“Aihọn to jujuyi po ojlo etọn po ga, ṣigba mẹhe wà ojlo Jiwheyẹwhe tọn na gbọṣi aimẹ kakadoi.”1 JOH. 2:17.

OHÀN LẸ: 134, 24

1, 2. (a) Aliho tẹ mẹ wẹ titonu ehe sọgan yin yiyijlẹdo danuwatọ he kú-whẹ̀ yin didá na de go te? (Pọ́n yẹdide he tin to bẹjẹeji hosọ ehe tọn.) (b) Etẹwẹ na yin nuyiwa nudida he tindo nuyọnẹn lẹ tọn gando vasudo titonu ylankan ehe tọn go?

“MẸKÚKÚ WẸ A KO YIN DOTE!” Nuhe gàntọ-ṣọ́tọ delẹ to didọ to whenue yé plan danuwatọ akonka de tọ́n sọn gànhọ he mẹ e yin súsúdo niyẹn. Naegbọn yé do to mọ dọna ẹn? Gàntọ lọ di mẹhe to gángán to agbasa mẹ; e ma to azọ̀n he nọ hùmẹ de jẹ. Amọ́, hùhùtẹn wẹ gàntọ-ṣọ́tọ lọ lẹ plan ẹn jei. Na kú-whẹ̀ ko yin didá na danuwatọ lọ wutu, e taidi mẹhe ko kú dote. *

2 To aliho de mẹ, titonu ehe taidi dawe enẹ he to kú-liho ji. Kú-whẹ̀ ko yin didá na aihọn ylankan ehe sọn ojlẹ dindẹn bọ vasudo etọn ko to yakẹ. Biblu dọmọ: “Aihọn to jujuyi.” (1 Joh. 2:17) Vasudo titonu lọ tọn ma na gblá. Etomọṣo, vogbingbọn daho de tin to vasudo aihọn ehe tọn po hùhù gàntọ enẹ tọn po ṣẹnṣẹn. To gbeegbe yè na hù gàntọ lọ, mẹdelẹ sọgan jẹagọdo whẹdida lọ bo fọ́n ayihaawe dote gandego, kavi donukun dọ mẹhuhu lọ ni yin hùzẹdeji etlẹ yin to nukunwhiwhe godo tọn lẹ mẹ. Amọ́, na nuhe dù aihọn ehe, Nupojipetọ pipé podọ dodonọ wẹkẹ lọ tọn lọsu wẹ  ko dawhẹna ẹn. (Deut. 32:4) Vasudo aihọn ehe tọn ma na yin hùzẹdeji, podọ ayihaawe depope ma na tin dọ owhẹ̀ dodo wẹ yin didá na ẹn. To vasudo aihọn lọ tọn godo, nudida he tindo nuyọnẹn to wẹkẹ lọ mẹ lẹpo na yí ahundopo do kọngbedopọ dọ whẹdida dodo ko yin hinhẹnṣẹ. Kọgbọ nankọ die enẹ na hẹnwa!

3. Onú voovo ẹnẹ he na busẹ to whenue Ahọluduta Jiwheyẹwhe tọn na wá tẹlẹ ji wẹ mí na dọhodo?

3 Ṣigba, etẹwẹ “aihọn” he “to jujuyi” lọ bẹhẹn? Susu nuhe gbẹtọ lẹ nọ saba pọnhlan taidi nuhe na gbọṣi aimẹ kakadoi to aihọn lọ mẹ to egbehe lẹ tọn na juwayi. Be owẹ̀n ylankan de wẹ enẹ ya? Paali! Na nugbo tọn, adà titengbe “wẹndagbe Ahọluduta lọ tọn” de wẹ. (Mat. 24:14) Enẹwutu, mì gbọ mí ni na ayidonugo nuhe na busẹ to whenue Ahọluduta Jiwheyẹwhe tọn na wá lẹ. Mí na dọhodo adà titengbe ẹnẹ ji: mẹylankan lẹ, titobasinanu he nọ hòmẹdu lẹ, walọyizan ylankan lẹ po ninọmẹ ayimajai tọn lẹ po. To whẹho dopodopo mẹ, mí na gbadopọnna (1) lehe adà gbẹzan tọn enẹlẹ nọ yinuwado mí ji do to egbehe, (2) nuhe Jehovah na wà na yé, podọ (3) lehe ewọ na yí onú dagbedagbe lẹ do diọtẹnna yé do.

MẸYLANKAN LẸ

4. Aliho tẹlẹ mẹ wẹ mẹylankan lẹ nọ yinuwado mí ji te to egbehe?

4 Nawẹ mẹylankan lẹ nọ yinuwado mí ji to egbehe gbọn? To whenue apọsteli Paulu dọ dọdai dọ to ojlẹ mítọn mẹ “ojlẹ awusinyẹn tọn he vẹawu nado pehẹ lẹ” na wá godo, e wlan to gbọdo glọ dọmọ: “Mẹylankan lẹ po mẹblutọ lẹ po na to yinylan deji dogọ.” (2 Tim. 3:1-5, 13) Be a doayi e go dọ dọdai enẹlẹ ko mọ hẹndi ya? Susu to mí mẹ wẹ ko jiya to alọ mẹylankan lẹ tọn mẹ pọ́n, yèdọ nukunvandomẹtọ he nọ wà danú lẹ, hẹngogonọ he nọ gbẹwannamẹ lẹ po kanylantọ akonka lẹ po. Delẹ to mẹylankan ehelẹ mẹ ma nọ whlá nuhe yé yin; mẹdevo lẹ yin mẹblutọ lẹ, he ma nọ do nuhe yé yin hia bo nọ sọawuhia di dodonọ. Eyin mílọsu na míde ma tlẹ ko jiya to alọ danuwatọ enẹlẹ tọn mẹ pọ́n, nuhe yé nọ dósin lẹ ma nọ nọma yinuwado mí ji. E nọ dotukla mí taun eyin mí sè nuylankan he yé to jijlẹ lẹ. Aliho he mẹ mẹylankan lẹ nọ sayana ovi lẹ, mẹhomẹ lẹ po agbátọnọ devo lẹ po te nọ dobuna mí taun. Yé nọ do gbigbọ kanlinjọmẹ tọn podọ etlẹ yin aovi lẹ tọn nkọ hia. (Jak. 3:15) Mí dopẹ́ dọ Ohó Jehovah tọn bẹ owẹ̀n dagbe lẹ hẹn he gbọnvo taun na owẹ̀n ylankan enẹlẹ.

5. (a) Dotẹnmẹ tẹwẹ gbẹ́ hundote na mẹylankan lẹ? (b) Etẹwẹ na yin kọdetọn mẹylankan he gbẹ́ nado diọ lẹ tọn?

5 Etẹwẹ Jehovah na wà? To alọnu din, Jehovah to dotẹnmẹ hundote na mẹylankan lẹ nado lẹnvọjọ. (Isa. 55:7) Ewọ ma ko dawhẹ godo tọn na dopodopo yetọn. Mẹylankan lẹ to pọmẹ wẹ ewọ dawhẹna. Ṣigba, etẹwẹ dogbọn gbẹtọvi he gbẹ́ nado diọ lẹ dali, yèdọ mẹhe zindonukọn nado to godonọna titonu ehe kakajẹ nukunbibia daho lọ whenu lẹ? Jehovah dopà nado sukúndona mẹylankan lẹ sọn aigba ji mlẹnmlẹn. (Hia Salmu lẹ 37:10.) Mẹylankan lẹ sọgan lẹndọ whẹdida mọnkọtọn ma na gando emi go. To aihọn ehe mẹ, mẹsusu ko plọn nado nọ whlá jijọ yetọn lẹ, podọ yé nọ saba duto whẹdida lẹ ji bo ma nọ jiya kọdetọn nuyiwa yetọn lẹ tọn. (Jobu 21:7, 9) Ṣigba, Biblu flinnu mí dọmọ: “Nukun Jiwheyẹwhe tọn lẹ tin to aliho gbẹtọ tọn lẹ ji, ewọ sọ nọ mọ afọdide etọn lẹpo. Zinvlu gọ́ngọ́n kavi titli de ma tin fie ylanwatọ lẹ sọgan whlá yede do.” (Jobu 34:21, 22) Fiwhiwhlá de ma tin he Jehovah Jiwheyẹwhe ma gán mọnú jẹ. Mẹblutọ de ma sọgan flu i; mọ zinvlu gọ́ngọ́n kavi titli de ma sọgan ṣinyọnyẹ whẹho de ji sọmọ bọ huhlọn madodogbó Jiwheyẹwhe tọn ma na mọnukunnujẹemẹ kitokito. To Amagẹdọni godo,  mí na pọ́n fihe mẹylankan lẹ nọ saba nọ̀, ṣigba mí ma na mọ yé. Yé na busẹ kakadoi!—Salm. 37:12-15.

6. Mẹnu lẹ wẹ na pò to whenue mẹylankan lẹ na busẹ, podọ naegbọn enẹ do yin wẹndagbe de?

6 Mẹnu lẹ wẹ na pò to whenue mẹylankan lẹ na busẹ? Jehovah dopagbe homẹmiọnnamẹ tọn ehe dọmọ: “Homẹmimiọnnọ lẹ wẹ na dugu aigba tọn, yé nasọ nọ mọ awuvivi susu to jijọho susugege mẹ.” To salmu dopolọ mẹ, mí hia dọmọ: “Dodonọ lẹ wẹ na dugu aigba tọn, yé nasọ nọgbẹ̀ to e ji kakadoi.” (Salm. 37:11, 29) Mẹnu wẹ yin “homẹmimiọnnọ lẹ,” podọ mẹnu wẹ yin “dodonọ lẹ”? Homẹmimiọnnọ lẹ wẹ mẹhe nọ gbọn whiwhẹ dali kẹalọyi nuplọnmẹ po anademẹ Jehovah tọn po lẹ; dodonọ lẹ wẹ mẹhe yiwanna nado nọ wà nuhe jlọ to nukun Jehovah Jiwheyẹwhe tọn mẹ lẹ. To egbehe, mẹhe nọ wà nuylankan lẹ wẹ sù taun hú dodonọ lẹ. Ṣigba to aihọn yọyọ he ja lọ mẹ, nuyijlẹdonugo enẹ ma nasọ tin ba, na homẹmimiọnnọ lẹ po dodonọ lẹ po kẹdẹ wẹ na tin. Na nugbo tọn, omẹ mọnkọtọn lẹ na hẹn aigba lọ zun paladisi de!

TITOBASINANU HE NỌ HÒMẸDU LẸ

7. Nawẹ titobasinanu he nọ hòmẹdu lẹ nọ yinuwado mí ji to egbehe gbọn?

7 Nawẹ titobasinanu he nọ hòmẹdu lẹ nọ yinuwado mí ji to egbehe gbọn? Suhugan nuylankan he nọ jọ to aihọn lọ mẹ lẹ tọn wẹ nọ yin nuyiwa titobasinanu lẹ tọn, e ma nọ yin nuyiwa mẹdopo poun tọn. Di apajlẹ, lẹnnupọndo sinsẹ̀n voovo lẹ ji he nọ dolalo na gbẹtọ livi susu lẹ gando mẹhe Jiwheyẹwhe yin, nugbo-yinyin Biblu tọn, sọgodo aigba po gbẹtọvi lẹ po tọn gọna whẹho susu devo lẹ go. Kavi sọ lẹnnupọndo gandudu he nọ nọgodona awhàn po danuwiwa akọ̀ ṣinṣinyan tọn lẹ po ji, ehe nọ gbidikọna wamọnọ po agbátọnọ lẹ po bo nọ yialọ na alọgodo-kuẹ yíyí po mẹnukuntahihopọn po. Podọ etẹwẹ dogbọn ajọwhé ṣejannabinọ lẹ dali he nọ hẹn lẹdo lẹ flu, bo nọ zan adọkunnu jọwamọ tọn lẹ do apà mẹ, bosọ nọ kọtọ́ ahisinọ homẹvọnọ lẹ nado hẹn omẹ vude jẹ adọkun to whenuena gbẹtọ livi susu lẹ to ahidi hẹ ohẹ́n? E họnwun dọ gandudu mẹhodutọ lẹ wẹ nọ hẹn suhugan oyà he gbẹtọ lẹ nọ ji to egbehe lẹ tọn wá.

8. Sọgbe hẹ nuhe Biblu dọ, etẹwẹ na jọ do titobasinanu he gbẹtọvi lẹ nọ pọnhlan di nuhe hẹnai to egbehe lẹ go?

8 Etẹwẹ Jehovah na wà? Nukunbibia daho lọ na bẹjẹeji to whenue tonudọtọ lẹ na diọnukunsọ galọtọ lọ he nọtena sinsẹ̀n lalo lẹpo to pọmẹ, yèdọ Babilọni Daho lọ. (Osọ. 17:1, 2, 16; 18:1-4) Pipli sinsẹ̀n lẹ tọn enẹ na yin vivasudo mlẹnmlẹn. Ṣigba, etẹwẹ na jọ do titobasinanu mẹhodutọ he pò lẹpo go? Biblu nọ yí osó po lopo lẹ po zan nado dlẹnalọdo suhugan titobasinanu he gbẹtọvi lẹ zedai tọn, ehe to pọndohlan gbẹtọ tọn mẹ nọ taidi nuhe hẹnai lẹ. (Hia Osọhia 6:14.) Ohó Jiwheyẹwhe tọn dọ dọdai dọ gandudu lẹ po titobasinanu he nọ wazọ́n dopọ hẹ yé lẹ po na yin adọ̀họ̀nna. Nukunbibia daho lọ na gbajẹgbonu bo na và gandudu aihọn ehe tọn lẹ gọna mẹhe nọ nọgodona yé nado jẹagọdo Ahọluduta Jiwheyẹwhe tọn lẹ sudo. (Jel. 25:31-33) To whenẹnu, titobasinanu mẹhodutọ depope ma nasọ tin ba!

9. Naegbọn mí sọgan kudeji dọ aigba yọyọ lọ na yin tito-basina ganji?

9 Etẹwẹ na diọtẹnna titobasinanu he nọ hòmẹdu lẹ? To Amagẹdọni godo, be titobasinanu de na gbẹ́ pò to aigba ji ya? Biblu dọna mí dọmọ: “Kẹdẹdi opagbe etọn, olọn yọyọ lẹ po aigba yọyọ de po tin he míwlẹ to tenọpọn, podọ ofi ehelẹ wẹ dodowiwa na nọ nọ̀.” (2 Pita 3:13) Olọn hoho lẹ po aigba hoho lọ po, enẹ wẹ gandudu he nọ hòmẹdu lẹ po ogbẹ́ gbẹtọvi tọn he to anademẹ yetọn glọ lẹ po na busẹ. Etẹwẹ na diọtẹnna yé? Hodidọ lọ “olọn yọyọ lẹ po aigba yọyọ de po” dohia dọ  gandudu yọyọ de na tin gọna ogbẹ́ gbẹtọvi tọn yọyọ de he na nọ anademẹ gandudu enẹ tọn glọ. Ahọluduta he Jesu Klisti na deanana lọ na do titojininọ Jehovah Jiwheyẹwhe tọn hia to gigọ́ mẹ. (1 Kọl. 14:33) Gbọnmọ dali, “aigba yọyọ” lọ na yin tito-basina. Sunnu nugopetọ lẹ na tin nado penukundo whẹho lẹ go. (Salm. 45:16) Yé na yin anadena gbọn Klisti po gandutọgbẹ́ etọn 144 000 lẹ po dali. Yí nukun homẹ tọn do pọ́n ojlẹ he mẹ titobasinanu dopo gee he ma nọ hòmẹdu de, ehe mẹ kinklan ma tin te na diọtẹnna titobasinanu he nọ hòmẹdu lẹpo te!

WALỌYIZAN YLANKAN LẸ

10. Wunmẹ walọyizan ylankan tọn tẹlẹ wẹ gbayipe to lẹdo towe mẹ, podọ nawẹ yé yinuwado hiẹ po whẹndo towe po ji gbọn?

10 Nawẹ walọyizan ylankan lẹ nọ yinuwado mí ji to egbehe gbọn? Mí to gbẹnọ to aihọn he gọ́ na walọ ylankan lẹ de mẹ. Fẹnnuwiwa, nugbomadọ po danuwiwa po wẹ dibla gọ́ titonu ehe mẹ. Na taun tọn, mẹjitọ lẹ nọ saba jẹtukla taun nado basi hihọ́na ovi yetọn lẹ sọn walọyizan ylankan mọnkọtọn lẹ si. Ajọwhé he nọ wleawuna ayidedai lẹ nọ zan wlẹnwin voovo nado doaṣọ́na walọyizan ylankan lẹ bo nọ gbọnmọ dali yí nujinọtedo dagbe po oylan po tọn Jehovah tọn lẹ do davlẹ. (Isa. 5:20) Klistiani nugbo lẹ nọ payi ma nado jai jẹ omọ̀ enẹ mẹ. Yé nọ dovivẹnu nado hẹn tenọgli yetọn go to aihọn he nọ de yẹyi sọn nujinọtedo Jehovah tọn lẹ go ehe mẹ.

11. Etẹwẹ whẹdida he Jehovah hẹnṣẹ do Sodọmi po Gomọla po ji plọn mí?

11 Etẹwẹ Jehovah na wà gando walọyizan ylankan lẹ go? Lẹnnupọndo nuhe e wà gando walọ ylankan he gbayipe to Sodọmi po Gomọla po go ji. (Hia 2 Pita 2:6-8.) Nuylankan he to jijọ lẹdo dawe dodonọ lọ Lọti po whẹndo etọn po lẹpo dotukla ẹ tlala. To whenue Jehovah và agbegbe lọ blebu sudo, e ma wàmọ nado hẹn opodo wá na nuylankan he to jijọ to finẹ lẹ poun gba. Ewọ “ze ohia nuhe na wá jọ lẹ tọn de dai na omẹ jijọ-madi-Jiwheyẹwhe tọn lẹ.” Dile Jehovah hẹn walọ fẹnnuwiwa tọn whenẹnu tọn lẹ wá opodo do, mọkẹdẹ wẹ ewọ na hẹn nuylankan mọnkọtọn he tin to egbehe lẹ wá opodo do to whenue e na hẹn whẹdida ṣẹ do titonu ehe ji.

12. Etẹwẹ yin delẹ to nuhe a to nukundo nado wà to whenue titonu hoho ehe na ko busẹ lẹ mẹ?

12 Etẹwẹ na diọtẹnna walọyizan ylankan lẹ? Paladisi aigba ji tọn lọ na gọ́ na nuwiwa ayajẹ tọn lẹ. Pọ́n lehe mí na gọ́ na ayajẹ do dile mí na to azọ́nwa nado diọ planẹti lọ zun paladisi de kavi to azọ́nwa nado gbá owhé mítọn po mẹyiwanna mítọn lẹ tọn po. Lẹnnupọndo todido he mí tindo nado dokuavọna gbẹtọ livi susu he na fọnsọnku lẹ, podọ nado gọalọna yé nado plọnnu gando aliho Jehovah tọn lẹ po lehe ewọ yinuwa hẹ gbẹtọvi lẹ to whenuho mẹ do po go ji. (Isa. 65:21, 22; Owalọ 24:15) Gbẹzan mítọn na gọ́ na nuwiwa he na yidogọna ayajẹ mítọn bo hẹn pipà wá na Jehovah lẹ!

NINỌMẸ AYIMAJAI TỌN LẸ

13. Ninọmẹ ayimajai tọn tẹlẹ wẹ atẹṣiṣi Satani gọna Adam po Evi po tọn hẹnwa aihọn mẹ to egbehe?

13 Nawẹ ninọmẹ ayimajai tọn lẹ nọ yinuwado mí ji to egbehe gbọn? Mẹylankan lẹ, titobasinanu he nọ hòmẹdu lẹ po walọyizan ylankan lẹ po to pọmẹ wẹ yin adọ̀ ninọmẹ ayimajai tọn he mí nọ pehẹ to egbehe lẹ tọn. Mẹnu to mí mẹ wẹ sọgan sọalọakọ́n dọ awhàn, ohẹ́n kavi akọ̀ ṣinṣinyan ma nọ yinuwado emi ji? Podọ etẹwẹ dogbọn azọ̀n po okú po dali? Mímẹpo ji wẹ ninọmẹ ehelẹ nọ yinuwado. Atẹṣiṣi mẹylankan atọ̀n delẹ, yèdọ Satani, Adam po Evi po tọn sọta Jehovah wẹ dekọtọn do ninọmẹ ehelẹ mẹ. To alọnu din, depope to mí mẹ ma sọgan dapana nugbajẹmẹji he atẹṣiṣi yetọn hẹnwa.

14. Etẹwẹ Jehovah na wà gando ninọmẹ ayimajai tọn lẹ go? Na apajlẹ de.

 14 Etẹwẹ Jehovah na wà gando ninọmẹ ayimajai tọn lẹ go? Lẹnnupọndo awhàn ji. Jehovah dopà nado hẹn awhàn wá opodo kakadoi. (Hia Salmu lẹ 46:8, 9.) Bọ azọ̀n lo? Ewọ na sukúndona ẹn. (Isa. 33:24) Bọ okú lo? Jehovah na ze e mì kakadoi! (Isa. 25:8) Ewọ na de ohẹ́n sẹ̀ mlẹnmlẹn. (Salm. 72:12-16) Nudopolọ wẹ ewọ na wà gando ninọmẹ ayimajai tọn devo he nọ hẹn gbẹninọ vẹawu to egbehe lẹpo go. Ewọ na tlẹ doalọtena “jẹhọn” ylankan titonu ehe tọn, na gbigbọ ylankan Satani po aovi etọn lẹ po tọn na busẹ mlẹnmlẹn wutu.—Efe. 2:2.

Yí nukun homẹ tọn do pọ́n aihọn de he mẹ awhàn, azọ̀n kavi okú ma tin te ba! (Pọ́n hukan 15tọ)

15. Etẹwẹ yin delẹ to onú he na busẹ kakadoi to Amagẹdọni godo lẹ mẹ?

15 Yí nukun homẹ tọn do pọ́n aihọn de he mẹ awhàn, azọ̀n kavi okú ma na tin te! Mí ni dọ dọ awhànfuntọ lẹ masọ tin ba, vlavo awhànfuntọ aigba ji tọn lẹ, tọji tọn lẹ, kavi he nọ zan agahun lẹ! Awhànfunnu lẹ kavi nudepope he sọgan hẹnmẹ flin awhàn lẹ ma nasọ tin ba. Dotowhé lẹ, doto lẹ po nukunpedomẹgotọ dotowhé tọn lẹ po kavi tito alọgọ mimọyi na owù-nujijọ agbasalilo tọn; glasé-họ̀ oṣiọ lẹ tọn, mẹhe nọ penukundo oṣiọ lẹ go po tẹpa lẹ po ma nasọ tin ba! Podọ na danuwiwa na ko busẹ wutu, azọ́nwhé hihọ́-basinamẹtọ lẹ tọn de ma nasọ tin ba, zomọ avase ninamẹ tọn (alarme) ma na tin, ponọ lẹ ma na tin podọ e yọnbasi dọ mẹde ma nasọ nọ dogàn ohọ̀n ji ba! Lẹnnupọndo magbọjẹ he si mí na vò sọn enẹ lẹpo ji.

16, 17. (a) Etẹlẹ si wẹ mẹhe na lùn Amagẹdọni tọ́n lẹ na vò sọn? Na apajlẹ de. (b) Nawẹ mí sọgan hẹn ẹn diun dọ mí na gbọṣi aimẹ to whenue aihọn hoho ehe na ko busẹ gbọn?

16 Nawẹ ogbẹ̀ na te to whenue ninọmẹ ylankan lẹ na busẹ? Na taun tọn, e na vẹawu nado dọ. Mí ko nọ aihọn hoho ehe mẹ sọmọ bọ mí sọgan nọma sọ nọ doayi obá he mẹ ninọmẹ aihọn ehe tọn lẹ ko yinuwado mí ji jẹ mẹ. Mọdopolọ, mẹhe to owhé he sẹpọ pinpán-glintẹn de gbè lẹ sọgan nọma sọ nọ doayi nudidọ pinpán tọn go ba, podọ mẹhe nọ nọ̀ fie sẹpọ ogbóji lẹ sọgan nọma sọ nọ doayi e go dọ nude to wánlùn ba. Amọ́, ayajẹnu daho wẹ e na yin to whenue ninọmẹ ylankan ehe lẹpo na busẹ!

17 Etẹwẹ na diọtẹnna kọgbidinamẹnu he mí nọ pehẹ to egbehe lẹ? Salmu lẹ 37:11 na gblọndo dọmọ: “Yé nasọ nọ mọ awuvivi susu to jijọho susugege mẹ.” Be hogbe enẹlẹ ma yinuwado ji we ya? Nuhe Jehovah jlo na we niyẹn. Enẹwutu, nọ wà nuhe go a pé lẹpo nado dọnsẹpọ Jehovah Jiwheyẹwhe bo tẹdo titobasinanu etọn go to azán godo tọn he vẹawu ehelẹ mẹ! Wlebòna todido towe, nọ lẹnayihamẹpọn do e ji, gbọ ni yin nujọnu to ahun towe mẹ—podọ nọ dọhodeji hẹ mẹdevo lẹ whẹwhẹ! (1 Tim. 4:15, 16; 1 Pita 3:15) Gbọnmọ dali, a sọgan hẹn ẹn diun dọ a ma na juwayi po aihọn hoho he ko yin whẹdana ehe lọ po. Kakatimọ, a na gbọṣi aimẹ—bo na nọgbẹ̀ to ayajẹ mẹ—kakadoi!

^ huk. 1 Hukan ehe basi zẹẹmẹ nuhe nọ saba jọ do gàntọ de go to owhe delẹ die wayi tọn to awà delẹ ji to États-Unis.