Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

ATỌ̀HỌ̀-NUHIHỌ́ LỌ TỌN SỌHA 5 2016

 BIBLU NỌ DIỌ GBẸZAN MẸTỌN

N’Nọ to Adidu Mapote Bosọ Nọ Wadanu

N’Nọ to Adidu Mapote Bosọ Nọ Wadanu
  • OWHE HE MẸ N’YIN JIJI: 1974

  • OTÒ HE MẸ N’WÁ SỌN: MEXIQUE

  • OTÀN ṢIE: JỌJA DANUWATỌ, PODỌ AVÙNDA-DAITỌ

NUHE N’YIN DAI:

N’yin jiji to Ciudad Mante, yèdọ lẹdo whanpẹnọ de to agbegbe Tamaulipas tọn mẹ to Mexique. To paa mẹ, tòmẹnu tòdaho lọ tọn lẹ nọ hẹjómẹ bo nọ jọmẹ. Ṣigba, e blawu dọ na sẹ́nhẹngba sù to finẹ wutu, lẹdo lọ nọ gọ́ na owù taun.

Yẹn wẹ yin visunnu awetọ to visunnu ẹnẹ mẹjitọ ṣie lẹ tọn mẹ. Mẹjitọ ṣie lẹ yí baptẹm na mi to Ṣọṣi Katoliki tọn mẹ, podọ to enẹgodo, n’biọ pipli hànjigbẹ́ ṣọṣi tọn de mẹ. N’nọ jlo na hẹn homẹ Jiwheyẹwhe tọn hùn na n’nọ dibu taun nado yin whẹdana bo na wá yì zòmẹ.

Whenue n’tindo owhe atọ́n, otọ́ mítọn jo mí do. Ehe hẹn awubla sinsinyẹn wá na mi bọ n’jẹflumẹ taun. N’ma yọ́n nuhe zọ́n bọ e do jo mí do mahopọnna dọ mí yiwanna ẹn taun. Onọ̀ ṣie dona nọ wazọ́n na gànhiho susu nado penukundo mí visunnu ẹnẹ lẹ go.

Ninọmẹ lọ zọ́n bọ n’họ̀n sọn wehọmẹ bo jẹ ovi devo he ko hú mẹho mi lẹ hodo pé ji. Yé plọn mi nado nọ zunmẹ, nù azọ̀, jẹajo, podọ nado nọ yìn akotokún. Na n’nọ jlo na dugán do mẹdevo lẹ ji wutu, n’plọn akotokún-yìnyìn, ahididi, karaté gọna lehe yè nọ yí adánwanu lẹ do hoavùn do. N’lẹzun jọja danuwatọ de. N’nọ saba yí osò do hoavùn, podọ whlasusu wẹ n’nọ to kúdaa-gbẹ̀daa to tòhomẹ-liho lẹ ji po ohùn po gbọn filẹpo. Lehe n’nọ hẹn onọ̀ ṣie gọ́ na awubla do sọ whenue e wá mọ mi domọ bo dona nọ ze mi gblẹgblẹ yì dotowhé!

To whenue n’tindo owhe 16, Jorge he yin họntọn ṣie to ovu whenu wá dla mí pọ́n. E dọna mí dọ emi yin dopo to Kunnudetọ Jehovah tọn lẹ mẹ bọ emi jlo na má owẹ̀n titengbe de hẹ mí. E jẹ zẹẹmẹ basi do nuyise etọn lẹ ji gbọn Biblu yiyizan dali. N’ma ko hia ẹ pọ́n, podọ e vivi na mi taun nado plọnnu dogbọn yinkọ Jiwheyẹwhe tọn po lẹndai etọn lẹ po dali. Jorge biọ nado plọn Biblu hẹ mí bọ mí yigbe.

LEHE BIBLU DIỌ GBẸZAN ṢIE DO:

Homẹ ṣie hùn taun nado plọn nugbo lọ gando olọnzomẹ go—dọ e ma yin nuplọnmẹ Biblu tọn. (Salmu lẹ 146:4; Yẹwhehodọtọ 9:5) To enẹgodo, n’masọ nọ to sijọsijọ ji na Jiwheyẹwhe ba. Kakatimọ, n’jẹ pinpọn ẹn hlan ji di Otọ́ owanyinọ de he nọ dín dagbe ovi etọn lẹ tọn.

 Dile n’to nukọnyi to Biblu pinplọn ṣie mẹ, n’mọdọ n’dona diọ walọ ṣie lẹ. N’dona wleawuna whiwhẹ bo doalọtena danuwiwa. Ayinamẹ he to 1 Kọlintinu lẹ 15:33 mẹ wẹ gọalọna mi. E dọmọ: “Gbẹdido ylankan lẹ nọ hẹn walọ dagbe lẹ gble.” N’mọdọ eyin n’jlo na diọ, n’dona nọla na mẹhe nọ sisẹ́ mi nado wà nuylankan lẹ. Enẹwutu, n’jo họntọn ṣie hoho lẹ do bo jẹ gbẹdo hẹ hagbẹ agun nugbo Klistiani tọn lẹ ji—yèdọ mẹhe nọ didẹ gbemanọpọ yetọn lẹ gbọn nunọwhinnusẹ́n Biblu tọn lẹ hihodo dali, e ma yin po akotokún kavi danuwiwa po.

Wefọ devo he yinuwado ji e wẹ Lomunu lẹ 12:17-19. E hia dọmọ: “Mì nọ yí oylan do suahọ oylan tọn na mẹdepope blo. . . . Eyin e yọnbasi, dile mì penugo do, mì nọ nọ̀ jijọho mẹ hẹ gbẹtọ lẹpo. . . . Mì yiahọsu na mìde blo, . . . na e ko yin kinkandai dọmọ: ‘“Ṣie wẹ ahọsuyi; yẹn na suahọ etọn,” wẹ Jehovah dọ.’” N’wá mọnukunnujẹemẹ dọ Jehovah na didẹ mawadodo lẹpo dile e jlo e do podọ to ojlẹ etọn mẹ. Vudevude, n’dealọ sọn danuwiwa mẹ.

N’ma gán wọn nuhe jọ pọ́n gbede, to whèjai dopo he n’lẹkọ jei whégbè. Pipli jọja delẹ tọn sọn jaguda-gbẹ́ he yin kẹntọ ṣie hoho dai tọn lẹ mẹ tọ́navùn mi, bọ ogán yetọn linú nẹgbé na mi, bo dawhá dọmọ: “Yiavùnlọna dewe!” To ojlẹ enẹ mẹ, n’hodẹ̀ kleun de hlan Jehovah dọ e ni gọalọna mi nado doakọnna mẹgbeyinyan lọ. Mahopọnna dọ e jlo mi taun nado yiahọsu, n’penugo bo tọ́n sọn finẹ. To wunkẹngbe, n’vọ́ dukosọ hẹ ogán lọ. Homẹgble mi sinsinyẹn bọ n’jlo na yiahọsu, ṣigba whladopo dogọ, n’vẹ̀ Jehovah dọ ni gọalọna mi nado duto dee ji. E paṣa mi dọ dẹpẹ lọ wá dee tlọlọ bo dọmọ: “Ma gblehomẹ na nuhe jọ to osọ zánmẹ blo, jaale bo jona mi. Nugbo lọ wẹ yindọ n’jlo na taidi hiẹ nkọ. N’jlo na plọn Biblu.” Lehe homẹ ṣie hùn do sọ dọ n’penugo nado duto homẹgble ṣie ji! Enẹ wẹ zọ́n todin bọ mí do bẹ plọnmẹ Biblu de jẹeji.

E vẹna dọ mi hagbẹ whẹndo ṣie tọn he pò lẹ ma zindonukọn to Biblu pinplọn yetọn mẹ to ojlẹ enẹ mẹ. Ṣigba, n’magbe sinsinyẹn nado zindonukọn to nupinplọn lọ mẹ bo ma dike mẹde kavi nudepope ni glọnalina mi. N’yọnẹn dọ gbẹdido hẹ omẹ Jiwheyẹwhe tọn lẹ to gbesisọ mẹ na miọnhomẹna mi bo na zọ́n bọ n’na mọ whẹndo he sin nuhudo n’tindo. N’zindonukọn to oplọn ṣie mẹ bọ to 1991, n’yí baptẹm taidi dopo to Kunnudetọ Jehovah tọn lẹ mẹ.

ALE HE N’MỌYI LẸ:

To dai, n’nọ to adidu mapote bo nọ jlo na dugán do mẹdevo lẹ ji bosọ yin danuwatọ. Ṣigba, Ohó Jiwheyẹwhe tọn ko diọ gbẹzan ṣie mlẹnmlẹn. Todin, n’nọ má owẹ̀n jijọho tọn Biblu tọn hẹ mẹdepope he jlo na sè. N’tindo lẹblanulọkẹyi nado sẹ̀n taidi lizọnyizọnwatọ whenu-gigọ́ tọn na owhe 23 he wayi lẹ.

N’wazọ́n taidi mẹdezejotọ to azọ́nwatẹn Kunnudetọ Jehovah tọn lẹ tọn mẹ to Mexique na ojlẹ de. Finẹ wẹ n’dukosọ hẹ Claudia te, yèdọ mẹmẹyọnnu jọja zohunhunnọ de, bọ mí wlealọ to 1999. Lehe n’dopẹna Jehovah do sọ dọ e na mi gbẹdohẹmẹtọ nugbonọ ehe!

Mí sẹ̀n dopọ to agun ogbè alọ-yido-dọho tọn Mexique tọn mẹ bo nọ gọalọna tókunọ lẹ nado plọnnu gando Jehovah go. To nukọn mẹ, mí yin oylọ-basina nado sẹtẹn yì Bélize nado plọn Biblu hẹ mẹhe nọ nọ̀ otò enẹ mẹ lẹ. Dile etlẹ yindọ mí hẹn gbẹzan mítọn bọawu taun to finẹ, mí tindo nuhe sọgan hẹn mí tindo ayajẹ lẹpo. Mí mọdọ gbẹzan dagbe hugan lọ die.

To ojlẹ de godo, onọ̀ ṣie gọjẹ Biblu plọn ji bo wá yí baptẹm. Podọ mẹdaho ṣie, asi etọn, gọna ovi yetọn lẹ ko lẹzun Kunnudetọ Jehovah tọn lẹ todin. Delẹ to hagbẹ ṣie hoho he n’má owẹ̀n Ahọluduta lọ tọn hẹ lẹ mẹ ko to Jehovah sẹ̀n todin ga.

E blawu dọ delẹ to hagbẹ whẹndo tọn ṣie lẹ mẹ ko kú na yé ma jo danuwiwa do wutu. Eyin n’ko zindonukọn to aliho dopolọ ji wẹ, nudopolọ sọgan ko jọ do yẹnlọsu go. N’dopẹ dọ Jehovah dọ̀n mi sẹpọ ede podọ sẹpọ sinsẹ̀n-basitọ etọn lẹ, he yí homẹfa po homẹdagbe po do plọn mi nado nọ yí nunọwhinnusẹ́n Biblu tọn lẹ do yizan mẹ to gbẹzan ṣie mẹ.