Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

ATỌ̀HỌ̀-NUHIHỌ́ LỌ TỌN (ZINJẸGBONU OPLỌN TỌN) DÉCEMBRE 2016

Be Hiẹ Flin Ya?

Be Hiẹ Flin Ya?

Be a yí sọwhiwhe do hia zinjẹgbonu Atọ̀họ̀-Nuhihọ́ lọ Tọn agọe tọn lẹ ya? Eyọn, pọ́n eyin a sọgan na gblọndo kanbiọ he bọdego ehelẹ tọn:

Ylando wunmẹ tẹ hodọ wẹ Jesu te to ayinamẹ he e na to Matiu 18:15-17 mẹ?

E to hodọ gando whẹho delẹ he sọgan yin dididẹ to mẹhe go whẹho lọ gando tlọlọ lẹ ṣẹnṣẹn go. Ṣigba, e na yin ylando de he sinyẹn sọmọ bọ mẹlọ sọgan yin didesẹ sọn agun mẹ eyin whẹho lọ ma yin dididẹ. Di apajlẹ, ylando mọnkọtọn sọgan yin mẹnudidọ mẹhẹngble tọn kavi mẹhodu.—w16.05, w. 7.

Etẹlẹ wẹ a sọgan wà nado mọaleyi dogọ sọn Biblu hihia mẹ?

A sọgan wà nuhe bọdego ehelẹ: Nọ tindo pọndohlan he gbloada, nọ dín nuplọnmẹ he a sọgan yí do yizan mẹ lẹ; nọ kàn kanbiọ delẹ sè dewe taidi ‘Nawẹ n’sọgan yí ehe zan nado gọalọna mẹdevo lẹ gbọn?’; podọ nọ yí azọ́nwanu he tin-to-aimẹ lẹ zan nado basi dodinnanu do nuhe a ṣẹṣẹ hia lọ ji.—w16.05, w. 24-26.

Be e ylan dọ Klistiani de ni blawu mahopọnna dọ ewọ tindo yise to fọnsọnku mẹ wẹ ya?

Yise to fọnsọnku mẹ ma nọ de awubla sinsinyẹn he okú mẹyiwanna de tọn sọgan hẹnwa na Klistiani de sẹ̀. Ablaham nọ aluẹmẹ to whenue Sala kú. (Jen. 23:2) Dile ojlẹ to yìyì, awubla lọ nọ wá depò.—wp16.3, w. 4.

Mẹnu wẹ dawe he tindo wesinzo wekantọ tọn bo yin nùdego to Ezekiẹli weta 9 mẹ lọ, po sunnu ṣidopo he tindo adánwanu lẹ po nọtena?

Mí mọnukunnujẹemẹ dọ yé nọtena awhànpa olọn mẹ tọn lẹ he tindo mahẹ to vasudo Jelusalẹm tọn mẹ bo nasọ tindo mahẹ to vasudo titonu ehe tọn mẹ to Amagẹdọni whenu. To hẹndi egbezangbe tọn mẹ, dawe he hẹn wesinzo lọ nọtena Jesu Klisti, yèdọ mẹlọ he nọ dohiagona mẹhe na yin whinwhlẹngán lẹ.—w16.06, w. 16-17.

Etẹlẹ mẹ wẹ Biblu luntọ́n sọn?

Mẹdelẹ (1) ko diọnukunsọ ẹ sinsinyẹn; bo (2) tẹnpọn nado diọ linlẹn he tin to e mẹ lẹ.—wp16.4, w. 8.

Etẹwẹ yin aliho delẹ he mẹ Klistiani de sọgan zan gbẹzan jlẹkaji tọn te?

Yọ́n nuhe yin nuhudo towe taun lẹ, bo dapana akuẹzinzan he ma yin dandan tọn lẹ. Wleawuna tito akuẹzinzan tọn de he sọgbe hẹ ninọmẹ towe. Ze nuhe a ma nọ zan lẹ dlan kavi namẹ, bo suahọ he a dù lẹ. De whenu he a nọ yizan na agbasazọ́n pò bo basi tito lehe a na gbloada na lizọnyizọn towe do tọn.—w16.07, w. 10.

Etẹwẹ Biblu dohia dọ e họakuẹ taun hú sika kavi fataka?

Jobu 28:12, 15 dohia dọ nuyọnẹn Jiwheyẹwhe tọn họakuẹ hú sika kavi fataka. Dile a to dindin in, dovivẹnu vẹkuvẹku nado yin whiwhẹnọ bo lodo to yise mẹ zọnmii.—w16.08, w. 18-19.

Be e sọgbe to egbehe dọ mẹmẹsunnu de ni hlá ogbì ya?

To aṣa delẹ mẹ, ogbì he yè pà bọ e jẹaṣọ́ sọgan yin alọkẹyi podọ e sọgan nọma fẹayihasẹnamẹ sọn owẹ̀n Ahọluduta lọ tọn ji. Etomọṣo, mẹmẹsunnu delẹ sọgan de ma nado hlá ogbì. (1 Kọl. 8:9) To awà delẹ ji kavi to lẹdo delẹ mẹ, ogbì hihla ma yin alọkẹyi na Klistiani lizọnyizọnwatọ lẹ.—w16.09, w. 21.

Naegbọn mí sọgan kudeji dọ kandai Biblu tọn he dohia dọ Davidi pé avùn hẹ Goliati yin nugbo?

E yin didohia dọ cm 15 poun wẹ Goliati yí do dite hú dawe he dodinnanu lẹ dọ dọ ewọ wẹ dite hugan to ojlẹ mítọn mẹ. Gbẹtọ jọnun wẹ Davidi yin, dile nukinkan hohowhenu tọn de he dọho gando ohọ̀ Davidi tọn go po nuhe Jesu dọ lẹ po dekunnu etọn do. Nọtẹn he yin nùdego to kandai lọ mẹ lẹ yin nọtẹn jọnun lẹ.—wp16.5, w. 13.

Vogbingbọn tẹwẹ tin to oyọnẹn, nukunnumọjẹnumẹ, po nuyọnẹn po ṣẹnṣẹn?

Mẹhe tindo oyọnẹn nọ bẹ nudọnamẹ kavi nugbo lẹ pli. Mẹhe tindo nukunnumọjẹnumẹ sọgan nọ mọ lehe nugbo de tindo kanṣiṣa hẹ devo do. Ṣigba, mẹhe tindo nuyọnẹn nọ penugo nado kọ̀n oyọnẹn po nukunnumọjẹnumẹ po dopọ bo nọ yí yé zan ganji.—w16.10, w. 18.