Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Atọ̀họ̀-Nuhihọ́ lọ Tọn—Zinjẹgbonu Oplọn Tọn  |  Octobre 2017

“Nọ Yiwannamẹ . . . to Walọ po Nugbo po Mẹ”

“Nọ Yiwannamẹ . . . to Walọ po Nugbo po Mẹ”

“Mí ma dona nọ yiwannamẹ to ohó mẹ kavi po odẹ́ po kẹdẹ gba, ṣigba to walọ po nugbo po mẹ.”​—1 JOH. 3:18.

OHÀN LẸ: 106, 100

1. Owanyi tẹwẹ yiaga hugan, podọ naegbọn e do yinmọ? (Pọ́n yẹdide he tin to bẹjẹeji hosọ ehe tọn.)

OWANYI he sinai do nunọwhinnusẹ́n he sọgbe lẹ ji (a·gaʹpe) yin nunina de sọn Jehovah dè. Ewọ wẹ Asisa owanyi ehe tọn. (1 Joh. 4:7) Owanyi ehe wẹ yin dehe yiaga hugan. Dile owanyi ehe tlẹ sọgan bẹ numọtolanmẹ sisosiso lẹ hẹn, nuhe nọ do e hia hugan wẹ nuyiwa matin ṣejannabi na dagbe mẹdevo lẹ tọn. Owe alọdlẹndonu tọn de dọ dọ, owanyi a·gaʹpe “sọgan yin yinyọnẹn kiki gbọn nuhe e nọ whànmẹ nado wà lẹ dali.” Eyin mí do owanyi matin ṣejannabi hia kavi eyin e yin didohia mí, gbẹzan mítọn nọ pọnte taun, na e nọ gọ́ na ayajẹ bo nọ tindo zẹẹmẹ.

2, 3. Nawẹ Jehovah do owanyi matin ṣejannabi hia gbẹtọvi lẹ gbọn?

2 Jehovah do owanyi hia gbẹtọvi lẹ, etlẹ yin whẹpo ewọ do dá Adam po Evi po. E wleawuna aigba nado yin owhé gbẹtọvi lẹ tọn kakadoi, e ma yin fie gbẹtọ lẹ na nọgbẹ̀ te poun gba, ṣigba fide he yé na duvivi ogbẹ̀ tọn to gigọ́ mẹ te. Na taun tọn, Jehovah wà ehe na dagbe mítọn, e ma yin na ale edetiti tọn gba. To nukọn mẹ, e sọ do owanyi matin ṣejannabi hia gbọn todido lọ nina ovi aigba ji tọn etọn lẹ nado nọgbẹ̀ kakadoi to Paladisi he e ko wleawu etọn na yé lọ mẹ dali.

 3 To atẹṣiṣi Adam po Evi po tọn godo, Jehovah do owanyi matin ṣejannabi etọn hia to aliho he yiaga hugan de mẹ. E basi tito nado fli kúnkan atẹṣitọ awe ehelẹ tọn gọ̀, po jide lọ po dọ delẹ to yé mẹ na wá yọ́n pinpẹn owanyi Emitọn tọn. (Jen. 3:15; 1 Joh. 4:10) Na nugbo tọn, bẹsọn gbeegbe Jehovah dopà Whlẹngántọ sọgodo tọn de tọn, to pọndohlan Etọn mẹ, e taidi dọ avọ́sinsan ehe ko yin bibasi wẹ nkọ. Podọ to nudi owhe 4 000 godo, Jehovah yí Visunnu detọ́n dopo akàn etọn do sanvọ́ do gbẹtọvi lẹpo tamẹ, mahopọnna avọ́sinsan daho he enẹ biọ to e si. (Joh. 3:16) Lehe mí yọ́n pinpẹn owanyi matin ṣejannabi he Jehovah dohia ehe tọn do sọ!

4. Etẹwẹ dohia dọ gbẹtọvi mapenọ lẹ tindo nugopipe lọ nado do owanyi matin ṣejannabi hia?

4 Mí sọgan nọ do owanyi matin ṣejannabi hia ga, na Jiwheyẹwhe dá mí to apajlẹ etọn mẹ wutu. Ylando he mí dugu etọn nọ hẹn ẹn vẹawuna mí nado do owanyi hia, ṣigba enẹ ma yí nugopipe lọ nado wàmọ sọn mí si. Abẹli do owanyi matin ṣejannabi hia Jiwheyẹwhe gbọn dagbe hugan to nuhe e tindo lẹ mẹ nina ẹn dali. (Jen. 4:3, 4) Noa do owanyi matin ṣejannabi hia gbẹtọvi hatọ etọn lẹ gbọn owẹ̀n Jiwheyẹwhe tọn lilá na yé na owhe susu lẹ dali dile etlẹ yindọ depope yetọn ma kẹalọyi. (2 Pita 2:5) Ablaham dohia dọ owanyi etọn na Jiwheyẹwhe yin nujọnu hú numọtolanmẹ edetiti tọn lẹ to whenue e yin bibiọ to e si nado yí visunnu etọn Isaki do sanvọ́. (Jak. 2:21) Taidi sunnu nugbonọ ehelẹ, ojlo mílọsu tọn wẹ nado nọ do owanyi hia mahopọnna avùnnukundiọsọmẹnu depope he mí pannukọn.

OWANYI NUGBO PO OWANYI OKLỌ TỌN PO

5. Aliho tẹlẹ mẹ wẹ mí sọgan nọ do owanyi nugbo hia te?

5 Biblu dohia dọ owanyi nugbo ma nọ yin didohia “to ohó mẹ kavi po odẹ́ po kẹdẹ gba, ṣigba to walọ po nugbo po mẹ” ga. (1 Joh. 3:18) Be ehe zẹẹmẹdo dọ mí ma sọgan do owanyi hia to hodidọ mẹ wẹ ya? Paali! (1 Tẹs. 4:18) Ṣigba, e zẹẹmẹdo dọ owanyi didohia ma dona nọte do hodidọ kẹdẹ ji, titengbe to whenue ninọmẹ lẹ biọ dọ yè ni yinuwa. Di apajlẹ, whenue Klistiani hatọ de do nuhudo dandannu gbẹ̀mẹ tọn lẹ tọn, ohó tulinamẹ tọn lẹ didọna ẹn poun ma na gbọ nuhahun etọn. (Jak. 2:15, 16) Mọdopolọ, owanyi na Jehovah podọ na kọmẹnu mítọn lẹ nọ whàn mí, e ma yin nado nọ biọ dọ Jiwheyẹwhe ‘ni do azọ́nwatọ lẹ hlan ojijẹ lọ mẹ’ kẹdẹ gba, ṣigba nado nọ tindo mahẹ gigọ́ to azọ́n yẹwhehodidọ tọn lọ mẹ ga.—Mat. 9:38.

6, 7. (a) Etẹwẹ “owanyi matin yẹnuwiwa” zẹẹmẹdo? (b) Na apajlẹ owanyi oklọ tọn delẹ tọn.

6 Apọsteli Johanu wlan dọ mí dona nọ yiwannamẹ “to walọ po nugbo po mẹ.” Enẹwutu, owanyi mítọn dona yin matin oklọ kavi “matin yẹnuwiwa.” (Lom. 12:9; 2 Kọl. 6:6) Ehe zẹẹmẹdo dọ mí ma sọgan dọ dọ mí tindo owanyi nugbo eyin nuhe mí ma yin wẹ mí nọ dohia, na enẹ na taidi nukunmẹṣinyọnnu de zizedo nkọ. Mí sọgan kanse míde dọ ‘Be owanyi jọ owanyi wẹ owanyi he nọ zọnpọ hẹ yẹnuwiwa yin ya?’ Lala. Ehe ma gán yin owanyi pọ́n gbede, amọ́ yẹblẹ tọn wẹ.

7 Lẹnnupọndo apajlẹ owanyi oklọ tọn delẹ tọn ji. To jipa Edẹni tọn mẹ, Satani yinuwa taidi mẹhe dagbemẹninọ Evi tọn to ahunmẹduna sisosiso, ṣigba, na nugbo tọn ṣejannabi po yẹnuwiwa po wẹ to godo na nuyiwa etọn lẹ. (Jen. 3:4, 5) To ojlẹ Davidi tọn mẹ, nuyiwa Ahitofẹli tọn lẹ dohia dọ họntọn oklọ tọn wẹ e yin na ahọlu. Ahitofẹli dùpa to whenue e mọdọ mọwiwà na hẹn ale wá na ẹn. (2 Sam. 15:31) Mọdopolọ to egbehe, atẹṣitọ lẹ po mẹdevo he nọ hẹn kinklan wá agun mẹ lẹ po nọ yí “ohó vivi po mẹpipa oklọ tọn po” zan nado sọawuhia di mẹhe tindo owanyi, ṣigba na taun tọn mẹwhinwhàn ṣejannabi tọn wẹ yé tindo.—Lom. 16:17, 18.

8. Kanbiọ tẹwẹ mí dona kanse míde?

8 Owanyi yẹnuwiwa tọn ylan taun, na e yin aliho oklọ tọn de nado do owanyi mẹde-yido-sanvọ́ tọn hia. Gbẹtọ lẹ wẹ yẹnuwiwa  mọnkọtọn sọgan flu, e ma yin Jehovah. Jesu tlẹ dọ dọ mẹhe nọ yinuwa po yẹnuwiwa po lẹ na yin yasana “to aliho he sinyẹn hugan mẹ.” (Mat. 24:51) Nugbo wẹ dọ devizọnwatọ Jehovah tọn lẹ ma na jlo gbede nado do owanyi yẹnuwiwa tọn hia. Etomọṣo, mí na wà dagbe nado kanse míde dọ, ‘Be n’nọ do owanyi nugbo hia to whepoponu matin ṣejannabi kavi oklọ depope ya?’ Mì gbọ mí ni gbadopọnna aliho ṣinẹnẹ delẹ he mẹ mí sọgan dovivẹnu nado do owanyi “matin yẹnuwiwa” hia te.

LEHE MÍ SỌGAN “YIWANNAMẸ . . . TO WALỌ PO NUGBO PO MẸ” DO

9. Etẹwẹ owanyi nugbo na whàn mí nado wà?

9 Nọ yí ayajẹ do wà sinsẹ̀nzọn lọ to nuglọ. To whedepopenu he enẹ yọnbasi, mí dona nọ desọn ojlo mẹ nado nọ yinuwa po owanyi po hẹ mẹmẹsunnu mítọn lẹ “to nuglọ” kavi eyin mẹde ma tlẹ doayi mí go. (Hia Matiu 6:1-4.) Nuhe Ananias po Safila po gboawupo nado wà niyẹn. Kakati yé ni basi nunina yetọn bọ mẹde ma na yọnẹn, yé dolalo madoadúdẹji gando nunina yetọn go, podọ yẹnuwiwa yetọn hẹn nugbajẹmẹji wá yé ji. (Owalọ 5:1-10) To vogbingbọn mẹ, owanyi nugbo nọ whàn mí nado yí ayajẹ do yilizọn na mẹmẹsunnu mítọn lẹ bo ma jla pé kavi donukun dọ yé ni yọnẹn na mí. Di apajlẹ, mẹmẹsunnu he nọ gọalọna Hagbẹ Anademẹtọ lọ nado wleawuna núdùdù gbigbọmẹ tọn lẹ nọ wàmọ to nuglọ, bo ma nọ dọ̀n ayidonugo wá yede ji kavi dọ nuhe ji yé wazọ́n do lẹ.

10. Nawẹ mí sọgan yin nukọntọ to gbégbò didohia mẹdevo lẹ mẹ gbọn?

10 Nọ yin nukọntọ to gbégbò didohia mẹdevo lẹ mẹ. (Hia Lomunu lẹ 12:10.) Jesu ze apajlẹ gbégbigbòna mẹdevo lẹ tọn dai gbọn azọ́n he sọgan demẹpò taun de wiwà dali. (Joh. 13:3-5, 12-15) E sọgan biọ dọ mí ni dovivẹnu taun nado wleawuna whiwhẹ he e nọ biọ nado do gbégbò hia mẹdevo lẹ to aliho mọnkọ mẹ. Apọsteli lẹ lọsu ma tlẹ mọnukunnujẹ nuyiwa Jesu tọn lẹ mẹ to gigọ́ mẹ kakajẹ whenue yé mọ gbigbọ wiwe yí. (Joh. 13:7) Mí sọgan do gbégbò hia mẹdevo lẹ eyin mí nọ dapana míde mẹ mimọ, na wésise mítọn, nutindo mítọn lẹ kavi lẹblanulọkẹyi he mí tindo to sinsẹ̀nzọn Jehovah tọn mẹ lẹ wutu. (Lom. 12:3) Podọ kakati nado nọ whànwu na mẹdevo lẹ mọ pipà yí wutu, mí nọ jaya hẹ yé eyin mí tlẹ mọdọ mílọsu jẹna gbégbò dopolọ kavi dona mọ pipà yí ga na nuhe yin wiwadotana lọ.

11. Naegbọn mẹpipa mítọn dona nọ yin ahundopo tọn?

11 Nọ pà mẹmẹsunnu towe lẹ po ahundopo po. Mí dona nọ yí dotẹnmẹ hundote lẹ zan nado pà ode awetọ, na hogbe mọnkọtọn lẹ nọ “yọ́n na mẹjlọdote.” (Efe. 4:29) Ṣigba, mí dona nọ wàmọ po ahundopo po. E ma yinmọ, mẹpipa mítọn sọgan yin oklọ tọn, kavi mí gán gboawupo nado hẹn azọngban mítọn lọ di, yèdọ nado nọ na mẹdevo lẹ ayinamẹ he jẹ. (Howh. 29:5) Nado pà mẹde bo ka wá hẹn ẹn gble to godo etọn yin wunmẹ yẹnuwiwa tọn de ga. Apọsteli Paulu dapana omọ̀ enẹ bo ze apajlẹ dagbe owanyi nugbo didohia tọn dai to aliho he mẹ e pà mẹdevo lẹ te mẹ. Di apajlẹ, e yí ahundopo do pà Klistiani Kọlinti tọn lẹ gando walọyizan yetọn to whẹho delẹ mẹ go. (1 Kọl. 11:2) Ṣigba, to whenue yé wà nudelẹ he ma jẹna pipà, e yí homẹdagbe do dó nuhewutu nuyiwa yetọn ma sọgbe hia yé to aliho he họnwun mẹ.—1 Kọl. 11:20-22.

Aliho dopo nado do owanyi po johẹmẹ mítọn po hia wẹ nado nọ nanú mẹmẹsunnu mítọn he tin to nuhudo mẹ lẹ (Pọ́n hukan 12tọ)

12. Nawẹ mí sọgan nọ do owanyi nugbo hia to whenue mí hẹjó mẹdevo lẹ gbọn?

12 Nọ hẹjómẹ. Jehovah biọ to mí si nado nọ tlúalọ hlan Klistiani hatọ mítọn lẹ. (Hia 1 Johanu 3:17.) Ṣigba, mí dona nọ wàmọ po mẹwhinwhàn dagbe po matin ṣejannabi depope. Mí sọgan kanse míde dọ: ‘Be mẹhe n’nọ hẹjó hugan lẹ wẹ họntọn vivẹ́ lẹ, omẹ nukundeji lẹ, kavi mẹhe sọgan wá suahọ etọn mi to aliho de mẹ lẹ ya? Kavi be n’nọ dín dotẹnmẹ lẹ nado do alọtútlú hia mẹmẹsunnu po mẹmẹyọnnu po he n’ma jẹakọ hẹ ganji lẹ  kavi he ma sọgan wá suahọ etọn mi lẹ ya?’ (Luku 14:12-14) Todin, mí ni dọ dọ Klistiani hatọ de biọ nuhahun mẹ na e ma basi tito dagbe lẹ wutu, kavi dọ e gboawupo nado do pinpẹn-nutọn hia mí na johẹmẹ mítọn. To ninọmẹ mọnkọtọn lẹ mẹ, ayinamẹ he mí dona yí do yizan mẹ wẹ: “Mì nọ hẹjó ode awetọ matin hùnhlún.” (1 Pita 4:9) Eyin a nọ hodo ayinamẹ ehe, a na duvivi ayajẹ he nunamẹ po mẹwhinwhàn dagbe de po nọ hẹnwa tọn.—Owalọ 20:35.

13. (a) Whetẹnu wẹ alọgigọna madogánnọ lẹ sọgan wá vẹawu taun? (b) Onú titengbe tẹlẹ wẹ mí sọgan wà nado gọalọna madogánnọ lẹ?

13 Nọ gọalọna mẹhe yin madogánnọ lẹ. Tonusisena gbedide Biblu tọn lọ nado “nọ gọalọna madogánnọ lẹ bo nọ fahomẹ hẹ mẹlẹpo” sọgan yin kunnudenu de dọ mí nọ do owanyi nugbo hia. (1 Tẹs. 5:14) Dile etlẹ yindọ susu mẹhe yin madogánnọ lẹ tọn nọ wá lodo to yise mẹ to nukọn mẹ, e nọ biọ dọ mí ni fahomẹ hẹ delẹ to yé mẹ bo to alọgọna yé zọnmii. Ehe sọgan bẹ linlẹn mẹjlọdote tọn he sinai do Owe-wiwe ji lẹ mimá hẹ yé, bibiọ to yé si nado wazọ́n hẹ mí to lizọnyizọn lọ mẹ po whenu yiyizan nado dotoaina yé po hẹn. Humọ, kakati nado nọ to linlẹn poun dọ mẹmẹsunnu le kavi mẹmẹyọnnu le-le “lodo” kavi yin “madogánnọ,” mí dona kẹalọyi dọ dopodopo mítọn wẹ tindo nugopipe po madogán etọn lẹ po. Apọsteli Paulu lọsu tlẹ kẹalọyi dọ emi do madogán emitọn titi lẹ. (2 Kọl. 12:9, 10) Enẹwutu, mímẹpo wẹ sọgan mọaleyi sọn godonọnamẹ Klistiani hatọ lẹ tọn mẹ.

14. Obá tẹ mẹ wẹ mí dona wleawufo jẹ nado nọ dín jijọho hẹ mẹmẹsunnu mítọn lẹ?

14 Nọ dín jijọho. Mí nọ wà nuhe go mí pé lẹpo nado nọ jijọho mẹ hẹ mẹmẹsunnu mítọn lẹ, etlẹ yin to whenue mí mọdọ yé mọnukunnujẹ nuyiwa mítọn mẹ to aliho agọ̀ mẹ kavi mọdọ yé yinuwa hẹ mí po mawadodo po. (Hia Lomunu lẹ 12:17, 18.) Ovẹvivẹ sọgan gọalọ nado didẹ whẹho lẹ, ṣigba e dona yin po ahundopo po. Di apajlẹ, kakati nado nọ dọ, “E vẹna mi dọ mọ wẹ a yí hó lọ do,” a sọgan kẹalọyi adà towe to whẹho lọ mẹ bo dọ dọ, “Ṣo, e vẹna mi dọ nuhe n’dọ hẹn awugblena we.” Na nugbo tọn, jijọho yin dandan to alọwle mẹ. Asu po asi po de ma dona nọ dohia to gbangba dọ yé yiwanna yede ganji, ṣigba to whenue e wá pò yewlẹ ṣo, yé ma nọ kẹnù do yede ji, nọ yí hogbe whánsọmẹ tọn lẹ zan na ode awetọ kavi tlẹ nọ hoavùn.

15. Nawẹ mí sọgan dohia dọ mí jonamẹ nugbonugbo gbọn?

15 Nọ jonamẹ sọn ojlo mẹ wá. Mí nọ jona mẹhe ṣinuwa do mí eyin mí dọwhẹgbọ hẹ ẹ bo masọ hẹn ẹn do homẹ. Eyin mí “nọ sinyẹnlin hẹ ode awetọ to owanyi mẹ, bo nọ yí vivẹnudido vẹkuvẹku do hẹn dopo-yinyin gbigbọ tọn go to gẹdẹ pọninọ jijọho tọn mẹ,” mí na penugo nado nọ jona mẹdevo lẹ sọn ojlo mẹ wá, etlẹ yin mẹhe ma yọnẹn dọ yé ṣinuwa do mí lẹ. (Efe. 4:2, 3) Eyin jonamẹ mítọn na yin nugbo, mí dona nọ dava linlẹn mítọn lẹ, na mí nikaa “nọ basi kandai nuṣiwa tọn.” (1 Kọl. 13:4, 5) Eyin mí nọ hẹnmẹdohomẹ kavi nọ dokẹ̀nmẹ, e ma yin haṣinṣan mítọn  hẹ Klistiani hatọ lẹ kẹdẹ wẹ na gble gba, ṣigba haṣinṣan mítọn hẹ Jehovah lọsu. (Mat. 6:14, 15) Mí sọgan sọ dohia dọ jonamẹ mítọn yin ahundopo tọn eyin mí nọ hodẹ̀ na mẹhe ṣinuwa do mí lẹ.—Luku 6:27, 28.

16. Nukun tẹwẹ mí dona nọ yí do pọ́n lẹblanulọkẹyi he mí tindo to sinsẹ̀nzọn Jehovah tọn mẹ lẹ?

16 Nọ yí ale mẹdetiti tọn lẹ do sanvọ́. Eyin mí mọ lẹblanulọkẹyi lẹ yí to sinsẹ̀nzọn Jehovah tọn mẹ, mí dona nọ yí dotẹnmẹ hundote enẹlẹ zan nado do owanyi nugbo mítọn hia, gbọn ‘dindin e ma yin ale mídetiti tọn gba, ṣigba dehe yin mẹdevo tọn’ dali. (1 Kọl. 10:24) Di apajlẹ, to plidopọ mítọn lẹ ji, aisinnunamẹtọ lẹ dona ko nọ to finẹ whẹpo mẹdevo lẹ nido jẹ wiwá ji. Kakati nado nọ pọ́n azọ́ndenamẹ yetọn taidi dotẹnmẹ hundote lọ nado yí aisinnu he yọ́n hugan lẹ dai na yede podọ na whẹndo yetọn, susu mẹmẹsunnu ehelẹ tọn wẹ nọ de ma nado sinai do fie na yọ́n na yé hugan lẹ to awà he ji yé yin azọ́ndena do. Gbọn ale yedetiti tọn yíyí do sanvọ́ to aliho ehe mẹ dali, yé nọ do owanyi he ma tindo ṣejannabi depope hia. Nawẹ mí sọgan hodo apajlẹ dagbe yetọn gbọn?

17. Etẹwẹ owanyi nugbo na whàn mẹhe waylando sinsinyẹn de nado wà?

17 Nọ yigbe ylando he a wà to nuglọ lẹ tọn bo nọ dealọ sọn yé mẹ. Klistiani delẹ he ko waylando sinsinyẹn lẹ nọ tẹnpọn nado whlá yé, na yé ma jlo na duwinyan kavi hẹn mẹdevo lẹ jẹflumẹ wutu. (Howh. 28:13) Etomọṣo, nuyiwa to aliho mọnkọtọn mẹ ma do owanyi hia, na e nọ hẹn awugble wá na mẹhe ṣinuwa lọ podọ na mẹdevo lẹ ga. Ehe sọgan glọnalina gbigbọ Jiwheyẹwhe tọn nado yinuwa bosọ ze jijọho agun lọ blebu tọn do owù mẹ. (Efe. 4:30) Owanyi nugbo nọ whàn Klistiani he ko waylando sinsinyẹn lẹ nado yì mọ mẹho lẹ, na yé nido sọgan na yé alọgọ he jẹ.—Jak. 5:14, 15.

18. Nawẹ owanyi nugbo didohia yin nujọnu sọ?

18 Owanyi wẹ yiaga hugan to jẹhẹnu lẹpo mẹ. (1 Kọl. 13:13) E nọ do mí hia di hodotọ Jesu tọn lẹ podọ di mẹhe nọ hodo apajlẹ Jehovah tọn lẹ, yèdọ Asisa owanyi tọn lọ. (Efe. 5:1, 2) Paulu wlan dọ ‘eyin yẹn ma tindo owanyi, yẹn ma yin nude.’ (1 Kọl. 13:2) Mì gbọ mí ni zindonukọn nado nọ do owanyi hia, e ma yin “to ohó mẹ” kẹdẹ gba, ṣigba “to walọ po nugbo po mẹ” ga.