Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

ATỌ̀HỌ̀-NUHIHỌ́ LỌ TỌN SỌHA 6 2016

Adọwé

Nuhe Mí Plọn sọn Ohẹ̀ Agahomẹ Tọn lẹ Dè

Nuhe Mí Plọn sọn Ohẹ̀ Agahomẹ Tọn lẹ Dè

“Jaale kanhose, . . . ohẹ̀ agahomẹ tọn lẹ, na yé ni dọna we. Detẹ to ehe lẹpo mẹ wẹ ma yọnẹn dọ alọ Jehovah tọn wẹ basi ehe?”—Jobu 12:7, 9.

HUGAN owhe 3 000 die, tọgbo Jobu hohowhenu tọn lọ mọdọ ohẹ̀ agahomẹ tọn lẹ tindo nususu nado plọn mí gando alọnuzọ́n Jiwheyẹwhe tọn go. Ṣigba, nuyiwa yetọn sọ nọ do nuhe yé yin hia to yẹhiadonu-liho. To Biblu mẹ, alọdlẹndonu susu he gando ohẹ̀ agahomẹ tọn lẹ go wẹ plọn mí onú titengbe lẹ gando ogbẹ̀ po haṣinṣan mítọn hẹ Jiwheyẹwhe po go. Mì gbọ mí ni pọ́n apajlẹ kleun de.

FIE AGADAWHLÉ NỌ DO ADỌ́ DO

Agadawhlé

Tòmẹnu Jelusalẹm tọn lẹ jẹakọ hẹ agadawhlé lẹ, ehe to paa mẹ nọ saba do adọ́ do adó ohọ̀ lẹ tọn go. Delẹ nọ do adọ́ do tẹmpli Sọlomọni tọn mẹ. Agadawhlé he nọ do adọ́ do lẹdo tẹmpli lọ tọn mẹ to whemẹwhemẹ lẹ nọ mọdọ hihọ́tẹn de wẹ finẹ yin, na mẹde ma na dotukla ovi yetọn lẹ wutu.

Mẹhe pà Salmu 84tọ, enẹ wẹ dopo to visunnu Kola tọn he nọ sẹ̀n to tẹmpli mẹ na osẹ dopo to osun ṣidopo gblamẹ lẹ mẹ, doayi adọ́ he to tẹmpli lọ mẹ lẹ go. Ojlo etọn wẹ nado taidi agadawhlé he nọ nọ̀ tẹmpli Jehovah tọn mẹ tẹgbẹ lẹ. E yí ogbè lélé do dọmọ: “Lehe yẹn yiwanna gòhọtúntún gigonọ towe do sọ, Jehovah awhànpa lẹ tọn E! N’tin to jejeji, mọwẹ, ojlo vẹkuvẹku he n’tindo na awánu Jehovah tọn lẹ to hinhẹn mi dakú . . . Ohẹ̀ lẹ tlẹ nọ mọ adọ́ do finẹ bọ agadawhlé nọ do adọ́ na ede do finẹ, fie ewọ nọ penukundo ovi etọn lẹ go te, yèdọ sẹpọ agbà gigonọ towe, Jehovah awhànpa lẹ tọn E, Ahọlu ṣie podọ Jiwheyẹwhe ṣie!” (Salmu lẹ 84:1-3) Be míwlẹ po ovi mítọn lẹ po nọ do ojlo po pinpẹn-nutọn-yinyọnẹn mọnkọtọn po hia gbọn pipli dopọ hẹ agun omẹ Jiwheyẹwhe tọn lẹ tọn to gbesisọ mẹ dali ya?—Salmu lẹ 26:8, 12.

ADỌWÉ NỌ YỌ́N OJLẸ ETỌN

Yẹwhegán Jelemia wlan dọmọ: ‘Adọwé he to agahomẹ nọ yọ́n ojlẹ etọn lẹ.’ Ayihaawe ma tin dọ e yọ́n tẹnsisẹ adọwé lẹ tọn gbọn Aigba Pagbe tọn ji. To amakikọ whenu, adọwé wewe he nọ sẹtẹn sọn Aflika yì agewaji Europe tọn gbọn Agbàdo Jọdani tọn mẹ lẹ yì 300 000 linlán. Podọ eyin ojlẹ sọ nado lẹkọyi fie yé nọ nọ̀ to alunlun mẹ, yé nọ yọnẹn. To vogbingbọn mẹ na ohẹ̀ devo lẹ, yé “nọ yọ́n whenue yé na lẹkọ.”—Jelemia 8:7.

Wezẹhomẹ lọ Atlas Des Oiseaux Migrateurs dọmọ: “Nupaṣamẹnu de wẹ e yin nado mọ lehe yé nọ sẹtẹn do to jọwamọ-liho.” Jehovah Jiwheyẹwhe na nuyọnẹn jọwamọ tọn ohẹ̀ he nọ zingbejizọnlin lẹ gando osaa lẹ go, ṣigba e na nugopipe lọ gbẹtọ nado nọ yọ́n ojlẹ po osaa lẹ po. (Luku 12:54-56) To vogbingbọn mẹ na nuyọnẹn jọwamọ tọn he adọwé tindo, oyọnẹn Jiwheyẹwhe tọn wẹ nọ gọalọna gbẹtọvi lẹ nado yọ́n zẹẹmẹ nujijọ po ojlẹ he mẹ mí to gbẹnọ te lẹ tọn po. Islaelivi he nọgbẹ̀ to azán Jelemia tọn gbè lẹ ma  doayi ohia enẹlẹ go. Jiwheyẹwhe dọ gando nuhe yin nuhahun yetọn taun go dọmọ: “Yé ko gbẹ́ ohó Jehovah tọn dai, nuyọnẹn tẹwẹ yé tindo lo?”—Jelemia 8:9.

To egbehe, mí tindo kunnudenu dolido lọ dọ mí to gbẹnọ to nuhe Biblu ylọ dọ “azán godo tọn lẹ” mẹ. (2 Timoti 3:1-5) Be a na hodo apajlẹ adọwé lẹ tọn nado nọ payi ‘osaa’ lẹ go ya?

AKÙN NỌ MỌNÚ HLAN FIDINDẸN

Akùn

Akùn yin nùdego to Biblu mẹ whlasusu, podọ ohẹ̀ ehe gbayipe to Aigba Pagbe tọn ji. Eyin akùn tlẹ to adọ́ etọn he to bẹbẹnu osókla de tọn mẹ, e “nọ dín núdùdù” sọn finẹ, podọ “nukun etọn nọ mọnú hlan fidindẹn.” (Jobu 39:27-29) Nukun etọn lẹ zìn sọmọ bọ e sọgan mọ azui he dẹn do e na kilomẹtlu dopo hlan.

Dile akùn de sọgan “mọnú hlan fidindẹn” do, Jehovah tindo nugopipe nado mọnú zẹ̀ sọgodo go. Abajọ, Jehovah Jiwheyẹwhe do dọmọ: “Yẹn ko nọ dọ kọdetọn lọ sọn bẹjẹeji, bosọ nọ dọ nuhe ma ko yin wiwà lẹ sọn whenu dindẹn jẹnukọn.” (Isaia 46:10) Eyin mí nọ setonuna ayinamẹ Jehovah tọn lẹ, mí sọgan mọaleyi sọn nuyọnẹn po huhlọn numọdohlan nukọn tọn etọn he madodogbó po mẹ.—Isaia 48:17, 18.

Biblu sọ yí mẹhe nọ dejido Jehovah go lẹ jlẹdo akùn go dọmọ: “Mẹhe ze todido yetọn do Jehovah mẹ lẹ na vọ́ huhlọn mọyi. Yé na yí awà lẹ do zlọn taidi akùn lẹ.” (Isaia 40:31) Akùn de nọ zlọn gbọn jẹhọn he gblọ de mẹ. Eyin akùn de biọ jẹhọn mẹ, e nọ kẹ̀ awà etọn lẹ bọ jẹhọn lọ nọ to zize e bọ e nọ to agayi. Akùn ma nọ ganjẹ huhlọn ede titi tọn go nado zlọn yì fidindẹn. Mọdopolọ, mẹhe dejido Jehovah go lẹ sọgan ganjẹ ewọ go, na ewọ dopà nado na yé “huhlọn he hú jọwamọ tọn.”—2 Kọlintinu lẹ 4:7, 8.

‘LEHE KOKLOSI DE NỌ BẸ OVI ETỌN LẸ PLI DO’

Koklosi po koklovi lẹ po

Ojlẹ vude jẹnukọnna okú Jesu tọn, e nọte vude nado pọ́n tatọ́-tònọ Ju lẹ tọn. E yí awubla do dọmọ: “Jelusalẹm, Jelusalẹm E, hiẹ he nọ hù yẹwhegán lẹ bo nọ dlan zannu do mẹhe yin didohlan we lẹ—whla nẹmu wẹ yẹn ko jlo nado bẹ ovi towe lẹ pli dile koklosi de nọ bẹ ovi etọn lẹ pli do awà etọn lẹ glọ do! Ṣigba, mìwlẹ ma jlo domọ.”—Matiu 23:37.

Dopo to nuhe nọ duahunmẹ na ohẹ̀ lẹ hugan mẹ wẹ nado basi hihọ́na ovi yetọn. Ohẹ̀ he nọ do adọ́ do kọmẹ lẹ, taidi koklosi whégbè tọn lẹ, dona to aṣeji taun. Eyin koklosi de mọ gàngàn de to lilẹpe, e nọ bẹ awhá nado na avase bọ ovi etọn lẹ nọ yawu họ̀n wá awà etọn lẹ glọ nado mọ hihọ́. Gbọnmọ dali, koklovi lọ lẹ sọ nọ mọ bẹtẹn sọn owhè kavi jikun sinsinyẹn nù. Jesu lọsu jlo na na tòmẹnu Jelusalẹm tọn lẹ bẹtẹn po hihọ́ gbigbọmẹ tọn po. To egbehe, Jesu to oylọ-basina mí nado wá e dè nado mọ kọfanamẹ po hihọ́ po sọn magbọjẹ egbesọ tọn mítọn lẹ mẹ.—Matiu 11:28, 29.

Na nugbo tọn, mí sọgan plọn nususu sọn nudida awànọ ehelẹ dè. Dile a na to ayido nuyiwa yetọn lẹ go, tẹnpọn nado flin zẹẹmẹ yẹhiadonu tọn Owe-wiwe lẹ tọn gando yé go. Mì gbọ agadawhlé ni nọ gọalọna mì nado nọ do pinpẹn-nutọn-yinyọnẹn hia ohọ̀ sinsẹ̀n-bibasi tọn Jehovah tọn. Nọ ganjẹ Jiwheyẹwhe go nado mọ todido he na gọalọna we nado sọgan zlọn dile akùn de nọ wà do. Wá Jesu dè nado mọ nugbo gbigbọmẹ tọn he na basi hihọ́na we, dile koklosi de nọ basi hihọ́na ovi etọn lẹ do. Podọ, mì gbọ adọwé ni nọ flinnu mì nado nọ nọ̀ aṣeji gando zẹẹmẹ nujijọ he to hiadogona azán mítọn lẹ tọn go.

Plọnnu Dogọ

Nawẹ Hiẹ Sọgan Dọnsẹpọ Jiwheyẹwhe Gbọn?

Dindona eyin Jiwheyẹwhe nọ sè odẹ̀ lẹpo, lehe mí dona nọ hodẹ̀ gbọn, podọ nuhe mí sọgan sọ wà nado dọnsẹpọ Jiwheyẹwhe.