Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

ATỌ̀HỌ̀-NUHIHỌ́ LỌ TỌN (ZINJẸGBONU OPLỌN TỌN) JUILLET 2016

Dín Ahọluduta lọ, Kakati Ni Yin Agbasanu Lẹ

Dín Ahọluduta lọ, Kakati Ni Yin Agbasanu Lẹ

“Mì to Ahọluduta [Jiwheyẹwhe tọn] dín zọnmii, podọ onú ehelẹ na yin yiyidogọ na mì.”—LUKU 12:31.

OHÀN LẸ: 40, 98

1. Vogbingbọn tẹwẹ tin to nuhudo po nujlomẹ po ṣẹnṣẹn?

MẸSUSU nọ dọ dọ nuhudo gbẹtọvi tọn lẹ ma sù, ṣigba nujlomẹ etọn lẹ ma do dogbó. E taidi dọ e nọ vẹawuna mẹsusu nado yọ́n vogbingbọn he tin to nuhudo agbasa tọn lẹ po nujlomẹ lẹ po ṣẹnṣẹn. Etẹwẹ yin vogbingbọn lọ? Nuhudo yin nuhe a dona tindo nado nọgbẹ̀. Apajlẹ nuhudo delẹ tọn wẹ núdùdù, avọ̀ po adọtẹn po. Ṣigba, nujlomẹ yin nude he a jlo nado tindo, amọ́ nulọ ma yin dandan nado nọgbẹ̀.

2. Etẹwẹ yin delẹ to nuhe gbẹtọvi lẹ nọ jlo lẹ mẹ?

2 Nujlomẹ gbẹtọvi lẹ tọn sọgan gbọnvo taun sọn awà de ji jẹ devo ji. To otò he ma hunnukun lẹ mẹ, nuhe mẹsusu sọgan nọ jlo wẹ nado mọ akuẹ bo họ̀ alokan apòmẹ tọn, zokẹkẹ kavi aigba kleun de. Ṣigba, to otò adọkunnọ lẹ mẹ, gbẹtọ lẹ sọgan nọ jlo nado tindo avọ̀ akuẹgegenu tọn lẹ, owhé daho lẹ kavi mọto he vẹahi taun lẹ. Depope he whẹho lọ yin, owù daho de tin, enẹ wẹ nado lẹzun afanumẹ na agbasanu lẹ, bo nọ jlo nado tindo agbasanu susu dogọ, vlavo mí do hudo yetọn kavi lala podọ vlavo mí penugo nado họ̀ yé kavi lala.

 NỌ HỌ́ DEWE SỌTA OMỌ̀ WANYINA AGBASANU LẸ TỌN

3. Etẹwẹ e zẹẹmẹdo nado yiwanna agbasanu lẹ?

3 Etẹwẹ e zẹẹmẹdo nado yiwanna agbasanu lẹ? Nuhe e zẹẹmẹdo wẹ nado nọ yin ahunmẹduna gbọn agbasanu lẹ dali kakati nido yin adọkunnu gbigbọmẹ tọn lẹ. Ojlo mẹde tọn, nuhe tin to otẹn tintan mẹ na ẹn po yanwle etọn lẹ po wẹ nọ dohia eyin ewọ yiwanna agbasanu lẹ. Owanyi na agbasanu lẹ nọ sisẹ́ mí nado tindo ojlo sinsinyẹn nado bẹ nususu pli dogọ. E ma yin dandan dọ mẹde ni tindo akuẹ susu kavi nọ họ̀ nuhe vẹahi taun lẹ whẹpo do yin wanyina agbasanu lẹ tọ́. Mẹhe tlẹ yin hẹntọnọ lẹ lọsu sọgan jẹ omọ̀ wanyina agbasanu lẹ tọn mẹ, bo sọgan dovọ́na Ahọluduta lọ zize do otẹn tintan mẹ.—Heb. 13:5.

4. Nawẹ Satani nọ yí “ojlo nukun tọn” zan gbọn?

4 Satani nọ yí tito ajọwiwa aihọn etọn tọn zan nado doyẹklọ mí nado yise dọ, agbasanu lẹ tintindo zẹ̀ nuhe sin nuhudo mí tindo lẹ go yin dandan nado duvivi ogbẹ̀ tọn. Ewọ sinyẹn taun to “ojlo nukun tọn” yiyizan nado dọnmẹ mẹ. (1 Joh. 2:15-17; Jen. 3:6; Howh. 27:20) Aihọn nọ ze agbasanu wunmẹ lẹpo donukọnnamẹ, yèdọ sọn dehe yọ́n hugan ji jẹ dehe ma yọ́n paali ji, podọ delẹ to onú ehelẹ mẹ nọ dọnmẹ taun. Be a ko họ̀ nude pọ́n, bọ e ma yindọ a do hudo etọn, ṣigba na e dọ̀n we to whenue yè to ajọjijla etọn basi kavi tẹ ẹ do ṣọfu mẹ wutu wẹ ya? Be a wá mọ to godo mẹ dọ eyin emi ma tlẹ ko tindo onú enẹ, emi sọgan nọgbẹ̀ ya? Onú he ma yin dandan tọn mọnkọtọn lẹ nọ hẹn ogbẹ̀ vẹawuna mí bo nọ hẹn agbàn pẹ̀n mí poun wẹ. Yé sọgan do omọ̀ wle mí bo fẹayihasẹna mí sọn aṣa gbigbọmẹ tọn mítọn lẹ ji, enẹ wẹ Biblu pinplọn, awuwiwlena opli lẹ po yìyì yé po gọna mahẹ gbesisọ tọn tintindo to lizọnyizọn lọ mẹ. Flindọ apọsteli Johanu na avase dọmọ: “Aihọn to jujuyi po ojlo etọn po ga.”

5. Etẹwẹ sọgan jọ do mẹhe nọ yí suhugan huhlọn yetọn lẹ tọn zan nado bẹ agbasanu susu pli lẹ go?

5 Satani nọ jlo dọ mí ni yin afanumẹ na Adọkunnu lẹ kakati nido yin na Jehovah. (Mat. 6:24) Mẹhe nọ yí huhlọn yetọn lẹpo do bẹ agbasanu lẹ pli lẹ ma nọ tindo ayajẹ nujọnu tọn to gbẹ̀mẹ, na ogbẹ̀ yetọn nọ sinai do pekọ hinhẹnwa na ojlo ṣejannabi tọn yetọn lẹ ji; kavi dehe nọ ylan hugan wẹ yindọ gbẹzan yetọn nọ wá dekọtọn do awubla po flumẹjijẹ po mẹ, na yé ma tindo haṣinṣan depope hẹ Jiwheyẹwhe wutu. (1 Tim. 6:9, 10; Osọ. 3:17) E taidi lehe Jesu basi zẹẹmẹ etọn do to apajlẹ nudotọ lọ tọn mẹ. To whenue owẹ̀n Ahọluduta lọ tọn “yin dido do owùn lẹ ṣẹnṣẹn, . . . ojlo na nuhe pò lẹpo biọ ahun yetọn mẹ bo gbidikọna ohó lọ, bọ e ma de sinsẹ́n tọ́n.”—Malku 4:14, 18, 19.

6. Etẹwẹ mí plọn sọn apajlẹ Baluki tọn mẹ?

6 Lẹnnupọndo apajlẹ Baluki tọn ji, yèdọ wekantọ yẹwhegán Jelemia tọn. To whenue vasudo Jelusalẹm tọn he ko yin didọdai lọ to dindọnsẹpọ, Baluki jẹ “onú daho lẹ dín” na ede ji, yèdọ nuhe ma tindo ale he dẹn-to-aimẹ lẹ. Ṣigba, onú dopo he e dona ko donukun wẹ nado duvivi hẹndi opagbe he Jehovah do na ẹn tọn dọmọ: “Yẹn na whlẹn ogbẹ̀ towe.” (Jel. 45:1-5) E họnwun dọ Jiwheyẹwhe ma na basi hihọ́na nutindo agbasa tọn mẹdepope tọn to tòdaho he na yin vivasudo lọ mẹ. (Jel. 20:5) Dile mí to dindọnsẹpọ opodo titonu ehe tọn, e ma yin ojlẹ lọ die nado bẹ agbasanu susu pli. Mí ma dona donukun dọ mí na luntọ́n po nutindo mítọn depope po to nukunbibia daho lọ whenu, mahopọnna lehe yé yin nujọnu kavi họakuẹ sọ.—Howh. 11:4, nudọnamẹ odò tọn; Mat. 24:21, 22; Luku 12:15.

7. Etẹwẹ mí na gbadopọnna todin, podọ etẹwutu?

7 Jesu na mí ayinamẹ dagbe hugan lọ he na gọalọna mí nado nọ dín dandannu gbẹ̀mẹ tọn lẹ bo ma yin ayihafẹsẹna, bo wá lẹzun agbasanu bẹplitọ, kavi do magbọjẹ he ma yin dandan tọn lẹ na míde. Yẹwhehodidọ Osó ji tọn etọn bẹ ayinamẹ enẹ hẹn. (Mat. 6:19-21) Mì gbọ mí ni hia bo gbadopọnna apadewhe etọn he yin kinkandai to Matiu 6:25-34 mẹ. Mọwiwà dona hẹn mí  kudeji dọ mí dona ‘to Ahọluduta lọ dín zọnmii,’ kakati ni yin agbasanu lẹ.Luku 12:31.

JEHOVAH NỌ PENUKUNDO NUHUDO AGBASA TỌN MÍTỌN LẸ GO

8, 9. (a) Naegbọn mí ma dona nọ hànu zẹjlẹgo gando nuhudo mítọn lẹ go? (b) Etẹwẹ Jesu yọnẹn gando gbẹtọvi lẹ po nuhudo yetọn lẹ po go?

8 Hia Matiu 6:25. To whenue Jesu dọna todoaitọ etọn lẹ ma nado ‘sọ yin magbọjẹnọ na ogbẹ̀ yetọn ba blo,’ nuhe dọna yé e te wẹ nado doalọtena nuhiha. Yé yin magbọjẹnọ na nuhe yé ma dona yin magbọjẹnọ na lẹ. Jesu dọ dọ yé ni doalọtena mọwiwà—podọ na whẹwhinwhẹ́n dagbe de wutu. Magbọjẹ kavi nuhiha he ma yin dandan tọn, etlẹ yin gando whẹho he sọgbe lẹ go, sọgan zọ́n bọ ayiha mẹde tọn na má bọ ewọ na yin ayihafẹsẹna, podọ e na gbẹkọ whẹho gbigbọmẹ tọn he yin nujọnu hugan to gbẹ̀mẹ lẹ go. Onú devi lẹ tọn duahunmẹna Jesu sọmọ bọ e na yé avase gando ayilinlẹn ylankan enẹ go whla ẹnẹ dogọ to yẹwhehodidọ etọn mẹ.—Mat. 6:27, 28, 31, 34.

9 Naegbọn Jesu do dọ dọ mí ni ma yin magbọjẹnọ na nuhe mí na dù, nuhe mí na nù kavi nuhe mí na do blo? Be onú enẹlẹ ma yin delẹ to dandannu gbẹ̀mẹ tọn lẹ mẹ ya? E họnwun dọ mọwẹ! Eyin mí ma penugo nado mọ onú enẹlẹ, be to jọwamọ-liho, mí ma na yin magbọjẹnọ ya? Na nugbo tọn, mí na wàmọ, podọ Jesu lọsu yọ́n enẹ. Ewọ yọ́n nuhudo egbesọegbesọ tọn gbẹtọvi lẹ tọn ganji. Humọ, e yọ́n ninọmẹ sinsinyẹn he devi etọn lẹ na pehẹ to owhe kanweko lẹ godo, dile yé na to gbẹnọ to “azán godo tọn lẹ mẹ,” yèdọ “ojlẹ awusinyẹn tọn he vẹawu nado pehẹ lẹ.” (2 Tim. 3:1) Ninọmẹ mọnkọtọn lẹ bẹ azọ́nmamọwa, ahivivẹ nulẹ tọn, núdùdù whèdomẹ po ohẹ́n klókló he mẹsusu nọ tindo numimọ etọn po hẹn. Etomọṣo, Jesu mọdọ ‘ogbẹ̀ yin nujọnu hú núdùdù podọ agbasa hú avọ̀.’

10. Whenue Jesu plọn hodotọ etọn lẹ lehe yé na nọ hodẹ̀ do, etẹwẹ e dọ dọ e dona yin nujọnu hugan na yé to gbẹ̀mẹ?

10 Jẹnukọnna enẹ, Jesu ko plọn hosetọ etọn lẹ to yẹwhehodidọ etọn mẹ nado nọ basi obiọ nuhudo agbasa tọn yetọn lẹ tọn hlan Otọ́ yetọn olọn tọn to whenue e dọna yé dọ yé sọgan hodẹ̀ dọmọ: “Na núdùdù mítọn egbehe tọn mí to egbé.” (Mat. 6:11) E sọ dọ nudopolọ to ninọmẹ devo mẹ dọmọ: “Na núdùdù azán dopodopo tọn mí sọgbe hẹ nuhudo azán lọ tọn lẹ.” (Luku 11:3) Ṣigba, ayinamẹ enẹ ma zẹẹmẹdo dọ nuhudo agbasa tọn mítọn lẹ dona nọ duahunmẹna mí zẹjlẹgo gba. To odẹ̀ apajlẹ tọn dopolọ mẹ, wiwá Ahọluduta Jiwheyẹwhe tọn wẹ yin onú tintan he go Jesu hodẹ̀ gando. (Mat. 6:10; Luku 11:2) Nado hẹn ayiha hosetọ etọn lẹ tọn jai, Jesu zinnudeji bọdego dọ Jehovah wẹ Nukunpedomẹgotọ daho hugan lọ.

11, 12. Etẹwẹ mí plọn sọn aliho he mẹ Jehovah nọ penukundo ohẹ̀ agahomẹ tọn lẹ go te mẹ? (Pọ́n yẹdide he tin to bẹjẹeji hosọ ehe tọn.)

11 Hia Matiu 6:26. Mí dona nọ “pọ́n ohẹ̀ agahomẹ tọn lẹ tlintlin.” Dile etlẹ yindọ nudida enẹlẹ ma klo, yé nọ dùnú taun, yèdọ atin-sinsẹ́n, jinukun, wánvú kavi nutogbẹ̀ devo lẹ. Na nugbo tọn, eyin ohẹ̀ nọ klo sọ gbẹtọ wẹ, e na nọ dùnú hú gbẹtọ. Ṣogan, e ma nọ biọ dọ yé ni pọ̀gle kavi do jinukun. Jehovah wẹ nọ wleawu nuhe sin hudo yé tindo lẹpo tọn. (Salm. 147:9) Amọ́, Jehovah ma nọ ze núdùdù lọ do obẹ́ yetọn mẹ! Núdùdù lọ tin-to-aimẹ bo sù, ṣigba yelọsu wẹ dona yì dín.

12 Na Jesu, e ma yọnbasi dọ Otọ́ olọn mẹ tọn etọn ni wleawu núdùdù tọn na ohẹ̀ lẹ bo na nọma penukundo nuhudo dandan tọn enẹlẹ dopolọ go na gbẹtọvi lẹ. [1] (1 Pita 5:6, 7) Jehovah ma na ze núdùdù do nùmẹ na mí, ṣigba e sọgan dona vivẹnu he mí nọ do nado pọ̀ jinukun he sin hudo mí tindo, kavi nado mọ akuẹ he mí nado họ̀ nuhe mí nọ tindo nuhudo etọn egbesọegbesọ lẹ. To  whenue mí tin to nuhudo mẹ, ewọ sọgan whàn mẹdevo lẹ nado má nutindo yetọn lẹ hẹ mí. Dile etlẹ yindọ Jesu ma donù lehe Jehovah nọ wleawu adọtẹn tọn na ohẹ̀ agahomẹ tọn lẹ do go, Jehovah na yé nuyọnẹn jọwamọ tọn, azọ́nyinyọnẹn, po azọ́nwanu he yé nado do adọ́ yetọn lẹ po. Mọdopolọ, Jehovah sọgan gọalọna mí nado mọ adọtẹn he jẹ na whẹndo mítọn.

13. Etẹwẹ dohia dọ mí họakuẹ hú ohẹ̀ agahomẹ tọn lẹ?

13 Jesu kanse hosetọ etọn lẹ dọmọ: ‘Be mìwlẹ ma họakuẹ hú ohẹ̀ agahomẹ tọn lẹ ya?’ Ayihaawe ma tin dọ Jesu na ko to nulẹnpọn do okú he e na kú do ota gbẹtọvi lẹ tọn mẹ to madẹnmẹ ji. (Yijlẹdo Luku 12:6, 7 go.) Avọ́sinsan ofligọ Klisti tọn ma yin awuwlena na nudida gbẹ̀te devo lẹ. Jesu ma kú na ohẹ̀ agahomẹ tọn lẹ, ṣigba e kú do ota mítọn mẹ, na mí nido sọgan duvivi ogbẹ̀ madopodo tọn.—Mat. 20:28.

14. Etẹwẹ mẹhe nọ do magbọjẹ na ede ma sọgan wà pọ́n gbede?

14 Hia Matiu 6:27. Naegbọn Jesu do dọ dọ gbẹtọ ma sọgan gbọn magbọjẹnọ-yinyin dali yí awagbà dopo dogọ tedidi gbẹzan etọn tọn? Na nuhiha he ma yin dandan tọn gando nuhudo egbesọ tọn mítọn lẹ go ma na yidogọna tedidi gbẹzan mítọn tọn wutu wẹ. Kakatimọ, magbọjẹnọ-yinyin zẹjlẹgo tlẹ sọgan sán ogbẹ̀ mítọn dogli.

15, 16. (a) Etẹwẹ mí plọn sọn aliho he mẹ Jehovah nọ penukundo vounvoun danji tọn lẹ go te mẹ? (Pọ́n yẹdide he tin to bẹjẹeji hosọ ehe tọn.) (b) Kanbiọ tẹlẹ wẹ e sọgan biọ dọ mí ni kanse míde, podọ etẹwutu?

15 Hia Matiu 6:28-30. Mẹnu wẹ ma na jlo nado tindo avọ̀ dagbedagbe lẹ, titengbe nuhe e na nọ do na nuwiwa gbigbọmẹ tọn lẹ, yèdọ na lizọnyizọn lọ, opli lẹ po plidopọ lẹ po? Etomọṣo, be mí dona yin “magbọjẹnọ na nuhe dù avọ̀dido” wẹ ya? Whladopo  dogọ, Jesu dọ̀n ayidonugo mítọn wá nudida Jehovah tọn lẹ ji. To whẹho ehe mẹ, mí sọgan plọn nususu sọn awusọhia “vounvoun danji tọn lẹ” mẹ. Jesu sọgan ko to nulẹnpọn do vounvoun delẹ ji taidi glaïeul, jacinthe, iris po tulipe po; vounvoun ehelẹ dopodopo wẹ tindo whanpẹ yetọn. E ma nọ biọ dọ nudida enẹlẹ ni lọ̀n okàn nado wleawuna avọ̀ yetọn titi. Ṣogan, awusọhia yetọn nọ dọnmẹdogo taun! Na nugbo tọn, “Sọlomọni lọsu to gigo etọn lẹpo mẹ ma tlẹ yin aṣọ́dona di dopo to ehelẹ mẹ”!

16 A dike nuagokun nuhe dọ Jesu te tọn ni gbọ gowe blo: “Eyin Jiwheyẹwhe nọ doaṣọ́na ogbé danji tọn lẹ . . . , be ewọ ma na doaṣọ́na mì humọ, mì yise pẹvinọ?” Matin ayihaawe, ewọ na wàmọ. Ṣogan, yise devi Jesu tọn lẹ tọn ko dekanpo to aliho de mẹ. (Mat. 8:26; 14:31; 16:8; 17:20) Yé tindo nuhudo yise po jidide he lodo humọ po tọn to Jehovah mẹ. Etẹwẹ dogbọn míwlẹ dali? Obá tẹ mẹ wẹ mí yise jẹ dọ Jehovah tindo ojlo po nugopipe lọ po nado wleawu nuhe mí tindo nuhudo etọn lẹ tọn na mí?

17. Etẹwẹ sọgan hẹn haṣinṣan he mí tindo hẹ Jehovah gble?

17 Hia Matiu 6:31, 32. Mí ma dona hodo apajlẹ omẹ “akọta” lẹ tọn he ma tindo yise nujọnu tọn dọ Otọ́ olọn mẹ tọn owanyinọ de tin he nọ penukundo mẹhe nọ ze Ahọluduta lọ do otẹn tintan mẹ to gbẹzan yetọn mẹ lẹ go. Vivẹnudido nado bẹ “nuhe akọta lẹ nọ to afọdona vẹkuvẹku” lẹ pli na hẹn haṣinṣan mítọn hẹ Jehovah gble. Etomọṣo, mí sọgan deji mlẹnmlẹn dọ eyin mí wà nuhe yin bibiọ to mí si—yèdọ nado ze onú gbigbọmẹ tọn lẹ do otẹn tintan mẹ to gbẹzan mítọn mẹ—Jehovah ma na tẹ̀ nudagbe de mí. Mẹdezejo na Jiwheyẹwhe dona nọ whàn mí nado tindo pekọ to “núdùdù po avọ̀ [kavi  adọtẹn] po” mẹ.—1 Tim. 6:6-8; nudọnamẹ odò tọn.

BE AHỌLUDUTA JIWHEYẸWHE TỌN TIN TO OTẸN TINTAN MẸ NA WE YA?

18. Etẹwẹ Jehovah yọnẹn gando dopodopo mítọn lẹ go, podọ etẹwẹ ewọ na wà na mí?

18 Hia Matiu 6:33. Devi Klisti tọn lẹ dona nọ ze Ahọluduta lọ do otẹn tintan mẹ to whelẹponu. Jesu dọ dọ eyin mí wàmọ, to whenẹnu “nudevo ehe lẹpo na yin yiyidogọ na” mí. Naegbọn e sọgan dọmọ? E basi zẹẹmẹ to wefọ he jẹnukọn mẹ dọmọ: “Otọ́ mìtọn olọn tọn yọnẹn dọ mì tindo nuhudo onú ehe lẹpo tọn,” enẹ wẹ dandannu gbẹ̀mẹ tọn lẹ. Whẹpo mí na tlẹ doayi nuhe na yin nuhudo mítọn titi lẹ go na nuhe dù núdùdù, avọ̀, po adọtẹn po, Jehovah sọgan mọ nuhudo enẹlẹ hlan nukọn po awubibọ po. (Flp. 4:19) Ewọ nọ yọ́n fie avọ̀ mítọn na vún sọn to madẹnmẹ. Ewọ nọ yọ́n núdùdù he sọgan wà dagbe na mí lẹ, podọ adọtẹn he na yọ́n na mí sọgbe hẹ sọha mẹhe tin to whẹndo mítọn mẹ lẹ tọn. Jehovah na hẹn ẹn diun dọ mí mọ nuhe mí tindo nuhudo etọn nugbonugbo lẹ.

19. Naegbọn mí ma dona nọ hanú gando nuhe sọgan jọ to sọgodo lẹ go?

19 Hia Matiu 6:34. Doayi e go dọ whla awetọ die he Jesu dọmọ: ‘Mì yin magbọjẹnọ gbede blo.’ Ewọ nọ jlo dọ mí ni lẹnnupọndo nuhahun azán dopodopo tọn lẹ kẹdẹ ji—bo deji mlẹnmlẹn dọ Jehovah na gọalọna mí. Eyin mẹde nọ do magbọjẹ he ma yin dandan tọn na ede gando nuhe sọgan jọ to sọgodo lẹ go, e sọgan tẹnpọn nado nọ ganjẹ edetiti go kakati nido yin do Jiwheyẹwhe go, podọ enẹ sọgan hẹn haṣinṣan etọn hẹ Jehovah gble.—Howh. 3:5, 6; Flp. 4:6, 7.

NỌ DÍN AHỌLUDUTA LỌ WHẸ́, PODỌ JEHOVAH NA YÍ NUHE PÒ LẸ DOGỌ NA WE

Be hiẹ sọgan zan gbẹzan jlẹkaji tọn nado na ayidonugo nuhe gando Ahọluduta lọ go lẹ dogọ ya? (Pọ́n hukan 20)

20. (a) Yanwle tẹwẹ a sọgan zedonukọnna dewe to sinsẹ̀nzọn Jehovah tọn mẹ? (b) Etẹwẹ a sọgan wà nado zan gbẹzan jlẹkaji tọn?

20 Ovọ́ wẹ e yin nado yí nuhe gando Ahọluduta lọ go lẹ do sanvọ́, nado sọgan to gbẹzan adọkunnu lẹ bibẹpli tọn zan zọnmii. Kakatimọ, mí dona nọ doafọna yanwle gbigbọmẹ tọn lẹ. Di apajlẹ, be hiẹ sọgan sẹtẹn yì agun he mẹ nuhudo wẹnlatọ Ahọluduta lọ tọn lẹ sù te de mẹ ya? Be hiẹ sọgan yin gbehosọnalitọ ya? Eyin a ko yin gbehosọnalitọ, be a ko lẹnnupọndo alọdidowemẹ nado yì Wehọmẹ Wẹndagbe-Jlatọ Ahọluduta lọ tọn lẹ tọn ji ya? Be a sọgan nọ yì gọalọ na azán delẹ to sẹmẹsẹmẹ to Bẹtẹli kavi to wekantẹn lẹdogbedevomẹ bibasi tọn de ya? Be hiẹ sọgan lẹzun mẹdezejotọ de na Azọ́nwatẹn Họ̀gbigbá tọn, bo nọ wazọ́n to azán delẹ ji to sẹmẹsẹmẹ na tito Plitẹnhọ Ahọluduta tọn lẹ gbigbá tọn ya? Lẹnnupọndo nuhe a sọgan wà nado penugo bo zan gbẹzan jlẹkaji tọn nado sọgan tindo mahẹ to nuwiwa Ahọluduta lọ tọn lẹ mẹ ji. Hodẹ̀ bo lẹnnupọndo apotin lọ “ Lehe Hiẹ Sọgan Zan Gbẹzan Jlẹkaji Tọn Do” ji, bo jẹ afọdide he jẹ lẹ ze ji nado jẹ yanwle towe kọ̀n.

21. Etẹwẹ na gọalọna we nado dọnsẹpọ Jehovah dogọ?

21 Owhẹ̀ Jesu tọn whẹ́n nado plọn mí nado nọ dín Ahọluduta lọ, kakati nido yin agbasanu lẹ. Eyin mí nọ wàmọ, mí ma na yin magbọjẹnọ gbede gando nuhudo agbasa tọn mítọn lẹ go. Mí nọ dọnsẹpọ Jehovah eyin mí nọ dejido ewọ go, bo ma nọ tẹnpọn nado joawuna nuhe nọ jlo mí kavi nado họ̀ nuhe aihọn nọ zedonukọnnamẹ lẹpo, eyin mí tlẹ tindo nugopipe etọn. Gbẹzan jlẹkaji tọn zinzan todin na gọalọna mí nado “tẹdo ogbẹ̀ nujọnu tọn” he ja lọ go gligli.—1 Tim. 6:19.

^ [1] (hukan 12) Nado mọnukunnujẹ nuhewutu Jehovah sọgan dike Klistiani de ni jẹdò núdùdù he na pé e tọn to whedelẹnu mẹ, pọ́n “Kanbiọ lẹ sọn Wehiatọ lẹ Dè” to zinjẹgbonu Atọ̀họ̀-Nuhihọ́ lọ Tọn 15 septembre 2014 weda 22 mẹ.