TODIDO DAGBE NANKỌ DIE! Mẹdatọ mítọn dopà nado na mí ogbẹ̀ madopodo, to aigba ji fi. Amọ́, e nọ vẹawuna mẹsusu nado yí enẹ sè. Yé nọ dọ dọ, ‘Okú ma glo mẹde. Jọ mí jọ wá mọ okú.’ Mẹdevo lẹ nọ mọdọ yè gán nọgbẹ̀ kakadoi, amọ́ e ma na yin to aigba ji fi. Yé nọ dọ dọ whenue mẹde kú bo yì olọn mẹ godo wẹ e gán nọgbẹ̀ kakadoi. Etẹ a lẹn?

Jẹnukọn whẹ́, e na yọ́n dọ a ni pọ́n gblọndo Biblu tọn na kanbiọ atọ̀n ehelẹ: Etẹwẹ aliho he mẹ gbẹtọ yin didá te dohia gando lehe e gán nọgbẹ̀ dẹnsọ do go? Etẹwẹ yin ojlo Jiwheyẹwhe tọn na aigba po gbẹtọ po to bẹjẹeji? Etẹwẹ hẹn okú wá?

LEHE GBẸTỌ YIN DIDÁ DO

To nuhe Jiwheyẹwhe dá do aigba ji lẹpo mẹ, gbẹtọ kẹdẹ wẹ gbọnvo. Gbọnna? Biblu dọ dọ gbẹtọ kẹdẹ wẹ yin didá to “apajlẹ” Jiwheyẹwhe tọn mẹ. (Jenẹsisi 1:26, 27) Etẹwẹ enẹ zẹẹmẹdo? E zẹẹmẹdo dọ gbẹtọ tindo nugopipe po jẹhẹnu Jiwheyẹwhe tọn nkọ lẹ po, taidi owanyi po whẹdida dodo po.

Humọ, gbẹtọ tindo nugopipe lọ nado nọ lẹnnupọn, yọ́n dagbe dovo na oylan bo gán jihọntọn hẹ Jiwheyẹwhe. Enẹwutu wẹ mí gán yọ́n lehe wẹkẹ lọ klo sọ, bo nọ mọ lehe nudida lẹ yọnwhanpẹ do bosọ nọ duvivi anazọ́n lẹ tọn, gọna nuhiho po ohó milomilo lẹ po. Hú popolẹpo, gbẹtọ tindo nugopipe vonọtaun lọ nado sẹ̀n Mẹdatọ lọ. Nugopipe enẹlẹ wẹ zọ́n bọ gbẹtọ gbọnvo taun na nudida gbẹ̀te devo he pò to aigba ji lẹpo.

Todin, lẹnnupọn pẹẹde: Be Jiwheyẹwhe na ko na mí nugopipe dagbedagbe enẹlẹ po huhlọn lọ po nado nọ yí yé zan, eyin owhe vude poun wẹ ewọ jlo dọ mí ni nọgbẹ̀ na ya? Nugbo lọ wẹ yindọ Jiwheyẹwhe na mí jẹhẹnu po nugopipe vonọtaun enẹlẹ po, na mí nido duvivi ogbẹ̀ tọn to aigba ji fi kakadoi.

OJLO JIWHEYẸWHE TỌN TO BẸJẸEJI

Mẹdelẹ nọ dọ dọ e ma yin ojlo Jiwheyẹwhe tọn dọ gbẹtọ ni nọgbẹ̀ kakadoi to aigba ji. Yé nọ dọ dọ ojlẹ gli de wẹ mí na nọgbẹ̀ na to aigba ji fi, na yè nido yọ́n mẹhe jẹ nado nọgbẹ̀ kakadoi to olọn mẹ hẹ Jiwheyẹwhe lẹ. Amọ́ eyin enẹ yin nugbo, be e ma na dohia dọ Jiwheyẹwhe wẹ nọ hẹn nuylankan po yajiji he to aigba ji lẹ po wá ya? Ehe ka na jẹagọdo nuhe Biblu dọ gando Jiwheyẹwhe go. Biblu dọmọ: “Aliho etọn lẹpo wẹ nọ do whẹdida dodo  hia. Jiwheyẹwhe nugbonọ de wẹ bo ma nọ dawhẹ agọ̀ gbede; dodonọ podọ nugbonọ wẹ ewọ.”—Deutelonomi 32:4.

Biblu dọ nuhe yin ojlo Jiwheyẹwhe tọn na aigba to bẹjẹeji dọmọ: “Na nuhe dù olọn, Jehovah tọn wẹ, ṣigba, aigba wẹ ewọ ko yí na gbẹtọvi lẹ.” (Salmu lẹ 115:16) Mọwẹ, Jiwheyẹwhe dá aigba nado yin owhé whanpẹnọ de na gbẹtọ kakadoi, podọ e ko na mí nuhe sin hudo mí do nado duvivi ogbẹ̀ tọn to aigba ji kakadoi lẹ.—Jenẹsisi 2:8, 9.

“Na nuhe dù olọn, Jehovah tọn wẹ, ṣigba, aigba wẹ ewọ ko yí na gbẹtọvi lẹ.”​—Salmu lẹ 115:16

Biblu sọ dọ nuhe yin ojlo Jiwheyẹwhe tọn na gbẹtọ. E degbena asu po asi po tintan nado ‘gọ́ aigba ji bo dugán do e ji, podọ nado dugán do nudida he nọ sẹtẹn to aigba ji lẹpo ji.’ (Jenẹsisi 1:28) Yẹyi nankọ die na yé nado penukundo Paladisi lọ go bo gbloada na ẹn gbọn aigba lẹpo ji! Na nugbo tọn, todido he Adam po Evi po, gọna ovi he yé na wá ji lẹ tindo wẹ nado nọgbẹ̀ kakadoi to aigba ji, e ma yin to olọn mẹ.

NAEGBỌN MÍ DO NỌ KÚ?

Bọ naegbọn mí do nọ kú? Biblu dohia dọ dopo to angẹli Jiwheyẹwhe tọn lẹ mẹ he ṣiatẹ bo wá lẹzun Satani Lẹgba wẹ tẹnpọn nado hẹn tito Jiwheyẹwhe tọn to Edẹni mẹ gble. Gbọnna?

Satani klọ mẹjitọ mítọn tintan lẹ, Adam po Evi po, bọ yelọsu ṣiatẹ sọta Jiwheyẹwhe. Satani dọna yé dọ Jiwheyẹwhe to nudagbe de ze whlá do yé, enẹ wẹ jlọjẹ lọ nado de nue sọgbe po nue ma sọgbe po na yede, bọ yé setonuna ẹn bo vẹtolina Jiwheyẹwhe. Nawẹ nulẹ wá yì do? Yé wá kú, dile Jiwheyẹwhe ko dọ do. Yé ma gán sọ nọgbẹ̀ kakadoi to Paladisi mẹ to aigba ji ba.—Jenẹsisi 2:17; 3:1-6; 5:5.

Atẹṣiṣi Adam po Evi po tọn wẹ bẹpla gbẹtọ lẹpo kakajẹ egbé. Biblu dọmọ: “Ylando gbọn mẹdopo [Adam] gblamẹ biọ aihọn mẹ podọ okú gbọn ylando gblamẹ wá, gbọnmọ dali okú dlẹnkan jẹ mẹlẹpo dè.” (Lomunu lẹ 5:12) Mí nọ kú, na mí dugu ylando po okú po tọn sọn mẹjitọ mítọn tintan lẹ dè wutu, e ma yindọ yè ko kàn ẹn do mí ji kavi dọ ojlo Jiwheyẹwhe tọn wẹ gba.

A GÁN NỌGBẸ̀ KAKADOI TO AIGBA JI

Atẹṣiṣi he wá aimẹ to Edẹni mẹ ma diọ nuhe yin ojlo Jiwheyẹwhe tọn to bẹjẹeji na gbẹtọ po aigba po gba. Owanyi nugbo po whẹdida dodo Jiwheyẹwhe tọn po wẹ zọ́n bọ e kàn ayiha nado whlẹn mí sọn ylando po okú po si. Apọsteli Paulu dọ dọ: “Ale ylando tọn wẹ okú, ṣigba nunina he Jiwheyẹwhe nọ namẹ wẹ ogbẹ̀ madopodo gbọn Klisti Jesu Oklunọ mítọn dali.” (Lomunu lẹ 6:23) Gbọn owanyi dali, Jiwheyẹwhe “namẹ Visunnu detọ́n dopo akàn etọn [Jesu Klisti], na mẹdepope he do yise hia to ewọ mẹ ma nado yin vivasudo adavo nado tindo ogbẹ̀ madopodo.” (Johanu 3:16) To whenue Jesu ze ede jo sọn ojlo mẹ wá taidi ofligọ de, e vọ́ nuhe Adam ko hẹnbu lẹpo hẹngọwa. *

To madẹnmẹ, opagbe Jiwheyẹwhe tọn dọ aigba na lẹzun paladisi na mọ hẹndi. A sọgan duvivi sọgodo dagbe ehe tọn, eyin a setonuna ayinamẹ Jesu tọn ehe: “Mì gbọn họntonu bibó lọ nù biọ e mẹ, na gbigblo wẹ họntonu lọ podọ gblagada wẹ aliho lọ he nọ planmẹ yì vasudo, mẹsusu wẹ sọ to gbingbọn e nù biọ e mẹ; to whenuena e yindọ bibó wẹ họntonu lọ podọ jinján wẹ aliho lọ he nọ planmẹ yì ogbẹ̀ mẹ, omẹ vude wẹ sọ to dindin in mọ.” (Matiu 7:13, 14) Mọwẹ, alọ towe titi mẹ wẹ sọgodo towe te. Be nudide towe lẹ na do enẹ hia ya?

^ huk. 17 Nado mọ nudọnamẹ dogọ gando ale he ofligọ lọ sọgan hẹnwa na we go, pọ́n weta 5tọ owe lọ Etẹwẹ Biblu Sọgan Plọn Mí? tọn, he Kunnudetọ Jehovah tọn lẹ zinjẹgbonu, e sọ tin-to-aimẹ to www.jw.org ji.