Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

ATỌ̀HỌ̀-NUHIHỌ́ LỌ TỌN (ZINJẸGBONU OPLỌN TỌN) AOÛT 2016

Kanbiọ lẹ sọn Wehiatọ lẹ Dè

Kanbiọ lẹ sọn Wehiatọ lẹ Dè

Naegbọn kẹntọ Jesu tọn lẹ do fọ́n whẹho alọ kiklọ tọn dote?

Ehe yin dopo poun to whẹho susu he mẹ kẹntọ Jesu tọn lẹ mọhodọdo ewọ po devi etọn lẹ po go te mẹ. To Osẹ́n Mose tọn mẹ, gbedide susu wẹ yin nina gando aṣa wiwejininọ tọn he dona yin hihodo to whẹho delẹ mẹ go, taidi to whenue vísin sà jẹgbonu sọn sunnu de go kavi yọnnu de tin to lajijẹ mẹ, to whenue mẹde bẹ pòzọ̀n, podọ nuyiwa he gando oṣiọ gbẹtọ po kanlin po tọn go. Osẹ́n lọ sọ na anademẹ lẹ gando nuhe sọgan yin wiwà nado tọ́n sọn ninọmẹ mawé tọn mẹ lẹ go. E sọgan yindọ avọ́sinsan na yin bibasi, avọ̀ na yin yinyan, kavi osin klọ́we tọn na yin húnhúnhún do omẹ ji.Lev. weta 11-15; Sọh. weta 19.

Ju he yin Labi lẹ nọ tẹdo nudọnamẹ flinflin osẹ́n enẹlẹ tọn go. Owe dodinnanu tọn de dọ dọ ninọmẹ mawé tọn dopodopo nọ zọ́n bọ “kanbiọ lẹ nọ yin finfọndote gando ninọmẹ he mẹ mẹlọ sọgan lẹzun mawé te lẹ go, lehe mawé lọ sọgan bẹpla mẹdevo lẹ do, podọ obá he mẹ e na bẹpla mẹdevo lẹ jẹ, núzinzan po nudevo lẹ po he sọgan lẹzun mawé kavi ma sọgan lẹzun mawé, enẹgodo, nuhe dona yin wiwà podọ nuyiwa aṣa tọn he dona yin bibasi na hinhẹn zun wiwe.”

Kẹntọ Jesu tọn lẹ kanse e dọmọ: “Naegbọn devi towe lẹ ma nọ hodo aṣa omẹ hohowhenu tọn lẹ tọn, ṣigba bo nọ yí alọ mawé lẹ do dùnú?” (Malku 7:5) Sinsẹ̀nnọ enẹlẹ he yin kẹntọ Jesu tọn lẹ ma to didọ dọ alọ he kudiho yíyí do dùnú na doazọ̀nmẹ gba. Aṣa he Labi lẹ nọ hodo wẹ yindọ osin dona yin kinkọ̀n do alọ yetọn lẹ go whẹpo yé nido dùnú. Owe he go mí donu to aga lọ yidogọ dọmọ: “Nudindọn sọ nọ yin finfọndote gando panu he mẹ yè na ba osin lọ do, osin wunmẹ he jẹ, mẹhe dona kọ̀n ẹn, podọ fie osin lọ dona nọte do to alọ yetọn go.”

Nuhe Jesu dọ gando osẹ́n he gbẹtọvi zedai enẹ lẹpo go họnwun. E dọna nukọntọ sinsẹ̀n tọn Ju owhe kanweko tintan whenu tọn lẹ dọmọ: “Isaia ko gbọn gbesisọ dali dọ dọdai gando mì yẹnuwatọ lẹ go, dile e yin kinkandai do dọ, ‘Omẹ ehelẹ nọ yí nùflo yetọn lẹ do gbògbéna mi, ṣigba ahun yetọn dẹn do mi tlala. Ovọ́ mẹ wẹ yé to sinsẹ̀n-basi hlan mi te, na gbedide gbẹtọ tọn lẹ wẹ yé nọ plọnmẹ taidi nuplọnmẹ lẹ.’ Mìwlẹ jo gbedide Jiwheyẹwhe tọn do bo tẹdo aṣa gbẹtọ lẹ tọn go.”Malku 7:6-8.