Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Atọ̀họ̀-Nuhihọ́ lọ Tọn  |  Sọha 4 2017

Hójọhó didọ do mẹwhenu yin nujọnu

Whenue Mẹyiwanna de to Azọ̀n He Ma Tindo Todido de Jẹ

Whenue Mẹyiwanna de to Azọ̀n He Ma Tindo Todido de Jẹ

DOREEN jẹflumẹ to whenue yè mọ nutitẹ̀ apọ̀nmẹ tọn sinsinyẹn de na asu etọn Wesley, he tindo owhe 54 poun. * Doto lẹ dọna ẹn dọ osun kleun de janwẹ e na nọgbẹ̀ na. “N’ma gán yí nuhe dọ yé te sè,” wẹ e flin. “N’jẹflumẹ pete na osẹ susu. E taidi dọ mẹdevo go wẹ e to jijọ do, e ma yin míwlẹ. N’ma donukun paali.”

E blawu dọ mẹsusu wẹ nọ tindo numọtolanmẹ Doreen tọn nkọ. Azọ̀n he ma tindo todido sọgan yinuwado mẹdepope ji to whedepopenu. E jẹna ayidego dọ mẹsusu nọ desọn ojlo mẹ nado penukundo mẹyiwanna yetọn he to azọ̀n mọnkọtọn jẹ go. Ṣigba, nukunpedomẹgo enẹ nọ kàn dẹpẹ biọ. Etẹwẹ hagbẹ whẹndo tọn lẹ sọgan wà nado miọnhomẹna mẹyiwanna de he to azọ̀n mọnkọtọn jẹ bo penukundego? Nawẹ nukunpedomẹgotọ lẹ sọgan duto numọtolanmẹ he yé na tindo to ojlẹ azọ̀n tọn lọ mẹ lẹ ji gbọn? Dile okú mẹlọ tọn to sisẹpọ, etẹwẹ yè sọgan donukun? Jẹnukọn whẹ́, mí ni gbadopọnna nuhewutu nukunpipedo mẹhe to azọ̀n mọnkọ jẹ go do nọ vẹawu taun to egbehe.

NUHAHUN DE TO EGBEHE

Lẹnunnuyọnẹn to dotozọ́nwiwa-liho ko wà nususu bọ gbẹtọ lẹ ma nọ yawu kú ba. To nudi owhe kanweko die, etlẹ yin to otò he hunnukun lẹ mẹ, gbẹtọ lẹ ma nọ nọgbẹ̀ dẹn sọmọ. Azọ̀n bẹplamẹ kavi asidan nọ yawu hùmẹ. Dotowhé ma sù, bọ mẹsusu nọ yin nukunpedego gbọn whẹndo yetọn dali bo nọ kú do whégbè.

To egbehe, nukọnyiyi dotozọ́nwiwa tọn zọ́n bọ doto lẹ nọ hoavùn sinsinyẹn sọta azọ̀n nado hẹn gbẹtọ lẹ dogbẹ̀. Azọ̀n de he na ko yawu hùmẹ dai sọgan gbẹ́ dẹn na owhe susu dogọ to egbehe. Ṣigba, gbẹninọ dogọ sọgan nọma yin pọngbọ de. Awutunọ delẹ nọ yin madogánnọ sọmọ bọ yé ma sọgan penukundo yede go. Nukunpipedo omẹ mọnkọ lẹ go ko wá lẹzun nuhe kàn dẹpẹ biọ taun.

 Taidi kọdetọn de, mẹsusu dogọ wẹ nọ wá kú do dotowhé. To egbehe, mẹsusu ma jẹakọ hẹ lehe gbẹtọ nọ kú do, podọ omẹ vude wẹ ko mọ bọ mẹde kú pọ́n. Enẹwutu, eyin mẹde ma yọ́n lehe e nọ yì do, ehe sọgan hẹn ẹn vẹawuna ẹn kavi tlẹ glọnalina vivẹnu etọn nado penukundo mẹhe to azọ̀njẹ de go. Etẹwẹ sọgan gọalọ?

TITO BIBASI JẸNUKỌN

Dile apajlẹ Doreen tọn dohia do, mẹsusu wẹ nọ jẹflumẹ to whenue yè mọ azọ̀n he ma tindo todido de na mẹyiwanna yetọn. To ojlẹ magbọjẹ, obu, po awubla sinsinyẹn po tọn enẹ mẹ, etẹwẹ sọgan gọalọna we nado wleawudaina nuhe to nukọn ja lọ? Devizọnwatọ nugbonọ Jiwheyẹwhe tọn de hodẹ̀ dọmọ: “Plọn mí lehe mí sọgan hia azán mítọn lẹ do na mí nido tindo ahun nuyọnẹn tọn.” (Salmu lẹ 90:12) Mọwẹ, nọ hodẹ̀ vẹkuvẹku na Jehovah Jiwheyẹwhe dọ e ni do lehe a sọgan yí nuyọnẹn do ‘hia azán towe lẹ’ do hia we, na a nido sọgan zan whenu he pò na mẹyiwanna towe lọ hẹ ẹ to aliho dagbe mẹ.

E nọ biọ tito dagbe bibasi. Eyin mẹyiwanna towe sọgan gbẹ́ dọho bosọ tindo ojlo nado dọhodo whẹho lọ ji, e na yọ́n nado kanse e mẹhe e jlo dọ ni basi nudide do otẹn etọn mẹ to whenue e ma na penugo nado wàmọ. Hodọdopọ dagbe nado yọnẹn eyin e jlo na yin hinhẹn dogbẹ̀ gbọn azọ́nwanu lẹnunnuyọnẹn tọn lẹ dali, yin ginglọndo dotowhé kavi kẹalọyi nukunpedomẹgo wunmẹ de sọgan zọ́n bọ wiwọ́ po numọtolanmẹ whẹhuhu tọn po na depò to hagbẹ whẹndo tọn he na yin hinhẹn gánnu-gánnu nado basi nudide lẹ ṣẹnṣẹn. Hójọhó didọ do mẹwhenu nọ zọ́n bọ whẹndo lọ nọ ze ayiha do nukunpipedo mẹhe to azọ̀njẹ lọ go ji. “Fie wedide dopọ ma tin te, tito lẹ nọ gboawupo,” wẹ Biblu dọ.—Howhinwhẹn lẹ 15:22.

LEHE YÈ SỌGAN GỌALỌ DO

To paa mẹ, azọngban tangan nukunpedomẹgotọ lọ tọn wẹ nado miọnhomẹnamẹ. Mẹhe to kúdonu lọ dona mọdọ yè yiwanna emi bo ma jo emi do. Nawẹ ehe sọgan yin wiwà gbọn? Nọ hiawe na mẹlọ kavi jihàn na ẹn, nọ de owe kavi ohàn he na jlọ ẹ dote bo na ẹn ayajẹ lẹ. Mẹsusu nọ yin homẹmiọnna eyin hagbẹ whẹndo tọn de hẹn alọ yetọn go bo dọhona yé po ogbè dẹẹdẹ po.

E nọ saba gọalọ eyin e yọ́n mẹhe wá dla ẹ pọ́n lẹ. Linlin de dọmọ: “To nugopipe atọ́n mítọn lẹ mẹ, nusise wẹ nọ yin hinhẹnbu gbọn godo. [Awutunọ lẹ] gán gbẹ́ sènu ganji eyin etlẹ taidi dọ yé to amlọndọ, enẹwutu ma dọ nude he a ma na dọ eyin yé to nukle blo.”

Eyin e yọnbasi, mì nọ hodẹ̀ dopọ. Biblu dọ dọ to  nujijọ de whenu, apọsteli Paulu po gbẹdohẹmẹtọ etọn lẹ po to kọgbidinamẹ sinsinyẹn glọ bo ma tlẹ yọnẹn dọ yé na gán. Alọgọ wunmẹ tẹwẹ yé dín? Paulu dọna họntọn etọn lẹ dọmọ: “Mìlọsu ga sọgan gọalọna mí gbọn ovẹvivẹ mìtọn do ota mítọn mẹ dali.” (2 Kọlintinu lẹ 1:8-11) Odẹ̀ ahundopo tọn to apọṣimẹ po azọ̀n sinsinyẹn po whenu yin nujọnu.

KẸALỌYI NUGBO LỌ

Linlẹn lọ dọ mẹyiwanna de na kú nọ saba hẹnmẹ jẹflumẹ. E ma dona paṣamẹ, na okú ma yin jọwamọnu. Mí ma yin didá nado kẹalọyi okú taidi apadewhe gbẹzan mítọn tọn. (Lomunu lẹ 5:12) Abajọ, Ohó Jiwheyẹwhe tọn ylọ okú dọ “kẹntọ” de. (1 Kọlintinu lẹ 15:26) Enẹwutu, e sọgbe ma nado nọ jlo nado lẹnnupọndo okú mẹyiwanna de tọn ji.

Etomọṣo, nulinlẹnpọn do nuhe sọgan wá jọ ji sọgan gọalọna hagbẹ whẹndo tọn lọ lẹ ma nado dibu zẹjlẹgo bo ze ayiha do lehe nulẹ na yì do to aliho dagbe mẹ ji. Delẹ to nuhe sọgan jọ lẹ mẹ yin sislẹ do apotin lọ “ Osẹ Godo Tọn Lẹ” mẹ. Nugbo wẹ dọ e ma yin onú enẹ lẹpo wẹ nọ jọ do awutunọ lẹpo go gba, podọ e ma yin dandan dọ ni jọ do lehe e yin sislẹ do. Ṣigba, suhugan awutunọ lẹ tọn wẹ nọ pehẹ e whè gbau delẹ to diọdo enẹlẹ mẹ.

To okú mẹyiwanna de tọn godo, e sọgan yọ́n nado ylọ họntọn de he ko do ojlo hia nado gọalọ. Nuhe nukunpedomẹgotọ lọ lẹ po whẹndo lọ po sọgan tindo nuhudo etọn wẹ yindọ yè ni hẹn yé kudeji dọ awufiẹsa mẹyiwanna yetọn tọn ko vọ̀ bọ e masọ to yaji ba. Mẹdatọ mítọn gbọn owanyi dali hẹn mí deji dọ, “oṣiọ lẹ ma yọ́n nudepope.”—Yẹwhehodọtọ 9:5.

NUKUNPEDOMẸGOTỌ DAHO LỌ

Mí sọgan plọn ma nado nọ gbẹ́ alọgọ mẹdepope tọn dai

Nujọnu wẹ e yin nado nọ ganjẹ Jiwheyẹwhe go, e ma yin to whenue hagbẹ whẹndo tọn de to azọ̀n he ma tindo todido jẹ kẹdẹ gba, ṣigba to awubla he nọ bọdo okú go whenu ga. E sọgan gọalọna we gbọn ohó po nuyiwa mẹdevo lẹ tọn po dali. “N’plọn ma nado nọ gbẹ́ alọgọ mẹdepope tọn dai,” wẹ Doreen dọ. “Na nugbo tọn, alọgọ he mí mọyi sù taun. E họnwun na yẹn po asu ṣie po dọ Jehovah wẹ to didọna mí dọ, ‘N’tin tofi po mì po nado gọalọna mì.’ N’ma na wọn enẹ gbede.”

Mọwẹ, Jehovah Jiwheyẹwhe wẹ Nukunpedomẹgotọ daho lọ. Taidi Basitọ mítọn, e nọ mọnukunnujẹ awufiẹsa po awubla mítọn lẹ po mẹ. Ewọ penugo bosọ jlo nado gọalọna mí bo na tuli mí na mí nido doakọnnanu. Ṣigba humọ, e dopagbe dọ emi na de okú sẹ̀ kakadoi bo na fọ́n gbẹtọ liva susu he to oflin emitọn mẹ lẹ sọnku. (Johanu 5:28, 29; Osọhia 21:3, 4) Whenẹnu, mẹlẹpo sọgan vọ́ hogbe apọsteli Paulu tọn lẹ dọ dọmọ: “Okú E, fie wẹ awhàngbigba towe te? Okú E, fie wẹ adí towe te?”—1 Kọlintinu lẹ 15:55.

^ huk. 2 Yinkọ lẹ ko yin didiọ.