na ẹn to odẹ̀ mẹ. Lehe e yin homẹmiọnnamẹnu do sọ nado yọnẹn dọ Jehovah nọ mọnukunnujẹ awufiẹsa mítọn mẹ bosọ nọ na mí homẹmimiọn he mí tindo nuhudo etọn nugbonugbo! Ṣigba nawẹ e nọ wà ehe gbọn?

6 Dopo to aliho he mẹ Jiwheyẹwhe nọ gọalọna mí te wẹ gbọn “homẹmimiọn he gbigbọ wiwe nọ namẹ” gblamẹ. (Owalọ 9:31) Huhlọn-yido-wazọ́n Jiwheyẹwhe tọn yin asisa homẹmiọnnamẹ tọn daho de. Jesu dopà dọ Otọ́ he to olọn mẹ na “na gbigbọ wiwe mẹhe to bibiọ ẹ lẹ” sọn ojlo mẹ wá. (Luku 11:13) Susi he yin nùdego wayi dọmọ: “Whlasusu wẹ mí nọ jẹklo poun bo nọ biọ dọ Jehovah ni miọnhomẹna mí. To whelẹponu, jijọho Jiwheyẹwhe tọn nọ họ́ ahun po ayiha mítọn lẹ po nugbonugbo.”—Hia Filipinu lẹ 4:6, 7.

JESU—YẸWHENỌ DAHO MẸTỌNHOPỌNTỌ DE

7, 8. Naegbọn mí sọgan deji dọ Jesu na miọnhomẹna mí?

7 Awuvẹmẹ sisosiso Jehovah tọn yin didohia to aliho pipé de mẹ to ohó po nuyiwa Visunnu awuvẹmẹtọ etọn, Jesu tọn lẹ po mẹ, to whenue e tin to aigba ji. (Joh. 5:19) Jesu yin didohlan nado miọnhomẹna “mẹhe ahun yetọn jẹflumẹ lẹ” podọ “mẹhe to aluẹmẹ lẹpo.” (Isa. 61:1, 2; Luku 4:17-21) Humọ, ewọ yin yinyọnẹn taidi mẹhe nọ do awuvẹmẹ sisosiso hia—yèdọ jẹhẹnu de he nọ whànmẹ nado mọnukunnujẹ yajiji mẹdevo lẹ tọn mẹ, po ojlo ahundopo tọn lọ po nado de yajiji yetọn pò.—Heb. 2:17.

8 To whenue Jesu gbẹ́ yin jọja, ayihaawe ma tin dọ okú hagbẹ whẹndo tọn etọn lẹ po mẹyinyọnẹn etọn lẹ po tọn hẹn awufiẹsa wá na ẹn. E tlẹ taidi dọ otọ́ mẹgopọntọ etọn Josẹfu kú to whenue Jesu gbẹ́ yin jọja de. * Yí nukun homẹ tọn do pọ́n lehe jọja awuvẹmẹtọ lọ Jesu, vlavo he gbẹ́ to aflanmẹ kavi tindo owhe 20 linlán, dona doakọnna awubla ede tọn, onọ̀ etọn tọn, gọna nọvisunnu po nọviyọnnu etọn lẹ po tọn do.

9. Nawẹ Jesu do awuvẹmẹ hia to whenue Lazalọsi kú gbọn?

 9 Whenue Jesu bẹ lizọnyizọn etọn jẹeji, aliho he mẹ e do zinzin po awuvẹmẹ po hia te jẹna ayidego. Di apajlẹ, flin ojlẹ he mẹ họntọn vivẹ́ etọn Lazalọsi kú. Dile etlẹ yindọ Jesu yọnẹn dọ emi na fọ́n Lazalọsi sọnku, e sè vivẹ́ he awubla lọ hẹnwa Malia po Malta po ji. Awuvẹmẹ sisosiso whàn ẹn sọmọ bọ e sè vivẹ́ lọ yì ahun mẹ bo kùn dasin.—Joh. 11:33-36.

10. Naegbọn mí sọgan dejido homẹmiọnnamẹ Jesu tọn go to egbehe?

10 Nawẹ nuyiwa awuvẹmẹ po homẹmiọnnamẹ tọn Jesu tọn lẹ po sọgan gọalọna mí to egbehe gbọn? Owe-wiwe lẹ na mí jide dọ “nudopolọ wẹ Jesu Klisti yin to osọ he wayi, to egbé podọ kakadoi.” (Heb. 13:8) To whenuena e yindọ “Afọzedaitọ-gán ogbẹ̀ tọn lọ” nọ mọnukunnujẹ nuhe awublamẹninọ zẹẹmẹdo mẹ, “e penugo nado gọalọna mẹhe to yinyin whiwhlepọn lẹ.” (Owalọ 3:15; Heb. 2:10, 18) Enẹwutu, mí sọgan deji dọ awufiẹsa mẹdevo lẹ tọn na gbẹ́ nọ yinuwado Klisti ji podọ dọ ewọ na gbẹ́ nọ mọnukunnujẹ awubla yetọn mẹ, bo nasọ nọ miọnhomẹna yé “to ojlẹ sisọ mẹ.”—Hia Heblu lẹ 4:15, 16.

“HOMẸMIMIỌN SỌN OWE-WIWE LẸ MẸ”

11. Wefọ tẹwẹ a mọdọ e nọ miọnhomẹnamẹ hugan?

11 Kandai he gando numọtolanmẹ awubla tọn sinsinyẹn he Jesu tindo to whenue Lazalọsi kú go yin dopo poun to wefọ homẹmiọnnamẹ tọn susugege he tin to Ohó Jiwheyẹwhe tọn mẹ lẹ mẹ. Abajọ Biblu dọ dọ, “na nuhe ko yin kinkandai jẹnukọn lẹpo yin kinkandai na oplọn mítọn, na míwlẹ nido sọgan tindo todido gbọn akọndonanu mítọn gblamẹ podọ gbọn homẹmimiọn sọn Owe-wiwe lẹ mẹ gblamẹ.” (Lom. 15:4) Eyin hiẹ lọsu to aluẹmẹ, a sọgan mọ homẹmiọnnamẹ sọn wefọ taidi dehe bọdego ehelẹ mẹ:

  • “Jehovah ma dẹn do mẹhe ahun yetọn jẹflumẹ lẹ; e nọ whlẹn ayimajainọ lẹ.”—Salm. 34:18, 19.

  • “Whenue magbọjẹ lẹ húagbọ́ mi, hiẹ [Jehovah]miọnhomẹna mi bo hẹn kọgbọ wá na mi.”—Salm. 94:19.

  • “Na Oklunọ mítọn Jesu Klisti lọsu podọ Jiwheyẹwhe Otọ́ mítọn, yèdọ mẹhe yiwanna mí bo na mí homẹmimiọn madopodo po todido dagbe po gbọn nukundagbe majẹhẹ dali, ni miọnhomẹna mì bo hẹn mì lodo.”—2 Tẹs. 2:16, 17. *

AGUN LỌ—ASISA HOMẸMIỌNNAMẸ TỌN DAHO DE

12. Aliho titengbe tẹ mẹ wẹ mí sọgan dohia dọ mí yin asisa homẹmiọnnamẹ tọn na mẹdevo lẹ te?

12 Agun Klistiani tọn yin asisa homẹmiọnnamẹ tọn devo na mẹhe to aluẹmẹ lẹ. (Hia 1 Tẹsalonikanu lẹ 5:11.) Nawẹ a sọgan nọ na huhlọn bo nọ miọnhomẹna mẹhe tindo “ayiha he jẹflumẹ” lẹ gbọn? (Howh. 17:22) Hẹn do ayiha mẹ dọ ojlẹ voovo wẹ tin, yèdọ “ojlẹ de nado nabọẹ podọ ojlẹ de nado dọho.” (Yẹwh. 3:7) Asuṣiọsi de he nọ yin Dalene dọmọ: “Mẹhe to aluẹmẹ lẹ nọ tindo nuhudo nado dọ linlẹn po numọtolanmẹ yetọn lẹ po tọ́n. Enẹwutu, onú titengbe hugan he a sọgan wà na mẹhe to aluẹmẹ de wẹ nado dotoaina ẹn bo ma gbòhódonù na ẹn blo.” Junia, he mẹdaho etọn sunnu hù ede, yidogọ dọmọ: “Eyin a ma tlẹ penugo nado mọnukunnujẹ awubla yetọn mẹ to gigọ́ mẹ, nujọnu lọ wẹ yindọ a tindo ojlo nado mọnukunnujẹ numọtolanmẹ yetọn mẹ.”

13. Etẹwẹ mí dona nọ flin gando awubla go?

13 Sọ flindọ, e ma yin aliho dopolọ mẹ wẹ mẹlẹpo nọ blawu bosọ nọ do e hia te. To whedelẹnu, mẹhe to ninọmẹ awubla tọn mẹ lọ kẹdẹ wẹ nọ yọ́n nuhe to gbigbò e, podọ e sọgan vẹawuna ẹn nado dọ numọtolanmẹ sisosiso etọn lẹ tọ́n. Ohó Jiwheyẹwhe tọn dọmọ: “Ahun lọsu wẹ nọ yọ́n nuhe to awuvẹ  hẹnwa na ẹn, podọ mẹdevo lao ma sọgan má ayajẹ etọn hẹ ẹ.” (Howh. 14:10) Eyin mẹde tlẹ dọ numọtolanmẹ etọn, e ma nọ saba bọawuna mẹdevo lẹ nado mọnukunnujẹ nuhe e to tintẹnpọn nado dọna yé lọ mẹ.

14. Nawẹ mí sọgan mọ hogbe he mí na yí do miọnhomẹna mẹhe to aluẹmẹ lẹ gbọn?

14 Enẹwutu, e sọgan vẹawu nado yọ́n nuhe mí na dọna mẹhe to awubla sinsinyẹn mẹ de. Etomọṣo, Biblu dọ dọ “odẹ́ nuyọnẹntọ tọn nọ hẹnazọ̀ngbọ.” (Howh. 12:18) Mẹsusu ko mọ linlẹn homẹmiọnnamẹ tọn delẹ he yé sọgan má hẹ mẹdevo lẹ sọn alọnuwe lọ Whenuena Mẹhe Hiẹ Yiwanna de Kú mẹ. * Ṣigba, to paa mẹ, nudagbe hugan he hiẹ sọgan wà nado gọalọ wẹ nado “nọ viavi hẹ mẹhe to avivi lẹ.” (Lom. 12:15) Gaby, mẹhe asu kú do, yigbe dọmọ: “Dasin wá lẹzun nuhe n’do nọ dọ nuhe to ahun ji na mi lẹ tọ́n. Enẹ wẹ zọ́n bọ n’nọ mọ homẹmimiọn yí jẹ obá de mẹ eyin họntọn lẹ wá viavi hẹ mi. To ojlẹ enẹ mẹ, n’nọ mọdọ n’ma tin to dee ṣo to awubla ṣie mẹ.”

15. Nawẹ mí sọgan miọnhomẹnamẹ eyin e vẹawuna mí nado wàmọ nukun sọ nukun gbọn? (Sọ pọ́n apotin lọ “ Hogbe Dagbe Delẹ Nado Miọnhomẹnamẹ.”)

15 Eyin e vẹawuna we nado dọhona mẹhe to awubla mẹ de nukun sọ nukun, e sọgan bọawu hugan nado miọnhomẹna ẹn gbọn nukinkan do kalti de ji, wekanhlanmẹ Intẹnẹt ji tọn, alokan ji tọn, kavi wema ji tọn dali. A sọgan donù wefọ homẹmiọnnamẹ tọn de go poun, flin in jijọ kavi jẹhẹnu titengbe mẹhe kú lọ tọn delẹ, kavi a sọgan dọ numimọ dagbe de he a yiwanna taun gando mẹlọ go. Junia dọmọ: “Hogbe tulinamẹ tọn kleun delẹ kavi oylọ-basinamẹ Klistiani hatọ de tọn nado yí whenu zan dopọ hẹ ẹ gọalọna mi taun. Nuyiwa enẹlẹ hẹn mi tindo numọtolanmẹ lọ dọ yè yiwanna mi bosọ nọ hò ṣie pọ́n.”

16. Etẹwẹ yin aliho titengbe de he mẹ mí sọgan miọnhomẹnamẹ po kọdetọn dagbe po te?

 16 Ma yí nukunpẹvi do pọ́n lehe dẹ̀hiho hẹ Klistiani hatọ he to aluẹmẹ de gọna dẹ̀hiho do ota etọn mẹ yin nujọnu sọ blo. Dile etlẹ yindọ e sọgan vẹawu nado dọ linlẹn towe lẹ tọ́n to odẹ̀ mẹ to ninọmẹ awubla tọn mọnkọtọn mẹ, ovẹvivẹ ahundopo tọn towe do ota etọn mẹ, etlẹ yin po dasin po gọna ogbè he to sisọsisọ de, sọgan de awufiẹsa etọn pò taun. Dalene flin dọmọ: “To whedelẹnu, whenue mẹmẹyọnnu lẹ wá dla mi pọ́n, n’nọ kanse yé eyin yé na jlo nado hodẹ̀ kleun de. Yé nọ jẹ dẹ̀ho ji, podọ to bẹjẹeji yé nọ saba to hogbe lẹ dín, ṣigba to paa mẹ to hodidọ kleun delẹ godo, ogbè yetọn nọ wá sinai bọ yé nọ hodẹ̀ he siso taun de. Yise dolido yetọn, owanyi yetọn po mẹtọnhopọn yetọn po ko hẹn yise ṣie lodo taun.”

TO HOMẸMIỌNNAMẸ ZỌNMII

17-19. Naegbọn mí dona nọ to homẹmiọnnamẹ zọnmii?

17 Ojlẹ he mẹde na nọ aluẹmẹ na nọ gbọnvo taun sọn mẹde ji jẹ mẹde ji. Enẹwutu, hẹn dewe tin-to-aimẹ, e ma yin to azán tintan he bọdo nujijọ lọ go tlolo lẹ gblamẹ kẹdẹ, to whenue họntọn po hẹnnumẹ susu po tin topọ hẹ mẹlọ gba, ṣigba to osun he na bọdego lẹ mẹ whenue mẹdevo lẹ ko lẹkọyi nuwiwa egbesọegbesọ tọn yetọn lẹ kọ̀n. “Họntọn nugbo nọ yiwannamẹ to whelẹponu, podọ nọvisunnu he go yè sọgan dejido to ojlẹ ayimajai tọn lẹ mẹ wẹ ewọ.” (Howh. 17:17) Klistiani hatọ lẹ sọgan yin asisa homẹmiọnnamẹ tọn daho de na mẹde dile e na dẹnsọ bọ mẹlọ na to pipehẹ awubla.—Hia 1 Tẹsalonikanu lẹ 3:7.

18 Flindọ mẹhe to aluẹmẹ lẹ sọgan nọ wá blawu sinsinyẹn to whemẹwhemẹ to whenue azán he gbè omẹ yetọn kú pé, whenue yé sè nuhiho de, mọ fọto de, tin to nuwiwa delẹ kọ̀n, kavi etlẹ yin to whenue yé sè owán kavi nudidọ de kavi to ojlẹ owhe lọ tọn de mẹ. Susu nuhe alọwlemẹ he to aluẹmẹ de na basi edeṣo whla tintan lẹ tọn—taidi plidopọ de kavi oflin yìyì—sọgan hẹn awubla wá na ẹn taun. Mẹmẹsunnu de dọmọ: “N’lẹndọ hùnwhẹ alọwle-zan tọn mítọn he n’na bayi dee ṣo to okú asi ṣie tọn godo na hẹn awubla wá na mi taun, podọ e ma bọawu nugbo. Ṣigba mẹmẹsunnu po mẹmẹyọnnu delẹ po basi tito bo ylọ họntọn vivẹ́ ṣie kleun delẹ, na yé ma jlo dọ ma nọ dee ṣo wutu.”

19 Etomọṣo, hẹn do ayiha mẹ dọ e ma yin to nujijọ vonọtaun lẹ kẹdẹ whenu wẹ mẹhe to aluẹmẹ lẹ nọ tindo nuhudo tulinamẹ tọn te gba. Junia basi zẹẹmẹ dọmọ: “Nado nọpọ́ hẹ omẹ mọnkọtọn bo gọalọna ẹn eyin e ma tlẹ yin to nujijọ vonọtaun de whenu sọgan hẹn ale wá taun. Afọdide madonukun mọnkọtọn lẹ zize nọ họakuẹ taun bosọ nọ miọnhomẹnamẹ.” Na nugbo tọn, mí ma sọgan de awubla lẹpo sẹ̀ kavi sú odò he okú mẹyiwanna de tọn kùn dote lọ mlẹnmlẹn, ṣigba mí sọgan miọnhomẹnamẹ jẹ obá de mẹ gbọn afọdide yọ́n-na-yizan lẹ zize nado gọalọna mẹhe to aluẹmẹ lọ dali. (1 Joh. 3:18) Gaby flin dọmọ: “N’nọ dopẹna Jehovah taun na mẹho owanyinọ he gọalọna mi nado jugbọn ninọmẹ sinsinyẹn voovo ṣie lẹ mẹ lẹ. Na nugbo tọn, yé ko hẹn mi tindo numọtolanmẹ lọ dọ awà owanyinọ Jehovah tọn lẹ lẹdo mi.”

20. Naegbọn opagbe Jehovah tọn lẹ do yin asisa homẹmiọnnamẹ tọn daho de?

20 Lehe e yin homẹmiọnnamẹnu do sọ nado yọnẹn dọ Jehovah, Jiwheyẹwhe homẹmimiọn lẹpo tọn na de awubla lẹpo sẹ̀ bo na miọnhomẹnamẹ mlẹnmlẹn to whenue “mẹhe to yọdò oflin tọn lẹ mẹ lẹpo na sè ogbè [Klisti tọn] bo tọ́njẹgbonu”! (Joh. 5:28, 29) Jiwheyẹwhe dopagbe dọ “[emi] na de okú sẹ̀ kakadoi, Oklunọ Nupojipetọ Jehovah na súnsún dasin sẹ̀ sọn nukun lẹpo mẹ.” (Isa. 25:8, Odò.) To whenẹnu, kakati nado “nọ viavi hẹ mẹhe to avivi lẹ,” mẹhe na nọ aigba ji lẹpo na “nọ jaya hẹ mẹhe to ayajẹ lẹ.”—Lom. 12:15.

^ huk. 8 Whla godo tọn he oyín Josẹfu tọn yin nùdego wẹ whenue Jesu tindo owhe 12. Whenue Jesu wà azọ́njiawu etọn tintan bo diọ osin zun ovẹn, yinkọ Josẹfu tọn ma yin nùdego—to nujijọ enẹ kavi devo depope he bọdego whenu. To whenue Jesu to yatin ji, e biọ to apọsteli Johanu si nado penukundo Malia go, nuhe Jesu ma na ko wà eyin Josẹfu gbẹ́ pò to ogbẹ̀.—Joh. 19:26, 27.

^ huk. 14 Sọ pọ́n hosọ lọ Comme Jésus, consolez les endeuillésto Atọ̀họ̀-Nuhihọ́ lọ Tọn 1er novembre 2010 [Flansegbe] tọn mẹ.