Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Atọ̀họ̀-Nuhihọ́ lọ Tọn  |  Sọha 2 2017

 HOSỌ HE JẸNUKỌN | BE HIẸ NA KẸALỌYI NUNINA DAHO LỌ YA?

Nawẹ A Na Yọ́n Pinpẹn Nunina Daho Hugan lọ Tọn Gbọn?

Nawẹ A Na Yọ́n Pinpẹn Nunina Daho Hugan lọ Tọn Gbọn?

“Owanyi he Klisti tindo nọ whàn mí . . . Ewọ kú na mẹlẹpo, na mẹhe to ogbẹ̀ lẹ ma nado nọgbẹ̀ na yede ba, ṣigba na mẹlọ he kú na yé.”—2 Kọlintinu lẹ 5:14, 15.

NUNINA jiawu de nọ whàn mí nado do pinpẹn-nutọn hia. Jesu zinnudo nuplọnmẹ enẹ ji to whenue e gbọazọ̀nna dawe ao he to azọ̀n sinsinyẹn de he ma tindo pọngbọ to ojlẹ enẹ mẹ jẹ lẹ godo. Dopo to yé mẹ “lẹkọwa godo bo to gigopana Jiwheyẹwhe po ogbè lélé po.” Jesu dọmọ: “Mì omẹ ao lẹpo wẹ yin kiklọ́we, kavi e ma yin mọ wẹ? To whelọnu lo, fie wẹ omẹ ṣinẹnẹ he pò lẹ te?” (Luku 17:12-17) Etẹwẹ yin nuplọnmẹ lọ? Mí sọgan yawu wọn nudagbe he mẹdevo lẹ wà na mí lẹ.

Ofligọ lọ yin nunina de he ma pé awe. Nunina daho hugan lọ niyẹn. Enẹwutu, nawẹ a sọgan yọ́n pinpẹn nuhe Jiwheyẹwhe wà na we enẹ tọn gbọn?

  • Dovivẹnu nado yọ́n Nunamẹtọ lọ. Ofligọ lọ ma nọ hẹn ogbẹ̀ madopodo wá na gbẹtọvi lẹpo to paa mẹ. Kakatimọ, Jesu dọ to odẹ̀ mẹ na Jiwheyẹwhe dọmọ: “Ehe wẹ ogbẹ̀ madopodo, dọ yé ni wá yọ́n hiẹ Jiwheyẹwhe nugbo dopo kẹdẹ lọ, podọ mẹhe hiẹ dohlan, yèdọ Jesu Klisti.” (Johanu 17:3) Eyin mẹde dọna we dọ dawe de whlẹn we to whenue a to pẹvi, be a ma na tẹnpọn nado yọ́n mẹlọ  bo dindona nuhewutu e do wàmọ ya? Jehovah Jiwheyẹwhe, he na nunina ofligọ tọn lọ nado whlẹn mí, jlo dọ a ni yọ́n omẹ nankọ he emi yin bosọ tindo haṣinṣan pẹkipẹki de hẹ emi. Biblu dọmọ: “Mì dọnsẹpọ Jiwheyẹwhe, ewọ nasọ dọnsẹpọ mì.”—Jakọbu 4:8.

  • Do yise hia to ofligọ lọ mẹ. “Mẹhe nọ do yise hia to Visunnu lọ mẹ tindo ogbẹ̀ madopodo.” (Johanu 3:36) Etẹwẹ e zẹẹmẹdo nado do yise hia? E zẹẹmẹdo nado yinuwa; nado do yise hia to ofligọ lọ mẹ nọ biọ nuyiwa. (Jakọbu 2:17) Nuyiwa nankọ? Nunina de nọ lẹzun towe to whenue a dovivẹnu nado mọ ẹn yí. Enẹwutu, a dona dovivẹnu nado kẹalọyi ofligọ lọ. Gbọnna? Plọn lehe Jiwheyẹwhe jlo dọ a ni zan gbẹzan towe do bo yinuwa sọgbe hẹ ẹ. * Nọ hodẹ̀ hlan Jiwheyẹwhe bo biọ jona po ayihadawhẹnamẹnu wiwe de po. Nọ dọnsẹpọ Jiwheyẹwhe po jide mlẹnmlẹn po dọ ofligọ lọ na hẹn jijọho, hihọ́ po kọdetọn dagbe madopodo to sọgodo po yọnbasi na mẹhe do yise hia to e mẹ lẹpo!—Heblu lẹ 11:1.

  • Yì Oflin okú Jesu tọn. Jesu ze nuwiwa whemẹwhemẹ tọn de dai nado nọ flin mí ofligọ lọ. E dọ gando hùnwhẹ enẹ go dọmọ: “Mì nọ wà ehe to oflin ṣie mẹ.” (Luku 22:19) Kunnudetọ Jehovah tọn lẹ na basi hùnwhẹ oflin okú Jesu tọn to mardi 11 avril 2017, to họyiyi owhè tọn godo. Nuwiwa nudi gànhiho dopo tọn ehe, na bẹ hodidọ de hẹn he na basi zẹẹmẹ okú Jesu tọn gọna ale he e nọ hẹnwa todin po dehe e na hẹnwa to sọgodo lẹ po tọn. To owhe he wayi, nudi gbẹtọ livi 20 wẹ wá Oflin okú Jesu tọn lẹdo aihọn pé. Mí yí zohunhun do to oylọ basina we nado wá kọnawudopọ hẹ mí nado do pinpẹn-nutọn hia na nunina daho hugan Jiwheyẹwhe tọn.

^ huk. 7 Aliho dagbe hugan nado wá yọ́n Jiwheyẹwhe bo dọnsẹpọ ẹ wẹ nado plọn Ohó etọn, Biblu. Eyin a jlo na yọ́n lehe a sọgan wàmọ gbọn, kanhose Kunnudetọ Jehovah tọn de kavi dla nọtẹn Intẹnẹt tọn mítọn, www.jw.org pọ́n.

Plọnnu Dogọ