Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Atọ̀họ̀-Nuhihọ́ lọ Tọn—Zinjẹgbonu Oplọn Tọn  |  Juillet 2016

Nọ Lá Wẹndagbe Nukundagbe Majẹhẹ lọ Tọn

Nọ Lá Wẹndagbe Nukundagbe Majẹhẹ lọ Tọn

“Dekunnu wẹndagbe nukundagbe majẹhẹ Jiwheyẹwhe tọn mlẹnmlẹn.”—Owalọ 20:24.

OHÀN LẸ: 101, 84

1, 2. Nawẹ apọsteli Paulu dohia dọ emi yọ́n pinpẹn nukundagbe majẹhẹ Jiwheyẹwhe tọn gbọn?

APỌSTELI PAULU sọgan dọ po ahundopo po dọmọ: “Nukundagbe majẹhẹ [Jiwheyẹwhe tọn] he yin didohia mi ma yin to ovọ́ mẹ.” (Hia 1 Kọlintinu lẹ 15:9, 10.) Paulu yọnẹn ganji dọ emi ma jẹna lẹblanu daho Jiwheyẹwhe tọn, mọ e masọ yin kanvinván emitọn wẹ zọ́n bọ emi do mọ ẹn yí, na emi ko dohomẹkẹn Klistiani lẹ to ojlẹ de mẹ wayi wutu.

2 Sẹpọ vivọnu gbẹzan Paulu tọn, ewọ kanwehlan azọ́nwatọgbẹ́ etọn Timoti dọmọ: “Yẹn dopẹna Klisti Jesu Oklunọ mítọn, mẹhe na mi huhlọn, na ewọ mọ mi di nugbonọ gbọn lizọnyizọn de zizedo alọmẹ na mi dali.” (1 Tim. 1:12-14) Lizọnyizọn tẹ hodọ wẹ e te? Paulu dọ nuhe lizọnyizọn enẹ bẹhẹn na mẹho agun tọn lẹ to Efesu dọmọ: “Yẹn ma hia ogbẹ̀ ṣie titi di nuhọakuẹ de gba, eyin yẹn ko gbẹ́ sọgan dotana alewezun ṣie po lizọnyizọn he yẹn mọyi sọn Oklunọ Jesu dè po, nado dekunnu wẹndagbe nukundagbe majẹhẹ Jiwheyẹwhe tọn mlẹnmlẹn.”Owalọ 20:24.

3. Lizọnyizọn vonọtaun tẹwẹ yin zizedo alọmẹ na Paulu? (Pọ́n yẹdide he tin to bẹjẹeji hosọ ehe tọn.)

 3 “Wẹndagbe” tẹwẹ Paulu lá he do nukundagbe majẹhẹ Jiwheyẹwhe tọn hia? E dọna Klistiani Efesunu lẹ dọmọ: “Mìwlẹ ko sè gando họ̀nkọnsi-zọ́n he yin nukundagbe majẹhẹ Jiwheyẹwhe tọn he yin nina mi na mìtọn wutu lọ go.” (Efe. 3:1, 2) Paulu yin azọ́ndena nado lá wẹndagbe lọ na mẹhe ma yin Ju lẹ, na yelọsu nido sọgan tin to mẹhe yin oylọ-basina nado kọnawudopọ hẹ Klisti to gandudu Ahọluduta Mẹsia lọ tọn mẹ lẹ mẹ. (Hia Efesunu lẹ 3:5-8.) Zohunhun he Paulu yí do hẹn lizọnyizọn etọn di yin apajlẹ dagbe de na Klistiani egbezangbe tọn lẹ, bosọ dohia dọ nukundagbe majẹhẹ Jiwheyẹwhe tọn ma yin didohia ẹ “to ovọ́ mẹ.”

BE NUKUNDAGBE MAJẸHẸ JIWHEYẸWHE TỌN NỌ WHÀN WE YA?

4, 5. Naegbọn mí sọgan dọ dọ “wẹndagbe Ahọluduta lọ tọn” po “wẹndagbe nukundagbe majẹhẹ Jiwheyẹwhe tọn” po yin nudopolọ?

4 To ojlẹ opodo tọn ehe mẹ, omẹ Jehovah tọn lẹ ko yin azọ́ndena nado lá “yẹwheho wẹndagbe Ahọluduta lọ tọn ehe . . . to aigba fininọ lẹpo ji taidi okunnu de na akọta lẹpo.” (Mat. 24:14) Owẹ̀n he mí nọ lá lọ sọ yin “wẹndagbe nukundagbe majẹhẹ Jiwheyẹwhe tọn,” na dona he mí tindo todido nado mọyi to gandudu Ahọluduta lọ tọn glọ lẹpo na yin nina mí gbọn homẹdagbe Jehovah tọn dali, ehe yin didohia mí gbọn Klisti gblamẹ. (Efe. 1:3) Be dopodopo mítọn lẹ nọ hodo apajlẹ Paulu tọn bo nọ do pinpẹn-nutọn-yinyọnẹn mítọn hia na nukundagbe majẹhẹ Jehovah tọn, gbọn mahẹ tintindo to lizọnyizọn lọ mẹ po zohunhun po dali ya?—Hia Lomunu lẹ 1:14-16.

5 To hosọ he wayi mẹ, mí ko plọn lehe nukundagbe majẹhẹ Jehovah tọn nọ hẹn ale wá na mí to aliho susu mẹ taidi ylandonọ lẹ do. Enẹwutu, ahọ́ he mí dù do gbẹtọ lẹpo wẹ nado wà nuhe go mí pé lẹpo nado hẹn lehe Jehovah to owanyi etọn dohia do zun yinyọnẹn na yé, podọ lehe dopodopo yetọn sọgan mọaleyi sọn e mẹ do. Adà nukundagbe majẹhẹ Jiwheyẹwhe tọn tẹlẹ wẹ mí dona gọalọna mẹdevo lẹ nado yọ́n pinpẹn etọn?

NỌ LÁ WẸNDAGBE AVỌ́SINSAN OFLIGỌ LỌ TỌN

6, 7. To whenue mí to zẹẹmẹ basina gbẹtọ lẹ gando ofligọ lọ go, nawẹ mí nọ hẹn wẹndagbe nukundagbe majẹhẹ tọn lọ gbayipe gbọn?

6 To aihọn he nọ joawuna nuylankan ehe mẹ, ylando masọ nọ yin pinpọnhlan taidi nuylankan paali ba, sọmọ bọ mẹsusu ma mọnukunnujẹemẹ dọ nuhudo ofligọ de tọn tin. To ojlẹ dopolọ mẹ, sọha mẹhe sọgan mọnukunnujẹemẹ dọ gbẹzan awujijonanu tọn enẹ zinzan ma nọ hẹn ayajẹ nujọnu tọn wá lẹ tọn wẹ fọ́n bo to jijideji. To whenue mẹsusu wá dọho hẹ Kunnudetọ Jehovah tọn lẹ wẹ yé nọ wá mọnukunnujẹ nuhe ylando yin, lehe e nọ yinuwado mí ji do, po nuhe mí dona wà ma nado sọ yin afanumẹ etọn ba po mẹ. Homẹ gbẹtọ ahunjijlọnọ lẹ tọn nọ hùn nado yọnẹn dọ Jehovah ko gbọn owanyi daho po nukundagbe majẹhẹ etọn po dali do Visunnu etọn hlan aigba ji nado fli mí gọ̀ sọn ylando po kọdetọn etọn he yin okú po si.—1 Joh. 4:9, 10.

7 To whenue Paulu to hodọ gando Visunnu yiwanna Jiwheyẹwhe tọn go, e wlan dọmọ: “Gbọn [Jesu] mẹhe gblamẹ míwlẹ mọ tundote yí gbọn ofligọ he omẹ enẹ yí ohùn etọn do basi lọ gblamẹ, mọwẹ, yèdọ jona sẹ́nmẹjijẹ mítọn lẹ tọn, sọgbe hẹ nukundagbe majẹhẹ susugege [Jehovah tọn].” (Efe. 1:7) Avọ́sinsan ofligọ Klisti tọn wẹ yin kunnudenu daho hugan owanyi Jiwheyẹwhe tọn na mí podọ e sọ do nuhọakuẹ-yinyin nukundagbe majẹhẹ Etọn tọn hia. Homẹmiọnnamẹnu nankọ die nado yọnẹn dọ ylando mítọn lẹ na yin jijona mí podọ ayihadawhẹnamẹnu mítọn na yin kiklọ́we eyin mí do yise hia to hùnsọndai Jesu tọn mẹ!  (Heb. 9:14) Wẹndagbe he mí dona nọ má hẹ mẹdevo lẹ de wẹ ehe yin nugbonugbo!

NỌ GỌALỌNA GBẸTỌ LẸ NADO BIỌ HAṢINṢAN DE MẸ HẸ JIWHEYẸWHE

8. Naegbọn gbẹtọvi mapenọ lẹ dona gbọwhẹ hẹ Jiwheyẹwhe?

8 Mí tindo azọngban lọ nado hẹn ẹn zun yinyọnẹn na gbẹtọvi hatọ mítọn lẹ dọ yé sọgan biọ haṣinṣan họntọnjiji tọn de mẹ hẹ Mẹdatọ yetọn. Whẹpo gbẹtọvi lẹ do nọ do yise hia to avọ́sinsan Jesu tọn mẹ, Jiwheyẹwhe nọ pọ́n yé hlan taidi kẹntọ etọn lẹ. Apọsteli Johanu wlan dọmọ: “Mẹhe nọ do yise hia to Visunnu lọ mẹ tindo ogbẹ̀ madopodo; mẹhe nọ vẹtolina Visunnu lọ ma na mọ ogbẹ̀, ṣigba homẹgble Jiwheyẹwhe tọn nọ gbọṣi e ji.” (Joh. 3:36) Mí dopẹ́ dọ avọ́sinsan Klisti tọn hẹn ẹn yọnbasi nado gbọwhẹ hẹ Jiwheyẹwhe. Paulu dọmọ: “Mìwlẹ he ko jẹla bo yin kẹntọ lẹ to ojlẹ de mẹ wayi, na ayiha mìtọn tin to azọ́n he yin ylankan lẹ ji wutu, e ko gbọwhẹ hẹ mì todin gbọn agbasa gbẹtọ tọn omẹ enẹ he kú lọ tọn gblamẹ.”—Kol. 1:21, 22.

9, 10. (a) Azọngban tẹwẹ Klisti zedo alọmẹ na mẹmẹsunnu yiamisisadode etọn lẹ? (b) Nawẹ “lẹngbọ devo lẹ” nọ gọalọna mẹmẹsunnu yiamisisadode yetọn lẹ gbọn?

9 Klisti ko ze nuhe Paulu ylọdọ “lizọnyizọn whẹgbigbọ tọn” do alọmẹ na mẹmẹsunnu yiamisisadode etọn he tin to aigba ji lẹ. Nado basi zẹẹmẹ ehe tọn, Paulu kanwehlan Klistiani yiamisisadode owhe kanweko tintan whenu tọn lẹ dọmọ: “Nulẹpo wẹ wá sọn Jiwheyẹwhe dè, mẹhe hẹn mí gbọwhẹ hẹ ede gbọn Klisti gblamẹ bo na mí lizọnyizọn whẹgbigbọ tọn, enẹ wẹ yindọ, Jiwheyẹwhe to aihọn de hẹn nado gbọwhẹ hẹ ede gbọn Klisti gblamẹ bo ma nọ hia sẹ́nmẹjijẹ yetọn lẹ dokọna yé, podọ ewọ ze owẹ̀n whẹgbigbọ tọn lọ do alọmẹ na mí. Enẹwutu, míwlẹ wẹ afọzedaitọ lẹ he to otẹn Klisti tọn mẹ, taidi dọ Jiwheyẹwhe to vẹvẹ gbọn míwlẹ gblamẹ nkọtọn. Taidi mẹhe to otẹn Klisti tọn mẹ lẹ, mí vẹvẹ dọmọ: ‘Mì gbọwhẹ hẹ Jiwheyẹwhe.’”—2 Kọl. 5:18-20.

10 “Lẹngbọ devo lẹ” nọ mọdọ lẹblanulọkẹyi wẹ e yin na emi nado gọalọna mẹmẹsunnu yiamisisadode emitọn lẹ to lizọnyizọn lọ mẹ. (Joh. 10:16) Dile yé to sinsẹ̀n to aliho de mẹ taidi mẹdehlan Klisti tọn lẹ, yé to mahẹ daho hugan tindo to nugbo gbigbọmẹ tọn pinplọn gbẹtọvi lẹ, podọ to alọgigọna yé nado wleawuna haṣinṣan mẹdetiti tọn de hẹ Jehovah mẹ. Adà titengbe de wẹ enẹ yin to azọ́n kunnudide mlẹnmlẹn gando wẹndagbe nukundagbe majẹhẹ Jiwheyẹwhe tọn lọ tọn go mẹ.

NỌ LÁ WẸNDAGBE LỌ DỌ JIWHEYEWHE NỌ SÈ ODẸ̀

11, 12. Naegbọn e do yin wẹndagbe na gbẹtọvi lẹ nado yọnẹn dọ yé sọgan hodẹ̀ hlan Jehovah?

11 Mẹsusu wẹ nọ hodẹ̀, na e nọ vivi na yé nado wàmọ, ṣigba yé ma nọ yise nugbonugbo dọ Jiwheyẹwhe nọ sè odẹ̀ yetọn. Yé tindo nuhudo nado yọnẹn dọ Jehovah wẹ “Sisètọ odẹ̀ tọn.” Salmu-kantọ Davidi wlan dọmọ: “Hiẹ Sisètọ odẹ̀ tọn E, dè we wẹ gbẹtọ wunmẹ lẹpo na nọ wá. Nuṣiwa ṣie lẹ ko húagbọ́ mi, ṣigba, hiẹ nọ jona sẹ́nhẹngba mítọn lẹ.”—Salm. 65:2, 3.

12 Jesu dọna devi etọn lẹ dọmọ: “Eyin mì biọ nudepope to oyín ṣie mẹ, yẹn na wà ẹ.” (Joh. 14:14) E họnwun dọ tofi, hogbe lọ “nudepope” zẹẹmẹdo nudepope he sọgbe hẹ ojlo Jehovah tọn. Johanu na mí jide dọmọ: ‘Ehe wẹ jidide he mí tindo to ewọ mẹ, dọ nudepope he mí biọ sọgbe hẹ ojlo etọn, ewọ nọ sè mítọn.’ (1 Joh. 5:14) Lehe e yọ́n do sọ nado plọn mẹdevo lẹ dọ, odẹ̀ ma nọ gọalọnamẹ nado vò sọn ayiha mẹ poun gba, kakatimọ e yin aliho jiawu de nado dọnsẹpọ “ofìn nukundagbe majẹhẹ tọn” Jehovah tọn! (Heb. 4:16) Eyin mí nọ plọn yé nado hodẹ̀ to aliho he sọgbe mẹ, nado hodẹ̀ hlan Mẹhe jẹ lọ, podọ nado biọ nuhe sọgbe lẹ, mí  sọgan gọalọna yé nado dọnsẹpọ Jehovah, bo mọ homẹmiọnnamẹ yí to ojlẹ ayimajai tọn lẹ mẹ.—Salm. 4:1; 145:18.

NUKUNDAGBE MAJẸHẸ NA YIN DIDOHIA TO TITONU YỌYỌ LỌ MẸ

13, 14. (a) Lẹblanulọkẹyi mayọnjlẹ tẹlẹ wẹ mẹyiamisisadode lẹ na tindo to sọgodo? (b) Azọ́n dagbedagbe tẹwẹ mẹyiamisisadode lẹ na wà na gbẹtọvi lẹ?

13 Nukundagbe majẹhẹ Jehovah tọn na lùn vivọnu titonu ylankan ehe tọn tọ́n. To whenue Paulu to alọdlẹndo lẹblanulọkẹyi mayọnjlẹ he Jiwheyẹwhe na gbẹtọ 144 000 lẹ, yèdọ mẹhe yin oylọ-basina nado duahọlu hẹ Klisti to Ahọluduta olọn mẹ tọn mẹ lẹ, ewọ wlan dọmọ: “Jiwheyẹwhe, mẹhe lẹblanu etọn sù tlala, podọ na owanyi daho etọn he e yí do yiwanna mí lọ wutu, ko hẹn mí wá ogbẹ̀ dopọ hẹ Klisti, dile etlẹ yindọ míwlẹ ko yin oṣiọ to sẹ́nmẹjijẹ lẹ mẹ—gbọn nukundagbe majẹhẹ dali, mìwlẹ ko yin whinwhlẹngán. Humọ, ewọ hẹn mí gọwá ogbẹ̀ dopọ bo hẹn mí sinai dopọ to olọn mẹ to kọndopọ mẹ hẹ Klisti Jesu, na to titonu he ja lẹ mẹ, ewọ nido do nukundagbe majẹhẹ susugege he ma yọnjlẹ etọn hia mí to lẹblanu etọn hlan mí mẹ to kọndopọ mẹ hẹ Klisti Jesu.”—Efe. 2:4-7.

14 E vẹawu nado yí nukun homẹ tọn do mọ dona jiawu he Jiwheyẹwhe tindo to sẹdotẹnmẹ na Klistiani yiamisisadode lẹ to whenue yé na sinai to ofìn lẹ ji nado dugán hẹ Klisti to olọn mẹ. (Luku 22:28-30; Flp. 3:20, 21; 1 Joh. 3:2) Jehovah na “do nukundagbe majẹhẹ susugege he ma yọnjlẹ etọn hia” yé to aliho vonọtaun mẹ. Yé na wleawuna “Jelusalẹm Yọyọ lọ,” yèdọ asiyọyọ Klisti tọn. (Osọ. 3:12; 17:14; 21:2, 9, 10) To pọmẹ hẹ Jesu, yé na tindo mahẹ to “azọ̀nhẹngbọ akọta lẹ tọn” mẹ, bo na gọalọna gbẹtọvi tonusetọ lẹ nado jẹ mẹdekannu sọn agbàn pinpẹn ylando po okú po tọn si bo nasọ hẹn yé jẹ pipé kọ̀n.—Hia Osọhia 22:1, 2, 17.

15, 16. Nawẹ Jehovah na do nukundagbe majẹhẹ etọn hia “lẹngbọ devo lẹ” to sọgodo gbọn?

15 To Efesunu lẹ 2:7 mẹ, mí hia dọ dohia nukundagbe majẹhẹ Jiwheyẹwhe tọn na sọawuhia “to titonu he ja lẹ mẹ.” Matin ayihaawe, mẹhe na nọgbẹ̀ to titonu yọyọ Jehovah tọn mẹ lẹ na tindo numimọ “nukundagbe majẹhẹ susugege he ma yọnjlẹ etọn” tọn. (Luku 18:29, 30) Dopo to aliho daho hugan he mẹ Jehovah na do homẹdagbe jiawu etọn hia to aigba ji te lẹ mẹ wẹ nado fọ́n gbẹtọvi lẹ sọn “Yọdò” mẹ. (Jobu 14:13-15; Johanu 5:28, 29) Sunnu po yọnnu po hohowhenu tọn he kú jẹnukọnna okú avọ́sinsan tọn Klisti tọn lẹ, gọna “lẹngbọ devo” enẹ lẹpo he nọ hẹn nugbonọ-yinyin yetọn go kaka bo nọ kú to azán godo tọn lẹ mẹ lẹ na yin hinhẹn gọwá ogbẹ̀ nado zindonukọn to Jehovah sinsẹ̀n mẹ.

16 Gbẹtọ livi susu he kú bo ma yọ́n Jiwheyẹwhe lẹ lọsu na yin finfọnsọnku. Dotẹnmẹ na yin nina yé nado litaina nupojipetọ-yinyin Jehovah tọn. Johanu wlan dọmọ: “Yẹn . . . mọ oṣiọ lẹ, daho po pẹvi po, to ote to ofìn lọ nukọn, owe-hihá lẹ sọ yin hùnhùn. Ṣigba, owe-hihá devo yin hùnhùn; owe-hihá ogbẹ̀ tọn lọ wẹ. Oṣiọ lẹ sọ yin whẹdana sọn nuhe yin kinkan do owe-hihá lọ lẹ mẹ lẹ mẹ sọgbe hẹ walọ yetọn lẹ. Ohù sọ jo oṣiọ he tin to e mẹ lẹ, okú po Yọdò po sọ jo oṣiọ he tin to yé mẹ lẹ, dopodopo yetọn sọ yin whẹdana sọgbe hẹ walọ yetọn lẹ.” (Osọ. 20:12, 13) Na nugbo tọn, e na yin bibiọ to mẹhe na yin finfọnsọnku lẹ si nado plọn lehe yé na yí nunọwhinnusẹ́n he tin to Biblu mẹ lẹ do yizan mẹ do. Humọ, yé dona hodo nudọnamẹ yọ́n-na-yizan yọyọ he na yin didehia to “owe-hihá” lọ lẹ mẹ, he do nubiọtomẹsi Jehovah tọn na mẹhe na nọgbẹ̀ to titonu yọyọ lọ mẹ lẹ hia. Nudọnamẹ he owe-hihá enẹlẹ bẹhẹn lẹ didehia nasọ yin aliho devo he mẹ nukundagbe majẹhẹ Jehovah tọn na yin didohia te.

 ZINDONUKỌN NADO TO WẸNDAGBE LỌ HẸN GBAYIPE

17. Etẹwẹ mí na nọ hẹn do ayiha mẹ to whenue mí to mahẹ tindo to azọ́n kunnudide tọn mítọn mẹ?

17 Hugan gbede pọ́n, azọ́ndenamẹ mítọn dile opodo lọ to sisẹpọ wẹ nado dọyẹwheho wẹndagbe Ahọluduta lọ tọn! (Malku 13:10) Matin ayihaawe, wẹndagbe lọ nọ do nukundagbe majẹhẹ Jehovah tọn hia. Mí dona nọ hẹn ehe do ayiha mẹ to whenue mí to mahẹ tindo to azọ́n kunnudide tọn mítọn mẹ. Yanwle mítọn to whenue mí to yẹwhehodọ wẹ nado gbògbéna Jehovah. Mí sọgan wàmọ eyin mí nọ dohia gbẹtọ lẹ dọ dona he mí na duvivi etọn to aihọn yọyọ lọ mẹ lẹpo yọnbasi gbọn homẹdagbe mayọnjlẹ Jehovah tọn gblamẹ.

Nọ sẹ̀n taidi ‘họ̀nkọnsi dagbe nukundagbe majẹhẹ Jiwheyẹwhe tọn’ po zohunhun po. —1 Pita 4:10 (Pọ́n hukan 17-19)

18, 19. Nawẹ mí nọ ze nukundagbe majẹhẹ Jehovah tọn daga gbọn?

18 Dile mí to kunnudena mẹdevo lẹ, mí sọgan nọ basi zẹẹmẹ na yé dọ to gandudu Ahọluduta Klisti tọn glọ, gbẹtọvi lẹ na mọaleyi to gigọ́ mẹ sọn avọ́sinsan ofligọ lọ tọn mẹ bo na yin hinhẹnwa pipé kọ̀n vudevude. Biblu dọmọ: “Nudida lọsu na ede nido yin hinhẹn jẹ mẹdekannu sọn afanumẹ-yinyin na gbigble mẹ bo tindo mẹdekannujẹ gigonọ he yin ovi Jiwheyẹwhe tọn lẹ tọn.” (Lom. 8:21) Homẹdagbe mayọnjlẹ Jehovah tọn kẹdẹ wẹ na hẹn ehe yọnbasi.

19 Mí tindo lẹblanulọkẹyi lọ nado hẹn opagbe ojlofọndotenamẹ tọn he tin to Osọhia 21:4, 5 mẹ zun yinyọnẹn na mẹhe na dotoaina mí lẹpo. E dọ dọ: “[Jiwheyẹwhe na] súnsún dasin lẹpo sẹ̀ sọn nukun yetọn mẹ, okú ma nasọ tin ba, mọjanwẹ aluẹmẹninọ kavi avi kavi awufiẹsa ma nasọ tin ba. Onú hoho lẹ ko juwayi.” Podọ Jehovah, mẹhe sinai to ofìn lọ ji dọmọ: “Pọ́n! Yẹn to nulẹpo hẹn zun yọyọ.” E sọ yidogọ dọmọ: “Kanwe, na ohó ehelẹ tindo jidide bo yin nugbo wutu.” Eyin mí nọ dọyẹwheho wẹndagbe lọ tọn na mẹdevo lẹ po zohunhun po, be mí to nukundagbe majẹhẹ Jehovah tọn zedaga nugbonugbo niyẹn!