Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Atọ̀họ̀-Nuhihọ́ lọ Tọn—Zinjẹgbonu Oplọn Tọn  |  Avril 2016

Kanbiọ lẹ sọn Wehiatọ lẹ Dè

Kanbiọ lẹ sọn Wehiatọ lẹ Dè

Etẹwẹ yin “ohia” lọ po “hiadonu” lọ po he Klistiani yiamisisadode dopodopo nọ mọyi sọn Jiwheyẹwhe dè?—2 Kọl. 1:21, 22; nudọnamẹ odò tọn.

To hohowhenu, alọkẹ hiadonu tọn de nọ yin yinylọ́n do okò kavi osẹ̀n pinpẹn mẹ bo nọ yin zínzín do owe de ji nado dohia dọ yè sọgan dejido owe lọ go

Ohia: Sọgbe hẹ owe alọdlẹndonu tọn de, hogbe Glẹki tọn he yin lilẹdo “ohia” to 2 Kọlintinu lẹ 1:22 mẹ yin “hogbe de he nọ yin yiyizan to osẹ́n-liho podọ to ajọwiwa-liho,” ehe zẹẹmẹdo “afàsúnú, akuẹ he yin súsú to tintan whenu, akuẹ he yin súsú sọn akuẹ nuhe jlo na yin hihọ̀ de tọn mẹ, podọ ehe nọ yin jidenamẹnu de to osẹ́n-liho gando nuhe jlo na yin hihọ̀ lọ go, kavi ehe nọ dohia dọ gbekọndopọ de yin hinhẹn lodo.” To whẹho mẹyiamisisadode lẹ tọn mẹ, owe 2 Kọlintinu lẹ 5:1-5 basi zẹẹmẹ dọ, akuẹ he na yin súsú lọ blebu kavi ahọsumẹ lọ bẹ agbasa olọn mẹ tọn he ma nọ gble de zizedo hẹn. Ahọsumẹ lọ sọ bẹ nunina jọmaku tọn mimọyi hẹn ga.—1 Kọl. 15:48-54.

To Glẹkigbe egbezangbe tọn mẹ, hodidọ de he tindo zẹẹmẹ dopolọ nọ yin yiyizan na alọkẹ he yè do nọ dopà na mẹde dọ emi na wlealọ hẹ ẹ. Nuyijlẹdonugo ehe sọgbe na mẹhe na wá lẹzun dopo to hagbẹ asi yẹhiadonu tọn Klisti tọn lẹ mẹ.—2 Kọl. 11:2; Osọ. 21:2, 9.

Hiadonu: To hohowhenu, hiadonu nọ yin yiyizan taidi kunnudenu dolido de nado do mẹhe tindo nude hia, nado dohia dọ nude sọgbe, kavi nado do gbekọndopọ hia. To whẹho mẹyiamisisadode lẹ tọn mẹ, yé nọ yin ‘hiadogona’ gbọn gbigbọ wiwe dali bo nọ lẹzun nutindo Jiwheyẹwhe tọn. (Efe. 1:13, 14) Ṣigba, hiadonu ehe ma nọ yin tẹgbẹ tọn kakajẹ ojlẹ de mẹ jẹnukọnna whenue mẹlọ kú po nugbonọ-yinyin po kavi kakajẹ ojlẹ de mẹ jẹnukọnna bẹjẹeji nukunbibia daho lọ tọn.—Efe. 4:30; Osọ. 7:2-4.