Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Atọ̀họ̀-Nuhihọ́ lọ Tọn—Zinjẹgbonu Oplọn Tọn  |  Février 2017

Ofligọ lọ—“Nunina Pipé” de sọn Otọ́ lọ Dè

Ofligọ lọ—“Nunina Pipé” de sọn Otọ́ lọ Dè

‘Nunina dagbe lẹpo gọna nunina pipé lẹpo nọ wá sọn Otọ́ lọ dè.’—JAK. 1:17.

OHÀN LẸ: 148, 109

1. Dona tẹlẹ wẹ awuwledainanu ofligọ lọ tọn hẹn yọnbasi?

DONA susu wẹ avọ́sinsan ofligọ Jesu Klisti tọn hẹn yọnbasi. Awuwledainanu ofligọ lọ tọn sọ hẹn ẹn yọnbasi na ovi Adam tọn he yiwanna dodowiwa lẹpo nado wá lẹzun hagbẹ whẹndo Jiwheyẹwhe tọn. Ṣigba, ofligọ Klisti tọn wà nususu hú dona sọgodo tọn lẹ hinhẹnwa na gbẹtọvi tonusetọ lẹ poun. Ojlo Jesu tọn nado tẹdo nujinọtedo dodo Jehovah tọn lẹ go kakajẹ okú gọalọ nado didẹ whẹho titengbe lẹ he gando mẹlẹpo go.—Heb. 1:8, 9.

2. (a) Whẹho he gando mẹlẹpo go tẹlẹ wẹ tin to odẹ̀ Jesu tọn mẹ? (Pọ́n yẹdide he tin to bẹjẹeji hosọ ehe tọn.) (b) Etẹwẹ mí na gbadopọnna to hosọ ehe mẹ?

2 Nudi owhe awe whẹpo Jesu do kú nado wleawuna avọ́sinsan ofligọ lọ tọn, e plọn devi etọn lẹ nado nọ hodẹ̀ dọmọ: “Otọ́ mítọn he tin to olọn mẹ, na oyín towe ni yin kinklandowiwe. Na Ahọluduta towe ni wá. Na ojlo towe ni yin wiwà, kẹdẹdi to olọn mẹ, mọdopolọ to aigba ji.” (Mat. 6:9, 10) Nado hẹn pinpẹn-nutọn-yinyọnẹn mítọn na ofligọ lọ jideji, mì gbọ mí ni  gbadopọnna lehe e tindo kanṣiṣa hẹ klandowiwe oyín Jiwheyẹwhe tọn, gandudu Ahọluduta Jiwheyẹwhe tọn po hẹndi lẹndai Jiwheyẹwhe tọn po do.

“NA OYÍN TOWE NI YIN KINKLANDOWIWE”

3. Etẹwẹ oyín Jehovah tọn dehia, podọ nawẹ Satani kọnmasin do oyín wiwe enẹ go gbọn?

3 Obiọ tintan Jesu tọn to odẹ̀ apajlẹ tọn etọn mẹ gando klandowiwe oyín Jiwheyẹwhe tọn go. Oyín Jehovah tọn nọ de obá he mẹ gigo, aṣẹpipa po wiwe-yinyin Etọn po gbloada jẹ hia. To odẹ̀ devo mẹ, Jesu dlẹnalọdo Jehovah taidi “Otọ́ Wiwe.” (Joh. 17:11) To whenuena e yindọ Jehovah yin wiwe, nunọwhinnusẹ́n po osẹ́n he wá sọn e dè lẹpo po nọ yin wiwe. Mahopọnna enẹ, to jipa Edẹni tọn mẹ, Satani gbọn oklọ dali fọ́n ayihaawe dote gando jlọjẹ Jiwheyẹwhe tọn nado ze nujinọtedo lẹ dai na gbẹtọvi lẹ go. Satani dolalo dokọna Jehovah bo gbọnmọ dali kọnmasin do oyín wiwe Jiwheyẹwhe tọn go.—Jen. 3:1-5.

4. Nawẹ Jesu nọgodona klandowiwe oyín Jiwheyẹwhe tọn gbọn?

4 To vogbingbọn mẹ, Jesu yiwanna oyín Jehovah tọn nugbonugbo. (Joh. 17:25, 26) Jesu nọgodona klandowiwe oyín Jiwheyẹwhe tọn. (Hia Salmu lẹ 40:8-10.) Gbọn gbẹzan pipé he e zan to aigba ji dali, Jesu dohia dọ e sọgbe hẹ lẹnpọn dagbe podọ hẹ dodowiwa dọ Jehovah ze nujinọtedo lẹ dai na nudida nuyọnẹntọ etọn lẹ. Etlẹ yin to whenue Satani hẹn okú awufiẹsa tọn de wá Jesu ji, Jesu gbẹ́ yin nugbonọ mlẹnmlẹn na Otọ́ olọn mẹ tọn etọn. Gbọn nugbonọ-yinyin etọn dali, Jesu dohia dọ gbẹtọvi pipé de sọgan setonuna nujinọtedo dodo Jiwheyẹwhe tọn lẹ to gigọ́ mẹ.

5. Nawẹ mí sọgan nọgodona klandowiwe oyín Jiwheyẹwhe tọn gbọn?

5 Nawẹ mí sọgan dohia dọ mí yiwanna oyín Jehovah tọn gbọn? Gbọn walọyizan mítọn dali. Jehovah biọ dọ mí ni yin wiwe. (Hia 1 Pita 1:15, 16.) Ehe zẹẹmẹdo dọ mí ni nọ basi sinsẹ̀n hlan Jehovah kẹdẹ podọ dọ mí ni nọ setonuna ẹn po ahun mítọn lẹpo po. Eyin yè tlẹ to homẹkẹndo mí, mí nọ wà nuhe go mí pé lẹpo nado nọgbẹ̀ sọgbe hẹ nunọwhinnusẹ́n po osẹ́n dodo tọn etọn lẹ po. Gbọn nuhe sọgbe wiwà dali, mí nọ dike hinhọ́n mítọn ni họnwun bo nọ gbọnmọ dali hẹn gigo wá na oyín Jehovah tọn. (Mat. 5:14-16) Taidi omẹ wiwe lẹ, mí nọ dohia gbọn aliho gbẹninọ tọn mítọn dali dọ osẹ́n Jehovah tọn lẹ yọ́n podọ dọ lalo wẹ whẹsadokọnamẹ Satani tọn lẹ. To whenue mí ṣinuwa, dile e nọ jọ do mímẹpo go do, mí nọ lẹnvọjọ sọn ahun mẹ wá bo nọ dealọ sọn walọ he nọ kọnmasin do Jehovah go lẹ mẹ.—Salm. 79:9.

6. Naegbọn Jehovah sọgan pọ́n mí hlan di dodonọ mahopọnna dọ mí gbẹ́ yin mapenọ?

6 To dodonu avọ́sinsan Klisti tọn ji, Jehovah nọ jona ylando mẹhe do yise hia lẹ tọn. E nọ kẹalọyi mẹhe klan yede do wiwe na ẹn lẹ taidi sinsẹ̀n-basitọ etọn lẹ. Jehovah nọ lá Klistiani yiamisisadode he yin dodonọ lẹ di visunnu etọn lẹ, podọ hagbẹ “lẹngbọ devo lẹ” tọn he yin dodonọ lẹ di họntọn etọn lẹ. (Joh. 10:16; Lom. 5:1, 2; Jak. 2:21-25) Enẹwutu, etlẹ yin todin, ofligọ lọ nọ hẹn mí penugo nado tindo haṣinṣan dagbe de hẹ Otọ́ mítọn podọ nado nọgodona klandowiwe oyín etọn tọn.

“NA AHỌLUDUTA TOWE NI WÁ”

7. Dona tẹlẹ wẹ ofligọ lọ na hẹn yọnbasi to gandudu Ahọluduta lọ tọn glọ?

7 To odẹ̀ apajlẹ tọn lọ mẹ, Jesu basi obiọ he bọdego ehe hlan Jiwheyẹwhe dọmọ: “Na Ahọluduta towe ni wá.” Nawẹ ofligọ lọ gando Ahọluduta Jiwheyẹwhe tọn go gbọn? Ofligọ lọ hẹn ẹn yọnbasi nado bẹ gbẹtọ 144 000 lẹ pli, na yé nido yin ahọlu podọ yẹwhenọ lẹ hẹ Klisti to olọn mẹ. (Osọ. 5:9, 10; 14:1) Jesu  po gandutọgbẹ́ etọn lẹ po he wleawuna Ahọluduta Jiwheyẹwhe tọn, na yí ale he ofligọ lọ hẹnwa lẹ zan do ota gbẹtọvi tonusetọ lẹ tọn mẹ to owhe fọtọ́n lọ gblamẹ. Aigba na yin hinhẹn zun paladisi de, podọ gbẹtọvi nugbonọ lẹpo na yin hinhẹn jẹ pipé kọ̀n, bọ adà olọn mẹ tọn po aigba ji tọn whẹndo Jiwheyẹwhe tọn po na yin kinkọndopọ to gigọ́ mẹ. (Osọ. 5:13; 20:6) Jesu na só ota odàn lọ tọn bo na de nuyiwadomẹji atẹṣiṣi Satani tọn lẹpo sẹ̀ sọn wẹkẹ lọ mẹ.—Jen. 3:15.

8. (a) Nawẹ Jesu gọalọna devi etọn lẹ nado mọ nujọnu-yinyin Ahọluduta Jiwheyẹwhe tọn gbọn? (b) Nawẹ mí nọ do godonọnamẹ mítọn na Ahọluduta lọ hia to egbehe gbọn?

8 To whenue Jesu tin to aigba ji, e gọalọna devi etọn lẹ nado mọ nujọnu-yinyin Ahọluduta Jiwheyẹwhe tọn. Tlolo to baptẹm etọn godo, Jesu lá “wẹndagbe Ahọluduta Jiwheyẹwhe tọn” lẹdo pé. (Luku 4:43) To hodidọ godo tọn etọn na devi etọn lẹ whẹpo e do lẹkọyi olọn mẹ whenu, Jesu na yé anademẹ nado yin kunnudetọ etọn lẹ “kaka yì awà he dẹn hugan aigba tọn lẹ ji.” (Owalọ 1:6-8) Gbọn azọ́n yẹwhehodidọ Ahọluduta lọ tọn gblamẹ, gbẹtọ lẹ na tindo dotẹnmẹ hundote lẹdo aihọn pé nado plọnnu gando ofligọ lọ go bo lẹzun mẹjidugando Ahọluduta Jiwheyẹwhe tọn lẹ. To egbehe, mí nọ do godonọnamẹ mítọn na Ahọluduta lọ hia gbọn alọgigọna nọvisunnu Klisti tọn he to aigba ji lẹ nado hẹn azọ́ndenamẹ yetọn nado dọyẹwheho wẹndagbe Ahọluduta lọ tọn lẹdo aihọn pé di dali.—Mat. 24:14; 25:40.

“NA OJLO TOWE NI YIN WIWÀ”

9. Naegbọn mí sọgan kudeji dọ Jehovah na hẹn lẹndai etọn na gbẹtọvi lẹ di?

9 Etẹ dọ wẹ Jesu te to whenue e dọ bọdego dọ: “Na ojlo towe ni yin wiwà”? Jehovah wẹ yin Mẹdatọ lọ. Eyin e dọ dọ nude na jọ, e nọ taidi dọ nulọ ko jọ wẹ nkọ. (Isa. 55:11) Ewọ ma na dike atẹṣiṣi Satani tọn ni glọnalina lẹndai Etọn na gbẹtọvi lẹ. Sọn dowhenu, ojlo Jehovah tọn wẹ yindọ aigba ni gọ́ na ovi pipé Adam po Evi po tọn lẹ. (Jen. 1:28) Eyin Adam po Evi po ma jivi whẹpo do kú dai wẹ, lẹndai Jiwheyẹwhe tọn nado hẹn kúnkan yetọn gọ́ aigba ji na ko gboawupo. Enẹwutu, to ylando Adam po Evi po tọn godo, Jehovah gbẹ́ na yé dotẹnmẹ nado jivi lẹ. Gbọn ofligọ lọ gblamẹ, Jiwheyẹwhe hùn dotẹnmẹ dote na mẹhe do yise hia lẹpo nado wá lẹzun mẹpipe bo nọgbẹ̀ kakadoi. Jehovah yiwanna gbẹtọvi lẹ, podọ ojlo etọn wẹ yindọ mẹhe yin tonusetọ lẹ ni nọgbẹ̀ sọgbe hẹ lẹndai etọn.

10. Nawẹ ofligọ lọ na hẹn ale wá na mẹhe ko kú lẹ gbọn?

10 Etẹwẹ dogbọn gbẹtọ liva susu he kú bo ma tindo dotẹnmẹ hundote lọ pọ́n nado yọ́n Jehovah bo sẹ̀n ẹn lẹ dali? Ofligọ lọ hẹn fọnsọnku oṣiọ lẹ tọn yọnbasi. Otọ́ owanyinọ olọn mẹ tọn mítọn na hẹn yé gọwá ogbẹ̀ bo na na yé dotẹnmẹ hundote lọ nado plọnnu gando lẹndai etọn go podọ nado nọgbẹ̀ kakadoi. (Owalọ 24:15) Jehovah jlo dọ gbẹtọ lẹ ni nọgbẹ̀, kakati nado kú. Ewọ wẹ Asisa ogbẹ̀ tọn, yèdọ Otọ́ mẹhe fọnsọnku lẹpo tọn. (Salm. 36:9) Enẹwutu, lehe e sọgbe do sọ dọ Jesu plọn mí nado nọ hodẹ̀ dọmọ: “Otọ́ mítọn he tin to olọn mẹ.” (Mat. 6:9) Jehovah ko de Jesu nado yí adà titengbe de wà to fọnsọnku oṣiọ lẹ tọn mẹ. (Joh. 6:40, 44) To Paladisi mẹ, Jesu, yèdọ mẹhe yin “fọnsọnku po ogbẹ̀ po” na yí adà etọn wà.—Joh. 11:25.

11. Etẹwẹ yin ojlo Jiwheyẹwhe tọn na “gbẹtọ susugege” lọ?

11 Alọtútlú Jehovah tọn ma yin na omẹ ṣinṣinyan delẹ poun gba, na Jesu dọmọ: “Mẹdepope he wà ojlo Jiwheyẹwhe tọn, omẹ ehe lọ wẹ nọvisunnu, nọviyọnnu po onọ̀ ṣie po.” (Malku 3:35) Ojlo Jiwheyẹwhe tọn wẹ yindọ “gbẹtọ susugege”  madosọha de sọn akọta lẹpo mẹ, hẹnnu lẹpo mẹ, po ogbè lẹpo mẹ po ni lẹzun sinsẹ̀n-basitọ etọn lẹ. Mẹhe do yise hia to ofligọ Klisti tọn mẹ bo nọ wà ojlo Jiwheyẹwhe tọn lẹ sọgan tin to mẹhe na dawhá dọ, “Jiwheyẹwhe mítọn he sinai to ofìn lọ ji po Lẹngbọvu lọ po dè wẹ whlẹngán mítọn wá sọn” lẹ mẹ.—Osọ. 7:9, 10.

12. Nawẹ lẹndai Jehovah tọn na gbẹtọvi tonusetọ lẹ sọawuhia to odẹ̀ apajlẹ tọn lọ mẹ gbọn?

12 Lẹndai Jehovah tọn na gbẹtọvi tonusetọ lẹ sọawuhia to obiọ he tin to odẹ̀ apajlẹ tọn Jesu tọn mẹ lẹ mẹ. To kọndopọ mẹ hẹ odẹ̀ ehe, mí jlo na wà nuhe go mí pé lẹpo nado klan oyín Jehovah tọn do wiwe, kavi nọ pọ́n ẹn hlan di wiwe. (Isa. 8:13) Oyín Jesu tọn lọsu zẹẹmẹdo “Jehovah Wẹ Whlẹngán,” podọ whlẹngán mítọn gbọn ofligọ lọ gblamẹ nọ hẹn gbégbò po gigo po wá na oyín Jehovah tọn. Ahọluduta Jiwheyẹwhe tọn na yin yiyizan nado hẹn ale ofligọ lọ tọn lẹ wá na gbẹtọvi tonusetọ lẹ. Na nugbo tọn, odẹ̀ apajlẹ tọn lọ hẹn mí deji dọ nudepope ma sọgan glọnalina ojlo Jiwheyẹwhe tọn nado mọ hẹndi.—Salm. 135:6; Isa. 46:9, 10.

DO PINPẸN-NUTỌN-YINYỌNẸN TOWE HIA NA OFLIGỌ LỌ

13. Etẹwẹ baptẹm mítọn nọ dohia?

13 Dopo to aliho titengbe he mẹ mí nọ do pinpẹn-nutọn hia na ofligọ lọ te lẹ mẹ wẹ gbọn míde kinklandowiwe hlan Jehovah to dodonu yise mítọn to ofligọ lọ mẹ tọn ji dali, podọ gbọn baptẹm mítọn dali. Baptẹm mítọn nọ dohia dọ “Jehovah tọn wẹ mí yin.” (Lom. 14:8) E nọtena obiọ mítọn hlan Jiwheyẹwhe nado tindo ayihadawhẹnamẹnu dagbe de. (1 Pita 3:21) Jehovah nọ na gblọndo obiọ ehe tọn gbọn ohùn mẹklọ́we tọn avọ́sinsan Klisti tọn yiyizan do ota mítọn mẹ dali. Mí tindo nujikudo mlẹnmlẹn dọ ewọ na na mí nuhe e ko dopà etọn lẹpo.—Lom. 8:32.

Aliho tẹlẹ mẹ wẹ mí nọ do pinpẹn-nutọn-yinyọnẹn mítọn hia na ofligọ lọ te? (Pọ́n hukan 13 po 14tọ po)

14. Naegbọn mí do yin gbedena nado yiwanna kọmẹnu mítọn?

 14 Aliho devo tẹ mẹ wẹ mí nọ do pinpẹn-nutọn mítọn hia na ofligọ lọ te? To whenuena e yindọ owanyi wẹ nọ deanana nuhe Jehovah nọ wà lẹpo, ojlo etọn wẹ yindọ sinsẹ̀n-basitọ etọn lẹpo ni wleawuna owanyi taidi jẹhẹnu titengbe hugan yetọn. (1 Joh. 4:8-11) Mí nọ dohia dọ mí jlo na yin “visunnu Otọ́ [mítọn] he tin to olọn mẹ lọ tọn lẹ” gbọn owanyi didohia kọmẹnu mítọn dali. (Mat. 5:43-48) Gbedide lọ nado yiwanna kọmẹnu mítọn wẹ bọdo gbedide lọ nado yiwanna Jehovah go tlolo. (Mat. 22:37-40) Aliho titengbe dopo nado do owanyi mọnkọtọn hia kọmẹnu mítọn wẹ gbọn tonusisena gbedide lọ nado dọyẹwheho wẹndagbe Ahọluduta Jiwheyẹwhe tọn dali. Dile mí to owanyi dohia gbẹtọ hatọ mítọn lẹ, mí nọ do gigo Jiwheyẹwhe tọn hia. Na nugbo tọn, owanyi na Jiwheyẹwhe nọ yin “hinhẹn zun pipé to mí mẹ” to whenue mí setonuna gbedide lọ nado yiwanna mẹdevo lẹ, titengbe mẹmẹsunnu mítọn lẹ.—1 Joh. 4:12, 20.

OFLIGỌ LỌ NỌ HẸN “OJLẸ KỌFANAMẸ TỌN” LẸ WÁ SỌN JEHOVAH DÈ

15. (a) Dona tẹlẹ wẹ mí to mimọyi sọn Jehovah dè todin? (b) Dona tẹlẹ wẹ to tepọn mí?

15 Ohọ̀n jonamẹ mlẹnmlẹn tọn nọ hundote na mí to whenue mí do yise hia to ofligọ lọ mẹ. Ohó Jiwheyẹwhe tọn hẹn mí deji dọ, ylando mítọn lẹ sọgan yin ‘súnsúnsún sẹ̀.’ (Hia Owalọ lẹ 3:19-21.) Dile mí ko mọ do to aga, to dodonu ofligọ lọ tọn ji, Jehovah kẹalọyi devizọnwatọ yiamisisadode lẹ taidi ovi sọdodovi etọn lẹ. (Lom. 8:15-17) Na nuhe dù míwu mẹhe yin hagbẹ “lẹngbọ devo lẹ” tọn lẹ, e taidi dọ Jehovah ko wleawuna kunnudewema sọdodovi tọn de he ji yinkọ mítọn lẹ tin te wẹ nkọ. To whenue mí na ko jẹ pipé kọ̀n bo na ko lùn mẹtẹnpọn godo tọn lọ tọ́n godo, Jehovah na kẹalọyi mí taidi ovi sọdodovi yiwanna etọn lẹ to aigba ji, taidi dọ e doalọ kunnudewema lọ mẹ po homẹhunhun po wẹ nkọ. (Lom. 8:20, 21; Osọ. 20:7-9) Owanyi Jehovah tọn na ovi vivẹ́ etọn lẹ madopodo. Ale ofligọ lọ tọn lẹ na nọ aimẹ kakadoi. (Heb. 9:12) Nunina ehe ma na hẹn nuhọakuẹ-yinyin etọn bu gbede. Mẹdepope kavi gandudu depope ma sọgan hò e yí sọn mí si.

16. Nawẹ ofligọ lọ nọ hẹn mí penugo nado jẹ mẹdekannu nugbonugbo gbọn?

16 Nude ma tin he Lẹgba sọgan wà nado glọnalina mẹhe lẹnvọjọ sọn ahun mẹ lẹpo nado wá lẹzun hagbẹ whẹndo Jehovah tọn. Jesu wá aigba ji bo kú “whladopo podọ kakadoi.” Gbọnmọ dali, ofligọ lọ yin súsú kakadoi. (Heb. 9:24-26) E zẹhudo whẹgbledomẹ he mí dugu etọn sọn Adam si lọ ji mlẹnmlẹn. Gbọn avọ́sinsan Klisti tọn gblamẹ, mí jẹ mẹdekannu sọn aihọn he tin to anademẹ Satani tọn glọ ehe si, podọ mí masọ nọ dibuna okú to gbẹzan mítọn mẹ ba.—Heb. 2:14, 15.

17. Etẹwẹ owanyi Jehovah tọn zẹẹmẹdo na we?

17 Opagbe Jiwheyẹwhe tọn lẹ sọgan yin jidedego mlẹnmlẹn. Kẹdẹdile osẹ́n nudida tọn lẹ ma nọ gboawupo gbede do, Jehovah ma na dowinyan mí gbede. Ewọ ma nọ diọ. (Mal. 3:6) Nuhe Jehovah na mí ma nọte do ogbẹ̀ kẹdẹ ji. E sọ na mí owanyi etọn. “Míwlẹ ko wá yọnẹn bo ko sọ yise to owanyi he Jiwheyẹwhe tindo na mí mẹ. Jiwheyẹwhe wẹ owanyi.” (1 Joh. 4:16) Aigba lọ blebu na yin hinhẹn zun paladisi de he na gọ́ na nudagbe susu, podọ mẹhe to aigba ji lẹpo wẹ na nọ do owanyi Jiwheyẹwhe tọn nkọ hia. Mì gbọ mí ni kọ̀n ogbè mítọn lẹ dopọ hẹ nudida nugbonọ Jiwheyẹwhe tọn he to olọn mẹ lẹ tọn dọmọ: “Mì gbọ pipà, gigo, nuyọnẹn, pẹdido, gbégbò, huhlọn po hlọnhlọn po ni tin hlan Jiwheyẹwhe mítọn kakadoi podọ doidoi. Niṣẹ.”—Osọ. 7:12.