Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

ATỌ̀HỌ̀-NUHIHỌ́ LỌ TỌN SỌHA 2 2016

 HOSỌ HE JẸNUKỌN

Naegbọn Jesu Do Jiya bo Kú?

Naegbọn Jesu Do Jiya bo Kú?

“Ylando gbọn omẹ dopo [Adam] gblamẹ biọ aihọn mẹ podọ okú gbọn ylando gblamẹ wá.”—Lomunu lẹ 5:12

Etẹwẹ na yin gblọndo towe eyin yè kanse we dọ, “Be e na jlo we nado nọgbẹ̀ kakadoi ya?” Vlavo mẹsusu wẹ na dọ dọ e na jlo yé nado wàmọ, ṣigba yé lẹndọ odlọ de poun wẹ. Yé nọ dọ dọ jọwamọnu de wẹ okú yin to gbẹzan mítọn mẹ.

Mí ni dọ dọ yè wá kanse we todin dọ, “Be a jlo na kú ya?” To paa mẹ, gblọndo he suhugan gbẹtọ lẹ tọn na na wẹ lala. Naegbọn e do yinmọ? To jọwamọ-liho, ojlo mítọn wẹ nọ yin nado nọgbẹ̀ mahopọnna whlepọn po nuhahun depope he mí to pipehẹ po. Biblu dohia dọ Jiwheyẹwhe dá gbẹtọvi lẹ po ojlo lọ po nado nọgbẹ̀. Na nugbo tọn, e dọ dọ, “e yí wẹkẹ do ayiha yetọn mẹ ga.”—Yẹwhehodọtọ 3:11.

Ṣigba, nugbo lọ wẹ yindọ gbẹtọvi lẹ ma nọ nọgbẹ̀ kakadoi. Etẹwẹ jọ lo? Humọ, be Jiwheyẹwhe ko yí nude wà nado didẹ nuhahun lọ ya? Gblọndo Biblu tọn lẹ vọ́ jidenamẹ podọ yé sọ do nuhewutu Jesu do jiya bo kú hia.

NUHE JỌ LỌ

Weta atọ̀n tintan Gẹnẹsisi he yin owe Biblu tọn tọn lẹ dọna mí dọ Jiwheyẹwhe ze todido lọ nado nọgbẹ̀ kakadoi donukọnna Adam po Evi po he yin asu po asi po tintan lọ bo dọ nuhe yé dona ko wà nado duvivi todido ehe tọn na yé. Enẹgodo, kandai lọ basi zẹẹmẹ lehe yé vẹtolina Jiwheyẹwhe bo hẹn todido enẹ bu do tọn. Otàn lọ yin didọ to aliho he bọawu mẹ, enẹwutu mẹdelẹ nọ yawu wá tadona lọ kọ̀n dọ hopàdọ de wẹ. Ṣigba, taidi owe Wẹndagbe tọn lẹ, Gẹnẹsisi na kunnudenu lẹpo he dohia dọ nugbo wẹ kandai lọ. *

Etẹwẹ yin kọdetọn tolivivẹ Adam tọn? Biblu na gblọndo to aliho ehe mẹ dọmọ: “Kẹdẹdile ylando gbọn omẹ dopo [Adam] gblamẹ biọ aihọn mẹ podọ okú gbọn ylando gblamẹ wá, gbọnmọ dali, okú dlẹnkan jẹ mẹlẹpo dè, na yemẹpo wẹ ko waylando wutu.” (Lomunu lẹ 5:12) Adam vẹtolina Jiwheyẹwhe bo waylando. Gbọnmọ dali, e hẹn todido ogbẹ̀ madopodo tọn bu bo wá kú. Na mí yin kúnkan etọn wutu, mí dugu ylando tọn sọn e dè. Taidi kọdetọn de, mí nọ jẹazọ̀n, poyọnho bo nọ kú. Zẹẹmẹ nuhewutu mí nọ kú tọn enẹ sọgbe hẹ nuhe mí yọnẹn to egbehe gando gududu go. Ṣigba, be Jiwheyẹwhe ko yí nude wà nado didẹ ninọmẹ lọ ya?

 NUHE JIWHEYẸWHE KO WÀ

Na nugbo tọn, Jiwheyẹwhe ko basi tito nado fli nuhe Adam hẹnbu na kúnkan etọn lẹ gọ̀, enẹ wẹ todido lọ nado nọgbẹ̀ kakadoi. Nawẹ Jiwheyẹwhe wàmọ gbọn?

Biblu dọ to Lomunu lẹ 6:23 mẹ dọmọ: “Ale ylando tọn wẹ okú.” Ehe dohia dọ ylando wẹ hẹn okú wá. Na Adam waylando wutu, e kú. Mọdopolọ, mílọsu lẹ nọ waylando bo nọ mọ ale etọn he yin okú yí. Ṣigba, e ma yin mílọsu wẹ waylando gba, mí yin jiji po e po wẹ. Enẹwutu, Jiwheyẹwhe gbọn owanyi dali do Visunnu etọn Jesu hlan nado wá hẹn agbàn “ale ylando tọn” na mí. Gbọnna?

Okú Jesu tọn hùn dotẹnmẹ gbẹninọ kakadoi po ayajẹ po tọn dote

To whenuena e yindọ sunnu de, yèdọ sunnu pipé lọ Adam wẹ vẹtoli bo hẹn ylando po okú po wá mí ji, sunnu pipé de he yin tonusetọ kakajẹ okú wẹ sọgan de agbàn pinpẹn enẹ sọn mí ji. Biblu basi zẹẹmẹ etọn to aliho ehe mẹ dọmọ: “Kẹdẹdile mẹsusu lẹzun ylandonọ gbọn tolivivẹ omẹ dopo tọn gblamẹ, mọdopolọ ga wẹ mẹsusu na lẹzun dodonọ do, gbọn tonusise omẹ dopo tọn gblamẹ.” (Lomunu lẹ 5:19) Jesu wẹ yin “omẹ dopo” enẹ. E tọ́n sọn olọn mẹ bo lẹzun sunnu pipé * de bo wá kú do ota mítọn mẹ. Taidi kọdetọn de, ehe hẹn ẹn yọnbasi na mí nado tindo haṣinṣan dagbe de hẹ Jiwheyẹwhe bo duvivi todido lọ nado nọgbẹ̀ kakadoi tọn.

NUHEWUTU JESU DO JIYA BO KÚ

Nado jẹ yanwle enẹ kọ̀n, naegbọn Jesu do tin to dandannu glọ nado kú? Be e ma yọnbasi dọ Jiwheyẹwhe Ganhunupotọ lọ ni degbe dọ kúnkan Adam tọn lẹ ni to gbẹnọ zọnmii wẹ ya? Ayihaawe matin dọ e tindo aṣẹpipa lọ nado wàmọ. Ṣigba, mọwiwà na jẹagọdo osẹ́n etọn he dọ dọ ale ylando tọn wẹ okú. Osẹ́n enẹ ma yin osẹ́n tata de he sọgan yin hùzẹdeji kavi yin didiọ dile yè jlo do gba. Dodonu de wẹ e yin na whẹdida dodo.—Psalm 37:28.

Eyin Jiwheyẹwhe ma ko yí whẹdida dodo zan to whẹho ehe mẹ wẹ, gbẹtọ lẹ sọgan lẹndọ vlavo ewọ na wàmọ to whẹho devo lẹ mẹ ga. Di apajlẹ, be e sọgan penugo nado yí dodowiwa do de mẹhe jẹ nado nọgbẹ̀ kakadoi to ovivi Adam tọn lẹ mẹ ya? Be gbẹtọ lẹ sọgan deji dọ ewọ na hẹn opagbe etọn lẹ di  ya? Gbọn whẹdida dodo yíyí do wleawuna whlẹngán mítọn dali, Jiwheyẹwhe hẹn mí deji dọ ewọ na nọ wà nuhe sọgbe to whelẹponu.

Jiwheyẹwhe hùn dotẹnmẹ lọ dote na gbẹtọvi lẹ nado nọgbẹ̀ kakadoi to Paladisi mẹ to aigba ji gbọn okú avọ́sinsan tọn Jesu tọn dali. Doayi hogbe Jesu tọn he yin kinkandai to Johanu 3:16 mẹ lẹ go dọmọ: “Jiwheyẹwhe yiwanna aihọn lọ sọmọ bọ e namẹ Visunnu detọ́n dopo akàn etọn, na mẹdepope he do yise hia to ewọ mẹ ma nado yin vivasudo adavo nado tindo ogbẹ̀ madopodo.” Gbọnmọ dali, okú Jesu tọn ma dohia dọ Jiwheyẹwhe yiwanna whẹdida dodo kẹdẹ gba, amọ́ e sọ do owanyi daho he e tindo na gbẹtọvi lẹ hia.

Ṣigba, naegbọn Jesu dona jiya bo kú okú awufiẹsa tọn he owe Wẹndagbe tọn lẹ basi zẹẹmẹ etọn? Na Jesu jiya kakajẹ okú bo hẹn nugbonọ-yinyin etọn go wutu, e dohia dọ lalodo wẹ Lẹgba te to whenue e dọ dọ gbẹtọ lẹ ma na hẹn nugbonọ-yinyin yetọn na Jiwheyẹwhe go to whlepọn glọ. (Job 2:4, 5) Nuhe Satani dọ ehe sọgan ko taidi nugbo to whenue e klọ Adam he yin mẹpipe lọ nado waylando. Ṣigba Jesu, yèdọ mẹhe yin mẹpipe lọ taidi Adam, hẹn nugbonọ-yinyin etọn go to whlepọn sinsinyẹn lẹ glọ. (1 Kọlintinu lẹ 15:45) E gbọnmọ dali dohia dọ Adam lọsu sọgan ko setonuna Jiwheyẹwhe eyin e de nado wàmọ. Akọndonanu Jesu tọn to whlepọn lẹ glọ yin apajlẹ de na mílọsu lẹ nado hodo. (1 Pita 2:21) Jiwheyẹwhe suahọ Visunnu etọn na tonusise mlẹnmlẹn etọn wutu bo na Jesu ogbẹ̀ jọmaku tọn to olọn mẹ.

LEHE A SỌGAN MỌALEYI SỌN E MẸ DO

Jesu kú nugbonugbo. Ehe hùn dotẹnmẹ ogbẹ̀ madopodo tọn dote na mí. Be e na jlo we nado nọgbẹ̀ kakadoi ya? Jesu do nuhe mí dona wà lọ hia to whenue e dọmọ: “Ehe wẹ ogbẹ̀ madopodo, dọ yé ni to vivẹnudo zọnmii nado yọ́n hiẹ Jiwheyẹwhe nugbo dopo kẹdẹ lọ, podọ mẹhe hiẹ dohlan, yèdọ Jesu Klisti.”—Johanu 17:3.

Mẹhe zín owe ehe jẹgbonu lẹ to tulina we nado plọnnu dogọ gando Jehovah, Jiwheyẹwhe nugbo lọ po Visunnu etọn Jesu Klisti po go. Homẹ kunnudetọ Jehovah tọn he to lẹdo towe mẹ lẹ tọn na hùn nado gọalọna we. A sọgan sọ mọ nudọnamẹ yọ́n-na-yizan lẹ to nọtẹn Intẹnẹt tọn mítọn www.jw.org ji.

^ huk. 8 Pọ́n “Historicité de la Genèse” to Étude perspicace des Écritures weda 988, he Kunnudetọ Jehovah tọn lẹ zinjẹgbonu mẹ.

^ huk. 13 Jiwheyẹwhe do Visunnu etọn hlan sọn olọn mẹ do vidọ̀ Malia tọn mẹ, podọ gbigbọ wiwe Jiwheyẹwhe tọn basi hihọ́na Jesu ma nado dugu mape tọn sọn Malia si.—Luku 1:31, 35.

Plọnnu Dogọ

Flin Okú Jesu Tọn

Mí yí zohunhun do basi oylọna we nado wá kọnawudopọ hẹ mí to nujijọ vonọtaun ehe whenu. A na mọ lehe gbẹzan po okú Jesu tọn po sọgan hẹn ale wá na we do.