Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

ATỌ̀HỌ̀-NUHIHỌ́ LỌ TỌN SỌHA 6 2016

 HOSỌ HE JẸNUKỌN | OLỌN LẸ—NUHE MẸDELẸ MỌ GANDEGO

Kanbiọ lẹ Gando Mẹhe Nọ Nọ̀ Lẹdo Gbigbọ Tọn mẹ lẹ Go

Kanbiọ lẹ Gando Mẹhe Nọ Nọ̀ Lẹdo Gbigbọ Tọn mẹ lẹ Go

Be a ko kanhose gando lẹdo gbigbọ tọn po mẹhe nọ nọ̀ finẹ lẹ po go pọ́n ya? Eyin mọwẹ, e ma yin hiẹ kẹdẹ wẹ ko wàmọ. Na owhe fọtọ́n susu lẹ, gbẹtọ lẹ ko pà ohó susu dọ gando whẹho ehe go. Mẹdelẹ yise dọ tọgbo he dona yin sinsẹ̀n basi hlan lẹ wẹ nọ nọ̀ lẹdo gbigbọ tọn lẹ mẹ. Mẹdevo lẹ nọ pọ́n ẹn hlan taidi nọtẹn jijọho tọn de he nọ yin yiylọdọ olọn, fie gọ́ na angẹli lẹ po mẹdagbe he ko kú lẹ po. Etomọṣo, mẹdevo lẹ nọ pọ́n lẹdo gbigbọ tọn hlan taidi owhé yẹwhe livi donu kanweko susu lẹ tọn.

Mẹsusu nọ dọnnu dọ mí ma sọgan yọ́n nudepope gando lẹdo gbigbọ tọn go, na mẹde ma ko nọ finẹ pọ́n nado dọhona mí gandego. Amọ́, whẹwhinwhẹ́n enẹ ma sọgbe. Jesu Klisti ko nọ olọn mẹ, yèdọ lẹdo gbigbọ tọn de whẹpo do wá aigba ji. Enẹwutu, e dọna nukọntọ sinsẹ̀n tọn owhe kanweko tintan whenu tọn lẹ madoadúdẹji dọmọ: “Yẹn ko jẹte sọn olọn mẹ wá, e ma yin nado wà ojlo ṣie titi gba, ṣigba ojlo ewọ he do mi hlan tọn.” Gbọnmọ dali, Jesu to nudọnamẹ tlọlọ na apọsteli etọn lẹ to whenue e dọna yé dọmọ: “Fininọ susu wẹ tin to owhé Otọ́ ṣie tọn gbè.”—Johanu 6:38; 14:2.

Na nugbo tọn, Jiwheyẹwhe wẹ yin Otọ́ Jesu tọn, mẹhe yinkọ etọn nọ yin Jehovah, podọ olọn mẹ wẹ “owhé” Jehovah tọn te. (Salmu lẹ 83:18) Enẹwutu, mẹdepope ma sọgan basi zẹẹmẹ lẹdo mayinukundomọ lọ tọn hugan Jehovah Jiwheyẹwhe po Jesu Klisti po. Yé ko na nudọnamẹ susu gando lẹdo gbigbọ tọn go gbọn numimọ jiawu he yé dehia omẹ nugbonọ lẹ gblamẹ.

Hosọ he bọdego dọhodo adà Biblu tọn delẹ ji he basi zẹẹmẹ gando suhugan numimọ lọ lẹ tọn go. Dile a to dogbapọnna numimọ ehelẹ, nọ flindọ lẹdo gbigbọ tọn ma yin fihe yè sọgan yinukundomọ de he bẹ nuhe mí sọgan mọ kavi doalọ e go lẹ hẹn gba. Nuhe zọ́n niyẹn bọ kakati Jiwheyẹwhe ni basi zẹẹmẹ etọn to aliho de mẹ bọ e na yindọ nudida gbigbọnọ lẹ kẹdẹ wẹ na mọnukunnujẹemẹ, e de nado yí numimọ lẹ zan na mí nido sọgan mọnukunnujẹ lẹdo gbigbọ tọn go. Numimọ lọ lẹ na gọalọna we nado mọnukunnujẹ mẹhe nọ nọ̀ “fininọ susu” to lẹdo gbigbọ tọn mẹ lẹ go.