Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Atọ̀họ̀-Nuhihọ́ lọ Tọn  |  Sọha 5 2017

 HOSỌ HE JẸNUKỌN | ANGẸLI LẸ​—BE YÉ TIN YA? NUHEWUTU E DO YIN NUJỌNU

Nugbo lọ Gando Angẹli lẹ Go

Nugbo lọ Gando Angẹli lẹ Go

Be e na jlo we nado yọ́n nugbo lọ gando angẹli lẹ go ya—yèdọ mẹhe yé yin, lehe yé wá aimẹ gbọn po nuhe yé nọ wà po? Fihe yọ́n hugan nado dín gblọndo lẹ te wẹ Ohó gbọdo Jiwheyẹwhe tọn, yèdọ Biblu mẹ. (2 Timoti 3:16) Etẹwẹ Biblu dọna mí?

  • Dile Jiwheyẹwhe yin Gbigbọ do, mọdopolọ, angẹli lẹ lọsu yin gbigbọ mayinukundomọ lẹ he “ma nọ tindo agbasalan po ohú lẹ po.” Angẹli nugbonọ lẹ nọ nọ̀ olọn mẹ bo nọ yì Jiwheyẹwhe nukọn tlọlọ.​—Luku 24:39; Matiu 18:10; Johanu 4:24.

  • To whedelẹnu, angẹli lẹ nọ ze agbasa gbẹtọ tọn do nado hẹn azọ́ndenamẹ he Jiwheyẹwhe dena yé lẹ di to aigba ji bosọ nọ diọwunmẹ eyin yé dotana azọ́ndenamẹ yetọn lẹ.​—Whẹdatọ lẹ 6:11-23; 13:15-20.

  • Dile etlẹ yindọ Biblu nọ do angẹli lẹ hia taidi sunnu lẹ bọ yé nọ saba ze agbasa sunnu tọn do, vogbingbọn sunnu po yọnnu po tọn ma tin to ṣẹnṣẹn yetọn. Yé ma nọ wlealọ bo nọ ji ovi he di yé lẹ gba. Humọ, e ma yin lehe gbẹtọ nọ yin jiji do to aigba ji—yèdọ taidi viyẹyẹ, bo nọ lẹzun jọja, bosọ nọ wá whẹ́n mẹho wẹ angẹli lẹ wá aimẹ do gba. Jehovah wẹ dá angẹli lẹ; enẹwutu, Biblu ylọ yé dọ “visunnu Jiwheyẹwhe nugbo lọ tọn lẹ.”​—Jobu 1:6; Salmu lẹ 148:2, 5.

  • Biblu dọho gando “ogbè gbẹtọ lẹ po angẹli lẹ tọn po” go nado dohia dọ nudida gbigbọnọ enẹlẹ lọsu tindo ogbè yetọn. Dile etlẹ yindọ Jiwheyẹwhe yí angẹli lẹ zan nado dọho hẹ gbẹtọvi lẹ, e ma na mí dotẹnmẹ nado basi sinsẹ̀n kavi hodẹ̀ hlan yé gba.​—1 Kọlintinu lẹ 13:1; Osọhia 22:8, 9.

  • Angẹli fọtọ́n ao donu fọtọ́n ao lẹ wẹ tin, vlavo yé tlẹ yì liva lẹ. *​—Daniẹli 7:10; Osọhia 5:11.

  • Angẹli lẹ “yin huhlọnnọ taun”—yèdọ hú gbẹtọ lẹ—bosọ yọnnuin taun. E họnwun dọ yé sọgan sẹtẹn po awuyiya daho po, yèdọ zẹ̀ dogbó aihọn yinukundomọ ehe tọn lẹ go.​—Salmu lẹ 103:20; Daniẹli 9:20-23.

  • Mahopọnna nugopipe apọ̀nmẹ tọn po gbigbọmẹ tọn jiawu he angẹli lẹ tindo lẹ po, yé tindo dogbó bọ nudelẹ tin he yé ma yọnẹn.​—Matiu 24:36; 1 Pita 1:12.

  • Angẹli lẹ yin didá po jẹhẹnu he taidi gbẹtọ tọn lẹ po, gọna jẹhẹnu Jiwheyẹwhe tọn nkọ lẹ po mẹdekannujẹ nudide bibasi tọn po. Enẹwutu, taidi gbẹtọvi lẹ, yé sọgan de nado wà nuhe sọgbe kavi ylan. E blawu dọ angẹli delẹ de nado ṣiatẹ sọta Jiwheyẹwhe.​—Juda 6.

^ huk. 8 Fọtọ́n ao donu fọtọ́n ao basi livi 100. Ṣogan, na nuhe dù angẹli lẹ, owe Osọhia tọn dọho gando “fọtọ́n ao donu fọtọ́n ao lẹ” go. Enẹ dohia dọ nudida gbigbọnọ livi kanweko lẹ wẹ tin, vlavo liva lẹ!