Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Atọ̀họ̀-Nuhihọ́ lọ Tọn  |  Sọha 6 2017

 HOSỌ HE JẸNUKỌN | NUNINA TẸWẸ YIN DAGBE HUGAN?

Ojlo Na Nunina Dagbe Hugan

Ojlo Na Nunina Dagbe Hugan

E ma nọ bọawu nado mọ nunina dagbe hugan de. To popolẹpo mẹ, mẹhe mọ nunina de yí wẹ na yọ́n lehe e họakuẹ sọ. Podọ nuhe yin dagbe hugan na mẹde sọgan nọma yinmọ na mẹdevo.

Di apajlẹ, jọja de sọgan mọdọ nuyizan lẹtliki tọn he to zoji de wẹ yin nunina dagbe hugan na emi. To alọ devo mẹ, mẹhe ko whẹ́n de sọgan yọ́n pinpẹn nunina he yin nina ẹn nado do owanyi hia ẹ de tọn, taidi nunina họakuẹ he ko dẹn-to-aimẹ to whẹndo mẹ de. To aṣa delẹ mẹ, nunina he yọpọ po mẹho po nọ saba yiwanna wẹ akuẹ, na mẹlọ sọgan yí i do wà nudepope he e jlo.

Mahopọnna nuhahun ehelẹ, mẹsusu gbẹ́ nọ tindo ojlo nado yọ́n nunina họakuẹ hugan he yé sọgan na mẹvivẹ yetọn. Nugbo wẹ dọ e ma nọ yọnbasi to whelẹponu nado mọ nunina mọnkọtọn, ṣigba onú delẹ hinhẹn do ayiha mẹ sọgan gọalọ. Mì gbọ mí ni gbadopọnna onú ẹnẹ he sọgan zọ́n bọ nunina de na hẹn pekọ wá na mẹhe mọ ẹn yí.

Nujlomẹ mẹhe na mọ ẹn yí lọ tọn. Dawe de to Belfast, Irlande du Nord dọ dọ kẹkẹ tata he yè na ẹn to whenue e do nudi owhe 10 kavi 11 wẹ yin nunina dagbe hugan na ẹn. Etẹwutu? “Na e nọ jlo mi taun,” wẹ e dọ. Zẹẹmẹ etọn dohia dọ, to ninọmẹ susu mẹ, nujlomẹ mẹde tọn wẹ nọ dohia eyin e na wlebòna nunina de kavi lala. Enẹwutu, nọ lẹnnupọndo mẹhe a jlo na nanú lọ ji. Tẹnpọn nado yọ́n nuhe mẹlọ sọgan yiwanna, na nuhe to mẹde jlo wẹ e nọ yiwanna hugan. Di apajlẹ, mẹjitọ daho lẹ nọ saba yiwanna whenu yiyizan dopọ hẹ whẹndo yetọn. Yé sọgan nọ jlo nado mọ ovi po ovivi yetọn lẹ po whẹwhẹ dile e na yọnbasi do. Enẹwutu, gbọjẹ yìyì dopọ po mẹjitọ daho lẹ po sọgan họakuẹ na yé hugan nunina devo depope.

Nuhe na gọalọ nado yọ́n nujlomẹ mẹde tọn wẹ nado nọ dotoai ganji. Biblu na tuli mí nado “nọ yawu nado dotoai, whleawu nado dọho.” (Jakọbu 1:19) Eyin a to hodọdopọ hẹ họntọn kavi hẹnnumẹ towe lẹ, nọ dotoai ganji nado yọ́n nuhe yé yiwanna po nuhe yé gbẹwanna lẹ po. Enẹ na zọ́n bọ a na penugo nado na yé nunina he na hẹn homẹhun yé.

Nuhudo mẹhe na mọ ẹn yí lọ tọn. Mẹde sọgan  yọ́n pinpẹn nunina he ma tlẹ vẹakuẹ sọmọ de tọn, eyin e súdo nuhudo titengbe de tọn. Amọ́, nawẹ a sọgan yọ́n nuhudo mẹdevo tọn gbọn?

E sọgan taidi dọ aliho he bọawu wẹ nado kàn nuhe sin hudo mẹlọ do biọ—kavi nuhe e yiwanna. Ṣigba ehe nọ de ayajẹ nunamẹtọ susu tọn pò, na yé nọ saba jlo nado nanúmẹ to whenue mẹlọ ma madonukun. Humọ, mẹsusu sọgan nọ yawu dọ nuhe yé yiwanna kavi gbẹwanna lẹ, amọ́ yé ma nọ saba dọ nuhudo yetọn lẹ tọ́n.

Enẹwutu, nọ yin ayidonugotọ bo nọ lẹnnupọndo ninọmẹ mẹlọ tọn lẹ ji. Jọja de wẹ ya, kavi yọnhonọ, tlẹnnọ, alọwlemẹ, mẹhe ko basi gbẹdai, mẹhe ko hẹn alọwlemẹ bu, azọ́nwatọ kavi mẹhe ko yí gbọjẹ whenu gaa tọn de? Enẹgodo, nọ lẹnnupọndo nunina he sọgan súdo nuhudo he mẹlọ tindo tọn ji.

Nado yí zinzin do yọ́n nuhudo mẹhe a jlo na nanú de tọn, dọho hẹ mẹhe ko gbọn ninọmẹ mọnkọ mẹ pọ́n lẹ. Yé sọgan dọ nuhudo vonọtaun yetọn lẹ he mẹlẹpo ma yọnẹn na we. Enẹ na gọalọna we nado na ẹn nude he na súdo nuhudo he ma to paa de tọn.

Ojlẹ he mẹ nunina lọ yin bibasi. Biblu dọmọ: “Ohó he yin didọ to ojlẹ he sọgbe mẹ—lehe e nọ yọ́n sọ!” (Howhinwhẹn lẹ 15:23) Wefọ ehe dohia dọ, ojlẹ he mẹ ohó de yin didọ te sọgan yinuwadomẹji taun. Nudopolọ wẹ na nuyiwa mítọn lẹ. Dile ohó he yin didọ to ojlẹ he sọgbe mẹ sọgan yọ́nsè do, mọdopolọ wẹ nunina he yè namẹ to ojlẹ he sọgbe mẹ kavi to ninọmẹ he sọgbe mẹ sọgan yidogọna ayajẹ mẹhe mọ ẹn yí lọ tọn do.

Dotẹnmẹ hundote delẹ die he whenu yè nọ saba nanúmẹ. Họntọn de jlo na wlealọ. Jọja de jlo na fó wehọmẹ. Asu po asi po de to nukundo viyẹyẹ de. Mẹdelẹ nọ mọdọ e yọ́n nado basi kandai nujijọ mọnkọ he na wá aimẹ to owhe dopo gblamẹ lẹ tọn. Gbọnmọ dali, yé nọ basi tito jẹnukọn na nunina he na yọ́n hugan to nujijọ dopodopo whenu. *

Nugbo wẹ dọ e ma yin nujijọ vonọtaun lẹ whenu kẹdẹ wẹ a dona nọ nanúmẹ. Yè sọgan mọ ayajẹ he nunamẹ nọ hẹnwa to whedepopenu. Ṣigba, mí dona to aṣeji. Di apajlẹ, eyin sunnu de nanú yọnnu de matin whẹwhinwhẹ́n de, yọnnu lọ sọgan lẹndọ ojlo tindo to emi mẹ wẹ e te. Eyin e ma yin linlẹn etọn niyẹn, nunina mọnkọtọn sọgan hẹn nukunnumamọjẹnumẹ lẹ wá kavi fọ́n ayihaawe dote. Ehe dohia dọ yè dona lẹnnupọndo onú titengbe devo ji—enẹ wẹ mẹwhinwhàn nunamẹtọ lọ tọn.

Mẹwhinwhàn nunamẹtọ lọ tọn. Dile apajlẹ he wayi dohia do, e nọ yọ́n nado pọ́n eyin nunina lọ na fọ́n ayihaawe dote gando mẹwhinwhàn nunamẹtọ lọ tọn go. To alọ devo mẹ, e na yọ́n dọ nunamẹtọ lọ ni gbadopọnna mẹwhinwhàn edetiti tọn. Dile etlẹ yindọ mẹsusu nọ lẹndọ mẹwhinwhàn yetọn yin dagbe, suhugan yetọn wẹ nọ nanúmẹ to ojlẹ owhe lọ tọn tangan de mẹ, na yé nọ mọdọ emi to dandannu glọ nado wàmọ wutu. Humọ, mẹdelẹ nọ nanúmẹ nado mọ nukundagbe mẹlọ tọn kavi mọ nude yí lẹkọ.

Etẹwẹ a sọgan wà nado nọ nanúmẹ po mẹwhinwhàn dagbe po? Biblu dọmọ: “Mì gbọ nuhe mì to wiwà lẹpo ni nọ yin to owanyi mẹ.” (1 Kọlintinu lẹ 16:14) Eyin owanyi nujọnu tọn wẹ whàn we bọ onú mẹlọ tọn nọ duahunmẹna we, nunina towe na hẹn ẹn jaya bọ hiẹ lọsu na tindo ayajẹ daho he alọtútlú nujọnu tọn nọ hẹnwa. Eyin a nọ nanúmẹ sọn ahun mẹ, Otọ́ olọn mẹ tọn mítọn lọsu nọ jaya. Apọsteli Paulu pà Klistiani Kọlinti hohowhenu tọn lẹ to whenue yé yí alọtútlú po ayajẹ po do nọgodona azọ́n kọgbọ tọn do ota Klistiani hatọ he to Jude lẹ tọn mẹ. Paulu dọna yé dọmọ: “Jiwheyẹwhe nọ yiwanna nunamẹtọ homẹhunnọ.”—2 Kọlintinu lẹ 9:7.

Eyin a na ayidonugo nuhe ji mí dọhodo ehelẹ, nunina towe lẹ na nọ hẹnmẹ jaya. Onú ehelẹ—gọna devo lẹ—ko yí adà titengbe de wà to tito Jiwheyẹwhe tọn mẹ he zọ́n bọ gbẹtọvi lẹ do mọ nunina daho hugan lọ yí. Mí basi oylọna we nado gbadopọnna nunina daho ehe gbọn hosọ he bọdego hihia dali.

^ huk. 13 Mẹsusu sọ nọ nanúmẹ to jijizan po whedudu lẹ po whenu. Ṣigba, susu aṣa he nọ yin hihodo to nujijọ ehelẹ whenu lẹ tọn nọ jẹagọdo nuplọnmẹ Biblu tọn lẹ. Pọ́n hosọ lọ “Kanbiọ Wehiatọ Mítọn lẹ Tọn—Be Klistiani lẹ Dona Dù Noẹli Wẹ Ya?” to linlinnamẹwe ehe mẹ.