Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

ATỌ̀HỌ̀-NUHIHỌ́ LỌ TỌN (ZINJẸGBONU OPLỌN TỌN) NOVEMBRE 2016

Be A Nọ Yí Nukun Nujọnu Tọn Do Pọ́n Owe Jehovah Tọn Ya?

Be A Nọ Yí Nukun Nujọnu Tọn Do Pọ́n Owe Jehovah Tọn Ya?

“To whenue mì kẹalọyi ohó Jiwheyẹwhe tọn, . . . mì kẹalọyi i . . . kẹdẹdile e te do nugbonugbo, yèdọ taidi ohó Jiwheyẹwhe tọn.”—1 TẸS. 2:13.

OHÀN LẸ: 114, 113

1-3. Etẹwẹ sọgan ko hẹn gbemanọpọ wá Euodia po Sintiki po ṣẹnṣẹn, podọ nawẹ nuhahun mọnkọtọn lẹ sọgan yin didapana gbọn? (Pọ́n yẹdide he tin to bẹjẹeji hosọ ehe tọn.)

DEVIZỌNWATỌ Jehovah tọn lẹ nọ yí nukun nujọnu tọn do pọ́n owe wiwe Jiwheyẹwhe tọn titi, yèdọ Biblu. Na mí yin mapenọ wutu, mímẹpo wẹ nọ mọ ayinamẹ Owe-wiwe tọn yí to whedelẹnu. Nawẹ mí nọ yinuwa gbọn? Lẹnnupọndo Klistiani owhe kanweko tintan tọn Euodia po Sintiki po ji. Gbemanọpọ sinsinyẹn lẹ fọndote to yọnnu yiamisisadode awe ehelẹ ṣẹnṣẹn. Etẹwẹ jọ? Biblu ma dọ. Ṣigba, lẹnnupọndo yọnbasi ehe ji.

2 Mí ni dọ dọ Euodia basi oylọna mẹmẹsunnu po mẹmẹyọnnu delẹ po wá owhé etọn gbè nado dùnú bo jaya dopọ. E ma basi oylọna Sintiki, ṣigba Sintiki sè dogbọn ojlẹ dagbe he yé yizan dopọ lọ dali. Sintiki sọgan ko dọmọ: ‘N’ma gán yise dọ Euodia ma basi oylọna mi! N’lẹndọ họntọn dagbe wẹ mí yin sin.’ Na Sintiki tindo numọtolanmẹ dọ Euodia zan emi wutu, e jẹ ayihaawe tindo gando Euodia go ji bo tlẹ jẹ nuvẹdo e ji. Enẹwutu, Sintiki lọsu wleawuna jonọyiyi etọn titi bo basi oylọna mẹmẹsunnu po mẹmẹyọnnu dopolọ lẹ po—ṣigba,  e ma ylọ Euodia! Gbemanọpọ he tin to Euodia po Sintiki po ṣẹnṣẹn sọgan ko hẹn jijọho agun lọ blebu tọn gble. Biblu ma dọ kọdetọn gbemanọpọ lọ tọn, ṣigba mẹmẹyọnnu ehelẹ na ko yinuwa to aliho dagbe mẹ gando ayinamẹ owanyinọ apọsteli Paulu tọn go.—Flp. 4:2, 3.

3 To egbehe, to agun omẹ Jehovah tọn lẹ tọn mẹ, ninọmẹ mọnkọtọn lẹ nọ hẹn nuhahun lẹ wá to whedelẹnu. Etomọṣo, nuhahun mọnkọtọn lẹ sọgan yin dididẹ kavi tlẹ yin didapana eyin mí nọ yí ayinamẹ he tin to Ohó Jiwheyẹwhe tọn Biblu mẹ lẹ do yizan mẹ. Podọ eyin mí nọ yí nukun nujọnu tọn do pọ́n Owe Jehovah tọn titi, mí na nọ nọgbẹ̀ sọgbe hẹ anademẹ etọn lẹ.—Salm. 27:11.

OWE JIWHEYẸWHE TỌN TITI PO NUMỌTOLANMẸ GBẸTỌVI TỌN LẸ PO

4, 5. Ayinamẹ tẹlẹ wẹ Ohó Jiwheyẹwhe tọn na mí gando numọtolanmẹ mítọn lẹ didava go?

4 E ma nọ bọawu nado dava numọtolanmẹ mítọn lẹ to whenue mí mọdọ mí yin didepo kavi yin nuyiwa hẹ to aliho mawadodo tọn mẹ. E sọgan gbleawuna mí taun eyin mí yin nuyiwa hẹ to aliho agọ̀ mẹ na akọ̀ mítọn, sinmẹ agbasa tọn mítọn kavi na vogbingbọn agbasa tọn devo lẹ wutu. Lehe awufiẹsa lọ nasọ sinyẹn sọ eyin Klistiani hatọ de wẹ gbleawuna mí! Be Ohó Jiwheyẹwhe tọn na ayinamẹ lẹ he na gọalọna mí nado pehẹ jijọ ylankan gbẹtọvi mapenọ lẹ tọn ehe ya?

5 Jehovah ko to haṣinṣan gbẹtọvi lẹ tọn pọ́n sọn didá yetọn whenu gbọ́n. Ewọ nọ doayi numọtolanmẹ po nuyiwa mítọn lẹ po go. Linlẹn mítọn lẹ, etlẹ yin dehe bẹ numọtolanmẹ sinsinyẹn hẹn lẹ, sọgan dekọtọn do hogbe po nuyiwa he na wá vẹna mí to nukọn mẹ lẹ po mẹ. Lehe e yin nuyọnẹnnu do sọ nado yí ayinamẹ Biblu tọn lẹ do yizan mẹ bo nọ dava numọtolanmẹ mítọn lẹ bosọ nọ dapana homẹgble aplà! (Hia Howhinwhẹn lẹ 16:32; Yẹwhehodọtọ 7:9.) Ayihaawe ma tin dọ, mímẹpo wẹ dona dovivẹnu ma nado nọ yawu gblehomẹ podọ nado nọ jonamẹ dogọ. Jehovah po Jesu po nọ yí nukun nujọnu tọn do pọ́n whẹho jonamẹ tọn. (Mat. 6:14, 15) Be e biọ dọ a ni nọ jonamẹ dogọ kavi a ni nọ dava numọtolanmẹ towe lẹ dogọ wẹ ya?

6. Naegbọn mí dona họ́ míde sọta adidudu?

6 Mẹhe nọ gboawupo nado dava numọtolanmẹ yetọn lẹ nọ saba lẹzun fifiẹtọ. Taidi kọdetọn de, gbẹtọ lẹ ma na nọ jlo nado sẹpọ yé. Mẹhe nọ duadi sọgan tindo nuyiwadomẹji ylankan do agun lọ ji. Mẹlọ sọgan tẹnpọn nado whlá adi kavi etlẹ yin wangbẹna etọn, ṣigba linlẹn agọ̀ he whlá do ahun etọn mẹ lẹ “na yin didegbà to agun mẹ.” (Howh. 26:24-26) Mẹho agun tọn lẹ sọgan gọalọna omẹ mọnkọtọn lẹ nado mọnukunnujẹemẹ dọ adi, homẹgble po mẹhẹndohomẹ po yin jijọ he ma tindo otẹn to titobasinanu Jiwheyẹwhe tọn mẹ. Nuhe owe họakuẹ Jehovah tọn titi dọ gando jijọ ehelẹ go họnwun. (Lev. 19:17, 18; Lom. 3:11-18) Be a nọ kẹalọyi nuhe e dọ lẹ ya?

NỌ FLIN LEHE MÍ NỌ YIN ANADENA DO

7, 8. (a) Nawẹ Jehovah nọ deanana adà aigba ji tọn titobasinanu etọn tọn gbọn? (b) Etẹwẹ yin delẹ to anademẹ he tin to Ohó Jiwheyẹwhe tọn mẹ lẹ mẹ, podọ naegbọn mí dona nọ setonuna yé?

7 Jehovah nọ deanana mẹhe tin to adà aigba ji tọn titobasinanu etọn tọn mẹ lẹ bo nọ na yé núdùdù gbọn “afanumẹ nugbonọ podọ nuyọnẹntọ lọ” he tin to anademẹ Klisti tọn glọ, yèdọ “ota agun lọ tọn” gblamẹ. (Mat. 24:45-47; Efe. 5:23) Taidi hagbẹ anademẹtọ owhe kanweko tintan whenu tọn, afanumẹ ehe nọ kẹalọyi ohó gbọdo Jiwheyẹwhe tọn kavi wẹndomẹ etọn bo nọ yí nukun nujọnu tọn do pọ́n ẹn. (Hia 1 Tẹsalonikanu lẹ 2:13.) Etẹwẹ yin delẹ to gbedide kavi anademẹ he yin awuwlena do Biblu mẹ na ale mítọn lẹ mẹ?

8 Biblu na mí anademẹ nado nọ yì opli lẹ to gbesisọ mẹ. (Heb. 10:24, 25) E dotuhomẹna mí nado nọ tindo nuyise dopolọ. (1 Kọl. 1:10) Ohó Jiwheyẹwhe tọn dọna mí nado nọ ze  Ahọluduta lọ do otẹn tintan mẹ to gbẹzan mítọn mẹ. (Mat. 6:33) Owe-wiwe lẹ sọ zinnudo azọngban podọ lẹblanulọkẹyi mítọn nado nọ dọyẹwheho sọn whédegbè-jẹ-whédegbè, to nọtẹn gbangba tọn lẹ podọ to aliho mayin aṣa tọn mẹ ji. (Mat. 28:19, 20; Owalọ 5:42; 17:17; 20:20) Owe Jiwheyẹwhe tọn titi na anademẹ mẹho agun tọn lẹ nado hẹn titobasinanu etọn do wiweji. (1 Kọl. 5:1-5, 13; 1 Tim. 5:19-21) Podọ Jehovah degbe dọ mẹhe tin to titobasinanu etọn mẹ lẹpo dona tin to wiweji to agbasa-liho podọ to gbigbọ-liho.—2 Kọl. 7:1.

9. Asisa dopo gee tẹ gblamẹ wẹ mí nọ mọ alọgọ yí te nado mọnukunnujẹ Ohó Jiwheyẹwhe tọn mẹ?

9 Mẹdelẹ sọgan nọ lẹndọ yé sọgan basi zẹẹmẹ Biblu tọn na yede. Ṣigba, Jesu ko de “afanumẹ nugbonọ” lọ nado yin asisa dopo gee he gblamẹ núdùdù gbigbọmẹ tọn na nọ yin ninamẹ te. Sọn 1919, Jesu Klisti he yin gigopana lọ ko to afanumẹ enẹ yizan nado gọalọna hodotọ etọn lẹ nado mọnukunnujẹ Owe Jiwheyẹwhe tọn titi mẹ bo hodo anademẹ he e bẹhẹn lẹ. Gbọn tonusisena anademẹ he tin to Biblu mẹ lẹ dali, mí nọ yidogọna wiwejininọ, jijọho po pọninọ po to agun mẹ. E na yọ́n dọ dopodopo mítọn ni kanse ede dọ, ‘Be n’nọ yin nugbonọ na asisa he Jesu to yiyizan to egbehe lọ ya?’

AWHÀN-KẸKẸ JEHOVAH TỌN TO NUKỌNYI!

10. Nawẹ adà olọn mẹ tọn titobasinanu Jehovah tọn yin zẹẹmẹ-basina to owe Ezekiẹli tọn mẹ gbọn?

10 Biblu nọ gọalọna mí nado jẹakọ hẹ adà olọn mẹ tọn titobasinanu Jehovah tọn. Di apajlẹ, yẹwhegán Ezekiẹli mọ numimọ de he mẹ adà olọn mẹ tọn titobasinanu Jiwheyẹwhe tọn yin tenọna gbọn awhàn-kẹkẹ olọn mẹ tọn de dali te. (Ezek. 1:4-28) Jehovah wẹ to awhàn-kẹkẹ lọ kùn podọ fidepope he gbigbọ etọn deanana awhàn-kẹkẹ lọ hlan wẹ e nọ yì. Taidi kọdetọn de, adà olọn mẹ tọn titobasinanu etọn tọn nọ yinuwado adà aigba ji tọn lọ ji. E họnwun dọ nukọnyi wẹ awhàn-kẹkẹ lọ te! Lẹnnupọndo diọdo susu he ko yin bibasi to titobasinanu lọ mẹ to owhe ao he wayi lẹ gblamẹ ji—podọ hẹn do ayiha mẹ dọ Jehovah wẹ to godona vọjlado mọnkọtọn lẹ. Na Klisti po angẹli wiwe etọn lẹ po na và aihọn ylankan ehe sudo to madẹnmẹ wutu, awhàn-kẹkẹ Jehovah tọn to mizọnmizọn ji nado suwhẹna nupojipetọ-yinyin etọn bo klan oyín etọn do wiwe!

Lehe mí yọ́n pinpẹn mẹdezejotọ ojlo dagbenọ susu he nọ wazọ́n sinsinyẹn nado nọgodona tito họ̀gbigbá tọn lẹ tọn do sọ! (Pọ́n hukan 11tọ)

11, 12. Etẹwẹ yin delẹ to nuhe titobasinanu Jehovah tọn to wiwadotana lẹ mẹ?

11 Lẹnayihamẹpọn do nuhe adà aigba ji tọn titobasinanu Jiwheyẹwhe tọn to wiwadotana to azán godo tọn ehelẹ mẹ ji. Họ̀gbigbá. Azọ́nwatọ kanweko susu lẹ wẹ hẹn alọnu yetọn ján to tatọ́-tẹnnọ yọyọ Kunnudetọ Jehovah tọn lẹ tọn gbigbá mẹ to Warwick, New York to États-Unis d’Amérique. To anademẹ Azọ́nwatẹn Yẹdide po Họ̀gbigbá Lẹdo Aihọn Pé po tọn glọ, mẹdezejotọ fọtọ́n susu lẹ lẹdo aihọn pé wẹ to azọ́n sinsinyẹn wà nado gbá Plitẹnhọ Ahọluduta tọn yọyọ lẹ bosọ nọ hẹn alahọ lẹ gblodeji. Lehe mí yọ́n pinpẹn mẹdezejotọ ojlo dagbenọ susu ehelẹ he nọ wazọ́n sinsinyẹn nado nọgodona tito mọnkọtọn lẹ tọn do sọ! Flindọ lẹdo aihọn pé, Jehovah to didona wẹnlatọ  Ahọluduta lọ tọn lẹ he nọ gbọn whiwhẹ po nugbonọ-yinyin po dali basi nunina sọgbe hẹ nugopipe yetọn nado nọgodona tito mọnkọtọn lẹ to akuẹzinzan-liho.—Luku 21:1-4.

12 Mẹpinplọn. Lẹnnupọndo wehọmẹ voovo he nọ plọnmẹ Ohó Jiwheyẹwhe tọn lẹ ji. (Isa. 2:2, 3) Mí tindo Wehọmẹ Sinsẹ̀nzọn Gbehosọnalitọ tọn, Wehọmẹ Wẹndagbe-Jlatọ Ahọluduta lọ Tọn lẹ tọn, Wehọmẹ Giliadi tọn, Wehọmẹ Mẹhe Wá Bẹtẹli Yọyọ lẹ tọn, Wehọmẹ Nugopọntọ Tomẹyitọ lẹ po Asi Yetọn lẹ po tọn, Wehọmẹ Mẹho Agun Tọn lẹ tọn, Wehọmẹ Lizọnyizọn Ahọluduta tọn, Wehọmẹ Hagbẹ Wedegbẹ́ Alahọ Tọn lẹ po Asi Yetọn lẹ po tọn. Lehe Jehovah yiwanna omẹ etọn lẹ pinplọn do sọ! Nuplọnmẹ sinai do Biblu ji sọ nọ yin godonọna to nọtẹn Intẹnẹt tọn mítọn, jw.org ji, fie mí tindo owe lẹ to ogbè kanweko susu lẹ mẹ te. Nọtẹn lọ tindo adà vonọtaun lẹ na yọpọvu lẹ, na whẹndo lẹ podọ adà de he nọ bẹ nuyọyọ lẹ hẹn. Be a ko to jw.org yizan to lizọnyizọn towe mẹ podọ to sinsẹ̀n-bibasi whẹndo tọn towe whenu ya?

YIN NUGBONỌ NA JEHOVAH BO NỌ NỌGODONA TITOBASINANU ETỌN

13. Azọngban tẹwẹ mí tindo taidi sinsẹ̀n-basitọ nugbonọ Jehovah tọn lẹ?

13 Lẹblanulọkẹyi nankọ die nado tin to titobasinanu Jehovah tọn mẹ! To whenuena e yindọ mí yọ́n nubiọtomẹsi po nujinọtedo Jiwheyẹwhe tọn lẹ po, mí tindo azọngban lọ nado wà nuhe sọgbe bo nọgodona nupojipetọ-yinyin etọn. Dile aihọn ehe fọ́n bo to titlọ biọ walọ gblezọn mẹ, mí dona “gbẹwanna oylan” dile Jehovah nọ wà do. (Salm. 97:10) Mí nọ gbẹ́ nado kọnawudopọ hẹ gbẹtọ jijọ-madi-Jiwheyẹwhe tọn lẹ bo ma “nọ ylọ dagbe dọ oylan podọ oylan dọ dagbe.” (Isa. 5:20) Na mí jlo na hẹn homẹ Jiwheyẹwhe tọn hùn wutu, mí nọ dovivẹnu nado gbọṣi wiweji to agbasa-liho, walọyizan-liho podọ to gbigbọ-liho. (1 Kọl. 6:9-11) Mí yiwanna Jehovah bo nọ ze jide mítọn do ewọ mẹ; mí nọ do nugbonọ-yinyin mítọn na ẹn hia gbọn gbẹninọ sọgbe hẹ nujinọtedo he yin sislẹ to aliho he họnwun mẹ do Owe họakuẹ etọn titi mẹ lẹ dali. Podọ mí nọ wà nue go mí pé lẹpo nado setonuna nujinọtedo enẹlẹ to whégbè, to agun mẹ, to azọ́nmẹ, to wehọmẹ—to filẹpo. (Howh. 15:3) Gbọ mí ni pọ́n aliho devo lẹ he mẹ mí sọgan dohia dọ mí yin nugbonọ na Jiwheyẹwhe te.

14. Nawẹ mẹjitọ Klistiani lẹ nọ dohia dọ emi yin nugbonọ na Jiwheyẹwhe gbọn?

14 Ovi lẹ pinplọn whẹ́n. Mẹjitọ Klistiani lẹ nọ dohia dọ emi yin nugbonọ na Jehovah gbọn ovi yetọn lẹ pinplọn sọgbe hẹ Ohó etọn dali. Mẹjitọ jijọ-di-Jiwheyẹwhe tọn lẹ ma nọ yin nuyiwadeji to aliho agọ̀ mẹ gbọn aṣa lẹdo tọn he gando ovi lẹ pinplọn whẹ́n go dali. Gbigbọ aihọn tọn ma tindo otẹn to whédo Klistiani tọn de mẹ. (Efe. 2:2) Otọ́ Klistiani he ko yí baptẹm de ma na dọ dọ, ‘To otò mítọn mẹ, yọnnu wẹ nọ plọn ovi.’ Nuhe Biblu dọ gando whẹho lọ go họnwun dọmọ: “Mì otọ́ lẹ emi . . . mì nọ to pinpọn [ovi mìtọn lẹ] go whẹ́n to mẹplọnlọ po tudohomẹnamẹ [oplọn; anademẹ] Jehovah tọn po mẹ.” (Efe. 6:4; Odò.) Otọ́ po onọ̀ budisi Jiwheyẹwhe tọ́ lẹ po nọ jlo dọ ovi yetọn lẹ ni taidi Samuẹli, yèdọ mẹhe Jehovah tin hẹ dile e to whinwhẹ́n.—1 Sam. 3:19.

15. Nawẹ mí nọ dohia dọ mí yin nugbonọ na Jehovah to whenue mí to nudide sinsinyẹn lẹ basi gbọn?

15 Nudide lẹ bibasi. To whenue mí to nudide sinsinyẹn lẹ basi to gbẹ̀mẹ, aliho de nado dohia dọ mí yin nugbonọ na Jiwheyẹwhe wẹ nado nọ dín alọgọ sọn Ohó etọn Biblu mẹ podọ sọn titobasinanu etọn dè. Nado do nujọnu-yinyin mọwiwà tọn hia, lẹnnupọndo whẹho sinsinyẹn de ji he nọ yinuwado mẹjitọ susu ji. Aṣa he gbayipe to mẹhe tin to tògodo delẹ ṣẹnṣẹn wẹ yindọ eyin yé jivi, yé nọ do ovi lọ hlan hẹnnumẹ yetọn lẹ to owhé na yé nido penukundego, gbọnmọ dali yelọsu nọ vò nado wazọ́n bo dín akuẹ. Nugbo wẹ dọ nudide mẹdetiti tọn wẹ, ṣigba mí dona hẹn do ayiha mẹ  dọ mí na dogbè nudide he mí nọ basi lẹ tọn na Jiwheyẹwhe. (Hia Lomunu lẹ 14:12.) Be e na yin nuyọnẹnnu ma nado dín anademẹ Biblu tọn whẹpo do basi nudide sinsinyẹn he gando whẹndo mítọn po agbasazọ́n po go lẹ ya? Paali! Mí tindo nuhudo alọgọ Otọ́ olọn mẹ tọn mítọn tọn, na mílọsu ma sọgan deanana afọdide mítọn titi lẹ.—Jel. 10:23.

16. To whenue nawe de jivi, nudide tẹwẹ ewọ dona basi, podọ etẹwẹ gọalọna ẹn nado basi nudide he sọgbe lọ?

16 Nawe de ji visunnu de to whenue e tin to tògodo bo jlo na do ovi lọ hlan whé na mẹjitọ daho ovi lọ tọn lẹ nido penukundego. To ojlẹ lọ mẹ, dopo to Kunnudetọ Jehovah tọn lẹ mẹ ko jẹ Biblu plọn hẹ ẹ ji. E to nukọnyi to gbigbọ-liho bosọ plọn dọ ewọ wẹ Jiwheyẹwhe ze azọngban lọ do alọmẹ na nado pọ́n ovi etọn go whẹ́n nado sẹ̀n Jehovah. (Salm. 127:3; Howh. 22:6) Nawe lọ kọ̀n ahun etọn jẹgbonu hlan Jehovah to odẹ̀ mẹ, dile Owe-wiwe lẹ dọna mí nado nọ wà do. (Salm. 62:7, 8) E sọ dọ nuhe to ahun ji na ẹn na mẹhe to Biblu plọn hẹ ẹ bosọ dọho hẹ mẹdevo lẹ to agun lọ mẹ. Dile etlẹ yindọ hẹnnumẹ po họntọn etọn lẹ po gbidikọna ẹn nado do ovi etọn hlan mẹjitọ daho lọ lẹ, ewọ wá tadona kọ̀n dọ e ma sọgbe nado wàmọ. Aliho he mẹ agun lọ dohia dọ emi yin fibẹtado de na ewọ po viyẹyẹ lọ po te yinuwado asu etọn ji sọmọ bọ e kẹalọyi plọnmẹ Biblu de bo ẹ opli lẹ yì ji hẹ asi etọn po ovi etọn po. Be a lẹndọ onọ̀ ehe mọdọ Jehovah na gblọndo odẹ̀ ahundopo tọn emitọn ya? Matin ayihaawe, numọtolanmẹ he e tindo niyẹn.

17. Anademẹ tẹwẹ mí mọyi gando plọnmẹ Biblu lẹ go?

17 Anademẹ lẹ hihodo. Aliho titengbe de he mẹ mí nọ dohia dọ mí yin nugbonọ na Jiwheyẹwhe te wẹ gbọn anademẹ he mí nọ mọyi sọn titobasinanu etọn dè lẹ hihodo dali. Di apajlẹ, lẹnnupọndo ayinamẹ he yin nina gando plọnmẹ Biblu mítọn lẹ go ji. Anademẹ ko yin nina mí dọ ojlẹ kleun de to whenue mí jẹ owe lọ Etẹwẹ Biblu Plọn Mí Taun? plọn hẹ mẹde ji godo, mí ni nọ yí nukunwhiwhe kleun delẹ zan to oplọn dopodopo godo nado dọ̀n ayiha nuplọntọ lọ tọn wá titobasinanu lọ ji. Mí sọgan wàmọ gbọn video lọ Etẹwẹ Nọ Jọ to Plitẹnhọ Ahọluduta Tọn? po alọnuwe lọ Mẹnu lẹ Wẹ to Ojlo Jehovah Tọn Wà to Egbehe? po yiyizan dali. Ayinamẹ ko yin nina mí dọ to whenue mí dotana owe Biblu Plọn Mí hẹ nuplọntọ he to nukọnyi de, mí ni plọn owe lọ Mì Gbọṣi Owanyi Jiwheyẹwhe Tọn Mẹhẹ ẹ, eyin ewọ tlẹ ko yí baptẹm to ojlẹ enẹ mẹ. Titobasinanu lọ na anademẹ ehe, na devi yọyọ lẹ nido yin “hinhẹn lodo to yise mẹ.” (Kol. 2:7) Be a nọ hodo anademẹ mọnkọtọn he wá sọn titobasinanu Jehovah tọn dè lẹ ya?

18, 19. Etẹwẹ yin delẹ to whẹwhinwhẹ́n he wutu mí dona nọ dopẹna Jehovah lẹ mẹ?

18 Mí tindo whẹwhinwhẹ́n susu nado dopẹna Jehovah! Mí duahọ ogbẹ̀ mítọn tọn do e, na gbọn ewọ dali wẹ mí nọ yì bosọ tin. (Owalọ 17:27, 28) E ko na mí nunina he họakuẹ taun de—yèdọ owe etọn titi, Biblu. Mí nọ gbọn pinpẹn-nutọn-yinyọnẹn dali kẹalọyi i taidi wẹndomẹ Jiwheyẹwhe tọn kẹdẹdile Klistiani Tẹsalonika tọn lẹ kẹalọyi Ohó Jiwheyẹwhe tọn do.—1 Tẹs. 2:13.

19 Ohó Jiwheyẹwhe tọn Biblu he mí tindo ko gọalọna mí nado dọnsẹpọ Jehovah podọ ewọ ko dọnsẹpọ mí. (Jak. 4:8) Otọ́ olọn mẹ tọn mítọn ko na mí lẹblanulọkẹyi jiawu lọ nado tin to titobasinanu etọn mẹ. Lehe mí nọ yọ́n pinpẹn dona mọnkọtọn lẹ tọn do sọ! Salmu-kantọ lọ basi zẹẹmẹ dona ehelẹ tọn to aliho dagbedagbe mẹ to whenue e jihàn dọmọ: “Mì nọ dopẹna Jehovah, na ewọ yọ́n; owanyi nugbo etọn na gbọṣi aimẹ kakadoi.” (Salm. 136:1) To Salmu 136tọ mẹ, whla koatọ́n-nukundopo wẹ mí mọ hàngbèpli lọ, “owanyi nugbo etọn na gbọṣi aimẹ kakadoi.” Eyin mí yin nugbonọ na Jehovah po titobasinanu etọn po, mí na mọ hẹndi hogbe ojlofọndotenamẹ tọn enẹlẹ tọn, na mí na nọgbẹ̀ kakadoi wutu!