Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Atọ̀họ̀-Nuhihọ́ lọ Tọn—Zinjẹgbonu Oplọn Tọn  |  Novembre 2017

Hodo Apajlẹ Jehovah Tọn to Whẹdida Dodo po Lẹblanu Didohia po Mẹ

Hodo Apajlẹ Jehovah Tọn to Whẹdida Dodo po Lẹblanu Didohia po Mẹ

“Mì nọ yí nugbo do dawhẹ dodo bo nọ yí owanyi nugbo po lẹblanu po do yinuwa hẹ ode awetọ.”—ZEK. 7:9.

OHÀN LẸ: 125, 88

1, 2. (a) Numọtolanmẹ tẹwẹ Jesu tindo gando Osẹ́n Jiwheyẹwhe tọn go? (b) Nawẹ wekantọ lẹ po Falesi lẹ po nọ slokọna Osẹ́n lọ gbọn?

JESU yiwanna Osẹ́n Mose tọn. Ehe ma yin nupaṣamẹ de! Na Osẹ́n enẹ wá sọn mẹhe yin Omẹ titengbe hugan to gbẹzan Jesu tọn mẹ dè—yèdọ Otọ́ etọn, Jehovah. Owanyi sisosiso he Jesu tindo na osẹ́n Jiwheyẹwhe tọn yin nùdego to dọdai Salmu lẹ 40:8 tọn mẹ dọmọ: “Jiwheyẹwhe ṣie E, yẹn nọ mọ awuvivi to ojlo towe wiwà mẹ, podọ osẹ́n towe tin to ahun ṣie mẹ dọ́n.” To ohó po walọ po mẹ, Jesu dohia dọ Osẹ́n Jiwheyẹwhe tọn yin pipé bo nọ hẹn ale wá bo nasọ mọ hẹndi dandan.—Mat. 5:17-19.

2 Enẹwutu, pọ́n lehe e na ko vẹna Jesu do sọ to whenue e mọ bọ wekantọ lẹ po Falesi lẹ po to kọslona Osẹ́n Otọ́ etọn tọn! Yé nọ yí sọwhiwhe do setonuna adà pẹvi pete Osẹ́n lọ tọn delẹ, na Jesu yigbe dọ: “Mì nọ na mado-ao mẹnti, nuwhẹ́nkun aneti po nuwhẹ́nkun kumini po tọn.” Bọ etẹwẹ yin nuhahun yetọn lo? Jesu yidogọ dọ: “Ṣigba mì ko yí nukunpẹvi do pọ́n nuhe yin nujọnu hugan to Osẹ́n lọ mẹ lẹ, yèdọ whẹdida dodo, lẹblanu po nugbonọ-yinyin po.” (Mat. 23:23) To vogbingbọn mẹ na Falesi he nọ to dodonọ jla enẹlẹ, Jesu yọ́n gbigbọ he to godona Osẹ́n lọ, enẹ wẹ jẹhẹnu Jiwheyẹwhe tọn he gbedide lọ lẹ dopodopo dehia lẹ.

3. Etẹwẹ mí na gbadopọnna to hosọ ehe mẹ?

 3 Nugbo wẹ dọ taidi Klistiani lẹ, mí ma tin to alẹnu Osẹ́n tọn glọ. (Lom. 7:6) Etomọṣo, Jehovah hẹn Osẹ́n enẹ tin-to-aimẹ na mí to Biblu mẹ. E ma jlo dọ mí ni nọ tẹdo adà pẹvi pete Osẹ́n lọ tọn lẹ go, ṣigba dọ mí ni yọ́n “nuhe yin nujọnu hugan” to Osẹ́n lọ mẹ, yèdọ nunọwhinnusẹ́n yiaga he ji gbedide lọ lẹ sinai do lẹ bo nọ yìn yé. Di apajlẹ, nunọwhinnusẹ́n tẹlẹ wẹ mí sọgan mọyi sọn tito tòdaho fibẹtado tọn lẹ tọn mẹ? Hosọ he wayi zinnudo nuhe mí sọgan plọn sọn afọdide he hlọnhutọ he họ̀njẹgbé lọ dona ze lẹ mẹ ji. Ṣigba, tòdaho fibẹtado tọn lẹ sọ plọnnu mí gando Jehovah po lehe mí sọgan do jẹhẹnu etọn nkọ lẹ hia do po go. Enẹwutu, hosọ ehe na na gblọndo na kanbiọ atọ̀n delẹ: Nawẹ tòdaho fibẹtado tọn lẹ do lẹblanu Jehovah tọn hia gbọn? Etẹwẹ yé plọn mí gando nukun he e nọ yí do pọ́n ogbẹ̀ go? Nawẹ yé do whẹdida dodo pipé etọn hia gbọn? To dogbapọn kanbiọ dopodopo tọn whenu, dín aliho he mẹ a sọgan hodo apajlẹ Otọ́ olọn mẹ tọn towe tọn te lẹ.—Hia Efesunu lẹ 5:1.

“TÒDAHO HE MẸ E BỌAWU NADO YÌ LẸ”—DOHIA LẸBLANU TỌN DE

4, 5. (a) Etẹwẹ yin wiwà nado hẹn tòdaho fibẹtado tọn lẹ mẹ hinhọnyi bọawu, podọ etẹwutu? (b) Etẹwẹ ehe plọn mí gando Jehovah go?

4 Tòdaho fibẹtado tọn ṣidopo lọ lẹ tin to fie bọawu nado yì. Jehovah degbena Islaelivi lẹ nado de tòdaho sọha dopolọ to awà awe Tọ̀sisa Jọdani tọn lẹ ji. Etẹwutu? Na e nido bọawuna mẹdepope he jlo na họ̀njẹgbé nado yawu họnyi dín fibẹtado to finẹ. (Sọh. 35:11-14) Ali he yì tòdaho fibẹtado tọn lọ lẹ mẹ lẹ nọ yin hinhẹn do ninọmẹ dagbe mẹ. (Deut. 19:3) Sọgbe hẹ aṣa Juvi lẹ tọn, ohia delẹ nọ yin zizedo ali lọ lẹ ji nado deanana mẹhe họ̀njẹgbé lọ. Na tòdaho fibẹtado tọn lẹ tin-to-aimẹ wutu, mẹhe hùmẹ to mayọnẹn mẹ de ma nọ to dandannu glọ nado họnyi jonọ-gbéji, fie e gán wá doalọ to sinsẹ̀n-bibasi lalo mẹ te.

5 Lẹnnupọndo ehe ji: Jehovah—yèdọ Mẹdopolọ he degbe dọ mẹhe hùmẹ sọn ojlo mẹ wá lẹ ni yin hùhù—wẹ sọ hùnali dote na hlọnhutọ he hùmẹ to mayọnẹn mẹ lẹ nado duvivi awuvẹmẹ po hihọ́ po tọn to gigọ́ mẹ! Zẹẹmẹ-basitọ de wlan dọmọ: “Nulẹpo wẹ yin awuwlena to aliho he bọawu bo họnwun mẹ dile e sọgan yọnbasi do. Dohia homẹdagbe Jiwheyẹwhe tọn wẹ ehe yin.” Jehovah ma yin whẹdatọ okànọ de he nọ to dotẹnmẹ hundote lẹ dín nado sayana devizọnwatọ etọn lẹ. Kakatimọ, “lẹblanu etọn sù tlala.”—Efe. 2:4.

6. Nawẹ nuyiwa Falesi lẹ tọn jẹagọdo lẹblanu Jiwheyẹwhe tọn gbọn?

6 To vogbingbọn mẹ, Falesi lẹ ma nọ jlo na do lẹblanu hia. Di apajlẹ, sọgbe hẹ otàn Juvi lẹ tọn, Falesi lẹ ma nọ jona nuṣiwa dopolọ hugan whla atọ̀n. Jesu de aliho he mẹ yé nọ yinuwa hẹ mẹhe ṣinuwa lẹ te gbà to whenue e na apajlẹ gando Falesi de go he hodẹ̀ dọmọ:  “Jiwheyẹwhe E, n’dopẹna we dọ n’ma taidi mẹhe pò lẹ—yèdọ alọslonamẹtọ lẹ, mawadodonọ lẹ, ayọdetọ lẹ—kavi etlẹ yin taidi tòkuẹ-ṣinyantọ ehe,” yèdọ tòkuẹ-ṣinyantọ de he to lẹblanu Jiwheyẹwhe tọn biọ to odẹ̀ mẹ po whiwhẹ po. Naegbọn Falesi lẹ ma nọ jlo na do lẹblanu hia? Biblu dọ dọ na yé nọ “pọ́n mẹdevo lẹ hlan di nuvọ́nọ” wutu wẹ.—Luku 18:9-14.

Be a nọ hùn “ali” jonamẹ towe tọn dote bo nọ hẹn ẹn do ninọmẹ dagbe mẹ ya? Nọ yọ́n dọnsẹpọ (Pọ́n hukan 4-8)

7, 8. (a) Eyin mẹde ṣinuwa do we, nawẹ a sọgan hodo apajlẹ Jehovah tọn gbọn? (b) Naegbọn jonamẹ do nọ tẹ́n whiwhẹnọ-yinyin mítọn pọ́n?

7 Hodo apajlẹ Jehovah tọn, e ma yin Falesi lẹ tọn. Nọ vẹawumẹ. (Hia Kolosinu lẹ 3:13.) Dopo to aliho he mẹ a gán wàmọ te lẹ mẹ wẹ nado nọ hẹn ẹn bọawuna mẹdevo lẹ nado wá biọ jonamẹ towe. (Luku 17:3, 4) Kanse dewe dọ: ‘Be mẹhe ṣinuwa do mi etlẹ yin whlasusu lẹ gán voawu nado wá biọ jonamẹ ṣie ya? Be n’nọ to jejeji dọ jijọho ni gọwá yẹn po mẹhe ṣinuwa do mi lẹ po ṣẹnṣẹn ya?’

8 Jonamẹ nọ tẹ́n whiwhẹnọ-yinyin mítọn pọ́n taun. Falesi lẹ jai to mẹtẹnpọn ehe mẹ, na yé nọ pọ́n mẹdevo lẹ hlan di mẹhe yìdo wutu. Ṣigba taidi Klistiani lẹ, mí dona nọ gbọn whiwhẹ dali “pọ́n mẹdevo lẹ dọ yé yiaga” hú mí bo jẹna jonamẹ mítọn. (Flp. 2:3) Be a na hodo apajlẹ Jehovah tọn bo duto mẹtẹnpọn whiwhẹ tọn ehe ji ya? Hùn “ali” jonamẹ towe tọn dote bo nọ hẹn ẹn do ninọmẹ dagbe mẹ. Nọ wleawufo nado do lẹblanu hia bo nọ whleawu nado gblehomẹ.—Yẹwh. 7:8, 9.

NỌ NA SISI OGBẸ̀, PODỌ “HIẸ MA NA DUHÙNHỌ DEPOPE”

9. Nawẹ Jehovah hẹn wiwe-yinyin ogbẹ̀ gbẹtọvi tọn họnwun na Islaelivi lẹ gbọn?

9 Lẹndai titengbe tòdaho fibẹtado tọn lẹ tọn wẹ nado basi hihọ́na Islaelivi lẹ sọn hùnhọ́dudu mẹ. (Deut. 19:10) Jehovah yiwanna ogbẹ̀, podọ e gbẹwanna “alọ he nọ sọ̀n ohùn homẹvọnọ tọn dai.” (Howh. 6:16, 17) Na ewọ yin Jiwheyẹwhe wiwe he nọ dawhẹ dodo wutu, e ma gán miọnnukundo hùnsọndai he tlẹ wá aimẹ gbọn kosọ dali. Nugbo wẹ dọ lẹblanu nọ yin didohia mẹhe hùmẹ to mayọnẹn mẹ de. Etomọṣo, e dona jẹwhẹ ede tọn na mẹho lẹ, podọ eyin etlẹ họnwun dọ mayọnẹn mẹ wẹ e hùmẹ te, e dona gbọṣi tòdaho fibẹtado tọn lọ mẹ kakajẹ okú yẹwhenọ daho lọ tọn godo. Ehe sọgan biọ dọ ni yí pipotọ gbẹzan etọn tọn zan to finẹ. Kọdetọn vẹadi ehelẹ nọ hẹn wiwe-yinyin ogbẹ̀ gbẹtọvi tọn họnwun na Islaelivi lẹpo. Nado gbògbéna Gbẹ̀namẹtọ yetọn, yé dona dapana nuyiwa kavi vọdonanu depope he sọgan ze ogbẹ̀ hatọ yetọn de tọn do owù mẹ.

10. Dile Jesu dọ do, nawẹ wekantọ lẹ po Falesi lẹ po dohia dọ yé ma nọ kiyana ogbẹ̀ mẹdevo lẹ tọn gbọn?

10 To vogbingbọn mẹ na Jehovah, wekantọ lẹ po Falesi lẹ po ma nọ kiyana ogbẹ̀ mẹdevo lẹ tọn. Gbọnna? Jesu dọna yé dọmọ: “Mìwlẹ ze họnhungan oyọnẹn tọn yì. Mìlọsu lẹ ma biọ e mẹ, podọ mì nọ glọnalina mẹhe jlo na biọ e mẹ lẹ!” (Luku 11:52) Yewlẹ wẹ dona hùnnú sọn zẹẹmẹ Ohó Jiwheyẹwhe tọn ji bo gọalọna mẹdevo lẹ nado zinzọnlin gbọn aliho ogbẹ̀ tọn lọ ji. Ṣigba, yé nọ deanana mẹlẹ sọn Jesu he yin “Afọzedaitọ-gán ogbẹ̀ tọn lọ” dè yì aliho he gán plan yé yì vasudo mlẹnmlẹn mẹ de ji. (Owalọ 3:15) Na wekantọ lẹ po Falesi lẹ po yin goyitọ podọ ṣejannabinọ wutu, yé ma nọ ylọ ogbẹ̀ po dagbemẹninọ hatọ yetọn lẹ tọn po dọ  nujọnu. Kanyinylan po lẹblanu matindo nankọ po die!

11. (a) Nawẹ apọsteli Paulu dohia dọ emi tindo pọndohlan Jiwheyẹwhe tọn nkọ gando ogbẹ̀ go gbọn? (b) Etẹwẹ na gọalọna mí nado tindo pọndohlan dopolọ hẹ Paulu gando lizọnyizọn mítọn go?

11 Nawẹ mí gán dapana nuyiwa wekantọ lẹ po Falesi lẹ po tọn bo hodo apajlẹ Jehovah tọn gbọn? Mí dona nọ na sisi ogbẹ̀ he yin nina mí bo nọ wlebòna ẹn. Apọsteli Paulu wàmọ gbọn kunnudide mlẹnmlẹn dali. Taidi kọdetọn de, e sọgan dọmọ: “Yẹn wé sọn ohùn gbẹtọ lẹpo tọn mẹ.” (Hia Owalọ lẹ 20:26, 27.) Ṣogan, e ma yin numọtolanmẹ whẹhuhu kavi azọngban tọn wẹ sisẹ́ Paulu nado dọyẹwheho. Kakatimọ, e yiwanna gbẹtọ lẹ bọ ogbẹ̀ yetọn họakuẹ to nukun etọn mẹ. (1 Kọl. 9:19-23) Mọdopolọ, mílọsu dona dovivẹnu nado tindo pọndohlan Jiwheyẹwhe tọn nkọ gando ogbẹ̀ go. Jehovah “jlo dọ mẹlẹpo ni wá lẹnvọjọ kọ̀n.” (2 Pita 3:9) Hiẹ lo? Vlavo a na mọdọ awuwiwlena lẹblanu to ahun towe mẹ na whàn we nado yidogọna zohunhun towe to lizọnyizọn lọ mẹ, bọ a na mọ ayajẹ dogọ dile a to mọwà.

12. Naegbọn hihọ́ do yin nujọnu na omẹ Jiwheyẹwhe tọn lẹ?

12 Mí nọ dohia dọ mí tindo pọndohlan Jehovah tọn nkọ gando ogbẹ̀ go gbọn ayidonugo he jẹ nina whẹho hihọ́ tọn lẹ dali. Mí dona nọ họ́ míde to whenue mí to húnkun kavi to azọ́nwa, etlẹ yin to whenue mí to nọtẹn sinsẹ̀n-bibasi tọn lẹ gbá, to nukunpedo yé go kavi to gbejizọnlinzin jei opli lẹ. Ma dike nususu wiwadotana, akuẹ kavi titojininọ ni jẹnukọnna hihọ́ po agbasalilo po blo. Nuhe jlọ bo sọgbe wẹ Jiwheyẹwhe dodonọ mítọn nọ wà to whelẹponu. Apajlẹ etọn wẹ mí jlo na hodo. Titengbe mẹho agun tọn lẹ nọ dovivẹnu nado na ayidonugo hihọ́ yede tọn po mẹhe to azọ́nwa hẹ yé lẹ tọn po. (Howh. 22:3) Enẹwutu, eyin mẹho de flinnu we gando osẹ́n he yin zizedai na hihọ́ wutu lẹ go, kẹalọyi ayinamẹ etọn. (Gal. 6:1) Nọ pọ́n ogbẹ̀ hlan dile Jehovah nọ wà do, podọ “hiẹ ma na duhùnhọ depope.”

“DAWHẸ . . . SỌGBE HẸ OSẸ́NDOAI EHELẸ”

13, 14. Nawẹ mẹho Islaeli tọn lẹ sọgan do whẹdida dodo Jehovah tọn nkọ hia gbọn?

13 Jehovah degbena mẹho Islaeli tọn lẹ nado nọ dawhẹ sọgbe hẹ nujinọtedo yiaga whẹdida dodo tọn etọn lẹ. Jẹnukọn whẹ́, mẹho lọ lẹ dona gbeje whẹho lọ pọ́n. Humọ, yé dona yí sọwhiwhe do dindona mẹwhinwhàn hlọnhutọ lọ tọn, gbigbọ he e dohia po lehe e ko nọ yinuwa do dai po nado yọnẹn eyin lẹblanu dona yin didohia ẹ. Nado wanu sọgbe hẹ whẹdida dodo Jiwheyẹwhe tọn, yé dona dindona eyin “wangbẹna wutu” wẹ hlọnhutọ lọ yinuwa kavi eyin e tindo “linlẹn ylankan” de to ahun etọn mẹ. (Hia Sọha lẹ 35:20-24.) Eyin kunnudetọ lẹ dona dekunnu gando whẹho lọ go, e whè gbau kunnudetọ awe wẹ dona dekunnu dọ hlọnhuhu sọn ojlo mẹ wẹ.—Sọh. 35:30.

14 Gbọnmọ dali, to whenue mẹho lọ lẹ ko gbeje whẹho lọ pọ́n godo, yé dona lẹnnupọndo mẹlọ ji, e ma yin do nuṣiwa lọ kẹdẹ ji. Yé tindo nuhudo wuntuntun tọn, enẹ wẹ nugopipe lọ nado mọnú zẹ̀ nuhe sọawuhia to nukunta go bo yì adọ̀ nuhahun lọ tọn ji. Hú popolẹpo, yé do hudo gbigbọ wiwe Jehovah tọn, ehe na gọalọna yé bọ yé na do wuntuntun, lẹblanu po whẹdida dodo etọn po hia.—Eks. 34:6, 7.

15. Do vogbingbọn he tin to pọndohlan Jesu tọn gando ylandonọ lẹ go po Falesi lẹ tọn po ṣẹnṣẹn hia.

15 Falesi lẹ nọ ze ayidonugo yetọn lẹpo do nuṣiwa ylanwatọ lọ tọn kẹdẹ ji, kakati nado dindona mẹhe nkọ e yin. Whenue Falesi lẹ mọ Jesu to hùnwhẹ de tẹnmẹ to owhé Matiu tọn gbè, yé kanse devi etọn lẹ dọ: “Naegbọn mẹplọntọ mìtọn do nọ dùnú hẹ tòkuẹ-ṣinyantọ lẹ po ylandonọ lẹ po?” Jesu gblọnna yé dọmọ: “Mẹhe to gángán lẹ ma nọ tindo nuhudo dotozọ́nwatọ tọn gba, adavo mẹhe to azọ̀njẹ lẹ. Enẹwutu, mì yì bo plọn nuhe ehe zẹẹmẹdo, dọ: ‘Lẹblanu wẹ yẹn jlo, e ma yin avọ́sinsan gba. Na yẹn ma wá nado ylọ dodonọ lẹ gba, adavo ylandonọ lẹ.” (Mat. 9:9-13) Be Jesu to nukun miọn do ylanwiwa wẹ ya? Paali. Na nugbo tọn, owẹ̀n  titengbe Jesu tọn bẹ oylọ lọ nado lẹnvọjọ sọn ylando mẹ hẹn. (Mat. 4:17) Etomọṣo, Jesu gbọn wuntuntun dali doayi e go dọ, e whè gbau delẹ to “tòkuẹ-ṣinyantọ lẹ po ylandonọ [lọ] lẹ po” mẹ jlo na diọ. Yé ma wá owhé Matiu tọn gbè nado dùnú poun. Kakatimọ, “susu mẹhe tin to finẹ lẹ tọn wẹ to hihodo [Jesu].” (Malku 2:15) E blawu dọ, suhugan Falesi lẹ tọn gboawupo nado mọ nuhe Jesu mọ to omẹ enẹlẹ mẹ. To vogbingbọn mẹ na Jiwheyẹwhe dodonọ podọ lẹblanunọ he yé sọalọkọ́n dọ emi to sinsẹ̀n, Falesi lẹ nọ tlẹ́ yinkọ ylandonọ tọn do ota na hatọ yetọn lẹ bo nọ dawhẹna yé di mẹhe todido de masọ tin na ba.

16. Etẹwẹ wedegbẹ́ whẹdida tọn de dona dovivẹnu nado yọnẹn?

16 To egbehe, mẹho agun tọn lẹ dona hẹn ẹn diun dọ emi to apajlẹ Jehovah, mẹhe “yiwanna whẹdida dodo” tọn hodo. (Salm. 37:28) Jẹnukọn whẹ́, yé dona “dindona whẹho lọ, bo gbadopọnna ganji bosọ gbeje e pọ́n kitokito” nado yọnẹn eyin ylanwiwa de wá aimẹ. Eyin e họnwun dọ mọ wẹ, yé dona penukundego sọgbe hẹ anademẹ Owe-wiwe lẹ tọn. (Deut. 13:12-14) Whenue yé tin to wedegbẹ́ whẹdida tọn de mẹ, yé dona nọ yí sọwhiwhe do dindona eyin Klistiani he waylando sinsinyẹn de lẹnvọjọ. E ma nọ bọawu to whelẹponu nado yọnẹn eyin mẹde lẹnvọjọ kavi lala. Ehe nọ gando pọndohlan, ayilinlẹn po ninọmẹ ahun mẹ tọn mẹlọ tọn po go. (Osọ. 3:3) Whẹpo lẹblanu nado yin didohia ylanwatọ de, e dona lẹnvọjọ. *

17, 18. Nawẹ mẹho lẹ gán wagbọn do yọnẹn eyin mẹde lẹnvọjọ sọn ahun mẹ? (Pọ́n yẹdide he tin to bẹjẹeji hosọ ehe tọn.)

17 To vogbingbọn mẹ na Jehovah po Jesu po, mẹho agun tọn lẹ ma gán mọnú jẹ ahun mẹ. Enẹwutu, eyin mẹho de wẹ a yin, nawẹ a gán wagbọn do yọnẹn eyin mẹde lẹnvọjọ sọn ahun mẹ nugbo? Jẹnukọn whẹ́, biọ nuyọnẹn po wuntuntun po to odẹ̀ mẹ. (1 Ahọ. 3:9) Enẹgodo, gbadopọnna Ohó Jiwheyẹwhe tọn po owe he afanumẹ nugbonọ lọ ko wleawuna lẹ po, ehe na gọalọna we nado yọ́n “awubla aihọn tọn” dovo na “awubla to aliho Jiwheyẹwhe tọn mẹ,” yèdọ lẹnvọjọ nujọnu tọn. (2 Kọl. 7:10, 11) Lẹnnupọndo zẹẹmẹ he Owe-wiwe lẹ basi gando mẹhe lẹnvọjọ lẹ po mẹhe ma lẹnvọjọ lẹ po go ji. Etẹwẹ Biblu dọ gando numọtolanmẹ yetọn lẹ, gbigbọ he yé nọ dohia po nuyiwa yetọn lẹ po go?

18 To ehe lẹpo godo, dovivẹnu nado yọ́n omẹ nankọ he mẹlọ yin taun. Lẹnnupọndo fihe e wá sọn, mẹwhinwhàn etọn po dogbó etọn lẹ po ji. Biblu dọ dọdai gando Jesu he yin ota agun lọ tọn go dọmọ: “E ma na nọ dawhẹ sọgbe hẹ awusọhia nukunta tọn, kavi wọhẹmẹ to dodonu nuhe e sè poun lẹ tọn ji. E na nọ dawhẹ jijlọ na agbátọnọ, e nasọ nọ yí dodowiwa do wọhẹmẹ do ota homẹmimiọnnọ aigba ji tọn lẹ tọn mẹ.” (Isa. 11:3, 4) Lẹngbọhọtọ pẹvi Jesu tọn lẹ wẹ mì mẹho lẹ yin, ewọ nasọ gọalọna mì nado dawhẹ dile e nọ wà do. (Mat. 18:18-20) Be homẹ mítọn ma hùn dọ mí tindo mẹho mẹtọnhopọntọ he nọ dovivẹnu nado wàmọ lẹ ya? Lehe mí yọ́n pinpẹn vivẹnu vẹkuvẹku he yé nọ do nado hẹn lẹblanu po whẹdida dodo po sudeji to agun mítọn lẹ mẹ tọn do sọ!

19. Detẹ to nuhe mí plọn sọn tito tòdaho fibẹtado tọn lẹ tọn mẹ wẹ a to linlẹn nado yizan?

19 Osẹ́n Mose tọn bẹ “adà tangan oyọnẹn tọn po nugbo lọ tọn po” hẹn bo plọnnu mí gando Jehovah po nunọwhinnusẹ́n dodo tọn etọn lẹ po go. (Lom. 2:20) Di apajlẹ, tito tòdaho fibẹtado tọn lẹ tọn plọn mẹho agun tọn lẹ lehe yé na “nọ yí nugbo do dawhẹ dodo” gbọn bosọ plọn mímẹpo lehe mí na “nọ yí owanyi nugbo po lẹblanu po do yinuwa hẹ ode awetọ” do. (Zek. 7:9) Mí masọ tin to Osẹ́n lọ glọ ba. Etomọṣo, Jehovah ma nọ diọ, podọ whẹdida dodo po lẹblanu po gbẹ́ yin nujọnu taun to nukun etọn mẹ. Lẹblanulọkẹyi nankọ die nado to Jiwheyẹwhe he dá mí to apajlẹ etọn mẹ lọ sẹ̀n, bo nọ do jẹhẹnu etọn nkọ lẹ hia dile mí to fibẹtado dín to ewọ mẹ!

^ huk. 16 Pọ́n “Kanbiọ lẹ sọn Wehiatọ lẹ Dè” to Atọ̀họ̀-Nuhihọ́ lọ Tọn 15 septembre 2006, w. 30 mẹ.