Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

ATỌ̀HỌ̀-NUHIHỌ́ LỌ TỌN SỌHA 5 2016

 HOSỌ HE JẸNUKỌN | FIE WẸ A SỌGAN MỌ HOMẸMIỌNNAMẸ YÍ TE?

Homẹmiọnnamẹ to Nuhahun lẹ Mẹ

Homẹmiọnnamẹ to Nuhahun lẹ Mẹ

Nuhahun voovo wẹ mí nọ pehẹ. Nugbo wẹ dọ mí ma sọgan dọhodo nuhahun lẹpo ji tofi, amọ́ mì gbọ mí ni dọhodo apajlẹ ẹnẹ he go mí ko donù wayi lẹ ji. Mì pọ́n lehe Jiwheyẹwhe miọnhomẹna mẹhe to nuhahun voovo mẹ lẹ do.

WHENUE AZỌ́N GBLEDO MẸ

“N’nọ kẹalọyi azọ́n wunmẹ lẹpo bọ mí nọ dapana akuẹzinzan he ma yin dandan tọn lẹpo.”—Jonathan

Seth * flindọ, “Ojlẹ dopolọ mẹ wẹ azọ́n gbledo yẹn po asi ṣie po. Alọgọ hagbẹ whẹndo tọn mítọn lẹ tọn po azọ́n kleunkleun he mí nọ wà lẹ po kẹdẹ go wẹ mí ganjẹ na owhe awe. Enẹwutu, asi ṣie Priscilla bẹ azọ̀n apọṣimẹ sinsinyẹn tọn, bọ n’nọ mọ dee di nuvọ́nọ.

“Etẹwẹ gọalọna mí? Priscilla nọ saba flin ede nue Jesu dọ to Matiu 6:34 mẹ lẹ. E dọ dọ mí ni ma yin magbọjẹnọ na osọ he ja blo, na azán dopodopo wẹ tindo magbọjẹ etọn titi lẹ. Odẹ̀ ahundopo tọn etọn lẹ sọ na ẹn huhlọn nado doakọnnanu. Na yẹn tọn, Salmu lẹ 55:22 wẹ miọnhomẹna mi. Taidi salmu-kantọ lọ, n’ze agbàn pinpẹn ṣie dlan Jehovah ji bọ e sọ penukundo go e. Nugbo wẹ dọ n’ko to azọ́nwa todin, amọ́ mí gbẹ́ hẹn gbẹzan mítọn bọawu sọgbe hẹ nue Jesu dọ to Matiu 6:20-22 mẹ. Podọ mí ko dọnsẹpọ Jiwheyẹwhe po ode awetọ po dogọ.”

Jonathan dọmọ: “N’jẹ nuhà ji gando sọgodo go to whenue ajọ́ kleun whẹndo mítọn tọn jai. Ahivivẹ nulẹ tọn zọ́n bọ owhe 20 he mí yí do wazọ́n sinsinyẹn lẹ ma wá de nude tọ́n. Yẹn po asi ṣie po nọ dọjlẹ gando akuẹ go. Mí tlẹ nọ dibu nado họ̀nú ahọ́, na mí ma yọnẹn eyin mí na mọ akuẹ bo sú.

“Ṣigba, Ohó Jiwheyẹwhe tọn po gbigbọ etọn po gọalọna mí nado basi nudide dagbe lẹ. N’nọ kẹalọyi azọ́n wunmẹ lẹpo bọ mí nọ dapana akuẹzinzan he ma yin dandan tọn lẹpo. Yisenọ hatọ mítọn lẹ sọ nọgodona mí. Yé nọ hẹn mí deji bo nọ gọalọna mí to ojlẹ sinsinyẹn lẹ mẹ.”

 WHENUE ALỌWLE DE GBAKIJA

Raquel flin dọmọ: “Whenue asu ṣie jo mi do to ajiji mẹ, e vẹna mi bọ n’biọ adi mẹ. N’sọ blawu taun. Ṣigba, n’dọnsẹpọ Jiwheyẹwhe, podọ ewọ miọnhomẹna mi. Jijọho Jiwheyẹwhe tọn basi hihọ́na ahun ṣie to whenue n’hodẹ̀ hlan ẹn egbesọegbesọ. E hẹn ahun ṣie he jẹflumẹ lọ jẹgangan.

“Podọ gbọn Ohó etọn Biblu gblamẹ, n’duto homẹgble po mẹhẹndohomẹ po ji. N’hẹn ohó apọsteli Paulu tọn he to Lomunu lẹ 12:21 mẹ do ayiha mẹ dọmọ: ‘A dike oylan gbawhàn towe blo, ṣigba nọ yí dagbe do gbawhàn oylan tọn.’

“To whedelẹnu mí dona yọnẹn dọ ‘nue jọ ko jọ.’ . . . Todin, n’tindo yanwle yọyọ lẹ to gbẹ̀mẹ.”—Raquel

“Họntọn dagbe de na mi ayinamẹ nado johodo. E do Yẹwhehodọtọ 3:6 hia mi bo yí homẹdagbe do dọna mi dọ, to whedelẹnu mí dona yọnẹn dọ ‘nue jọ ko jọ.’ Ayinamẹ lọ sinyẹn, amọ́ nue sin hudo n’tindo niyẹn. Todin, n’tindo yanwle yọyọ lẹ to gbẹ̀mẹ.”

Elizabeth dọmọ: “Eyin alọwle mẹtọn gbakija, yè nọ do hudo godonọnamẹ tọn. N’tindo họntọn vivẹ́ de he nọgodona mi egbesọegbesọ. E nọ viavi hẹ mi, nọ miọnhomẹna mi, bo nọ do owanyi hia mi. N’mọdọ Jehovah wẹ yí i zan nado fahomẹna mi.”

TO OJLẸ AZỌ̀N KAVI YỌNHOWHE TỌN MẸ

“N’nọ hodẹ̀ hlan Jehovah to whepoponu bo nọ mọdọ gbigbọ wiwe etọn nọ na mi huhlọn.”—Luis

Luis he go mí donù to hosọ tintan Atọ̀họ̀ ehe tọn mẹ to azọ̀n sinsinyẹn de jẹ, bo ko dibla kú whla awe. Todin, maṣinu he nọ namẹ jẹhọn dagbe (oxygène) nù wẹ e dona nọ nọ̀ na gànhiho 16 to gbèdopo. E dọmọ: “N’nọ hodẹ̀ hlan Jehovah to whepoponu bo nọ mọdọ gbigbọ wiwe etọn nọ na mi huhlọn. Dẹ̀hiho nọ na mi adọgbigbo nado zindonukọn na n’tindo yise to ewọ mẹ bo yọnẹn dọ e nọ hò ṣie pọ́n wutu.”

Petra he tindo owhe 80 linlán dọmọ: “N’nọ jlo na wà nususu, amọ́ n’ma nọ pé e go. Huhlọn ṣie he to didepo nọ vẹna mi taun. Agbọ́ nọ pé mi zẹjlẹgo, bọ amasin janwẹ n’nọ to nùnù. N’nọ saba flin whenue Jesu biọ to Otọ́ etọn si nado dike nuhahun de ni juwayi sọn e dè eyin e yọnbasi. Amọ́, Jehovah na huhlọn Jesu nado doakọnnanu, podọ yẹnlọsu ga. Odẹ̀ wẹ yin amasin ṣie egbesọegbesọ. Eyin n’hodẹ̀ hlan Jiwheyẹwhe, n’nọ mọ dee mẹ.”—Matiu 26:39.

 Numọtolanmẹ dopolọ wẹ Julian he ko to azọ̀n sinsinyẹn de jẹ sọn nudi owhe 30 die tindo. E dọmọ: “Yẹn ko yí kẹkẹ-sẹkunọ tọn do diọ otẹn azọ́ngán tọn. Ṣigba, gbẹzan ṣie pọnte todin, na n’to yíyí i zan to gigọ́ mẹ do mẹdevo lẹ tamẹ wutu. Nunamẹ sọgan de awufiẹsa pò, podọ Jehovah nọ hẹn opagbe etọn di nado hẹn mí lodo to ojlẹ nuhudo tọn mẹ. Taidi apọsteli Paulu, n’sọgan dọ nugbonugbo dọ: ‘To nulẹpo mẹ, yẹn tindo huhlọn lọ gbọn mẹlọ he nọ na mi huhlọn dali.’”—Filipinu lẹ 4:13.

TO WHENUE MẸYIWANNA DE KÚ

Antonio flindọ, “Whenue otọ́ ṣie bayi asidan bo kú, n’ma gán yise to tintan whenu. Mawadodo daho wẹ e di na mi—na aligbọntọ homẹvọnọ de poun wẹ e yin. Ṣigba, n’ma gán wà nudepope. E nọ kúdaa-gbẹ̀daa na azán atọ́n whẹpo do kú. N’nọ tẹnpọn nado dava dee to onọ̀ ṣie nukọn, amọ́ n’nọ viavi taun eyin n’to dee ṣo. ‘Etẹwutu? Etẹwutu?’ wẹ n’nọ to kinkanse dee.

“To ojlẹ enẹlẹ mẹ, n’nọ to bibiọ to Jehovah si nado gọalọna mi nado duto numọtolanmẹ ṣie lẹ ji bo na mi jijọho. Podọ vudevude wẹ n’wá mọ dee mẹ. N’flindọ Biblu dọ dọ mímẹpo ji wẹ ‘kosọ’ nọ wá. Na Jiwheyẹwhe ma sọgan dolalo wutu, n’kudeji dọ n’na gọ̀ otọ́ ṣie mọ to fọnsọnku whenu.”—Yẹwhehodọtọ 9:11; Johanu 11:25; Titu 1:2.

“Mahopọnna dọ visunnu mítọn kú to agahun he gbà lọ mẹ, mí gbẹ́ nọ flin ojlẹ susu he mí zan dopọ lẹ.”—Robert

Robert he go mí donù to hosọ bẹjẹeji tọn mẹ lọsu dọmọ: “Yẹn po asi ṣie po mọ jijọho ahun mẹ tọn he go Filipinu lẹ 4:6, 7 donù. Mí mọ jijọho ehe gbọn dẹ̀hiho hlan Jehovah dali. Jijọho ahun mẹ tọn ehe hẹn mí penugo nado dọhona linlin-kantọ lẹ gando todido fọnsọnku tọn go. Mahopọnna dọ visunnu mítọn kú to agahun he gbà lọ mẹ, mí gbẹ́ nọ flin ojlẹ susu he mí zan dopọ lẹ bo nọ tẹnpọn nado ze ayiha do yé ji.

“Whenue Kunnudetọ hatọ lẹ dọna mí dọ emi mọ mí to Televiziọn mẹ dile mí yí homẹfa do to zẹẹmẹ basi do nuyise mítọn ji, mí dọna yé dọ, odẹ̀ susu he yé hò do ota mítọn mẹ lẹ wẹ na ko gọalọna mí. N’yise dọ Jehovah wẹ to godonọna mí gbọn wekanhlanmẹ homẹmiọnnamẹ tọn yetọn lẹ gblamẹ.”

Dile apajlẹ he wayi lẹ dohia do, Jiwheyẹwhe sọgan miọnhomẹna mẹhe to pipehẹ nuhahun voovo lẹ. Bọ hiẹ lo? Mahopọnna nuhahun depope he a sọgan pehẹ to gbẹ̀mẹ, a sọgan yin homẹmiọnna. * Enẹwutu, naegbọn a ma na lẹhlan Jehovah na alọgọ? Ewọ wẹ “Jiwheyẹwhe homẹmimiọn lẹpo tọn.”2 Kọlintinu lẹ 1:3.

^ huk. 5 Yinkọ he tin to hosọ ehe mẹ delẹ ko yin didiọ.

^ huk. 23 Eyin a jlo na mọ alọgọ nado dọnsẹpọ Jiwheyẹwhe bo mọ homẹmiọnnamẹ etọn, jaale bo dọnsẹpọ Kunnudetọ Jehovah tọn he to lẹdo towe mẹ lẹ kavi kanwehlan azọ́nwatẹn yetọn he sẹpọ we.