“Jehovah E, nawẹ yẹn na to awhádo na alọgọ dẹnsọ bọ hiẹ ma na sè? Nawẹ yẹn na to alọgọ biọ sọn danuwiwa mẹ dẹnsọ bọ hiẹ ma na dademẹ?” (Habakuku 1:2, 3) Habakuku, yèdọ dawe dodonọ de he Jiwheyẹwhe yiwanna wẹ zan hogbe ehelẹ. Be kanbiọ etọn lẹ dohia dọ e ma do yise wẹ ya? Lala! Jiwheyẹwhe na jide Habakuku dọ Emi ko de ojlẹ de nado doalọtena yajiji.—Habakuku 2:2, 3.

To whenue hiẹ kavi mẹvivẹ towe de to yaji, e nọ bọawu nado lẹndọ Jiwheyẹwhe to gbàndọn nado yinuwa. Amọ́, Biblu na mí jide dọ: “Jehovah ma to gbàndọn gando opagbe etọn go, dile mẹdelẹ nọ lẹn gbàndindọn do, ṣigba e to homẹfa na mìtọn wutu, na e ma jlo dọ mẹdepope ni yin vivasudo ṣigba jlo dọ mẹlẹpo ni wá lẹnvọjọ kọ̀n.”—2 Pita 3:9.

WHETẸNU WẸ JIWHEYẸWHE NA YINUWA?

Zande din! Jesu dohia dọ whẹndo de na mọ bẹplidopọ nujijọ vonọtaun delẹ tọn he na dohia dọ mí to gbẹnọ to azán godo tọn “titonu lọ tọn” lẹ mẹ. (Matiu 24:3-42) Dọdai Jesu tọn lẹ he to hẹndi mọ to ojlẹ mítọn mẹ dohia dọ Jiwheyẹwhe na yinuwa zande din. *

Amọ́, nawẹ Jiwheyẹwhe na doalọtena yajiji lẹpo gbọn? To whenue Jesu to aigba ji, e dohia dọ Jiwheyẹwhe dohuhlọn nado de yajiji gbẹtọvi lẹ tọn sẹ̀. Pọ́n apajlẹ delẹ.

Nugbajẹmẹji Jọwamọ Tọn Lẹ: To whenue Jesu po apọsteli etọn lẹ po to tọjihun mẹ to Ohù Galili tọn ji, yujẹhọn daho de fọ́n bo jlo na siọ ohún yetọn. Amọ́, Jesu dohia dọ ewọ po Otọ́ etọn po gán deanana huhlọn jọwamọ tọn lẹ. (Kolosinu lẹ 1:15, 16) Jesu dọ poun dọ: “Danido! Nọ whii!” Etẹwẹ yin kọdetọn lọ? “Jẹhọn lọ sọ doalọte, bọ abọẹninọ daho de wá aimẹ.”—Malku 4:35-39.

Azọ̀n: Mẹsusu yọ́n Jesu na nugopipe etọn nado gbọazọ̀nna nukuntọ́nnọ lẹ, sẹkunọ lẹ, adíngbenọ lẹ, pòtọnọ lẹ gọna mẹhe do madogán wunmẹ devo lẹ. E “hẹnazọ̀ngbọna mẹhe ma to gángán lẹpo.”Matiu 4:23, 24; 8:16; 11:2-5.

Núdùdù Whèdomẹ: Jesu yí huhlọn he Otọ́ etọn na ẹn zan nado hẹn núdùdù vude zun susu. Biblu dọ dọ whla awe wẹ e na núdùdù gbẹtọ fọtọ́n susu to whenue e to aigba ji.—Matiu 14:14-21; 15:32-38.

Okú: Omẹ atọ̀n he Jesu fọnsọnku to ninọmẹ voovo lẹ mẹ dohia dọ Jehovah dohuhlọn nado de okú sẹ̀. Dopo to yé mẹ ko nọ yọdò mẹ na azán ẹnẹ whẹpo Jesu do fọ́n ẹn.—Malku 5:35-42; Luku 7:11-16; Johanu 11:3-44.

^ huk. 5 Na nudọnamẹ dogọ gando azán godo tọn lẹ go, pọ́n weta 9tọ owe Etẹwẹ Biblu Sọgan Plọn Mí? tọn he Kunnudetọ Jehovah tọn lẹ zinjẹgbonu, ehe sọgan yin mimọyi vọnu to www.jw.org ji.