Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Atọ̀họ̀-Nuhihọ́ lọ Tọn—Zinjẹgbonu Oplọn Tọn  |  Novembre 2017

Nọ Jihàn po Ayajẹ Po!

Nọ Jihàn po Ayajẹ Po!

“E yọ́n nado nọ jihàn pipà tọn lẹ hlan Jiwheyẹwhe mítọn.”​—SALM. 147:1.

OHÀN LẸ: 10, 2

1. Etẹwẹ hànjiji nọ hẹn mí penugo nado wà?

HÀNSINỌ he diyin de dọ to gbèdopo dọmọ: “Hogbe lẹ sisè nọ hẹn linlẹn lẹ wá ayiha mítọn mẹ. Nuhiho de sisè nọ fọ́n numọtolanmẹ dote to ohò mítọn mẹ. Amọ́, hànjiji nọ yinuwado linlẹn po numọtolanmẹ mítọn lẹ po ji yì ahun mẹ.” Linlẹn dagbe hugan tẹlẹ wẹ gán sọ fọ́n numọtolanmẹ dote na mí hú dehe nọ pà Otọ́ mítọn olọn mẹ tọn, Jehovah bo nọ de owanyi he mí tindo na ẹn hia lẹ? Abajọ bọ hànjiji to pọmẹ hẹ agun omẹ Jiwheyẹwhe tọn lẹ tọn kavi to whenue mí to míde ṣo do yin adà tangan sinsẹ̀n-bibasi wiwe-ṣeke tọn de.

2, 3. (a) Etẹwẹ mẹdelẹ sọgan nọ lẹn gando hànjiji po gbèzeyiaga po to agun mẹ go? (b) Kanbiọ tẹlẹ wẹ mí na gbadopọnna?

2 Ṣigba, etẹwẹ a nọ lẹn gando hànjiji po gbèzeyiaga po to agun mẹ go? Be e nọ huwinyan na we wẹ ya? To aṣa delẹ mẹ, sunnu lẹ sọgan nọma voawu nado jihàn to mẹmẹ. Pọndohlan ehe sọgan yinuwado agun lọ blebu ji, titengbe eyin mẹhe to anadenanu lẹ nọ whleawu kavi nọ dín whẹjijọ nado to nudevo lẹ wà to whenue hagbẹ agun lọ tọn he pò lẹ to hànji.—Salm. 30:12.

3 Eyin mí nọ pọ́n hànjiji hlan taidi apadewhe sinsẹ̀n-bibasi mítọn tọn nugbonugbo, e họnwun dọ mí ma na nọ tọ́n sọn plitẹnhọ mẹ to adà opli tọn enẹ whenu kavi dike ni gbọ mí go. Enẹwutu, dopodopo mítọn dona kanse ede dọ: ‘Nukun tẹwẹ n’nọ yí do pọ́n hànjiji to opli mítọn lẹ ji? Nawẹ n’sọgan duto aliglọnnamẹnu depope he  gán hẹn mi whleawu nado yí ayajẹ do jihàn ji gbọn? Podọ etẹwẹ n’sọgan wà nado nọ de numọtolanmẹ he to ohàn mítọn lẹ mẹ tọ́n to gigọ́ mẹ to whenue mí to hànji?’

HÀNJIJI—ADÀ TANGAN SINSẸ̀N-BIBASI NUGBO TỌN DE

4, 5. Nawẹ tito he yin bibasi na hànjiji to sinsẹ̀n-bibasi mẹ to Islaeli hohowhenu tọn mẹ lẹ gbloada sọ?

4 Sọn hohowhenu wẹ sinsẹ̀n-basitọ Jehovah tọn lẹ ko nọ yí nuhiho zan nado pà Jehovah. E jẹna ayidego dọ whenue Islaelivi lẹ to Jehovah sẹ̀n po nugbonọ-yinyin po, yé nọ ylọ hànjiji dọ nujọnu taun to sinsẹ̀n-bibasi yetọn mẹ. Di apajlẹ, nado wleawuna sinsẹ̀nzọn he na nọ yin wiwà to tẹmpli mẹ, Ahọlu Davidi basi tito na Levinu 4 000 he na nọ jihàn pipà tọn lẹ. To yé mẹ, omẹ 288 wẹ “mọ azọ́nplọnmẹ yí nado nọ jihàn hlan Jehovah . . ., yèdọ azọ́nyọnẹntọ lẹ kẹdẹ.”—1 Otàn. 23:5; 25:7.

5 To klandowiwe tẹmpli lọ tọn whenu, nuhiho po hànjiji po yí adà tangan de wà. Kandai lọ dọna mí dọ: “To ojlẹ he mẹ opẹ̀n-kúntọ lẹ po hànjitọ lẹ po to Jehovah pà bo to pẹdona ẹn to pọmẹ, bọ nudidọ opẹ̀n lẹ, ajogàn lẹ po hànjinu okànnọ lẹ po tọn to agayi dile yé to Jehovah pà, . . . gigo Jehovah tọn gọ́ ohọ̀ Jiwheyẹwhe nugbo lọ tọn mẹ.” Lehe nujijọ enẹ na ko hẹn yise mẹhe to finẹ lẹ tọn lodo do sọ!—2 Otàn. 5:13, 14; 7:6.

6. Basi zẹẹmẹ nuhiho vonọtaun he wá aimẹ to anademẹ ayimatẹn-gán Nẹhemia tọn glọ to Jelusalẹm tọn.

6 Whenue Nẹhemia deanana Islaelivi nugbonọ lẹ nado vọ́ adó Jelusalẹm tọn lẹ do, e sọ basi tito na Levinu lẹ nado nọ jihàn bo nọ yí hànjinu voovo lẹ zan. To klandowiwe adó he yin vivọ́ do lọ lẹ tọn whenu, nuhiho vonọtaun he yin awuwlena lọ yidogọna ayajẹ hùnwhẹ lọ tọn taun. To ojlẹ enẹ mẹ, “hànjigbẹ́ pẹdido tọn daho awe” wẹ hònú. Hànjigbẹ́ dopodopo pànta awà voovo ji bọ yé to yìyì kaka bo wá pé to adó he sẹpọ lẹdo tẹmpli lọ tọn kọ̀n nado hònú bọ hàngbe yetọn na yin sisè sọn fidindẹn. (Nẹh. 12:27, 28, 31, 38, 40, 43) Ayihaawe ma tin dọ homẹ Jehovah tọn hùn taun nado sè lehe sinsẹ̀n-basitọ etọn lẹ yí zohunhun do to pipà ẹ to ohàn mẹ do.

7. Nawẹ Jesu dohia dọ hànjiji yin nujọnu to sinsẹ̀n-bibasi Klistiani tọn mẹ gbọn?

7 To whenue agun Klistiani tọn yin didoai godo, nuhiho gbẹ́ nọ yí adà tangan de wà to sinsẹ̀n-bibasi nugbo mẹ. To ozán titengbe hugan whenuho gbẹtọvi tọn mẹ, Jesu basi tito hànjiji tọn to whenue e ko ze Tenu-Núdùdù Oklunọ tọn dai godo.—Hia Matiu 26:30.

8. Apajlẹ tẹwẹ Klistiani owhe kanweko tintan tọn lẹ zedai na nuhe dù hànjiji to sinsẹ̀n-bibasi mẹ?

8 Klistiani owhe kanweko tintan tọn lẹ ze apajlẹ dai na mí na nuhe dù hànjiji dopọ nado pà Jiwheyẹwhe. Dile etlẹ yindọ owhé mẹdetiti tọn lẹ gbè wẹ yé nọ saba pli te, nọtẹn sinsẹ̀n-bibasi tọn he to jlẹkaji enẹlẹ ma de zohunhun he yé nọ yí do jihàn hlan Jehovah pò. Apọsteli Paulu na anademẹ Klistiani hatọ etọn lẹ to gbọdo glọ dọmọ: “Mì nọ to ode awetọ mìtọn plọn bo nọ to tulina ode awetọ zọnmii gbọn salmu lẹ, pipà lẹ nina hlan Jiwheyẹwhe gọna ohàn gbigbọmẹ tọn lẹ jiji po pinpẹn-nutọn-yinyọnẹn po dali bo nọ to hànji to ahun mìtọn mẹ hlan Jehovah.” (Kol. 3:16) “Ohàn gbigbọmẹ tọn [he dona yin] jiji po pinpẹn-nutọn-yinyọnẹn po” lẹ wẹ ohàn he to ohanwe mítọn mẹ lẹ yin nugbo. Yé yin apadewhe núdùdù gbigbọmẹ tọn he “afanumẹ nugbonọ podọ nuyọnẹntọ lọ” nọ wleawuna tọn.—Mat. 24:45.

DUTO AWUWHIWHLE NADO JIHÀN JI

9. (a) Etẹwẹ sọgan nọ glọnalina mẹdelẹ nado yí ayajẹ do jihàn to opli po plidopọ lẹ po ji? (b) Nawẹ mí dona nọ jihàn pipà tọn lẹ hlan Jehovah gbọn, podọ mẹnu lẹ wẹ dona nọ ze apajlẹ dai to ehe mẹ? (Pọ́n yẹdide he tin to bẹjẹeji hosọ ehe tọn.)

9 Etẹwẹ lo eyin hànjiji ma yin aṣa to whẹndo  towe mẹ kavi to lẹdo towe mẹ? Po nuyizan egbezangbe tọn lẹ po, vlavo a nọ duvivi todidoai na nuhiho hànjitọ azọ́nyọnẹntọ lẹ tọn. Ṣogan, eyin a yí kọnugbè towe jlẹdo hànjitọ he nọ de agbán tọ́n to egbehe lẹ tọn go, winyan sọgan nọ hù we kavi a gán nọ mọdọ kọnugbè emitọn ma yọ́n. Amọ́, enẹ ma dona glọnalina we nado hẹn azọngban towe gando ohàn pipà tọn lẹ jiji hlan Jehovah go di. Kakatimọ, ze ohanwe towe daga, jlọkọ̀ bo jihàn sọn ahun mẹ wá! (Ẹzla 3:11; hia Salmu lẹ 147:1.) To Plitẹnhọ Ahọluduta tọn susu mẹ to egbehe, hogbe ohàn lẹ tọn nọ sọawuhia to televiziọn ji, bọ ehe nọ hẹn ẹn bọawu nado jihàn po gbèzeyiaga po. E sọ jẹna ayidego dọ ohàn Ahọluduta tọn lẹ jiji ko yin yiyidogọ tito-to-whinnu Wehọmẹ Lizọnyizọn Ahọluduta tọn na mẹho lẹ. Ehe dohia hezeheze dọ mẹho lẹ dona nọ ze apajlẹ dai na nuhe dù hànjiji to opli lẹ ji.

10. Etẹwẹ mí dona nọ flin eyin obu to aliglọnna mí nado jihàn po gbèzeyiaga po?

10 Dopo to nuhe nọ glọnalina mẹsusu nado jihàn po gbèzeyiaga po lẹ mẹ wẹ obu. E sọgan yin obu lọ dọ ogbè yetọn kẹdẹ wẹ na to aga kavi dọ e ma na yọ́nsè na mẹdevo lẹ. Amọ́, mí dona hẹn do ayiha mẹ dọ “mímẹpo wẹ nọ ṣinuwa whlasusu” to hodidọ mẹ. (Jak. 3:2) Etomọṣo, enẹ ma nọ glọnalina mí nado dọho. Bọ etẹwutu mí nado dike kọnugbè mapenọ tọn mítọn ni glọnalina mí nado jihàn pipà tọn hlan Jehovah?

11, 12. Ayinamẹ tẹlẹ wẹ sọgan gọalọna mí nado hẹn nugopipe hànjiji tọn mítọn pọnte?

11 Mí sọ sọgan nọ whleawu nado jihàn, na mí ma yọ́n hànji ganji wutu. Ṣigba, mí sọgan hẹn nugopipe hànjiji tọn mítọn pọnte gbọn ayinamẹ kleun delẹ hihodo dali. *

12 A sọgan plọn nado nọ yí nujikudo po gbèzeyiaga po do jihàn gbọn agbọ́yíyí ganji dali. Kẹdẹdile huhlọn lẹtliki tọn nọ zọ́n bọ miyọ́ngbán de nọ tá do, agbọ́yíyí wẹ nọ na huhlọn  ogbè mítọn eyin mí to hodọ kavi to hànji. Lehe a nọ ze ogbè daga nado dọho do wẹ a dona nọ wà do nado jihàn kavi etlẹ yin humọ. (Pọ́n ayinamẹ he tin to owe lọ Mọaleyi sọn Wehọmẹ Lizọnyizọn Yẹwhehọluduta Tọn Mẹ, weda 181 jẹ 184, to hóvila lọ “Deanana Agbọ́ Yíyí Towe Ganji” glọ.) Na nugbo tọn, gando ohàn pipà tọn lẹ jiji go, Owe-wiwe lẹ nọ na anademẹ sinsẹ̀n-basitọ Jehovah tọn lẹ to whedelẹnu nado “yí ayajẹ do dawhá.”—Salm. 33:1-3.

13. Basi zẹẹmẹ lehe mí gán plọn nado nọ jihàn po nujikudo po do tọn.

13 Tẹ́n nuhe bọdego lẹ pọ́n to sinsẹ̀n-bibasi whẹndo tọn whenu kavi na dewe: De dopo to ohàn he a yiwanna hugan lẹ mẹ sọn ohanwe mítọn mẹ. Hia hàngbe lọ lẹ daga po nujikudo po. Enẹgodo, nọ yí agbọ́ whladopo gee whẹpo do hia hogbe he hodidọ dopodopo bẹhẹn lẹpo dopọ po gbèzeyiaga po. Todin, yí ogbè lélé dopolọ do ji hàngbe hodidọ dopodopo tọn. (Isa. 24:14) Gbọnmọ dali kọnugbè towe na dohuhlọn dogọ, podọ nudagbe de wẹ enẹ yin. Ma dike enẹ ni dobuna we kavi huwinyan na we blo!

14. (a) Nawẹ nùkikẹ ganji sọgan gọalọna mí nado jihàn gbọn? (Pọ́n apotin lọ “ Hẹn Nugopipe Hànjiji Tọn Towe Pọnte.”) (b) Ayinamẹ tẹlẹ wẹ a mọdọ yé yọ́n-na-yizan nado duto nuhahun kọnugbè tọn lẹ ji?

14 A ma na penugo nado de kọnugbè towe tọ́n to gigọ́ mẹ eyin a ma kẹnù ganji. Enẹwutu, ayinamẹ devo wẹ nado nọ kẹnù ganji hú lehe a nọ wà do to whenue a to hodọ to paa mẹ. Etẹwẹ a gán wà eyin a mọdọ ogbè towe ma nọ tátá kavi dọ ogbè towe nọ zìn zẹjlẹgo? A sọgan mọ ayinamẹ yọ́n-na-yizan lẹ gando nuhahun ehelẹ go to owe lọ Mọaleyi sọn Wehọmẹ Lizọnyizọn Yẹwhehọluduta Tọn Mẹ, weda 184, to apotin lọ “Dùdù to Nuhahun Tangan Delẹ Ji” mẹ.

NỌ JIHÀN PIPÀ TỌN LẸ SỌN AHUN MẸ

15. (a) Nulila tẹwẹ yin bibasi to opli whemẹwhemẹ tọn 2016 tọn ji? (b) Etẹwẹ yin delẹ to nuhe zọ́n bọ ohanwe yọyọ lọ do yin didetọn lẹ mẹ?

15 Homẹ mẹlẹpo tọn wẹ hùn to opli whemẹwhemẹ tọn Watch Tower Bible and Tract Society of Pennsylvania tọn ji to 2016 to whenue Mẹmẹsunnu Stephen Lett he yin dopo to Hagbẹ Anademẹtọ lọ mẹ lá dọ ohanwe yọyọ  de he hosọ etọn yin Yí Ayajẹ Do Jihàn” Hlan Jehovah na yin didetọn to madẹnmẹ nado nọ yin yiyizan to opli lẹ ji. Mẹmẹsunnu Lett basi zẹẹmẹ dọ dopo to nuhe zọ́n bọ ohanwe mítọn do yin vivọjlado lẹ mẹ wẹ nado hẹn hàngbe lọ lẹ sọgbe hẹ Owe Wiwe lẹ—Lẹdogbedevomẹ Aihọn Yọyọ Tọn he ṣẹṣẹ yin vivọjlado lọ. Ehe biọ dọ hàngbe he bẹ hogbe he masọ tin to vọjlado 2013 tọn Lẹdogbedevomẹ Aihọn Yọyọ Tọn mẹ ba lẹ ni yin didesẹ kavi yin vivọjlado. Humọ, ohàn yọyọ he dọhodo azọ́n yẹwhehodidọ tọn mítọn ji lẹ po dehe do pinpẹn-nutọn-yinyọnẹn mítọn na ofligọ lọ hia lẹ po ko yin yiyidogọ. Podọ na hànjiji yin adà tangan sinsẹ̀n-bibasi mítọn tọn de wutu, Hagbẹ Anademẹtọ lọ jlo dọ ohanwe yọyọ lọ ni yin awuwlena ganji bo tindo wepa wunmẹ dopolọ hẹ Lẹdogbedevomẹ Aihọn Yọyọ Tọn he yin vivọjlado lọ.

16, 17. Vọjlado tẹlẹ wẹ yin bibasi to ohanwe yọyọ lọ mẹ?

16 Nado hẹn ohanwe lọ “Yí Ayajẹ Do Jihàn” Hlan Jehovah bọawu zinzan, ohàn lọ lẹ yin tito sọgbe hẹ nuhe ji yé dọhodo. Di apajlẹ, ohàn 12 he jẹnukọn lẹ dọhodo Jehovah ji, bọ 8 he bọdego lẹ dọhodo Jesu po ofligọ lọ po ji, po mọmọ po. Alọdlẹndonu hosọ lẹ tọn de tin to e mẹ he yọ́n-na-yizan taun, di apajlẹ nado de ohàn he na yin jiji to hodidọ na mẹlẹpo whenu.

17 Na mẹlẹpo nido sọgan jihàn sọn ahun mẹ wá, hàngbe delẹ ko yin vivọjlado na linlẹn he yé bẹhẹn nido họnwun podọ nado de hogbe he masọ nọ yin yiyizan sọmọ lẹ sẹ̀. Humọ, vivẹnu yin dido na hàngbe lọ lẹ nido gando mẹdopodopo go tlọlọ bo jẹ ahun mẹ. Di apajlẹ, hosọ lọ “Linsinsinyẹn” ko yin didiọ do “Mì Nọ Yí Homẹfa Zan,” bọ hàngbe etọn lẹ lọsu yin vivọjlado. Hosọ lọ “Whlá Ahun Towe” yin didiọ do “Mí Dona Họ́ Ahun Mítọn” nado do awuvẹmẹ hia dogọ. Gbọnna? Susu mẹhe nọ wá opli po plidopọ mítọn lẹ po tọn wẹ nọ yin mẹyọyọ, jlodotọ, jọja po mẹmẹyọnnu lẹ po, bọ hàngbe mọnkọtọn lẹ jiji sọgan zọ́n bọ yé na wá mọ yede taidi mẹhe to nuplọn mẹdevo lẹ gando nuhe yé dona wà go. Nuhe zọ́n bọ hosọ lọ po hàngbe lọ lẹ po do yin vivọjlado niyẹn.

Mì nọ basi zepọn ohàn lẹ tọn to sinsẹ̀n-bibasi whẹndo tọn whenu (Pọ́n hukan 18tọ)

18. Naegbọn mí dona jẹakọ hẹ ohàn he to ohanwe yọyọ mítọn mẹ lẹ? (Pọ́n nudọnamẹ odò tọn.)

18 Susu ohàn he to ohanwe lọ “Yí Ayajẹ Do Jihàn” Hlan Jehovah mẹ lẹ tọn wẹ yin awuwlena taidi odẹ̀. A sọgan nọ ji ohàn ehelẹ nado dọ numọtolanmẹ towe lẹ na Jehovah. Ohàn devo lẹ na gọalọ “nado nọ whàn mídelẹ hlan owanyi po azọ́n dagbe lẹ po kọ̀n.” (Heb. 10:24) Matin ayihaawe, mímẹpo wẹ na jlo nado jẹakọ hẹ nuhiho po hàngbe ohàn mítọn lẹ tọn po. A sọgan wàmọ gbọn todidoai na hànjiji yidokanji he to jw.org ji lẹ dali to ogbè he a sè de mẹ. Eyin a nọ basi zepọn ohàn lẹ tọn to whégbè, a sọgan plọn nado nọ ji yé po nujikudo po sọn ahun mẹ wá. *

19. Nawẹ hagbẹ agun lọ tọn lẹpo sọgan nọ tindo mahẹ to sinsẹ̀n-bibasi tlọlọ hlan Jehovah mẹ gbọn?

19 Flindọ adà titengbe sinsẹ̀n-bibasi mítọn tọn de wẹ hànjiji yin. Aliho dagbe de wẹ e yin nado do owanyi po pinpẹn-nutọn-yinyọnẹn mítọn po hia Jehovah. (Hia Isaia 12:5.) Eyin a nọ yí ayajẹ do jihàn, enẹ na na tuli mẹdevo lẹ nado nọ jihàn po nujikudo po. Na nugbo tọn, hagbẹ agun lọ tọn lẹpo—yèdọ yọpọvu, mẹho po jlodotọ lẹ po—wẹ dona nọ kọnawudopọ to wunmẹ sinsẹ̀n-bibasi tọn tlọlọ ehe mẹ hlan Jehovah. Enẹwutu, ma nọ whleawu nado jihàn blo. Kakatimọ, nọ setonuna anadenamẹ he salmu-kantọ lọ na to gbọdo glọ dọmọ: “Mì jihàn hlan Jehovah!” Mọwẹ, nọ jihàn po ayajẹ po!—Salm. 96:1.

^ huk. 11 Na nudọnamẹ dogọ gando lehe a sọgan hẹn kọnugbè towe pọnte do go, pọ́n video lọ “Wleawu Nado Ji Ohàn Yọyọ Lẹ” to Televiziọn JW ji (pọ́n VIDEO HE JLO WE > SỌN TELEVIZIỌN-HỌSA MÍTỌN).

^ huk. 18 Na mí nido wleawudai nado jihàn ganji to plidopọ mítọn lẹ ji, adà tito-to-whinnu lọ tọn dopodopo nọ bẹjẹeji po nuhiho nukunwhiwhe-ao tọn de po. Nuhiho hànjigbẹ́ tọn ehelẹ nọ yin awuwlena to aliho de mẹ nado gọalọna mí bọ mí na ko wleawuna ahun po ayiha mítọn po dote na tito-to-whinnu he na bọdego. Enẹwutu, mí yin tulina nado nọ sinai to otẹn mítọn lẹ mẹ whẹpo nuhiho lọ nido bẹ bo nọ yí sọwhiwhe do dotoai.