Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Atọ̀họ̀-Nuhihọ́ lọ Tọn—Zinjẹgbonu Oplọn Tọn  |  Décembre 2017

Be Jakọbu lẹzun tọgbo Mẹsia lọ tọn de na Esau sà jlọjẹ viplọnji tọn etọn na ẹn wutu wẹ ya?

Kanbiọ lẹ sọn Wehiatọ lẹ Dè

Kanbiọ lẹ sọn Wehiatọ lẹ Dè

To Islaeli hohowhenu tọn, be dandan wẹ dọ sunnu de ni mọ jlọjẹ viplọnji tọn yí whẹpo do yin tọgbo Mẹsia lọ tọn de ya?

To ojlẹ delẹ mẹ, zẹẹmẹ mítọn lẹ ko do mọ hia. E taidi dọ zẹẹmẹ enẹlẹ sọgbe hẹ Heblu lẹ 12:16. Wefọ lọ dọ dọ Esau “ma yọ́n pinpẹn onú wiwe lẹ tọn,” bo “yí núdùdù dopo [na Jakọbu] do diọ jlọjẹ viplọnji tọn etọn.” Po ehe po, e taidi dọ whenue Jakọbu mọ “jlọjẹ viplọnji tọn” yí, ewọ lẹzun dopo to tọgbo Mẹsia lọ tọn lẹ mẹ.—Mat. 1:2, 16; Luku 3:23, 34.

Ṣigba, kandai Biblu tọn lẹ vivọ́ gbeje pọ́n dohia dọ e ma yin dandan dọ sunnu de ni yin viplọnji whẹpo do yin tọgbo Mẹsia lọ tọn de. Lẹnnupọndo kunnudenu delẹ ji:

To visunnu Jakọbu (Islaeli) tọn lẹ mẹ, viplọnji etọn gbọn Lea gblamẹ wẹ Leubẹni. To nukọn mẹ, visunnu tintan he asi yiwanna Jakọbu tọn Laheli ji na ẹn wẹ Josẹfu. Whenue Leubẹni hùwhẹ walọ mawé tọn, jlọjẹ viplọnji tọn lọ wá lẹzun Josẹfu tọn. (Jen. 29:31-35; 30:22-25; 35:22-26; 49:22-26; 1 Otàn. 5:1, 2) Etomọṣo, Mẹsia lọ ma wá sọn hukan whẹndo tọn Leubẹni kavi Josẹfu tọn mẹ gba. Juda, yèdọ visunnu ẹnẹtọ Jakọbu tọn he Lea ji na ẹn gblamẹ wẹ e wá gbọn.—Jen. 49:10.

Luku 3:32 slẹ sunnu atọ́n delẹ he tin to hukan  whẹndo tọn he mẹ Mẹsia lọ wá sọn mẹ. E taidi dọ dopodopo yetọn yin viplọnji de. Di apajlẹ, Boazi ji Obẹdi, mẹhe wá ji Jẹsse.—Luti 4:17, 20-22; 1 Otàn. 2:10-12.

Ṣigba, visunnu Jẹsse tọn Davidi ma yin viplọnji. Ewọ wẹ yin godo tọn to visunnu ṣinatọ̀n lọ lẹ mẹ. Etomọṣo, Mẹsia lọ wá gbọn Davidi gblamẹ. (1 Sam. 16:10, 11; 17:12; Mat. 1:5, 6) Mọdopolọ, hukan whẹndo tọn he bọdego wẹ Sọlomọni tọn, mahopọnna dọ ewọ ma yin viplọnji Davidi tọn.—2 Sam. 3:2-5.

Ehe ma zẹẹmẹdo dọ viplọnji-yinyin ma do otẹn etọn gba. Visunnu plọnji nọ jẹna gbégbò podọ ewọ nọ saba yin nukọntọ whédo lọ tọn he na bọdego. Ewọ sọ wẹ visunnu he na dugu mimá awe nutindo lẹ tọn.—Jen. 43:33; Deut. 21:17; Jọṣ. 17:1.

Ṣigba, jlọjẹ viplọnji tọn sọgan yin didiọ sọn mẹde ji jẹ mẹdevo ji. Ablaham yàn Iṣmaeli bo ze jlọjẹ viplọnji tọn lọ jo na Isaki. (Jen. 21:14-21; 22:2) Podọ dile mí ko dọ do, jlọjẹ viplọnji tọn yin yíyí sọn Leubẹni si bo yin zize na Josẹfu.

Todin, mì gbọ mí ni lẹkọwa Heblu lẹ 12:16 ji, fie mí hia te dọmọ: “Mì payi dọ mẹde he nọ joawuna fẹnnuwiwa zanhẹmẹ tọn kavi mẹdepope he ma yọ́n pinpẹn onú wiwe lẹ tọn taidi Esau, mẹhe yí núdùdù dopo do diọ jlọjẹ viplọnji tọn etọn tin to ṣẹnṣẹn mìtọn blo.” Etẹwẹ yin nuagokun wefọ ehe tọn?

Tofi, apọsteli Paulu ma to hodọ gando hukan whẹndo tọn he mẹ Mẹsia lọ wá sọn go. E ṣẹṣẹ na tuli Klistiani lẹ nado ‘deali jijlọ lẹ na afọ yetọn lẹ’ wẹ. Gbọnmọ dali, yé ma na “gboawupo nado mọ nukundagbe majẹhẹ Jiwheyẹwhe tọn yí,” yèdọ nuhe sọgan jọ eyin yé doalọ to fẹnnuwiwa mẹ. (Heb. 12:12-16) Eyin yé wàmọ, yé na taidi Esau. Ewọ gboawupo nado “yọ́n pinpẹn onú wiwe lẹ tọn,” podọ e joawuna onú agbasalan tọn lẹ.

Esau nọgbẹ̀ to ojlẹ tọgbo lẹ tọn mẹ, podọ e tlẹ sọgan ko tindo lẹblanulọkẹyi lọ nado nọ basi avọ́sinsan lẹ to whedelẹnu taidi yẹwhenọ de na whẹndo etọn. (Jen. 8:20, 21; 12:7, 8; Jobu 1:4, 5) Ṣigba, na Esau tindo ayilinlẹn agọ̀ he sinai do ojlo agbasalan tọn etọn ji wutu, e yí lẹblanulọkẹyi visunnu plọnji tọn etọn lẹ do hòkọ́ na núdùdù agbán dopo poun wutu. E sọgan ko jlo nado dapana yasanamẹ he dọdai dohia dọ e na wá kúnkan Ablaham tọn ji. (Jen. 15:13) Esau sọ dohia dọ ewọ nọ ze ayiha do onú agbasalan tọn lẹ ji bo ma yọ́n pinpẹn onú wiwe lẹ tọn, gbọn yọnnu kosi awe didà dali, ehe hẹn awubla wá na mẹjitọ etọn lẹ. (Jen. 26:34, 35) Lehe ewọ gbọnvona Jakọbu do sọ, mẹhe wà nuhe go e pé lẹpo nado dà sinsẹ̀n-basitọ Jiwheyẹwhe nugbo lọ tọn de!—Jen. 28:6, 7; 29:10-12, 18.

To popolẹpo mẹ, tadona tẹ kọ̀n wẹ mí sọgan wá gando hukan whẹndo tọn he mẹ Jesu, yèdọ Mẹsia lọ wá sọn go? To whedelẹnu, hukan whẹndo tọn enẹ gbọn visunnu plọnji de ji jẹ devo ji—ṣigba e ma yinmọ to whelẹponu. Ju lẹ yọ́n ehe bosọ kẹalọyi i, taidi to whenue yé yigbe dọ Klisti lọ na wá sọn kúnkan Davidi tọn mẹ, yèdọ visunnu godo tọn Jẹsse tọn.—Mat. 22:42.