Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

ATỌ̀HỌ̀-NUHIHỌ́ LỌ TỌN (ZINJẸGBONU OPLỌN TỌN) FÉVRIER 2016

Hẹn Ayajẹ Towe Go to Sinsẹ̀nzọn Jehovah Tọn Mẹ

Hẹn Ayajẹ Towe Go to Sinsẹ̀nzọn Jehovah Tọn Mẹ

BE A flin azán he hẹn ayajẹ wá na we hugan to gbẹzan towe mẹ ya? Be alọwle-zan towe wẹ ya kavi gbeegbe ovi towe tintan yin jiji? Kavi be azán he gbè a basi dohia klandowiwe towe hlan Jehovah tọn bo yí baptẹm wẹ ya? Vlavo hiẹ na ko nọ pọ́n azán baptẹm towe tọn hlan taidi azán titengbe podọ dehe hẹn ayajẹ wá na we hugan. Podọ, lehe homẹ yisenọ hatọ towe lẹ tọn hùn do sọ nado mọdọ hiẹ dohia to gbangba dọ a yí ahun, alindọn, ayiha po huhlọn towe lẹpo po do yiwanna Jiwheyẹwhe!Malku 12:30.

E yọnbasi taun dọ hiẹ ni ko duvivi ayajẹ susu tọn to sinsẹ̀nzọn Jehovah tọn mẹ sọn baptẹm towe whenu gbọ́n. Etomọṣo, wẹnlatọ Ahọluduta lọ tọn delẹ ko hẹn ayajẹ he yé ko tindo dai bu jẹ obá de mẹ. Naegbọn enẹ do jọ do yé go? Whẹwhinwhẹ́n tẹlẹ wẹ mí tindo nado zindonukọn to sinsẹ̀nzọn Jehovah tọn mẹ po ayajẹ po?

NUHEWUTU MẸDELẸ HẸN AYAJẸ YETỌN BU

E họnwun dọ owẹ̀n Ahọluduta lọ tọn—po opagbe he e bẹhẹn po dọ, to madẹnmẹ Jehovah na hẹn titonu ylankan ehe wá opodo bo na na mí aihọn yọyọ etọn—nọ hẹn mí jaya taun. Humọ, Zẹfania 1:14 na mí jide dọmọ: “Azán daho OKLUNỌ tọn tin sẹpọ, e tin sẹpọ bosọ to unklẹn susu.” Ṣigba, dile mí to tenọpọn azán enẹ bọ e taidi nuhe to gbàndọn, enẹ sọgan hò ayajẹ he mí tindo dai yí sọn mí si bo hẹn mí nado dọ̀n yonu dogodo to sinsẹ̀nzọn wiwe Jiwheyẹwhe tọn mẹ.Howh. 13:12.

Ogbẹ́ dagbe dido to omẹ Jiwheyẹwhe tọn lẹ ṣẹnṣẹn nọ dozolanmẹna mí nado hẹn ayajẹ mítọn go to sinsẹ̀nzọn Jehovah tọn mẹ. Na nugbo tọn, e sọgan yindọ walọ dagbe devizọnwatọ Jehovah tọn lẹ tọn wẹ dọ̀n mí wá sinsẹ̀n nugbo lọ mẹ bo gọalọna mí nado jẹ Jiwheyẹwhe sẹ̀n ji po ayajẹ po. (1 Pita 2:12) Ṣigba, etẹwẹ sọgan jọ eyin mẹplọnlọ yin dido Klistiani hatọ de go, na e gboawupo nado nọgbẹ̀ sọgbe hẹ nujinọtedo Jiwheyẹwhe tọn lẹ wutu? To ninọmẹ mọnkọtọn lẹ mẹ, mẹdelẹ he ko wá nugbo lọ mẹ, na walọ jijọ-di-Jiwheyẹwhe tọn omẹ Jehovah tọn lẹ tọn wutu, sọgan gbọjọ bo hẹn ayajẹ yetọn bu.

Ajọjijla titonu ylankan Satani tọn sọgan sọ hò ayajẹ mítọn yí. Lẹgba nọ yí aihọn etọn zan nado hẹn mí lẹndọ mí tindo nuhudo onú delẹ tọn, ehe na taun tọn ma yin dandan. Ṣigba, mí na wà dagbe nado flin hogbe Jesu tọn lẹ he dọmọ: “Mẹdepope ma sọgan yin afanumẹ na ogán awe; adavo ewọ na gbẹwanna ode bo yiwanna awetọ, kavi ewọ na sẹbọdo ode go bo gbẹkọ awetọ go. Mìwlẹ ma sọgan yin afanumẹ na Jiwheyẹwhe podọ na Adọkunnu lẹ.” (Mat. 6:24) Mí ma sọgan sẹ̀n Jehovah po ayajẹ po bosọ tẹnpọn nado mọ nuhe alọ mítọn plá to aihọn ehe mẹ lẹpo yí to ojlẹ dopolọ mẹ.

NỌ ‘JẸAGLIN TO JIWHEYẸWHE WHLẸNGÁN MÍTỌN TỌN MẸ’

Jehovah sinsẹ̀n ma yin agbànpẹnmẹnu de na mẹhe yiwanna ẹn lẹ. (1 Joh. 5:3) Flindọ Jesu  dọmọ: “Mì wá dè e, mì mẹhe tin to magbọjẹ mẹ bọ yè doagban pinpẹn na lẹpo, yẹn nasọ fakọna mì. Mì yí zẹgẹ ṣie do okọ̀ mìtọn bosọ plọnnu sọn dè e, na homẹmimiọnnọ po whiwhẹnọ to ahun mẹ po wẹ yẹn, mìwlẹ nasọ mọ kọfanamẹ na alindọn mìtọn lẹ. Na zẹgẹ ṣie bọawu bọ agbàn ṣie sọ fua.” (Mat. 11:28-30) Zẹgẹ Klistiani-yinyin tọn zize nọ hẹn kọfanamẹ wá bosọ nọ namẹ ayajẹ. Podọ na taun tọn, mí tindo whẹwhinwhẹ́n lẹ nado nọ jaya tlala to sinsẹ̀nzọn Jehovah tọn mẹ. Todin, mì gbọ mí ni gbadopọnna whẹwhinwhẹ́n tangan atọ̀n he wutu mí sọgan nọ ‘jẹaglin to Jiwheyẹwhe whlẹngán mítọn tọn mẹ.’Hab. 3:18.

Mí to Jiwheyẹwhe ayajẹnọ lọ he yin Gbẹ̀namẹtọ mítọn sẹ̀n. (Owalọ 17:28; 1 Tim. 1:11) Mí yọnẹn dọ eyin Mẹdatọ mítọn tọn dẹ́n, mí ma na tin to ogbẹ̀. Enẹwutu, mí nọ zindonukọn nado to sinsẹ̀n ẹn po ayajẹ po mahopọnna owhe susu he ko juwayi to baptẹm mítọn godo.

Nado hẹn ayajẹ etọn go, Héctor nọ flin todido Ahọluduta lọ tọn bo nọ hẹn zohunhun etọn go

Lẹnnupọndo apajlẹ Héctor tọn ji, mẹhe sẹ̀n Jehovah taidi nugopọntọ tomẹyitọ na owhe 40. E gbẹ́ to sinsẹ́n detọ́n “to yọnho mẹ.” (Ps. 92:12-14) Azọ̀n asi Héctor tọn ko dekanpona nuhe Héctor nọ wà to sinsẹ̀nzọn Jiwheyẹwhe tọn mẹ, ṣigba enẹ ma de ayajẹ etọn pò. E dọmọ: “Dile etlẹ yindọ e blawu nado mọdọ azọ̀n asi ṣie tọn to yinylan deji vudevude bọ e ma bọawu nado penukundo e go, n’ma dike enẹ ni hò ayajẹ ṣie to Jiwheyẹwhe nugbo lọ sinsẹ̀n mẹ yí. Na n’yọnẹn dọ Jehovah, mẹhe dá gbẹtọvi lẹ na lẹndai de wutu, wẹ zọ́n bọ n’do tin to ogbẹ̀ wutu, enẹ ko pé nado yiwanna ẹn bo sẹ̀n ẹn po ahun lẹpo po. N’nọ tẹnpọn nado hẹn zohunhun ṣie go to azọ́n yẹwhehodidọ tọn lọ mẹ, podọ n’nọ dovivẹnu nado hẹn todido Ahọluduta lọ tọn dogbẹ̀ to ayiha ṣie mẹ, na ayajẹ ṣie nikaa bu.”

Jehovah ko wleawuna ofligọ lọ bo hẹn yọnbasi na mí nado tindo gbẹzan he gọ́ na ayajẹ. Na nugbo tọn, “Jiwheyẹwhe yiwanna aihọn lọ sọmọ bọ e namẹ Visunnu detọ́n dopo akàn etọn, na mẹdepope he do yise hia to ewọ mẹ ma nado yin vivasudo adavo nado tindo ogbẹ̀ madopodo.” (Joh. 3:16) Mọwẹ, mí sọgan mọ jona ylando mítọn lẹ tọn po ogbẹ̀ madopodo po yí, eyin mí tindo yise to awuwledainanu owanyinọ Jiwheyẹwhe tọn lọ he yin avọ́sinsan ofligọ Jesu tọn mẹ. Be enẹ ma yin whẹwhinwhẹ́n dagbe de nado do pinpẹn nutọn hia ya? Podọ be pinpẹn-nutọn-yinyọnẹn na ofligọ lọ ma dona whàn mí nado to Jehovah sẹ̀n po ayajẹ po ya?

Jesús hẹn gbẹzan etọn bọawu bo sẹ̀n Jehovah po ayajẹ po na owhe susu

Mẹmẹsunnu de he nọ yin Jesús bo nọ nọ̀ Mexique dọmọ: “Afanumẹ wẹ n’yin na agbasazọ́n ṣie dai, bọ to whedelẹnu n’nọ gọalọna pipli azọ́nwatọ tọn debọdo-dego atọ́n he nọ wazọ́n to ojlẹ voovo mẹ, dile etlẹ yindọ n’ma to dandannu glọ nado wàmọ. N’nọ wàmọ nado mọ akuẹ dogọ poun. Enẹgodo, n’plọnnu gando Jehovah po lehe e ko na  Visunnu vivẹ́ etọn gbẹtọvi lẹ do po go. N’tindo ojlo vẹkuvẹku nado sẹ̀n ẹn. Enẹwutu, n’klan gbẹzan ṣie do wiwe hlan Jehovah, bọ to whenue n’ko wazọ́n na azọ́nwhé lọ na owhe 28 godo, n’basi dide nado jo azọ́n lọ do bo biọ sinsẹ̀nzọn whenu-gigọ́ tọn mẹ.” E ko yì owhe lẹ todin bọ mẹmẹsunnu ehe to Jehovah sẹ̀n po ayajẹ po.”

Sinsẹ́n he mí nọ detọ́n nọ hẹn ayajẹ daho wá, e ma yin awubla. Be a flin lehe gbẹzan towe te whẹpo a do wá yọ́n Jehovah ya? Apọsteli Paulu flinnu Klistiani he to Lomu lẹ dọ yé ko “yin afanumẹ na ylando dai” bo ko wá lẹzun “afanumẹ lẹ na dodowiwa.” Yé to sinsẹ́n detọ́n na nuhe dù “wiwe-yinyin,” ehe na dekọtọn do ogbẹ̀ madopodo mẹ. (Lom. 6:17-22) Mílọsu nọ zan gbẹzan mítọn to kọndopọ mẹ hẹ wiwe-yinyin bo nọ vò sọn awubla he gbẹzan fẹnnuwiwa po danuwiwa po tọn nọ hẹnwa mẹ. Whẹwhinwhẹ́n nankọ die nado jaya!

“Owhe he n’yizan to sinsẹ̀nzọn Jehovah tọn mẹ lẹ wẹ hẹn ayajẹ wá na mi hugan to gbẹzan ṣie mẹ.”—Jaime

Lẹnnupọndo apajlẹ Jaime tọn ji, mẹhe ma yise dọ Jiwheyẹwhe tin bo nọ lẹndọ nulẹ wá aimẹ na yede bosọ nọ doalọ to akotokún-yìnyìn mẹ. Jaime jẹ opli lẹ yì ji bọ owanyi he nọ yin didohia to finẹ yinuwadeji taun. Nado deta sọn onú hoho enẹlẹ mẹ, Jaime biọ to Jehovah si nado gọalọna ẹn nado tindo yise to Ewọ mẹ. Jaime dọmọ: “Vudevude n’wá doayi e go dọ Otọ́ owanyinọ podọ Jiwheyẹwhe lẹblanunọ de tin nugbo. Gbẹninọ sọgbe hẹ nujinọtedo dodo tọn Jehovah tọn lẹ basi hihọ́na mi. Eyin n’ma ko diọ wẹ, n’na ko yin hùhù, kẹdẹdi akotokún-yìntọ-gbẹ́ ṣie hoho delẹ. Owhe he n’yizan to sinsẹ̀nzọn Jehovah tọn mẹ lẹ wẹ hẹn ayajẹ wá na mi hugan to gbẹzan ṣie mẹ.”

MA GBỌJỌ BLO!

Numọtolanmẹ tẹwẹ a lẹndọ mí dona tindo dile mí to tepọn vivọnu titonu ylankan ehe tọn? Flindọ, mí to “dido sọgbe hẹ gbigbọ” bo na “gbẹ̀n ogbẹ̀ madopodo.” Enẹwutu, “mì dike mí gbọjọ to nuhe yin dagbe wiwà mẹ blo, na mí na gbẹ̀n to osaa sisọ mẹ eyin agbọ́ ma pé mí.” (Gal. 6:8, 9) Po alọgọ Jehovah tọn po, mì gbọ mí ni nọ doakọnnanu bo wazọ́n sinsinyẹn nado wleawuna jẹhẹnu he yin dandan nado lùn “nukunbibia daho lọ” tọ́n lẹ bosọ zindonukọn nado to Jehovah sẹ̀n po ayajẹ po, eyin mí tlẹ pehẹ whlepọn lẹ.Osọ. 7:9, 13, 14; Jak. 1:2-4.

Mí sọgan deji dọ mí na mọ ahọsumẹ yí na akọndonanu mítọn, na Jiwheyẹwhe yọ́n azọ́n mítọn gọna owanyi he mí tindo na ewọ podọ na oyín etọn ganji. Eyin mí hẹn ayajẹ mítọn go to sinsẹ̀nzọn Jehovah tọn mẹ, mí na taidi psalm-kantọ Davidi he dọmọ: “Yẹn ko ze OKLUNỌ do nukọn ṣie whepoponu: na e tin to adusi ṣie mẹ wutu, yè ma na diọtẹnna mi. Na enẹwutu wẹ homẹ ṣie hùn, bọ gigo ṣie sọ to ayajẹ; agbasalan ṣie ga nasọ gbọjẹ to gòdenú mẹ.”Ps. 16:8, 9.