Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Atọ̀họ̀-Nuhihọ́ lọ Tọn—Zinjẹgbonu Oplọn Tọn  |  Août 2017

Kanbiọ lẹ sọn Wehiatọ lẹ Dè

Kanbiọ lẹ sọn Wehiatọ lẹ Dè

Naegbọn kandai he Matiu basi gando ovu whenu Jesu tọn go do gbọnvona dehe Luku basi?

Kandai Matiu tọn gando jiji Jesu tọn po ovu whenu etọn po go gbọnvo yẹẹ de na kandai Luku tọn, na adà voovo otàn lọ tọn lẹ ji wẹ Wẹndagbe-kantọ lọ lẹ ze ayidonugo do wutu.

To kandai etọn mẹ, Matiu na ayidonugo nujijọ he mẹ Josẹfu sọawuhia te lẹ. E basi zẹẹmẹ lehe Josẹfu yinuwa do tlolo he e sè dọ Malia to ohò, odlọ he e kú bọ angẹli de to zẹẹmẹ ninọmẹ lọ tọn basina ẹn, po lehe e kẹalọyi zẹẹmẹ enẹ do po tọn. (Mat. 1:19-25) Matiu sọ dọho gando odlọ he Josẹfu kú bọ angẹli de biọ to e si nado yawu họnyi Egipti go, lehe e họnyi po whẹndo etọn po do, odlọ he e kú bọ angẹli de dọna ẹn nado lẹkọyi aigba Islaeli tọn ji, kọlilẹ etọn, gọna nudide etọn nado sawhé do Nazalẹti po whẹndo etọn po. (Mat. 2:13, 14, 19-23) To weta he jẹnukọn lẹ mẹ to Wẹndagbe Matiu tọn mẹ, yinkọ Josẹfu tọn yin nùdego whla ṣinatọ̀n, ṣigba Malia tọn whla ẹnẹ poun.

To vogbingbọn mẹ, kandai Luku tọn na ayidonugo Malia hugan. E dọhodo dlapọn angẹli Gabliẹli tọn yì Malia dè, dlapọn Malia tọn yì hẹnnumẹ etọn Elizabẹti dè, po lehe Malia pà Jehovah do po ji. (Luku 1:26-56) Luku sọ donù hodidọ Simeoni tọn hlan Malia go gando oyà he Jesu na ji to nukọn mẹ lẹ go. Etlẹ yin to kandai he gando dlapọn whẹndo lọ tọn yì tẹmpli mẹ lẹ go mẹ to whenue Jesu tindo owhe 12, nuhe Malia dọ lẹ wẹ Luku wlan dai, e ma yin Josẹfu tọn lẹ. Luku yidogọ dọ nujijọ enẹ lẹpo yinuwado Malia ji sisosiso. (Luku 2:19, 34, 35, 48, 51) To weta awe he jẹnukọn to Wẹndagbe Luku tọn mẹ lẹ mẹ, yinkọ Malia tọn yin nùdego whla 12, ṣigba Josẹfu tọn whla 3 poun. Enẹwutu, mí mọdọ Matiu basi zẹẹmẹ nuhe gando Josẹfu po nuwiwa etọn lẹ po go tọn, bọ Luku basi zẹẹmẹ susu do azọngban po numimọ Malia tọn lẹ po ji.

Mọdopolọ, hukan whẹndo tọn he go Wẹndagbe-kantọ awe lọ lẹ donù lẹ gbọnvo. Matiu donù tọgbo Josẹfu tọn lẹ go, bo dohia dọ taidi visunnu sọdodovi Josẹfu tọn, Jesu wẹ yin whédutọ sọgbe hẹ osẹ́n na gandudu Davidi tọn. Gbọnna? Na kúnkan Ahọlu Davidi tọn mẹ wẹ Josẹfu wá sọn gbọn visunnu Davidi tọn Sọlomọni gblamẹ. (Mat. 1:6, 16) Ṣigba, Luku slẹ tọgbo Malia tọn lẹ, bo dohia dọ Jesu wẹ yin whédutọ he sọgbe to jọwamọ-liho lọ, yèdọ “to agbasa-liho” na gandudu Davidi tọn. (Lom. 1:3) Gbọnna? Na kúnkan Ahọlu Davidi tọn mẹ wẹ Malia wá sọn gbọn visunnu Davidi tọn Natani gblamẹ. (Luku 3:31) Ṣigba, naegbọn Luku ma slẹ Malia to hukan whẹndo tọn lọ mẹ taidi viyọnnu Heli, otọ́ etọn tọn? Na sunnu lẹ wẹ nọ saba yin sislẹ to hukan whẹndo tọn he yin alọkẹyi lẹ mẹ. Enẹwutu, ovisu Heli tọn he Josẹfu yin wẹ zọ́n bọ Luku do slẹ ẹ bo do e hia taidi visunnu Heli tọn.—Luku 3:23.

Todohukanji whẹndo tọn he Matiu po Luku po basi dohia hezeheze dọ Jesu wẹ yin Mẹsia dopagbe lọ. Na nugbo tọn, hukan whẹndo tọn he mẹ Jesu wá sọn họnwun sọmọ bọ Falesi lẹ po Sadusi lẹ po ma sọgan jẹagọdo nugbo enẹ. To egbehe, todohukanji whẹndo tọn he Matiu po Luku po basi gbẹ́ yin apadewhe dodonu yise mítọn tọn podọ kunnudenu de dọ opagbe Jiwheyẹwhe tọn lẹ na mọ hẹndi dandan.