Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

ATỌ̀HỌ̀-NUHIHỌ́ LỌ TỌN (ZINJẸGBONU OPLỌN TỌN) JANVIER 2016

Burnett, Simone, Eston po Caleb po

Yé Ze Yede Jo sọn Ojlo mẹ Wá—To Océanie

Yé Ze Yede Jo sọn Ojlo mẹ Wá—To Océanie

RENEÉ, yèdọ mẹmẹyọnnu de he tindo nudi owhe 35, whẹ́n to whẹndo Kunnudetọ tọn he hunzo taun de mẹ to Australie. E dọmọ: “Whlasusu wẹ mí sẹtẹn nado yì gọalọ to lẹdo he mẹ nuhudo wẹnlatọ Ahọluduta lọ tọn sù taun te lẹ. Papa po Mama po hẹn nulẹ yin awuvivinu podọ ojlofọndotenamẹnu! To whenue yẹnlọsu jivi ṣie awe lẹ, n’jlo dọ yé ni duvivi gbẹzan mọnkọtọn tọn.”

 Shane, asu Reneé tọn yin mẹmẹsunnu de he tindo owhe 35 linlán, bo tindo yanwle gbigbọmẹ tọn dopolọ lẹ. E dọmọ: “To whenue mí jivi mítọn awetọ godo, mí hia otàn de to Atọ̀họ̀-Nuhihọ́ lọ Tọn mẹ gando whẹndo Kunnudetọ tọn de go he sẹtẹn yì hùwaji-whèyihọ Pacifique tọn po bato yetọn po nado dọyẹwheho to lopo Tonga tọn lẹ ji. * Otàn ehe whàn mí bọ mí kanwehlan alahọ Kunnudetọ Jehovah tọn lẹ tọn Australie tọn po Nouvelle-Zélande tọn po nado yọ́n fie nuhudo wẹnlatọ Ahọluduta lọ tọn sù te. * Yé na mí gblọndo bo biọ to mí si nado sẹtẹn yì Tonga, yèdọ nọtẹn he go mí ko hianu gando lọ!”

Jacob, Reneé, Skye po Shane po

To whenue Shane po Reneé po gọna ovi yetọn Jacob po Skye po sẹ̀n to Tonga na nudi owhe dopo godo, yé wá to dandannu glọ nado lẹkọyi Australie na gufinfọn debọdo-dego he wá aimẹ to otò lọ mẹ lẹ wutu, ṣigba yé ma wọn yanwle yetọn nado gbloada na lizọnyizọn yetọn. To 2011, yé sẹtẹn yì Lopo Norfolk tọn ji, yèdọ lopo pẹvi Pacifique tọn de he dẹn do whèzẹtẹn Australie tọn na nudi kilomẹtlu 1 500. Nawẹ nulẹ yì do na yé? Jacob he tindo owhe 14 todin dọmọ: “Gbọnvona dọ Jehovah penukundo mí go, e sọ hẹn lizọnyizọn mítọn yin awuvivinu!”

VIVẸNUDIDO NADO SẸ̀N TAIDI WHẸNDO DE

Taidi Shane po Reneé po gọna ovi yetọn lẹ, whẹndo Kunnudetọ tọn susu devo lẹ ko ze yede jo sọn ojlo mẹ wá nado sẹ̀n to fie nuhudo sù te lẹ. Etẹwẹ whàn yé nado sẹtẹn?

“Mẹsusu wẹ do ojlo hia to wẹndagbe lọ mẹ. Mí jlo na gọalọna yé nado tindo tito Biblu pinplọn mẹdetiti tọn gbesisọ tọn de.”—Burnett

Burnett po Simone po he yin asu po asi po bo tindo nudi owhe 35, gọna visunnu yetọn lẹ Eston owhe 12 mẹvi, po Caleb owhe 9 mẹvi po sẹtẹn yì Burketown, yèdọ tòpẹvi he tin to olá de to Queensland, Australie. Burnett dọmọ: “Eyin Kunnudetọ lẹ yì dọyẹwheho to finẹ to owhe de mẹ, e sọ yì owhe atọ̀n kavi ẹnẹ godo. Mẹsusu wẹ do ojlo hia to wẹndagbe lọ mẹ. Mí jlo na gọalọna yé nado tindo tito Biblu pinplọn mẹdetiti tọn gbesisọ tọn de.”

Jim, Jack, Mark po Karen po

Mark po Karen po he tindo owhe 50 linlán todin ko sẹ̀n to agun susu mẹ to fie sẹpọ Sydney to Australie, whẹpo yewlẹ gọna ovi yetọn Jessica, Jim po Jack po do sẹtẹn yì Nhulunbuy, yèdọ gbétatò de he to olá bọ yè nọ kùn adọkunnu dòglọ tọn te to Ayimatẹn Agewaji tọn. Mark dọmọ: “Na n’yiwanna gbẹtọ lẹ wutu, n’jlo na yì agun he mẹ nuhudo te bọ wẹnlatọ ma sù te.” Amọ́, Karen whleawu nado sẹtẹn. E dọmọ: “To whenue Mark po mẹdevo lẹ po na mi tuli godo, e jlo mi nado yì whẹ́ bo pọ́n. Todin, homẹ ṣie hùn dọ n’yì!”

Benjamin, Jade, Bria po Carolyn po

To 2011, Benjamin po Carolyn po, gọna viyọnnu yetọn Jade po Bria po he ma ko bẹ wehọmẹ, sẹtẹn sọn Queensland to Australie yì Timor-Leste, he yin tòpẹvi de to Lopo Timor tọn ji, yèdọ dopo to lopo Indonésie tọn lẹ mẹ. Ben dọmọ: “Yẹn po Carolyn po yin gbehosọnalitọ titengbe dai to Timor-Leste. Kunnudide to finẹ vivi taun podọ mẹmẹsunnu lẹ nọ nọgodonamẹ. Homẹ mítọn ma hùn nado tọ́n sọn finẹ. Mí magbe nado lẹkọyi. To whenue mí jivi lẹ, mí ma diọ tito mítọn lẹ, amọ́ mí sẹ̀ yé donukọn.” Carolyn yidogọ dọmọ: “Mí jlo dọ ovi mítọn lẹ ni nọ dogbẹ́ hẹ mẹdehlan lẹ, mẹhe nọ wazọ́n to Bẹtẹli lẹ, po gbehosọnalitọ titengbe lẹ po, podọ na yé ni duvivi Jehovah sinsẹ̀n tọn to aliho dagbe hugan mẹ.”

AWUWIWLE WHẸPO DO SẸTẸN

Jesu dọna hodotọ etọn lẹ dọmọ: “Mẹnu to mì mẹ wẹ na jlo nado gbá atọ̀họ̀ de he ma na sinai bo lẹn akuẹ etọn whẹ́.” (Luku 14:28) Mọdopolọ, to whenue whẹndo de to linlẹn nado sẹtẹn yì lẹdo devo mẹ, nujọnu taun wẹ e yin dọ yé ni basi tito dagbe de. Etẹlẹ ji wẹ yé sọgan lẹnnupọndo?

GBIGBỌNỌ-YINYIN: Ben dọmọ: “Mí jlo na yì gọalọna mẹdevo lẹ wẹ, e ma yin nado yin agbàn na yé. Enẹwutu, whẹpo mí do sẹtẹn, mí dovivẹnu nado hẹn gbigbọnọ-yinyin mítọn lodo whẹ́. Mí sọ yidogọna mahẹ he mí nọ tindo to lizọnyizọn lọ mẹ podọ to nuwiwa agun tọn devo lẹ mẹ.”

Jacob he go mí donù wayi dọmọ: “Whẹpo mí do sẹtẹn yì Lopo Norfolk tọn ji, mí hia otàn gbẹzan tọn susu to Atọ̀họ̀-Nuhihọ́ lọ Tọn po Réveillez-vous! po mẹ gando whẹndo he sẹ̀n to fie nuhudo sù te lẹ go. Mí dọhodo avùnnukundiọsọmẹnu he yé pehẹ lẹ po lehe Jehovah penukundo yé go do po ji.” Nọviyọnnu etọn Skye he tindo owhe 11 yidogọ dọmọ: “N’hodẹ̀ susu yẹn kẹdẹ, podọ hẹ Papa po Mama po!”

NUMỌTOLANMẸ: Reneé dọmọ: “Na mí ma dẹn do hẹnnumẹ mítọn lẹ po họntọn vivẹ́ mítọn lẹ po bosọ tin to lẹdo he n’yiwanna de mẹ wutu, e sọgan ko vẹawuna  mi nado tọ́n sọn finẹ. Amọ́, kakati nado ze ayiha do nuhe n’to jijodo godo lẹ ji, n’lẹnnupọndo ale he tẹnsisẹ ehe na hẹnwa na whẹndo ṣie ji.”

AṢA: Whẹndo susu nọ basi dodinnanu jẹnukọn nado jẹakọ hẹ lẹdo he mẹ yé jei lọ. Mark dọmọ: “Mí hianu taun gando Nhulunbuy go. Mẹmẹsunnu he nọ nọ̀ dọ́n lẹ nọ do vọkan linlinwe he dọhodo tòpẹvi lọ ji lẹ tọn hlan mí. Ehe zọ́n bọ mí yọ́n mẹhe nọ nọ̀ lẹdo lọ mẹ lẹ po aṣa yetọn po.”

Shane, he sẹtẹn yì Lopo Norfolk tọn ji yidogọ dọmọ: “Hú popolẹpo, n’dovivẹnu nado wleawuna jẹhẹnu Klistiani tọn lẹ. N’yọnẹn dọ eyin n’nọ yinuwa hẹ gbẹtọ lẹ po ahundopo po, yin walọmimiọnnọ, nọ dọ nugbo, bosọ yin azọ́n sinsinyẹn-watọ, fidepope ma tin to aihọn lọ mẹ bọ n’ma sọgan sẹ̀n te.”

PIPEHẸ AVÙNNUKUNDIỌSỌMẸNU LẸ

Mẹhe ko sẹ̀n to fie nuhudo sù te bo tindo kọdetọn dagbe lẹ zinnudeji dọ nujọnu wẹ e yin nado nọ diọada sọgbe hẹ ninọmẹ lẹ bo nọ tindo pọndohlan dagbe to whenue avùnnukundiọsọmẹnu madonukun lẹ fọndote. Lẹnnupọndo apajlẹ delẹ ji:

Reneé dọmọ: “N’plọn nado nọ diọada sọgbe hẹ ninọmẹ yọyọ lẹ. Di apajlẹ, to ojlẹ he mẹ adánwiwa ohù tọn nọ sinyẹn te to Lopo Norfolk tọn ji lẹ, bato he nọ hẹn agbàn wá lẹ ma nọ penugo nado glin, ehe nọ zọ́n bọ nuhe mí na họ̀ nado dà núdùdù lẹ nọ hán bosọ nọ vẹakuẹ. Enẹwutu, n’plọn nado nọ dowénanu podọ nado nọ kàn ayiha to whenue n’jlo na danú.” Asu etọn Shane yidogọ dọmọ: “Mí sọ dovivẹnu ma nado nọ zankuẹ zẹ̀ akuẹ he mí dona zan to sẹmẹsẹmẹ go.”

Visunnu yetọn Jacob donù avùnnukundiọsọmẹnu devo go. E dọmọ: “Omẹ ṣinawe gee wẹ to agun yọyọ he mẹ mí tin te—depope to yé mẹ ma yin jọja. Enẹwutu n’ma do họntọn he to ohá dopolọ ji hẹ mi de! Amọ́ to whenue n’wazọ́n hẹ yé to lizọnyizọn lọ mẹ, e ma dẹn bọ mí lẹzun họntọn.”

Jim he tindo owhe 21 todin pehẹ ninọmẹ dopolọ. E dọmọ: “Agun he sẹpọ mí hugan to Nhulunbuy tin to kilomẹtlu 725 linlán, enẹwutu mí nọ dovivẹnu nado mọaleyi  sọn plidopọ lẹ mẹ to gigọ́ mẹ. Mí nọ yì do mẹwhenu bo nọ duvivi gbẹdido hẹ mẹmẹsunnu po mẹmẹyọnnu lẹ po tọn. Ojlẹ ehelẹ wẹ yọ́n hugan to owhe he mí yizan to finẹ mẹ!”

“E VIVI NA MI TAUN DỌ MÍ WÁFI!”

Biblu dọmọ: “Dona OKLUNỌ tọn, e nọ hẹnmẹ wàdọkun, e ma nọ yí awubla dogọ ẹ gba.” (Howh. 10:22) Lẹdo aihọn pé, mẹsusu he to sinsẹ̀n to fie nuhudo sù te lẹ ko mọdọ hogbe gbọdo ehelẹ yin nugbo.

Mark dọmọ: “Dona daho hugan he mí duvivi etọn wẹ nuyiwadomẹji dagbe he tẹnsisẹ lọ tindo do ovi mítọn lẹ ji. Ovi mítọn mẹho lẹ deji mlẹnmlẹn dọ Jehovah nọ penukundo mẹhe nọ ze Ahọluduta lọ do otẹn tintan mẹ lẹ go. Akuẹ ma sọgan họ̀ jide ehe.”

Shane dọmọ: “N’vẹ́ hẹ asi ṣie po ovi ṣie lẹ po dogọ. Eyin n’sè bọ yé to nuhe Jehovah wà na yé lẹ dọ, homẹ ṣie nọ hùn taun.” Visunnu etọn Jacob yigbe dọmọ: “N’duvivi ayajẹ daho tọn. E vivi na mi taun dọ mí wáfi!”

^ huk. 3 Pọ́n hosọ lọ “Họntọn Jiwheyẹwhe Tọn lẹ to ‘Lopo Họntọnjihẹmẹ Tọn lẹ’ Ji” to Atọ̀họ̀-Nuhihọ́ lọ Tọn 15 décembre 2004 tọn mẹ, weda 8-11.

^ huk. 3 To 2012, alahọ Australie po Nouvelle-Zélande po tọn yin kinkọndopọ bo lẹzun alahọ Australasie tọn.