Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

ATỌ̀HỌ̀-NUHIHỌ́ LỌ TỌN (ZINJẸGBONU OPLỌN TỌN) AVRIL 2016

Be Lizọnyizọn Towe Taidi Ahun Ya?

Be Lizọnyizọn Towe Taidi Ahun Ya?

LIZỌNYIZỌN mítọn yin nujọnu podọ nuhọakuẹ de. Ṣigba, e ma yin mẹhe mí nọ dọyẹwheho na lẹpo wẹ nọ yọ́n pinpẹn etọn. To whedelẹnu, eyin gbẹtọ lẹ tlẹ do ojlo hia to owẹ̀n Biblu tọn mẹ, yé sọgan nọma mọdọ nujọnu wẹ e yin nado plọn Ohó Jiwheyẹwhe tọn hẹ mí.

Ehe yin nugbo to whẹho Gavin tọn mẹ, yèdọ mẹhe nọ yì opli agun tọn lẹ bo ma ka yigbe dọ yè ni plọn Biblu hẹ emi. E dọmọ: “Oyọnẹn vude wẹ n’tindo gando Owe-wiwe lẹ go, podọ n’nọ whleawu nado do oyọnẹn matindo ṣie hia. N’nọ hanú dọ n’sọgan yin kiklọ podọ n’ma jlo na dota e mẹ.” Etẹwẹ a lẹn? Be e yọnbasi dọ Gavin ni kẹalọyi nugbo ya? Mọwẹ! Lẹnnupọndo nuyiwadomẹji dagbe he nuplọnmẹ Biblu tọn lẹ sọgan tindo do mẹde ji. Jehovah dọna omẹ etọn lẹ to hohowhenu dọmọ: “Ohó ṣie lẹ na kùn di ahun, yèdọ di jikun ṣẹ́nṣẹ́n do ogbé lẹ ji.” (Deut. 31:19, 30; 32:2) Nuyiwa ahun tọn delẹ do lehe mí sọgan tindo kọdetọn dagbe to alọgigọna gbẹtọ wunmẹ lẹpo to lizọnyizọn mítọn mẹ do hia ganji.—1 Tim. 2:3, 4.

 LIZỌNYIZỌN LỌ TAIDI AHUN—GBỌNNA?

Ahun nọ ja dẹẹdẹ. Ahun nọ yin awuwlena vudevude to whenue azọ̀ he bẹ osin hẹn to agahomẹ lẹ to didiọ zun kùnkùn osin tọn. Ohó Jehovah tọn lẹ “kùn di ahun,” na e yí homẹdagbe, dẹdẹwiwa po mẹtọnhopọn po do dọhona omẹ etọn lẹ wutu. Mí nọ hodo apajlẹ etọn to whenue mí na sisi pọndohlan he mẹdevo lẹ tindo. Mí nọ na tuli gbẹtọ lẹ nado lẹnnupọn bo wá tadona lẹ kọ̀n na yede. To whenue mí do sisi mọnkọtọn hia, e nọ bọawuna gbẹtọ lẹ nado kẹalọyi ohó mítọn lẹ podọ lizọnyizọn mítọn nọ tindo kọdetọn dagbe dogọ.

Ahun nọ hẹn ogbé lẹ fá. Lizọnyizọn mítọn nọ fakọna mẹdevo lẹ to whenue mí lẹnnupọndo aliho dagbe hugan he mẹ mí na doafọna ojlo yetọn lẹ te ji. Gavin, he go mí donù wayi, ma yin kọgbidina nado kẹalọyi plọnmẹ Biblu de. Kakatimọ, Chris, yèdọ mẹmẹsunnu he dọnsẹpọ ẹ to tintan whenu, lẹnnupọndo aliho voovo lẹ ji nado hẹn Gavin voawu dogọ gando Biblu pinplọn go. Chris basi zẹẹmẹ na Gavin dọ Biblu tindo hosọ de, podọ enẹ yinyọnẹn na gọalọna ẹn nado nọ mọnukunnujẹ opli he e nọ yì lẹ mẹ ganji. Enẹgodo, Chris dọna ẹn dọ dọdai Biblu tọn lẹ wẹ hẹn emi kudeji dọ Biblu yin nugbo. Ehe dekọtọn do hodọdopọ susu gando hẹndi dọdai lẹ tọn go mẹ. Hodọdopọ ehelẹ fakọna Gavin bọ e kẹalọyi plọnmẹ Biblu de to godo mẹ.

Ahun nọ hẹn ogbẹ̀ dote. To aigba Islaeli tọn ji, ojlẹ yozò po akúdido tọn po nọ tin, ehe whenu jikun sọgan nọma ja na osun susu. Matin fifá ahun tọn, ogbé po atin lẹ po sọgan hú bo kú. Akúdido gbigbọmẹ tọn de tin to egbehe dile Jehovah dọ dọdai etọn do. (Amọ. 8:11) Ewọ dopagbe dọ wẹndagbe-jlatọ yiamisisadode lẹ na “taidi ahun he to jijà sọn Jehovah dè” dile yé to owẹ̀n Ahọluduta lọ tọn lá po godonọnamẹ gbẹdohẹmẹtọ yetọn lẹ tọn po, enẹ wẹ “lẹngbọ devo lẹ.” (Mika 5:7; Joh. 10:16) Be mí nọ pọ́n owẹ̀n yẹwheho wẹndagbe Ahọluduta lọ tọn he lá mí te hlan taidi dopo to awuwledainanu họakuẹ Jehovah tọn he nọ fakọnamẹ to gbigbọ-liho bo nọ hẹn ogbẹ̀ dote lẹ mẹ ya?

Ahun yin dona de sọn Jehovah dè. (Deut. 33:13) Lizọnyizọn mítọn sọgan yin dona de na mẹhe kẹalọyi i lẹ. Gavin mọ dona mọnkọtọn yí. Gbọn Biblu pinplọn dali, e mọ gblọndo na kanbiọ etọn lẹpo. E yawu basi nukọnyiyi jẹ baptẹm kọ̀n, podọ todin, homẹ ewọ po asi etọn Joyce po tọn nọ hùn nado tindo mahẹ gigọ́ to yẹwheho wẹndagbe Ahọluduta lọ tọn didọ mẹ.

Kunnudetọ Jehovah tọn lẹ to owẹ̀n Ahọluduta lọ tọn lá gbọn aigba lọ blebu ji

NỌ YLỌ LIZỌNYIZỌN TOWE DỌ NUJỌNU

Nulinlẹnpọn do ahun ji sọ sọgan whàn mí nado yí nukun nujọnu tọn do pọ́n mahẹ he dopodopo mítọn nọ tindo to lizọnyizọn lọ mẹ. Gbọnna? Kùnkùn ahun tọn dopo ma nọ wanu kaka de, ṣigba kùnkùn ahun tọn livi susu to pọmẹ nọ zọ́n bọ aigba nọ fá bo nọ yọ̀n. Mọdopolọ, mahẹ he dopodopo mítọn nọ tindo to lizọnyizọn lọ mẹ sọgan taidi onú pẹvi taun to nukun mítọn mẹ. Etomọṣo, eyin yè hò vivẹnudido lizọnyizọnwatọ Jehovah tọn he nọ ze yede jo sọn ojlo mẹ wá lẹpo tọn dopọ, enẹ nọ dekọtọn do okunnu de mẹ “na akọta lẹpo.” (Mat. 24:14) Be lizọnyizọn mítọn na yin dona de sọn Jehovah dè na mẹdevo lẹ ya? E na yinmọ eyin owẹ̀n mítọn taidi ahun, enẹ wẹ yindọ e nọ yin lilá po dẹdẹwiwa po, nọ fakọnamẹ, bosọ nọ hẹn ogbẹ̀ dote!