Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Atọ̀họ̀-Nuhihọ́ lọ Tọn—Zinjẹgbonu Oplọn Tọn  |  Juillet 2017

“Na Ewọ Ni . . . Hẹn Tito Towe Lẹpo Tindo Kọdetọn Dagbe”

“Na Ewọ Ni . . . Hẹn Tito Towe Lẹpo Tindo Kọdetọn Dagbe”

“Nọ mọ awuvivi susu to Jehovah mẹ, ewọ nasọ na we ojlo ahun towe mẹ tọn lẹ.”—SALM. 37:4.

OHÀN LẸ: 135, 81

1. Nudide tẹwẹ jọja de dona basi na sọgodo, ṣigba naegbọn e ma dona hanú zẹjlẹgo? (Pọ́n yẹdide he tin to bẹjẹeji hosọ ehe tọn.)

MATIN ayihaawe, mìwu jọja lẹ na kọngbedopọ dọ whẹpo mẹde nido bẹ gbejizọnlin de jẹeji, nuyọnẹnnu wẹ e na yin dọ mẹlọ ni basi tito fie e na yì tọn. Gbẹninọ taidi gbejizọnlin de bibasi, podọ ojlẹ lọ nado basi tito fie mì jlo na yì tọn wẹ whenue mì gbẹ́ yin jọja. Na nugbo tọn, tito lẹ bibasi sọgan nọ vẹawu. Viyọnnu de he nọ yin Heather dọmọ: “E nọ dobu taun. Nuhe yè na yí pipotọ gbẹzan mẹtọn tọn do wà wẹ yè jlo na de.” Ṣigba, gboadọ. Jehovah dọna omẹ etọn lẹ dọmọ: “A yin magbọjẹnọ blo, na yẹn wẹ Jiwheyẹwhe towe. Yẹn na hẹn we lodo, mọwẹ, n’na gọalọna we.”—Isa. 41:10.

2. Nawẹ a wagbọn do yọnẹn dọ Jehovah jlo dọ hiẹ ni basi tito na sọgodo ayajẹnọ de?

2 Jehovah dotuhomẹna we nado nọ yí nuyọnẹn do basi tito na sọgodo towe. (Yẹwh. 12:1; Mat. 6:20) Ewọ jlo dọ a ni yin ayajẹnọ. Ehe nọ họnwun to whenue a pọ́n nudida whanpẹnọ lẹ, bo sè nudidọ yetọn bosọ duvivi otọ́n yetọn tọn. Sọ lẹnnupọndo lehe e nọ penukundo mí go bo nọ plọn mí aliho gbẹninọ tọn he yọ́n hugan lọ do ji. Na mẹhe gbẹ́ ayinamẹ etọn dai lẹ, Jehovah dọmọ: “[Mì] de nuhe nọ hẹn homẹgble mi lẹ. . . . Pọ́n! Devizọnwatọ ṣie lẹ na nọ jaya, ṣigba winyan na nọ hù mìwlẹ. Pọ́n! Devizọnwatọ ṣie lẹ na nọ yí ayajẹ do  dawhá na ninọmẹ dagbe ahun mẹ tọn wutu.” (Isa. 65:12-14) Jehovah nọ yin gigopana to whenue omẹ etọn lẹ basi nudide nuyọnẹn tọn lẹ to gbẹ̀mẹ.—Howh. 27:11.

TITO HE NA HẸN AYAJẸ WÁ NA WE LẸ

3. Tito tẹlẹ wẹ Jehovah jlo dọ a ni basi?

3 Tito tẹlẹ wẹ Jehovah jlo dọ a ni basi? Ewọ dá gbẹtọvi lẹ na yé nido nọ plọnnu gando ewọ go bo nọ basi sinsẹ̀n hlan ẹn po nugbonọ-yinyin po nado tindo ayajẹ. (Salm. 128:1; Mat. 5:3) Ehe hẹn mí gbọnvo pete na kanlin he e dá lẹ, he ko nọ mọ pekọ to dùdù, nùnù po vijiji po kẹdẹ mẹ. Jiwheyẹwhe jlo dọ a ni tindo ayajẹ gbọn tito-bibasina onú delẹ he gbọnvona nuhe mẹ kanlin lẹ ko nọ mọ pekọ te lẹ dali. Mẹdatọ towe yin “Jiwheyẹwhe owanyi tọn,” “Jiwheyẹwhe ayajẹnọ lọ,” he dá gbẹtọvi lẹ “to apajlẹ etọn mẹ.” (2 Kọl. 13:11; 1 Tim. 1:11; Jen. 1:27) A na tindo ayajẹ eyin a hodo apajlẹ Jiwheyẹwhe owanyinọ mítọn tọn. Be a ko tindo numimọ nugbo-yinyin wefọ lọ he dọ dọ: “Ayajẹ sù to nunamẹ mẹ hú to mimọyi mẹ” tọn pọ́n ya? (Owalọ 20:35) Enẹ yin dopo to nugbo dodonu tọn he gando gbẹzan gbẹtọvi tọn go lẹ mẹ. Enẹwutu, Jehovah jlo dọ tito towe lẹ ni sinai do owanyi didohia mẹdevo lẹ po Jiwheyẹwhe po ji.—Hia Matiu 22:36-39.

4, 5. Etẹwẹ hẹn Jesu yin ayajẹnọ?

4 Jesu Klisti ze apajlẹ pipé de dai na mìwu jọja lẹ. To ovu whenu, ayihaawe ma tin dọ e nọ daihun. Ohó Jiwheyẹwhe tọn dọ dọ ‘ojlẹ de tin nado konu podọ ojlẹ de tin nado dúwe.’ (Yẹwh. 3:4) Jesu sọ dọnsẹpọ Jehovah pẹkipẹki gbọn Owe-wiwe lẹ pinplọn dali. To whenue e tindo owhe 12, “nukunnumọjẹnumẹ etọn po gblọndo etọn lẹ po” gando gbigbọnu lẹ go nọ jiawu na mẹplọntọ lẹ to tẹmpli mẹ.—Luku 2:42, 46, 47.

5 To whenue Jesu whẹ́n mẹho, e yin ayajẹnọ. Etẹwẹ hẹn ẹn yin ayajẹnọ? E yọnẹn dọ, gbọnvona onú devo he Jiwheyẹwhe biọ to emi si lẹ, ewọ sọ jlo dọ emi ni “lá wẹndagbe na wamọnọ lẹ . . . podọ nukunnumimọ hlan nukuntọ́nnọ lẹ.” (Luku 4:18) Jesu yin ayajẹnọ na e wà nuhe Jiwheyẹwhe biọ to e si lẹ. Salmu lẹ 40:8 do numọtolanmẹ etọn hia dọmọ: “Jiwheyẹwhe ṣie E, yẹn nọ mọ awuvivi to ojlo towe wiwà mẹ.” Jesu yiwanna nupinplọn gbẹtọ lẹ gando Otọ́ olọn mẹ tọn etọn go. (Hia Luku 10:21.) To gbèdopo, to whenue Jesu ko plọnnu nawe de gando sinsẹ̀n-bibasi nugbo go godo, e dọna devi etọn lẹ dọmọ: “Núdùdù ṣie wẹ nado wà ojlo ewọ he do mi hlan tọn podọ nado dotana azọ́n etọn.” (Joh. 4:31-34) Owanyi didohia Jiwheyẹwhe po mẹdevo lẹ po hẹn ayajẹ wá na Jesu. E sọgan hẹn ayajẹ wá na hiẹ lọsu ga.

6. Naegbọn e na yọ́n dọ a ni dọhodo tito sọgodo tọn towe lẹ ji hẹ Klistiani numimọnọ lẹ?

6 Klistiani susu wẹ ko mọ ayajẹ to jọja whenu yetọn gbọn sinsẹ̀n taidi gbehosọnalitọ dali. Naegbọn a ma na dọhodo tito towe lẹ ji hẹ delẹ to yé mẹ? “Fie wedide dopọ ma tin te, tito lẹ nọ gboawupo, ṣigba, gbọn ayinamẹtọ susu gblamẹ wẹ nuwadotana dagbe nọ tin.” (Howh. 15:22) Gbẹtọ gbigbọnọ mọnkọtọn lẹ sọgan dọna we dọ sinsẹ̀nzọn whenu-gigọ́ tọn na na we azọ́nplọnmẹ he na hẹn ale wá na we to gbẹzan towe blebu mẹ. To whenue Jesu ko yin pinplọn gbọn Otọ́ olọn mẹ tọn etọn dali godo, e zindonukọn nado to nuplọn to lizọnyizọn aigba ji tọn etọn whenu. Di apajlẹ, e plọn ayajẹ he ahun gbẹtọ lẹ tọn mẹ jijẹ po wẹndagbe lọ po nọ hẹnwa, po ayajẹ he tenọgligo-hinhẹn to whlepọn lẹ glọ po nọ hẹnwa. (Hia Isaia 50:4; Heb. 5:8; 12:2) Gbọ mí ni gbadopọnna adà sinsẹ̀nzọn whenu-gigọ́ tọn delẹ he sọgan hẹn ayajẹ daho wá na we.

NUHEWUTU MẸHE NỌ HẸN GBẸTỌ LẸ ZUN DEVI LẸ NỌ TINDO KỌDETỌN DAGBE

7. Naegbọn jọja susu do yiwanna azọ́n mẹhẹnzun devi tọn?

7 Jesu dọmọ: “Mì yì bo hẹn gbẹtọ lẹ . . . zun devi lẹ . . . bo nọ plọn yé.” (Mat. 28:19, 20) Eyin a to tito basi nado bẹ azọ́n mẹhẹnzun devi tọn jẹeji, yọnẹn dọ azọ́n dagbe hugan he nọ hẹn pekọ wá lọ niyẹn, yèdọ azọ́n de he nọ  pagigona Jiwheyẹwhe. Dile e nọ yindo na azọ́n depope, e na biọ whenu to asi we nado lẹzun azọ́nyọnẹntọ. To agọe, mẹmẹsunnu de he nọ yin Timothy he bẹ gbehosọnalitọ bibasi jẹeji to whenue e to aflanmẹ dọmọ: “N’yiwanna sinsẹ̀nzọn whenu-gigọ́ tọn bibasi na Jehovah, na aliho he mẹ n’nọ do owanyi ṣie na ẹn hia te niyẹn. To bẹjẹeji, n’ma penugo nado bẹ plọnmẹ Biblu depope jẹeji, ṣigba to nukọn mẹ, n’sẹtẹn yì aigba-denamẹ devo ji, podọ to osun dopo gblamẹ n’bẹ oplọn susu jẹeji. Plọnmẹ Biblu ṣie dopo jẹ Plitẹnhọ Ahọluduta tọn mẹ wá ji. To whenue n’yì Wehọmẹ Biblu Pinplọn Tọn Na Mẹmẹsunnu Tlẹnnọ lẹ * he yin bibasi na osun awe godo, n’yin didohlan aigba-denamẹ yọyọ de ji, fie n’jẹ Biblu plọn hẹ omẹ ẹnẹ ji te. N’nọ yiwanna nupinplọn gbẹtọ lẹ, dile n’to mimọ bọ gbigbọ wiwe to yé diọ.”—1 Tẹs. 2:19.

8. Nawẹ Klistiani jọja delẹ ko yidogọna mahẹ tintindo yetọn to azọ́n mẹhẹnzun devi tọn lọ mẹ gbọn?

8 Jọja Klistiani delẹ ko plọn ogbè devo. Di apajlẹ, Jacob he wá sọn Agewaji Amelika tọn wlan dọmọ: “To whenue n’tindo owhe ṣinawe, wehọmẹvigbẹ́ ṣie susu wẹ nọ do Vietnam-gbè. N’jlo na dọhona yé gando Jehovah go, enẹwutu n’basi tito nado plọn ogbè yetọn to ojlẹ de godo. N’nọ saba plọn ogbè lọ gbọn zinjẹgbonu Atọ̀họ̀-Nuhihọ́ lọ Tọn Glẹnsigbe tọn yiyijlẹdo Vietnam-gbè tọn go dali. N’sọ jihọntọn lẹ do agun Vietnam-gbè tọn he sẹpọ fie n’nọ nọ̀ mẹ. Whenue n’tindo owhe 18, n’bẹ gbehosọnalitọ bibasi jẹeji. To nukọn mẹ, n’yì Wehọmẹ Biblu Pinplọn Tọn Na Mẹmẹsunnu Tlẹnnọ Lẹ. Ehe gọalọna mi to azọ́ndenamẹ yọyọ gbehosọnalitọ tọn ṣie mẹ, to kándo Vietnam-gbè tọn de mẹ fie yẹn kẹdẹ wẹ yin mẹho agun tọn te. E nọ jiawu na Vietnam-nu susu dọ n’plọn ogbè yetọn. Yé nọ basi oylọna mi biọ owhé yetọn gbè, podọ n’nọ penugo nado plọn Biblu hẹ yé. Delẹ to yé mẹ ko yinukọn jẹ baptẹm kọ̀n.”—Yijlẹdo Owalọ 2:7, 8 go.

9. Azọ́nplọnmẹ dagbe tẹwẹ azọ́n mẹhẹnzun devi tọn nọ namẹ?

9 Azọ́n mẹhẹnzun devi tọn lọ na gọalọna we nado wleawuna jijọ dagbe azọ́nwiwa tọn lẹ, nugopipe hodọdopọ tọn, jide po zinzin po. (Howh. 21:5; 2 Tim. 2:24, Odò.) Ṣigba, gbẹtọ lẹ hinhẹn zun devi nọ hẹn ayajẹ wá taun, na e na gọalọna we nado jẹakọ hẹ dodonu Owe-wiwe tọn he ji yise towe sinai do. A nasọ plọn lehe a na wazọ́n pẹkipẹki hẹ Jehovah do.—1 Kọl. 3:9.

10. Nawẹ a sọgan duvivi ayajẹ he azọ́n mẹhẹnzun devi tọn nọ hẹnwa tọn gbọn etlẹ yin to aigba-denamẹ he ma nọ de sinsẹ́n tọ́n de ji?

10 A sọgan duvivi azọ́n mẹhẹnzun devi tọn eyin etlẹ yindọ omẹ vude to aigba-denamẹ towe ji wẹ nọ do ojlo hia to wẹndagbe lọ mẹ. Azọ́n pọmẹ tọn wẹ azọ́n mẹhẹnzun devi tọn yin. Agun lọ blebu wẹ nọ dín gbẹtọ ahunjijlọnọ lẹ. Dile etlẹ yindọ mẹmẹsunnu kavi mẹmẹyọnnu dopo wẹ sọgan wá mọ mẹhe na lẹzun devi to godo mẹ lọ, mímẹpo wẹ nọ tindo mahẹ to azọ́n lọ mẹ podọ mímẹpo wẹ sọgan jaya. Di apajlẹ, Brandon basi gbehosọnalitọ na owhe ṣinẹnẹ to aigba-denamẹ he ma de sinsẹ́n tọ́n de ji. E dọmọ: “N’yiwanna yẹwheho wẹndagbe lọ tọn didọ, na nuhe Jehovah biọ to mí si nado nọ wà niyẹn. N’bẹ gbehosọnalitọ bibasi jẹeji tlolo he n’fó wehọmẹ. N’yiwanna tulinina jọja lẹ to agun mítọn mẹ podọ nado to mimọ dọ yé to nukọnyi to gbigbọ-liho. To whenue n’yì Wehọmẹ Biblu Pinplọn Tọn Na Mẹmẹsunnu Tlẹnnọ lẹ godo, n’mọ azọ́ndenamẹ gbehosọnalitọ tọn yọyọ de yí. Nugbo wẹ dọ n’ma ko plọnnu mẹde to aigba-denamẹ lọ ji he yinukọn jẹ baptẹm kọ̀n pọ́n, ṣigba mẹdevo lẹ ko wàmọ. Homẹ ṣie hùn dọ n’basi tito nado tindo mahẹ gigọ́ to azọ́n mẹhẹnzun devi tọn lọ mẹ.”—Yẹwh. 11:6.

FIE TITO TOWE LẸ SỌGAN PLAN WE JẸ

11. Adà sinsẹ̀nzọn wiwe lọ tọn tẹwẹ jọja susu ko duvivi etọn?

11 Dotẹnmẹ hundote susu wẹ tin nado sẹ̀n Jehovah. Di apajlẹ, jọja susu nọ ze yede jo  nado tindo mahẹ to azọ́n họ̀gbigbá tọn mẹ. Plitẹnhọ Ahọluduta lọ tọn kanweko susu wẹ dona gbẹ́ yin gbigbá. Mahẹ tintindo to azọ́n ehe mẹ yin sinsẹ̀nzọn wiwe de he nọ pagigona Jiwheyẹwhe bo sọgan hẹn ayajẹ wá na we. Dile e te do to adà sinsẹ̀nzọn lọ tọn devo lẹ mẹ, gbẹdido hẹ azọ́nwatọ hatọ lẹ nọ hẹn ayajẹ wá. Azọ́n họ̀gbigbá tọn yẹwhehọluduta lọ tọn sọ yin tito azọ́nplọnmẹ tọn de ga, he nọ plọnmẹ nado nọ na ayidonugo hihọ́ azọ́nwatọ lẹ tọn, nado bikan to azọ́n kọ̀n, podọ nado nọ kọngbedopọ hẹ mẹhe to anadenanu lẹ.

Dona susu lẹ wẹ to tepọn mẹhe nọ biọ sinsẹ̀nzọn whenu-gigọ́ tọn mẹ lẹ (Pọ́n hukan 11-13tọ)

12. Nawẹ sinsẹ̀nzọn gbehosọnalitọ tọn nọ hùn ohọ̀n devo lẹ dotenamẹ gbọn?

12 Mẹmẹsunnu de he nọ yin Kevin dọmọ: “Sọn ovu whenu ṣie gbọ́n wẹ e nọ jlo mi nado wá sẹ̀n Jehovah to sinsẹ̀nzọn whenu-gigọ́ tọn mẹ to gbèdopo. To nukọn mẹ, n’bẹ gbehosọnalitọ bibasi jẹeji to whenue n’tindo owhe 19. N’nọ wazọ́n whenu gli tọn na mẹmẹsunnu de he yin họ̀gbátọ, nado sọgan penukundo dee go. N’plọn lehe yè nọ whè họta do, gọna lehe yè nọ do fleṣe po ohọ̀n po do. To nukọn mẹ, n’wazọ́n na owhe awe hẹ pipli kọgbọ tọn de he nọ gọalọ to nugbajẹmẹji jẹhọn-ahizi tọn whenu, nado vọ́ Plitẹnhọ Ahọluduta tọn gọna owhé mẹmẹsunnu lẹ tọn gbá. To whenue n’sè dọ nuhudo họ̀gbigbá tọn tin to Afrique du Sud, n’doalọwemẹ bo wá yin oylọ-basina. To Aflika fi, n’nọ to tẹnsẹ sọn azọ́n Plitẹnhọ Ahọluduta tọn gbigbá tọn de kọ̀n jẹ devo kọ̀n to osẹ kleunkleun delẹ gblamẹ. Pipli họ̀gbátọ tọn he mẹ n’te lọ taidi whẹndo de na mi. Mí nọ dọ́ fidopolọ, nọ plọn Biblu dopọ bo nọ wazọ́n dopọ. N’sọ nọ yiwanna yẹwhehodidọ hẹ mẹmẹsunnu lẹdo lọ tọn lẹ to osẹ dopodopo mẹ. Tito he n’basi to jọja whenu lẹ ko hẹn ayajẹ wá na mi hú lehe n’sọgan ko lẹn do.”

13. Nawẹ sinsẹ̀nzọn Bẹtẹli tọn nọ hẹn ayajẹ wá na jọja lẹ gbọn?

13 Mẹdelẹ he yinuwa sọgbe hẹ tito yetọn nado sẹ̀n Jehovah to sinsẹ̀nzọn whenu-gigọ́ tọn mẹ tin to Bẹtẹli to alọnu. Sinsẹ̀nzọnwiwa to Bẹtẹli yin aliho gbẹninọ tọn he nọ hẹn  ayajẹ wá de, na nuhe a to wiwà to finẹ lẹpo, Jehovah wẹ a to wiwà na. Whẹndo Bẹtẹli tọn nọ gọalọ nado wleawuna núdùdù gbigbọmẹ tọn. Dustin he to sinsẹ̀n to Bẹtẹli dọmọ: “Whenue n’tindo owhe ṣinẹnẹ wẹ n’yí sinsẹ̀nzọn whenu-gigọ́ tọn do basi yanwle, podọ n’bẹ gbehosọnalitọ bibasi jẹeji to whenue n’fó wehọmẹ. To owhe dopo daa godo, n’yin oylọ-basina wá Bẹtẹli, fie n’plọn maṣinu wezinzin tọn zinzan te podọ to nukọn mẹ n’plọn ọdinatẹẹ-zọ́n. To Bẹtẹli, e nọ vivi na mi nado nọ sèhó tlọlọ gando nukọnyiyi azọ́n mẹhẹnzun devi tọn he to yìyì lẹdo aihọn pé lọ tọn go. N’yiwanna sinsẹ̀nzọnwiwa tofi, na nuhe wà mí te nọ gọalọna gbẹtọ lẹ nado dọnsẹpọ Jehovah pẹkipẹki wutu.”

TITO TẸLẸ WẸ A NA BASI NA SỌGODO TOWE?

14. Nawẹ a sọgan basi tito nado biọ sinsẹ̀nzọn whenu-gigọ́ tọn mẹ gbọn?

14 Nawẹ a sọgan basi tito nado lẹzun lizọnyizọnwatọ whenu-gigọ́ tọn de gbọn? Hugan nudevo depope, jẹhẹnu gbigbọmẹ tọn lẹ wẹ na gọalọna we nado sẹ̀n Jehovah to gigọ́ mẹ po kọdetọn dagbe po. Enẹwutu, dovivẹnu nado nọ plọn Ohó Jiwheyẹwhe tọn, nọ lẹnayihamẹpọn sisosiso do zẹẹmẹ etọn ji, bo nọ dín aliho lẹ nado do yise towe hia to opli agun tọn lẹ ji. Dile a to wehọmẹ yì, a sọgan wleawuna numimọ gọna azọ́nyinyọnẹn he na hẹn we pegan taidi yẹwhehodọtọ wẹndagbe lọ tọn de. Plọn nado nọ do ojlo hia to gbẹtọ lẹ mẹ gbọn zinzin yíyí do kàn linlẹn yetọn lẹ sè po todidoai na gblọndo yetọn lẹ po dali. Humọ, a sọgan nọ ze dewe jo nado wazọ́n voovo lẹ to agun mẹ, taidi alọgigọ nado hẹn Plitẹnhọ Ahọluduta tọn do wiweji bo penukundego. Homẹ Jehovah tọn nọ hùn nado yí mẹhe tindo whiwhẹ po gbigbọ mẹdezejo tọn po lẹ zan. (Hia Salmu lẹ 110:3; Owalọ 6:1-3) Apọsteli Paulu basi oylọna Timoti nado biọ sinsẹ̀nzọn mẹdehlan tọn mẹ, na ‘mẹmẹsunnu lẹ nọ dekunnu etọn dagbe’ wutu.—Owalọ 16:1-5.

15. Nawẹ a sọgan wleawu nado mọ dandannu gbẹ̀mẹ tọn lẹ gbọn?

15 To paa mẹ, lizọnyizọnwatọ whenu-gigọ́ tọn lẹ lọsu dona wazọ́n nado mọ dandannu gbẹ̀mẹ tọn lẹ. (Owalọ 18:2, 3) Vlavo wehọmẹ yìyì jẹ obá de mẹ na hẹn we penugo nado mọ agbasazọ́n whenu gli tọn de he nuhudo etọn nọ tin to lẹdo towe mẹ. Dile a to tito lẹ basi, dọho hẹ nugopọntọ lẹdo tọn po gbehosọnalitọ he to lẹdo towe mẹ lẹ po. Kàn azọ́n he nọ yọ́n na gbehosọnalitọ lẹ sè yé. Podọ dile Biblu dọ do, “nọ ze nudepope he wà a te do alọmẹ na Jehovah, to whenẹnu, tito towe lẹ na nọ tindo kọdetọn dagbe.”—Howh. 16:3; 20:18.

16. Nawẹ Jehovah sinsẹ̀n to gigọ́ mẹ to jọja whenu sọgan gọalọna we nado pegan na azọngban devo lẹ to sọgodo gbọn?

16 A sọgan deji dọ Jehovah jlo dọ a ni “tẹdo” sọgodo ayajẹ tọn de go gligli. (Hia 1 Timoti 6:18, 19.) Sinsẹ̀nzọn whenu-gigọ́ tọn na gọalọna we nado dogbẹ́ hẹ lizọnyizọnwatọ whenu-gigọ́ tọn devo lẹ podọ nado lẹzun Klistiani he whèwhín de. Mẹsusu ko mọdọ Jehovah sinsẹ̀n to gigọ́ mẹ to jọja whenu sọ zọ́n bọ yé wá tindo kọdetọn dagbe to alọwle mẹ. Mẹhe nọ basi gbehosọnalitọ whẹpo do wlealọ lẹ nọ saba zindonukọn to sinsẹ̀nzọn yetọn mẹ dopọ taidi asu po asi po.—Lom. 16:3, 4.

17, 18. Adà tẹwẹ ahun nọ yiwà to tito lẹ bibasi whenu?

17 Ahun mẹ wẹ tito lẹ bibasi nọ bẹsọn. Salmu lẹ 20:4 dọ gando Jehovah go dọmọ: “Na ewọ ni na we ojlo ahun towe mẹ tọn lẹ bo hẹn tito towe lẹpo tindo kọdetọn dagbe.” Enẹwutu, lẹnnupọndo nuhe a jlo na yí gbẹzan towe do wà ji. Lẹnayihamẹpọn do nuhe Jehovah to wiwà to ojlẹ mítọn mẹ lẹ po lehe a sọgan tindo mahẹ to sinsẹ̀nzọn etọn mẹ do po ji. Enẹgodo, basi tito nado nọ wà nuhe na hẹn homẹ etọn hùn.

18 Jehovah sinsẹ̀n to gigọ́ mẹ na hẹn ayajẹ daho wá na we, na aliho gbẹninọ tọn he nọ gbògbéna Jiwheyẹwhe niyẹn. Mọwẹ, “nọ mọ awuvivi susu to Jehovah mẹ, ewọ nasọ na we ojlo ahun towe mẹ tọn lẹ.”—Salm. 37:4.

^ huk. 7 Ehe wá lẹzun Wehọmẹ Wẹndagbe-Jlatọ Ahọluduta lọ Tọn lẹ tọn todin.