Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Nuplọnwe Opli Gbẹzan po Lizọnyizọn po Tọn  |  Juin 2017

 GBẸZAN KLISTIANI TỌN

Nọ Tẹdo Nujinọtedo Walọ Dagbe Tọn Jehovah Tọn lẹ Go

Nọ Tẹdo Nujinọtedo Walọ Dagbe Tọn Jehovah Tọn lẹ Go

Jehovah Jiwheyẹwhe ze nujinọtedo walọ dagbe tọn lẹ dai na gbẹtọvi lẹ. Di apajlẹ, e degbe dọ alọwle dona yin kọndopọ tẹgbẹ tọn de to sunnu de po yọnnu de po ṣẹnṣẹn. (Mt 19:4-6, 9) E jẹagọdo fẹnnuwiwa zanhẹmẹ tọn wunmẹ lẹpo. (1Kọ 6:9, 10) E tlẹ na nunọwhinnusẹ́n lẹ gando nusisọ́ po aṣọ́dido po go, ehe nọ hẹn omẹ etọn lẹ gbọnvo.​—De 22:5; 1Ti 2:9, 10.

To egbehe, mẹsusu nọ gbẹkọ nujinọtedo Jehovah tọn lẹ go. (Lo 1:18-32) Yé nọ dike linlẹn he gbayipe lẹ ni deanana yé to nusisọ́ po aṣọ́dido yetọn po mẹ, podọ to walọyizan yetọn lẹ mẹ. Mẹsusu nọ doawagun to ylanwiwa sinsinyẹn yetọn mẹ bo nọ mọhodọdo mẹhe nọ nọgbẹ̀ sọgbe hẹ nujinọtedo he gbọnvo lẹ go.​—1Pi 4:3, 4.

Taidi Kunnudetọ Jehovah tọn lẹ, mí dona nọ yí adọgbigbo do tẹdo nujinọtedo walọ dagbe tọn Jiwheyẹwhe tọn lẹ go. (Lo 12:9) Gbọnna? Mí dona nọ yí zinzin do hẹn nuhe e kẹalọyi lẹ zun yinyọnẹn na mẹdevo lẹ. Ṣigba, mílọsu dona hẹn nujinọtedo he yiaga de go to gbẹzan mítọn mẹ. Di apajlẹ, whenue mí jlo na de nusisọ́ po aṣọ́dido mítọn po, mí sọgan nọ kanse míde dọ: ‘Be nujinọtedo Jehovah tọn lẹ wẹ nudide ṣie lẹ nọ dohia ya kavi aihọn tọn? Be nusisọ́ po aṣọ́dido ṣie po nọ do mi hia taidi Klistiani de he nọ dibusi Jiwheyẹwhe ya?’ Kavi whenue mí jlo na pọ́n televiziọn kavi sinima de, mí sọgan nọ kanse míde dọ: ‘Be Jehovah na kẹalọyi nupinpọn ehe ya? Nujinọtedo walọ dagbe tọn mẹnu tọn wẹ e nọ zedaga? Be nudide he n’basi gando ayidedai go lẹ na de huhlọn pò na nujinọtedo walọ dagbe tọn ṣie lẹ wẹ ya? (Slm 101:3) Be e na hẹn hagbẹ whẹndo tọn ṣie lẹ kavi mẹdevo lẹ dahli wẹ ya?’​—1Kọ 10:31-33.

Naegbọn e do yin nujọnu sọmọ dọ mí ni nọ tẹdo nujinọtedo walọ dagbe tọn Jehovah tọn lẹ go? To madẹnmẹ, Klisti Jesu na và akọta lẹ bo de kanyinylan lẹpo sẹ̀. (Eze 9:4-7) Mẹhe to ojlo Jiwheyẹwhe tọn wà lẹ kẹdẹ wẹ na gbọṣi aimẹ. (1Jo 2:15-17) Enẹwutu, mì gbọ mí ni nọ yiavùnlọna nujinọtedo walọ dagbe tọn Jehovah tọn lẹ, na mẹhe to walọyizan dagbe mítọn mọ lẹ nido gbọnmọ dali pagigona Jiwheyẹwhe.​—1Pi 2:11, 12.

Etẹwẹ nusisọ́ po aṣọ́dido ṣie po nọ dohia gando nujinọtedo walọ dagbe tọn ṣie lẹ go?

PỌ́N VIDEO LỌ LẸZUN HỌNTỌN JEHOVAH TỌN—SUNNU DOPO, YỌNNU DOPO, ENẸGODO, GBADOPỌNNA KANBIỌ HE BỌDEGO LẸ:

  • Naegbọn e do yin nuyọnẹnnu nado nọ nọgbẹ̀ sọgbe hẹ nujinọtedo Jehovah tọn lẹ?

  • Naegbọn mẹjitọ lẹ dona nọ jẹ nujinọtedo walọ dagbe tọn Jehovah tọn lẹ plọn ovi yetọn lẹ ji sọn ovu whenu?

  • Nawẹ yọpọ po mẹho po sọgan gọalọna mẹdevo lẹ nado mọaleyi sọn dagbewà Jiwheyẹwhe tọn mẹ gbọn?