Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

ATỌ̀HỌ̀-NUHIHỌ́ LỌ TỌN SỌHA 5 2016

 HOSỌ HE JẸNUKỌN | FIE WẸ A SỌGAN MỌ HOMẸMIỌNNAMẸ YÍ TE?

Lehe Jiwheyẹwhe Nọ Miọnhomẹnamẹ Do

Lehe Jiwheyẹwhe Nọ Miọnhomẹnamẹ Do

Apọsteli Paulu dlẹnalọdo Jehovah * taidi “Jiwheyẹwhe homẹmimiọn lẹpo tọn, he nọ miọnhomẹna mí to whlepọn mítọn lẹpo mẹ.” (2 Kọlintinu lẹ 1:3, 4) Enẹwutu, Biblu na mí jide dọ mímẹpo wẹ sọgan mọ alọgọ Jiwheyẹwhe tọn yí podọ nuhahun de ma tin he mẹ Otọ́ olọn mẹ tọn mítọn ma sọgan miọnhomẹna mí te.

Na nugbo tọn, mílọsu dona yí nude wà eyin mí jlo na mọ homẹmiọnnamẹ sọn Jiwheyẹwhe dè. Nawẹ doto de sọgan gọalọna mí gbọn eyin mí ma basi tito nado mọ ẹn? Yẹwhegán Amọsi kanse dọmọ: “Be omẹ awe sọgan zọnpọ eyin yé ma ko kọngbedopọ nado pé wẹ ya?” (Amọsi 3:3, nudọnamẹ odò tọn) Enẹwutu, Biblu dọmọ: “Mì dọnsẹpọ Jiwheyẹwhe, ewọ nasọ dọnsẹpọ mì.”—Jakọbu 4:8.

Etẹwẹ dohia dọ Jiwheyẹwhe na dọnsẹpọ mí? Tintan, na e dọna mí whlasusu dọ emi jlo na gọalọna mí. (Pọ́n  apotin he zọnpọ hẹ hosọ ehe.) Podọ awetọ, na mí tindo apajlẹ jọnun mẹhe e ko miọnhomẹna lẹ tọn—yèdọ to egbehe podọ to hohowhenu.

Taidi mẹsusu he nọ dín alọgọ sọn Jiwheyẹwhe dè to egbehe lẹ, Ahọlu Davidi lọsu pehẹ nuhahun susu. E vẹ̀ Jehovah to gbèdopo dọ: “Dotoaina ovẹ̀ ṣie to whenue yẹn dawhá ylọ we na alọgọ.” Be e dotoai ya? Mọwẹ. Davidi yidogọ dọ: “Yẹn ko mọ alọgọ etọn yí, bọ ahun ṣie gọ́ na ayajẹ.”—Salmu lẹ 28:2, 7.

ADÀ HE JESU NỌ YIWÀ TO HOMẸMIMIỌNNA MẸHE TO ALUẸMẸ LẸPO MẸ

Jiwheyẹwhe jlo dọ Jesu ni yí adà tangan de wà to whẹho ehe mẹ. Azọ́n devo he ewọ dena Jesu wẹ nado “blá apà na mẹhe ahun yetọn jẹflumẹ lẹ” bo “miọnhomẹna mẹhe to aluẹmẹ lẹpo.” (Isaia 61:1, 2) Dile e ko yin didọdai do, Jesu do ojlo nujọnu tọn hia to mẹhe “tin to magbọjẹ mẹ bọ yè doagban pinpẹn na” lẹ mẹ.—Matiu 11:28-30.

Jesu yí ayinamẹ nuyọnẹn tọn lẹ do miọnhomẹna gbẹtọ lẹ, jọmẹ hẹ yé bosọ hẹnazọ̀ngbọna yé to ninọmẹ delẹ mẹ. To gbèdopo, pòtọnọ de vẹ̀ ẹ dọmọ: “Eyin hiẹ jlo domọ, hiẹ sọgan hẹn mi zun wiwe.” Lẹblanu whàn ẹn bọ e gblọn dọ: “Yẹn jlo! Yin hinhẹn zun wiwe.” (Malku 1:40, 41) Ewọ sọ jẹgangan.

 To egbehe, Visunnu Jiwheyẹwhe tọn ma to aigba ji nado miọnhomẹna mí. Amọ́, Otọ́ etọn Jehovah, yèdọ “Jiwheyẹwhe homẹmimiọn lẹpo tọn,” gbẹ́ to alọgọna mẹhe tindo nuhudo lẹ. (2 Kọlintinu lẹ 1:3) Pọ́n aliho titengbe ẹnẹ he mẹ ewọ nọ miọnhomẹna mí te.

  • Biblu. “Nuhe ko yin kinkandai jẹnukọn lẹpo yin kinkandai na oplọn mítọn, na míwlẹ nido sọgan tindo todido gbọn akọndonanu mítọn gblamẹ podọ gbọn homẹmimiọn sọn Owe-wiwe lẹ mẹ gblamẹ.”—Lomunu lẹ 15:4.

  • Gbigbọ Wiwe Jiwheyẹwhe Tọn. Ojlẹ vude to okú Jesu tọn godo, agun Klistiani tọn blebu biọ ojlẹ jijọho tọn mẹ. Etẹwutu? “[Agun lọ] zindonukọn nado to budisi Jehovah bosọ to gbẹnọ sọgbe hẹ homẹmimiọn he gbigbọ wiwe nọ namẹ.” (Owalọ lẹ 9:31) Gbigbọ wiwe, yèdọ huhlọn-yido-wazọ́n Jiwheyẹwhe tọn, do huhlọn taun. Jiwheyẹwhe sọgan yí i zan nado miọnhomẹna mímẹpo to ninọmẹ depope mẹ.

  • Odẹ̀. Biblu na mí ayinamẹ dọmọ: “Mì yin magbọjẹnọ na nudepope blo.” Kakatimọ, e dọmọ: “[Mì] hẹn obiọ mìtọn lẹ zun yinyọnẹn na Jiwheyẹwhe; jijọho Jiwheyẹwhe tọn he yiaga hugan nukunnumọjẹnumẹ lẹpo nasọ họ́ ahun mìtọn po nugopipe apọ̀nmẹ tọn mìtọn po.”—Filipinu lẹ 4:6, 7.

  • Klistiani Hatọ Lẹ sọgan yin họntọn nugbo lẹ he go mí na nọ ganjẹ nado mọ homẹmimiọn yí to nuhahun lẹ mẹ. Apọsteli Paulu ylọ gbẹdohẹmẹtọ etọn lẹ dọ “asisa homẹmiọnnamẹ tọn daho de” to ojlẹ ‘ayimajai po nukunbibia po’ tọn lẹ mẹ.—Kolosinu lẹ 4:11; 1 Tẹsalonikanu lẹ 3:7.

Ṣigba, a sọgan kanse dewe dọ, be onú ehe lẹpo sọgan yọnbasi nugbo ya? Mì gbọ mí ni yí sọwhiwhe do gbadopọnna numimọ mẹhe pehẹ nuhahun he go mí donù to bẹjẹeji lẹ tọn. Taidi yewlẹ, a sọgan mọdọ Jiwheyẹwhe gbẹ́ nọ hẹn opagbe homẹmiọnnamẹ tọn ehe di dọmọ: “Dile onọ̀ de nọ miọnhomẹna visunnu etọn do, mọ wẹ yẹn na nọ to homẹmiọnna mì do.”Isaia 66:13.

^ huk. 3 Jehovah wẹ yinkọ Jiwheyẹwhe tọn dile Biblu dohia do.