“Mì to okú Oklunọ tọn lá kaka e nado wá.”​—1 KỌL. 11:26.

OHÀN 18 Mí Yọ́n Pinpẹn Ofligọ lọ Tọn

BLADOPỌ *

1-2. (a) Etẹwẹ Jehovah nọ mọ to whenue gbẹtọ livi susu lẹ pli dopọ nado basi Tenu-Núdùdù Oklunọ tọn? (Pọ́n yẹdide he to wepa lọ ji.) (b) Etẹ ji wẹ mí na dọhodo to hosọ ehe mẹ?

YÍ NUKUN homẹ tọn do pọ́n nuhe Jehovah nọ mọ to whenue gbẹtọ livi susu lẹ lẹdo aihọn pé pli dopọ nado basi Tenu-Núdùdù Oklunọ tọn. E nọ mọnú zẹ̀ sọha gbẹtọ susu he wá otẹn lọ mẹ lẹ tọn go; e nọ doayi mẹdopodopo go. Di apajlẹ, e nọ mọ mẹhe nọ gbọn nugbonọ-yinyin dali wá to owhe lẹpo mẹ lẹ. Mẹhe nọ wá mahopọnna dọ yé to pipehẹ homẹkẹn sinsinyẹn lẹ sọgan to omẹ ehelẹ mẹ. Mẹdevo lẹ ma nọ wá opli lẹ to gbesisọ mẹ, amọ́ yé nọ mọdọ dandannu wẹ e yin na emi nado yì hùnwhẹ Oflin tọn tẹnmẹ. Jehovah sọ nọ doayi mẹhe wá Oflin whla tintan, vlavo na tlintlindo-dindin wutu lẹ go.

2 E họnwun dọ homẹ Jehovah tọn nọ hùn nado mọdọ mẹsusu nọ wá Oflin lọ. (Luku 22:19) Ṣigba, ahunmẹdunamẹnu tintan Jehovah tọn ma yin sọha mẹhe wá lẹ tọn gba. Whẹwhinwhẹ́n he wutu yé do wá wẹ nọ duahunmẹna Jehovah hugan; enẹ wẹ mẹwhinwhàn yetọn. To hosọ ehe mẹ, mí na dọhodo kanbiọ titengbe de ji: Naegbọn mí do nọ yì hùnwhẹ whemẹwhemẹ tọn Oflin tọn lọ gọna opli sẹmẹsẹmẹ tọn he Jehovah nọ wleawu etọn na mẹhe yiwanna ẹn lẹ?

Gbẹtọ livi susu lẹ lẹdo aihọn pé wẹ homẹ mítọn nọ hùn nado dokuavọna wá Tenu-Núdùdù Oklunọ tọn (Pọ́n hukan 1-2tọ)

WHIWHẸ WẸ NỌ WHÀN MÍ NADO YÌ

3-4. (a) Naegbọn mí do nọ yì opli lẹ? (b) Etẹwẹ opli mítọn lẹ yìyì nọ dohia gando mí go? (c) Sọgbe hẹ nuhe 1 Kọlintinu lẹ 11:23-26 dọ, naegbọn mí ma dona nọ gọ̀n hùnwhẹ Oflin tọn lọ?

3 Whẹwhinwhẹ́n tintan he wutu mí nọ yì opli agun tọn lẹ wẹ yindọ, yé yin apadewhe sinsẹ̀n-bibasi mítọn tọn. Mí sọ nọ yì opli lẹ na mí nọ yin pinplọn gbọn Jehovah dali to finẹ wutu. Goyitọ lẹ ma nọ kẹalọyi dọ emi do nuhudo nado yin pinplọn.  (3 Joh. 9) To vogbingbọn mẹ, míwlẹ nọ to jejeji nado yin pinplọn gbọn Jehovah po titobasinanu he e nọ yizan lọ po gblamẹ.—Isa. 30:20; Joh. 6:45.

4 Eyin mí yì opli lẹ, e nọ dohia dọ mí yin whiwhẹnọ—wleawufo, bosọ tindo ojlo nado yin pinplọn. To ozán Oflin okú Jesu tọn lọ mẹ, mí nọ yì nujijọ titengbe ehe tẹnmẹ, e ma yin na mí mọdọ e yin dandannu de wutu poun gba, ṣigba na mí sọ nọ gbọn whiwhẹ dali setonuna gbedide Jesu tọn lọ he dọmọ: “Mì nọ wà ehe to oflin ṣie mẹ.” (Hia 1 Kọlintinu lẹ 11:23-26.) Opli enẹ nọ hẹn todido mítọn gando sọgodo go lodo, bosọ nọ flin mí obá he mẹ Jehovah yiwanna mí jẹ. Ṣigba, Jehovah yọnẹn dọ mí do nuhudo tulinamẹ po jidevọnamẹ po tọn, e ma yin whladopo poun to owhe dopo mẹ. Enẹwutu, e nọ wleawuna opli lẹ na mí to osẹ dopodopo mẹ bosọ nọ dotuhomẹna mí nado yì yé. Whiwhẹ nọ whàn mí nado setonu. Mí nọ yí gànhiho susu lẹ zan to osẹ dopodopo mẹ nado wleawuna opli ehelẹ bosọ yì yé.

5. Naegbọn whiwhẹnọ lẹ nọ kẹalọyi oylọ-basinamẹ Jehovah tọn?

5 To owhe dopodopo mẹ, gbẹtọ whiwhẹnọ susu wẹ nọ kẹalọyi oylọ-basinamẹ Jehovah tọn nado yin pinplọn gbọn ewọ dali. (Isa. 50:4) E nọ vivi na yé nado wá Oflin lọ tẹnmẹ, podọ yé nọ jẹ opli devo lẹ wá ji. (Zek. 8:20-23) To pọmẹ, mí nọ jaya nado yin pinplọn bo yin anadena gbọn Jehovah, yèdọ “alọgọtọ po whlẹngántọ [mítọn] po” dali. (Salm. 40:17) Nado dọ hójọhó, etẹwẹ sọgan sọ hẹn awuvivi wá—kavi yin nujọnu—hugan alọkikẹyi oylọ-basinamẹ de nado yin pinplọn gbọn Jehovah po Jesu, Visunnu he ewọ yiwanna taun lọ po dali?—Mat. 17:5; 18:20; 28:20.

6. Nawẹ whiwhẹ gọalọna dawe de nado yì hùnwhẹ Oflin tọn gbọn?

6 To owhe dopodopo mẹ, mí nọ dovivẹnu nado ylọ mẹsusu dile e yọnbasi do nado wá Oflin okú Jesu tọn tẹnmẹ. Whiwhẹnọ susu ko mọaleyi sọn alọkikẹyi oylọ-basinamẹ mítọn mẹ. Lẹnnupọndo apajlẹ ehe ji. To owhe susu die wayi, dawe de mọ oylọ-basinamẹwe Oflin tọn de yí, ṣigba e dọna mẹmẹsunnu he ze wema lọ na ẹn dọ emi ma sọgan wá. Amọ́ to ozán Oflin tọn lọ mẹ, e paṣa mẹmẹsunnu lọ nado mọ dawe enẹ to Plitẹnhọ Ahọluduta tọn mẹ. Lehe mẹmẹsunnu lẹ dokuavọna dawe lọ do jiawu na ẹn sọmọ bọ e jẹ opli sẹmẹsẹmẹ tọn lẹ wá ji. Na nugbo tọn, opli atọ̀n gee wẹ e gọ̀n to owhe he bọdego blebu mẹ. Etẹwẹ gọalọna ẹn nado yinuwa to aliho dagbe ehe mẹ? Whiwhẹ wẹ whàn ẹn nado diọ pọndohlan etọn. Mẹmẹsunnu he basi oylọna ẹn lọ dọ to godo mẹ dọ, “Dawe ehe do whiwhẹ taun.” Ayihaawe ma tin dọ Jehovah wẹ dọ̀n dawe ehe nado wá sẹ̀n Ewọ, podọ todin e yin mẹmẹsunnu de he ko yí baptẹm.—2 Sam. 22:28; Joh. 6:44.

7. Nawẹ nuhe mí nọ plọn to opli lẹ ji po nuhe mí nọ hia to Biblu mẹ lẹ po sọgan gọalọna mí nado yin whiwhẹnọ gbọn?

7 Nuhe mí nọ plọn to opli lẹ ji po nuhe mí nọ hia to Biblu mẹ po sọgan gọalọna mí nado yin whiwhẹnọ. To osẹ he jẹnukọnna Oflin lọ lẹ gblamẹ, opli mítọn lẹ nọ saba zinnudo apajlẹ Jesu tọn gọna whiwhẹ he e dohia bo ze ogbẹ̀ etọn jo do ota mítọn mẹ taidi ofligọ de ji. Podọ to azán he jẹnukọnna Oflin lọ lẹ gblamẹ, mí nọ yin tulina nado hia kandai Biblu tọn he gando nujijọ he tindo kanṣiṣa hẹ okú po fọnsọnku Jesu tọn po go lẹ. Nuhe mí nọ plọn to opli enẹlẹ ji po nuhe mí nọ hia to kandai Biblu tọn lẹ mẹ lẹ po nọ hẹn pinpẹn-nutọn mítọn na avọ́sinsan he Jesu basi do ota mítọn mẹ siso dogọ. Mí nọ yin whinwhàn nado hodo apajlẹ nuyiwa whiwhẹ tọn etọn podọ nado wà ojlo Jehovah tọn, eyin etlẹ to kínni bo to kanna.—Luku 22:41, 42.

 ADỌGBIGBO WẸ NỌ GỌALỌNA MÍ NADO YÌ

8. Nawẹ Jesu do adọgbigbo hia gbọn?

8 Mí sọ nọ tẹnpọn nado hodo apajlẹ Jesu tọn gbọn adọgbigbo didohia dali. Lẹnnupọndo adọgbigbo he e dohia to azán he jẹnukọnna okú etọn lẹ gblamẹ ji. E yọnẹn ganji dọ to madẹnmẹ kẹntọ emitọn lẹ na dowinyan emi, hò emi bosọ hù emi. (Mat. 20:17-19) Etomọṣo, e desọn ojlo mẹ bo pannukọn okú. To whenue ojlẹ lọ sọ̀, e dọna apọsteli nugbonọ etọn he topọ hẹ ẹ to Gẹtsemani lẹ dọmọ: “Mì fọ́n, bo gbọ mí ni yì. Mì pọ́n! Mẹdehiatọ ṣie ko dọnsẹpọ.” (Mat. 26:36, 46) Podọ whenue gbẹtọgun zingidinọ de he hẹn adánwanu lẹ wá nado wle e, ewọ sẹwá nukọn bo do ede hia, bosọ degbena awhànfuntọ lọ lẹ nado gbọ apọsteli etọn lẹ ni yì. (Joh. 18:3-8) Adọgbigbo ayidego tọn nankọ die Jesu dohia! To egbehe, Klistiani yiamisisadode lẹ po lẹngbọ devo lẹ po nọ dovivẹnu nado hodo apajlẹ Jesu tọn to adọgbigbo didohia mẹ. Gbọnna?

Adọgbigbo he a nọ dohia nado yì opli Klistiani tọn lẹ nọ hẹn mẹdevo lẹ lodo (Pọ́n hukan 9tọ) *

9. (a) Naegbọn mí sọgan do nuhudo adọgbigbo tọn nado nọ yì opli lẹ to gbesisọ mẹ? (b) Nawẹ apajlẹ mítọn nọ yinuwado mẹmẹsunnu mítọn he yin súsú do gànpamẹ na yise yetọn wutu lẹ ji gbọn?

9 Nado nọ yì opli lẹ to gbesisọ mẹ, e sọgan biọ dọ mí ni nọ do adọgbigbo hia to ninọmẹ sinsinyẹn lẹ mẹ. Delẹ to mẹmẹsunnu po mẹmẹyọnnu mítọn lẹ po mẹ nọ wá opli lẹ mahopọnna dọ yé to pipehẹ awufiẹsa, gbigbọjọ, kavi nuhahun agbasalilo tọn. Mẹdevo lẹ nọ yí adọgbigbo do yì opli lẹ mahopọnna nukundiọsọmẹ sinsinyẹn sọn hagbẹ whẹndo tọn lẹ kavi aṣẹpatọ lẹ dè. Lẹnnupọn vude do lehe apajlẹ mítọn nọ yinuwado mẹmẹsunnu mítọn he to gànpamẹ na yise yetọn wutu lẹ ji do. (Heb. 13:3) Eyin yé sè dọ mí zindonukọn nado to Jehovah sẹ̀n mahopọnna whlepọn mítọn lẹ, yé nọ mọ huhlọn yí nado hẹn yise, adọgbigbo po tenọgli yetọn po go. Apọsteli Paulu tindo numimọ mọnkọ. To whenue e to gànmẹ to Lomu, e nọ jaya to whedepopenu he e sè dọ mẹmẹsunnu etọn lẹ to Jiwheyẹwhe sẹ̀n po nugbonọ-yinyin po. (Flp. 1:3-5, 12-14) Ojlẹ vude whẹpo e do yin tuntundote kavi to tundote etọn godo tlolo, Paulu kàn wekanhlanmẹ etọn hlan Heblu lẹ. To wekanhlanmẹ enẹ mẹ, e dotuhomẹna Klistiani nugbonọ enẹlẹ nado “zindonukọn to owanyi mẹmẹsunnu tọn” yetọn mẹ, podọ ma nado nọ gbẹkọ pipli dopọ lẹ go gbede.—Heb. 10:24, 25; 13:1.

10-11. (a) Mẹnu lẹ wẹ mí dona ylọ wá Oflin lọ tẹnmẹ? (b) Whẹwhinwhẹ́n tẹwẹ Efesunu lẹ 1:7 na nado nọ wàmọ?

10 Mí nọ do adọgbigbo hia to whenue mí basi oylọna hẹnnumẹ, azọ́nwatọgbẹ́ po kọmẹnu mítọn lẹ po wá Oflin lọ tẹnmẹ. Naegbọn mí do nọ basi oylọna omẹ enẹlẹ? Mí nọ yọ́n pinpẹn nuhe Jehovah po Jesu po wà na mí tọn sọmọ bọ mí ma sọgan nọma ylọ mẹdevo lẹ wá Oflin lọ tẹnmẹ. Mí nọ jlo dọ yé ni yọ́n lehe yelọsu sọgan mọaleyi sọn “nukundagbe majẹhẹ” Jehovah tọn mẹ gbọn ofligọ lọ gblamẹ do.—Hia Efesunu lẹ 1:7; Osọ. 22:17.

11 To whenue mí do adọgbigbo hia bo pli dopọ, mí sọ nọ do jẹhẹnu dagbe devo hia, yèdọ dehe Jiwheyẹwhe po Visunnu etọn po dohia to aliho ayidego tọn lẹ mẹ.

 OWANYI WẸ NỌ WHÀN MÍ NADO YÌ

12. (a) Nawẹ opli mítọn lẹ nọ hẹn owanyi mítọn na Jehovah po Jesu po jideji gbọn? (b) Etẹwẹ 2 Kọlintinu lẹ 5:14, 15 dotuhomẹna mí nado wà nado hodo apajlẹ Jesu tọn?

12 Owanyi he mí tindo na Jehovah po Jesu po nọ whàn mí nado yì opli lẹ. Taidi kọdetọn de, nuhe mí nọ plọn to opli lẹ ji nọ hẹn owanyi mítọn na Jehovah po Visunnu etọn po jideji. To opli lẹ ji, mí nọ yin nuflin whẹwhẹ gando nuhe yé wà na mí go. (Lom. 5:8) Na taun tọn, hùnwhẹ Oflin tọn lọ nọ flin mí lehe owanyi yetọn siso sọ, etlẹ yin na mẹhe ma yọ́n pinpẹn ofligọ lọ tọn lẹ. Po pinpẹn-nutọn po, mí nọ dovivẹnu nado hodo apajlẹ Jesu tọn to aliho he mẹ mí nọ nọgbẹ̀ te egbesọegbesọ. (Hia 2 Kọlintinu lẹ 5:14, 15.) Humọ, ahun mítọn nọ whàn mí nado pà Jehovah na ofligọ lọ he e wleawuna. Aliho dopo he mẹ mí sọgan pà ẹ te wẹ gbọn gblọndo ahundopo tọn lẹ nina to opli mítọn lẹ ji dali.

13. Nawẹ mí sọgan do obá he mẹ owanyi mítọn na Jehovah po Visunnu etọn po siso jẹ hia gbọn? Basi zẹẹmẹ.

13 Mí sọgan do obá he mẹ owanyi mítọn na Jehovah po Visunnu etọn po siso jẹ hia, eyin mí nọ desọn ojlo mẹ nado basi avọ́sinsan lẹ na yé. To paa mẹ, mí dona nọ basi avọ́sinsan voovo lẹ nado yì opli mítọn lẹ. Agun susu nọ basi opli dopo to vivọnu azọ́nzán de tọn, whenue agbọ́ sọgan ko pé mí. Podọ, opli devo nọ yin bibasi to sẹfifo, whenue mẹdevo lẹ nọ to gbigbọjẹ. Be Jehovah nọ doayi e go dọ mí yì opli lẹ mahopọnna dọ nuṣikọna mí ya? E họnwun dọ e nọ wàmọ! Na nugbo tọn, lehe mí nọ dovivẹnu sọ, mọ wẹ Jehovah nọ yọ́n pinpẹn owanyi he mí dohia ewọ tọn do niyẹn.—Malku 12:41-44.

14. Nawẹ Jesu ze apajlẹ owanyi mẹde-yido-sanvọ́ tọn dai gbọn?

14 Jesu ze apajlẹ owanyi mẹde-yido-sanvọ́ tọn dai na mí. E desọn ojlo mẹ, e ma yin nado kú na devi etọn lẹ kẹdẹ gba, ṣigba nado sọ nọgbẹ̀ to azán dopodopo ji to aliho de mẹ he na dohia dọ e nọ ze ale yetọn lẹ donukọnna etọn titi lẹ. Di apajlẹ, e pli hẹ devi etọn lẹ, etlẹ yin to whenue nuṣikọna ẹn kavi to whenue e jẹflumẹ sinsinyẹn. (Luku 22:39-46) Podọ e ze ayiha do nuhe e sọgan na mẹdevo lẹ ji, e ma yin do nuhe e sọgan mọyi sọn yé dè ji. (Mat. 20:28) Eyin owanyi he mí tindo na Jehovah po mẹmẹsunnu mítọn lẹ po sinyẹn jẹ obá enẹ mẹ, mí na wà nuhe go mí pé lẹpo nado nọ yì Tenu-Núdùdù Oklunọ tọn po opli agun tọn devo lẹpo po.

15. Mẹnu lẹ wẹ mí nọ jlo na gọalọna hugan?

 15 Mí yin apadewhe pipli mẹmẹsunnu lẹ tọn nugbo dopo gee lọ tọn, podọ homẹ mítọn nọ hùn nado yí whenu susu zan dile e yọnbasi do nado ylọ mẹyọyọ lẹ nado wá kọnawudopọ hẹ mí. Ṣigba, nuhe nọ duahunmẹna mí hugan wẹ nado gọalọna mẹhe “gando mí go to yise mẹ” bo ka gbọjọ lẹ. (Gal. 6:10) Mí nọ do owanyi he mí tindo na yé hia gbọn tulinina yé nado wá opli mítọn lẹ dali, titengbe hùnwhẹ Oflin tọn. Taidi Jehovah po Jesu po, homẹ mítọn nọ hùn taun to whenue mẹhe ko gbọjọ de lẹkọwa Jehovah, Otọ́ podọ Lẹngbọhọtọ owanyinọ mítọn dè.—Mat. 18:14.

16. (a) Nawẹ mí sọgan nọ na tuli ode awetọ gbọn, podọ ale tẹwẹ opli mítọn lẹ nọ hẹnwa na mí? (b) Naegbọn e do yin ojlẹ dagbe de to owhe lọ mẹ nado flin hogbe Jesu tọn lẹ he to Johanu 3:16 mẹ?

16 To osẹ he ja lẹ mẹ, basi oylọna mẹsusu dile e yọnbasi do nado wá Oflin lọ to vendredi whèjai 19 avril 2019. (Pọ́n apotin lọ “ Be A Na Basi Oylọna Yé Ya?”) To owhe he ja lọ gblamẹ, mì gbọ mí ni nọ na tuli ode awetọ gbọn opli he Jehovah wleawu yetọn na mí lẹpo yìyì to gbesisọ mẹ dali. Dile opodo titonu ehe tọn to dindọnsẹpọ, mí do hudo opli mítọn lẹ tọn nado mọ alọgọ yí nado to whiwhẹ, adọgbigbo po owanyi po dohia zọnmii. (1 Tẹs. 5:8-11) Mì gbọ mí ni yí ahun mítọn lẹpo do dó pinpẹn-nutọn mítọn hia na owanyi sisosiso he Jehovah po Visunnu etọn po tindo na mí!—Hia Johanu 3:16.

OHÀN 126 Mì Nọ Nukle, Mì Lodo, Mì Yin Huhlọnnọ

^ huk. 5 Oflin okú Klisti tọn he na yin bibasi to vendredi whèjai 19 avril 2019, na yin opli titengbe hugan owhe lọ tọn. Etẹwẹ nọ whàn mí nado yì nujijọ ehe tẹnmẹ? Ayihaawe ma tin dọ na mí jlo na hẹn homẹ Jehovah tọn hùn wutu wẹ. To hosọ ehe mẹ, mí na gbadopọnna nuhe hùnwhẹ Oflin tọn po opli sẹmẹsẹmẹ tọn mítọn lẹ po yìyì nọ dohia gando mí go.

^ huk. 52 ZẸẸMẸ YẸDIDE LẸ TỌN: Mẹmẹsunnu de he to gànpamẹ na yise etọn wutu mọ tuli yí whenue e mọ wekanhlanmẹ de sọn whẹndo etọn dè. E mọdọ emi ma yin winwọn, podọ e jaya tlala nado sè dọ whẹndo etọn gbẹ́ to nugbonọ yin na Jehovah mahopọnna dọ hunyanhunyan tonudidọ tọn tin to lẹdo yetọn mẹ.