Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Atọ̀họ̀-Nuhihọ́ lọ Tọn  |  Sọha 4 2017

Diblayin sinsẹ̀n nukundeji lẹpo wẹ yise dọ alindọn yin jọmaku

 HOSỌ HE JẸNUKỌN | OGBẸ̀ PO OKÚ PO—NUHE BIBLU DỌ GANDEGO

Kanbiọ He Gẹdẹ De

Kanbiọ He Gẹdẹ De

LINLẸN voovo wẹ gbẹtọ lẹ nọ tindo gando ogbẹ̀ po okú po go. Mẹdelẹ nọ lẹndọ to okú godo, yé na gbẹ́ to gbẹnọ, vlavo to ninọmẹ devo mẹ kavi to fidevo. Mẹdevo lẹ nọ lẹndọ yé na yin vivọji to awusọhia devo mẹ. Ṣigba, mẹdevo lẹ nọ lẹndọ okú wẹ opodo nulẹpo tọn.

Hiẹ lọsu sọgan ko tindo nuyise towe titi gando whẹho lọ go sọgbe hẹ lehe a yin pinplọn whẹ́n do kavi aṣa lẹdo towe tọn. To whenuena e yindọ linlẹn lẹ gando nuhe nọ jọ eyin yè kú go gbọnvo taun, be mẹde kavi fide tin he mí gán lẹhlan nado mọ gblọndo nujọnu tọn na kanbiọ he gẹdẹ ehe ya?

Na owhe kanweko susu lẹ, sinsẹ̀ngán lẹ ko plọnmẹ nuyise alindọn jọmaku tọn. Diblayin sinsẹ̀n nukundeji lẹpo, enẹ wẹ Klistiani lẹ, Hindu lẹ, Ju lẹ, Malenu lẹ po devo lẹ po wẹ yise dọ alindọn yin jọmaku bo nọ tọ́n sọn agbasa gbẹtọ tọn mẹ bosọ nọ yì nọgbẹ̀ to lẹdo gbigbọ tọn de mẹ to okú godo. To alọ devo mẹ, Bouddha-sẹ̀ntọ lẹ yise dọ to whenue mẹde ko yin vivọji whlasusu godo, huhlọn kavi nugopipe apọ̀nmẹ tọn he to mẹlọ mẹ nọ wá jẹ ninọmẹ dagbe hugan de mẹ, ehe nọ yin yiylọdọ Nirvana.

Nuplọnmẹ ehelẹ zọ́n bọ suhugan gbẹtọ lẹ tọn lẹdo aihọn pé ko wá yise dọ okú nọ hùnali dote nado nọgbẹ̀ to aihọn devo mẹ. Na mẹsusu, okú yin afọdide titengbe de to adàdidiọ gbẹzan tọn mẹ, podọ yé nọ mọdọ okú yin apadewhe ojlo Jiwheyẹwhe tọn. Ṣigba, etẹwẹ Biblu dọ gando whẹho lọ go? Jaale bo hia hosọ he bọdego. Gblọndo lọ sọgan paṣa we.