Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Atọ̀họ̀-Nuhihọ́ lọ Tọn  |  Sọha 5 2017

 HOSỌ HE JẸNUKỌN | ANGẸLI LẸ​—BE YÉ TIN YA? NUHEWUTU E DO YIN NUJỌNU

Be Angẹli Ylankan lẹ Tin Ya?

Be Angẹli Ylankan lẹ Tin Ya?

Mọwẹ, angẹli ylankan lẹ tin. Fie wẹ yé wá sọn? Flindọ Jiwheyẹwhe dá angẹli lẹ po mẹdekannujẹ nudide bibasi tọn po. Ojlẹ vude to whenue sunnu po yọnnu tintan lọ po, yèdọ Adam po Evi po yin didá godo, nudida gbigbọnọ pipé de ṣì mẹdekannujẹ nudide bibasi tọn etọn zan bo hẹn atẹṣiṣi wá aigba ji. E penugo bo hẹn Adam po Evi po nado ṣiatẹ sọta Jiwheyẹwhe. (Jenẹsisi 3:1-7; Osọhia 12:9) Biblu ma dọ yinkọ nudida gbigbọnọ ehe tọn kavi otẹn he mẹ e tin te to olọn mẹ whẹpo do wá ṣiatẹ gba. Ṣigba, to atẹṣiṣi etọn godo, Biblu ylọ ẹ to aliho he sọgbe mẹ dọ Satani, he zẹẹmẹdo “Agọjẹdomẹtọ,” podọ Lẹgba, he zẹẹmẹdo “Mẹhẹngbletọ.”​—Matiu 4:8-11.

E blawu dọ atẹṣiṣi sọta Jiwheyẹwhe ma fó do finẹ. To azán Noa tọn gbè, angẹli madosọha delẹ “jo nọtẹn he jẹna yé lọ do” to Jiwheyẹwhe dè to olọn mẹ. Yé jẹte wá aigba ji bo ze agbasa gbẹtọvi tọn do nado doafọna walọ gblezọn fẹnnuwiwa tọn, bo gbọnmọ dali yinuwa jẹagọdo lẹndai he wutu yé do yin didá.​—Juda 6; Jenẹsisi 6:1-4; 1 Pita 3:19, 20.

Etẹwẹ wá jọ do angẹli ylankan enẹlẹ go? To whenue Jiwheyẹwhe hẹn singigọ lẹdo aihọn pé de wá nado klọ́ aigba wé, yé diọwunmẹ bo lẹkọ do lẹdo gbigbọ tọn mẹ. Ṣigba, Jiwheyẹwhe ma na dotẹnmẹ angẹli ylankan enẹlẹ nado lẹkọ do “otẹn dowhenu tọn yetọn mẹ” gba. Kakatimọ, e glọn yé do ninọmẹ he yìdo “zinvlu gọ́ngọ́n” gbigbọmẹ tọn de mẹ, he nọ yin yiylọdọ Taltalu. (Juda 6; 2 Pita 2:4) Aovi enẹlẹ biọ anademẹ Satani Lẹgba tọn glọ, yèdọ “ogán aovi lẹ tọn,” mẹhe “nọ to wunmẹdiọ na ede zun angẹli hinhọ́n tọn de.”​—Matiu 12:24; 2 Kọlintinu lẹ 11:14.

Biblu plọnmẹ dọ Ahọluduta Mẹsia tọn he Jiwheyẹwhe zedai lọ, yèdọ gandudu olọn mẹ tọn de, yin didoai to 1914. * To nujijọ ayidego tọn enẹ godo, Satani po aovi etọn lẹ po yin yinyan sọn olọn mẹ bo yin ginglọndo lẹdo aigba tọn lẹ mẹ. Kanyinylan he sẹhundaga po fẹnnuwiwa gblezọn he gbayipe to aigba ji po yin kunnudenu de dọ yé to ahọsuyi bo to nuyiwa do gbẹtọvi lẹ ji to aliho ylankan mẹ.​—Osọhia 12:9-12.

Ṣigba, lehe walọ gblezọn po danuwiwa po to susudeji do dohia dọ gandudu ylankan yetọn ko sẹpọ vivọnu. To madẹnmẹ, nudida gbigbọnọ kanylantọ enẹlẹ na yin didesẹ. To whenue Ahọluduta Jiwheyẹwhe tọn na ko dugán do aigba he lẹzun paladisi lọ ji na owhe 1 000 godo, nudida gbigbọnọ ylankan enẹlẹ na yin tuntundote whladopo dogọ na ojlẹ gli de, yèdọ dotẹnmẹ hundote godo tọn nado whlé gbẹtọvi lẹ pọ́n. Enẹgodo, yé na yin vivasudo kakadoi.—Matiu 25:41; Osọhia 20:1-3, 7-10.

^ huk. 6 Na nudọnamẹ dogọ gando Ahọluduta Jiwheyẹwhe tọn go, pọ́n weta 8tọ owe lọ Etẹwẹ Biblu Plọn Mí Taun? tọn, ehe Kunnudetọ Jehovah tọn lẹ zinjẹgbonu. E sọ tin-to-aimẹ to www.jw.org ji.

Plọnnu Dogọ

WẸNDAGBE DE SỌN JIWHEYẸWHE DÈ!

Naegbọn Jiwheyẹwhe Jotẹnna Ylanwiwa po Yajiji Po?

Nawẹ ylanwiwa bẹjẹeji gbọn, podọ naegbọn Jiwheyẹwhe jotẹnna ẹn nado zindonukọn? Be yajiji na doalọte to gbèdopo ya?