Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Atọ̀họ̀-Nuhihọ́ lọ Tọn  |  Sọha 6 2017

Pọndohlan He Sọgbe Gando Nuṣiwa lẹ Go

Pọndohlan He Sọgbe Gando Nuṣiwa lẹ Go

Homẹ Don po Margaret * po tọn hùn nado dla viyọnnu yetọn po whẹndo etọn po pọ́n. Margaret he yin nudàtọ azọ́nyọnẹntọ he ko to gbọjẹ whenu gaa tọn mẹ de dà núdùdù he ovivi etọn awe lẹ yiwanna ganji, na yé nido dùnú dopọ whẹpo do lẹkọyi whé.

To whenue yemẹpo ko sinai to tafo kọ̀n, Margaret hẹn nuhe e dà lọ wá bo ze e do tafo lọ ji. Whenue e hùn núdùdù lọ bọ mẹdopodopo yí etọn, yemẹpo wẹ jẹflumẹ to whenue yé ba tintan do nùmẹ. Margaret wọn nado do ojẹ̀ núdùdù lọ mẹ!

Mímẹpo wẹ nọ ṣinuwa mahopọnna owhe kavi numimọ he mí tindo. E sọgan yin hodidọ matin lẹnpọn, nuwiwa he ma wá do gànmẹ, nukunpẹvi yíyí do pọ́n nude kavi vọdonanu. Naegbọn mí do nọ ṣinuwa? Nawẹ mí sọgan yinuwa gbọn eyin mí ṣinuwa? Be mí sọgan dapana yé ya? Pọndohlan he sọgbe gando nuṣiwa lẹ go na gọalọna mí nado na gblọndo na kanbiọ ehelẹ.

NUṢIWA LẸ—PỌNDOHLAN MÍTỌN PODỌ JIWHEYẸWHE TỌN

Homẹ mítọn nọ hùn eyin mí wà nude ganji bọ yè pà mí, bọ mí nọ mọdọ mí jẹna pipà enẹ. To whenue mí ṣinuwa, etlẹ yin to mayọnẹn mẹ kavi mẹdevo lẹ ma doayi e go, be e ma jẹ dọ mí ni nọ kẹalọyi nuṣiwa mítọn lẹ ga ya? E nọ biọ whiwhẹ nado wàmọ.

Eyin mí nọ yí míde do mọ mẹjọmẹ glanglan, mí sọgan nọ tẹnpọn nado yí nukunpẹvi do pọ́n nuṣiwa mítọn, dowhẹ mẹdevo kavi tlẹ mọ́n. Nuyiwa mọnkọtọn nọ saba hẹn kọdetọn ylankan lẹ wá. Nuhahun lọ sọgan gbọṣi aimẹ, bọ yè na to owhẹ̀ do mẹdevo lẹ to aliho agọ̀ mẹ. Eyin etlẹ pà mí bọ mí dapana kọdetọn nuṣiwa mítọn lẹ tọn todin, mí dona hẹn do ayiha mẹ dọ to godo mẹ, “dopodopo mítọn wẹ na dogbè edetiti tọn na Jiwheyẹwhe.”—Lomunu lẹ 14:12.

Pọndohlan he sọgbe wẹ Jiwheyẹwhe nọ tindo gando nuṣiwa lẹ go. Owe Salmu lẹ tọn basi zẹẹmẹ Jiwheyẹwhe tọn taidi “lẹblanunọ podọ awuvẹmẹtọ”; ewọ “ma na ze ayidonugo do nuṣiwa mítọn lẹ ji to whepoponu, mọjanwẹ e ma na gblehomẹ kakadoi do niyẹn.” E yọnẹn dọ mapenọ wẹ mí yin bosọ yọ́n awugbopo mítọn lẹ, bo “nọ flindọ kọ́gudu wẹ mí.”—Salmu lẹ 103:8, 9, 14.

Humọ, taidi otọ́ lẹblanunọ de, Jiwheyẹwhe jlo dọ míwu ovi etọn lẹ, ni nọ tindo pọndohlan etọn nkọ gando nuṣiwa lẹ go. (Salmu lẹ 130:3) Ohó etọn bẹ ayinamẹ po anademẹ owanyinọ susu po hẹn he na gọalọna mí to whenue míwlẹ kavi mẹdevo lẹ ṣinuwa.

LEHE MÍ SỌGAN YINUWA GANDO NUṢIWA LẸ GO DO

To whenue mẹde ṣinuwa, e nọ saba yí whenu susu zan nado to nulẹnpọn do lehe e na sisẹ́ owhẹ̀ lọ dokọna mẹdevo lẹ kavi suwhẹna ede gando nuhe e dọ kavi wà lọ go do ji. Eyin ohó towe lẹ gbleawuna mẹde, naegbọn a ma na gbọ bo vẹvẹ bo vọ́ nulẹ jlado, na họntọnjiji mìtọn nikaa gble? Be a ko ṣì nude wà he hẹn awugble mẹde kavi hiẹ lọsu wẹ ya? Kakati nado to whẹgbledo dewe glanglan kavi dowhẹ  mẹdevo lẹ, naegbọn a ma na wà nuhe go a pé nado jla ninọmẹ lọ do? Eyin a to tintẹnpọn nado dowhẹ mẹdevo, ninọmẹ lọ na vantan poun wẹ bọ nuhahun lọ na to kandlẹn. Kakatimọ, plọnnu sọn nuṣiwa towe lẹ mẹ, basi vọjlado bo zindonukọn.

Eyin mẹdevo de wẹ ṣinuwa, mí nọ yawu gblehomẹ. To ninọmẹ mọnkọtọn lẹ mẹ, e na yọ́n nado hodo ayinamẹ Jesu Klisti tọn he dọmọ: “Enẹwutu, nudepope he mìwlẹ jlo dọ gbẹtọ lẹ ni nọ wà na mì, mọ wẹ mìlọsu dona nọ wà na yé do.” (Matiu 7:12) Eyin a ṣì nude wà, etlẹ yin numadinu de, e họnwun dọ e nọ jlo we dọ mẹdevo lẹ ni vẹawu we bo wọnji nuṣiwa lọ go mlẹnmlẹn. Eyin mọ wẹ, naegbọn hiẹ lọsu ma na do homẹdagbe mọnkọ hia mẹdevo lẹ?—Efesunu lẹ 4:32.

NUNỌWHINNUSẸ́N DELẸ HE SỌGAN GỌALỌ NADO DE NUṢIWA PÒ

Wezẹhomẹ de basi zẹẹmẹ dọ “pọndohlan agọ̀, nukunnumamọjẹnumẹ kavi sọmawhe” wẹ nọ hẹn nuṣiwa wá. E họnwun dọ mímẹpo wẹ nọ ṣinuwa to ojlẹ de kavi devo mẹ, na mímẹpo wẹ nọ do awugbopo enẹlẹ hia to whedelẹnu. Ṣigba, nuṣiwa lẹ na depò eyin mí lẹnnupọndo nunọwhinnusẹ́n Owe-wiwe tọn titengbe delẹ ji.

Dopo to nunọwhinnusẹ́n lọ lẹ mẹ tin to Howhinwhẹn lẹ 18:13 mẹ, he dọmọ: “Eyin mẹdepope gblọnho gando whẹho de go whẹpo do sè e, be nulunu po winyannu de po wẹ e wà.” Mọwẹ, whenu yíyí nado dotoaina whẹho lọ bo lẹnnupọndo gblọndo he a na na ji na gọalọna we nado dapana hodidọ kavi nuyiwa aplà. Eyin mí dotoai po sọwhiwhe po, oyọnẹn họakuẹ he mí nọ tindo nọ gọalọ taun ma nado tindo pọndohlan agọ̀, bọ mí nọ dapana nuṣiwa.

Nunọwhinnusẹ́n devo sọn Biblu mẹ wẹ: “Eyin e yọnbasi, dile mì penugo do, mì nọ nọ̀ jijọho mẹ hẹ gbẹtọ lẹpo.” (Lomunu lẹ 12:18) Wà nuhe go a pé nado hẹn jijọho tin-to-aimẹ bo do gbigbọ gbekọndopọ tọn hia. Eyin a to azọ́nwa hẹ mẹdevo lẹ, nọ hò yetọn pọ́n, nọ do sisi hia yé bo nọ tẹnpọn nado pà yé bo na yé tuli. To ninọmẹ mọnkọtọn lẹ mẹ, hodidọ kavi nuyiwa matin lẹnpọn lẹ sọgan yawu yin jijonamẹ kavi yin vọdona, podọ nuṣiwa sinsinyẹn lẹ sọgan yin dididẹ kavi jijlado to aliho dagbe mẹ.

Nọ plọnnu sọn nuṣiwa towe lẹ mẹ. Kakati nado nọ to whẹjijọ dín na nuhe a dọ kavi wà de, nọ pọ́n lehe enẹ na gọalọna we nado wleawuna jẹhẹnu dagbe lẹ do. Vlavo be e ma na biọ dọ a ni nọ do homẹfa, homẹdagbe po mawazẹjlẹgo po hia dogọ ya? Etẹwẹ dogbọn walọmimiọn, jijọho po owanyi po dali? (Galatianu lẹ 5:22, 23) E whè gbau, a na yọ́n nuhe a na dapana to whedevonu. Ma yin vọdonanutọ blo, amọ́ tẹnpọn ma nado nọ ze ayidonugo glanglan do nuṣiwa towe lẹ ji. Aslan-yìnyìn lọsu sọgan gọalọ nado hẹn ninọmẹ lọ pọnte.

PỌNDOHLAN HE SỌGBE SỌGAN HẸN ALE WÁ

Pọndohlan he sọgbe gando nuṣiwa lẹ go sọgan gọalọna mí nado plọnnu sọn yé mẹ. Mí na nọ tin to jijọho mẹ to ahun mẹ podọ hẹ mẹdevo lẹ. Eyin mí nọ tẹnpọn nado plọnnu sọn nuṣiwa mítọn lẹ mẹ, mí na yọnnuin bo yọ́n dọnsẹpọ dogọ. Mí ma na nọ jẹflumẹ kavi nọ to whẹgbledo míde glanglan. Yinyọnẹn dọ mẹdevo lẹ lọsu to avùnho sọta nuṣiwa yetọn lẹ na zọ́n bọ mí na dọnsẹpọ yé dogọ. Hú popolẹpo, eyin mí nọ plọnnu sọn aliho he mẹ Jiwheyẹwhe nọ do owanyi hia bo nọ jonamẹ sọn ojlo mẹ wá te mẹ, ehe sọgan hẹn ale wá na mí.—Kolosinu lẹ 3:13.

Be nuṣiwa Margaret he go mí donù wayi tọn yinuwado ayajẹ whẹndo lọ tọn ji wẹ ya? Paali. Margaret po mẹhe pò lẹ po diọ nuṣiwa lọ zun aslan, bo gbọ bo do ojẹ̀ núdùdù lọ mẹ na yede! To owhe lẹ godo, ovivi etọn awe lẹ vọ́ otàn núdùdù he yé ma sọgan wọn enẹ tọn pìn na ovi yelọsu tọn lẹ bo nọ flin nudagbe lẹ gando mẹjitọ daho yetọn lẹ go. To popolẹpo mẹ, nuṣiwa de poun wẹ!

^ huk. 2 Yinkọ lẹ ko yin didiọ.